Talaga Kadi a Patienyo nga Adda ti Diablo?
IPAKITA ti Kasuratan a maysa a pudno a persona ti Diablo. Isu ket kas iti Dios a saan a makita dagiti tattao. “Ti Dios maysa nga Espiritu,” kuna ti Biblia. (Juan 4:24) Ti Diablo ket maysa nga espiritu a parsua. Ngem saan a kas iti Namarsua, adda nangrugian ti Diablo.
Nabayag sakbay ti panangparsuana kadagiti tattao, ni Jehova a Dios ket nangparsua kadagiti espiritu. (Job 38:4, 7) Iti Biblia, naawagan dagitoy nga espiritu kas anghel. (Hebreo 1:13, 14) Ti Dios pinarsuana ida amin a perpekto—awan ti uray maysa kadakuada a diablo wenno addaan iti dakes a galad. Kasano ngarud a timmaud ti Diablo? Ti sao a “diablo” ket kaipapananna“manangpardaya” isu a tumukoy ngarud iti maysa a mangidandanon kadagiti mangpadakes a kinaulbod maipapan kadagiti sabsabali. Ti “Satanas” ket kaipapananna “Bumusbusor.” Kas iti maysa a sigud a mapagpiaran a tao nga agbalin a mannanakaw babaen ti panagtakawna, maysa kadagiti perpekto nga espiritu nga anak ti Dios ti nagtignay gapu iti dakes a tarigagayna ket pinagbalinna ti bagina kas Satanas a Diablo. Ilawlawag ti Biblia no kasano a ti maysa mapagbalinna a dakes ti bagina: “Tunggal maysa masuot babaen ti pananggargari ken panangsulbog ti bukodna a derrep. Kalpasanna ti derrep, inton nayinawen, mangipasngay iti basol; kalpasanna, ti basol, inton naibanagen, mangpatanor iti ipapatay.”—Santiago 1:14, 15.
Kasta ti nalawag a napasamak. Sakbay ti panagrebeldena iti Dios, daytoy nga anghel naimatanganna ti panangparsua ni Jehova a Dios iti umuna a pagassawaan, da Adan ken Eva. Ammona nga imbilin ni Jehova kada Adan ken Eva a punuenda ti daga kadagiti nalinteg a tattao nga agdayaw iti Namarsua. (Genesis 1:28) Dayta nga anghel nakitana ti posibilidad a magun-odna ti dayaw ken importansia. Gapu iti kinaagum, tinarigagayanna ti panagdayaw dagiti tattao—banag a maikari laeng iti Namarsua. Imbes nga iwaksina dayta di umiso a tarigagay, daytoy nga espiritu nga anak ti Dios pinampanunotna ketdi dayta, a nangituggod kenkuana nga agulbod sa kalpasanna agrebelde. Usigenyo no ania ti inaramidna.
Ti rebelioso nga anghel inusarna ti serpiente a makisarita iti umuna a babai, ni Eva. “Pudno kadi a kinuna ti Dios a dikay mangan manipud iti tunggal kayo iti minuyongan?” inyimtuod ti serpiente ken ni Eva. Idi dinakamat ni Eva ti bilin ti Dios ken ti dusa no masalungasing dayta, kinuna ti serpiente: “Sigurado a saankayto a matay. Ta ammo ti Dios nga iti mismo nga aldaw a pannanganyo manipud [iti kayo iti tengnga ti minuyongan] maluktan dagiti matayo ket sigurado nga agbalinkayo a kas iti Dios, a makaammo iti naimbag ken dakes.” (Genesis 3:1-5) Naakusaran ti Dios a saanna nga imbaga ti pudno kada Adan ken Eva. Babaen ti pannangan iti bunga dayta a kayo, agbalin kano ni Eva a kas iti Dios, nga addaan iti kalintegan a mangikeddeng no ania ti naimbag ken no ania ti dakes. Isu dayta ti kaunaan a panagulbod. Dayta ti namagbalin iti dayta nga anghel a manangpardaya. Nagbalin met a bumusbusor iti Dios. Ti ngarud Biblia impabigbigna daytoy a kabusor ti Dios kas “ti kadaanan a serpiente, daydiay naawagan iti Diablo ken Satanas.”—Apocalipsis 12:9.
“Managbantaykayo Koma”
Kas iti pinanggep ti Diablo, nagballigi ti panagulbodna ken ni Eva. Kuna ti Biblia: “Iti kasta nakita ti babai a ti kayo nasayaat a pagtaraon ken maysa a banag a pakailiwan dagiti mata, wen, ti kayo makaay-ayo a matmatan. Gapuna rinugianna ti nangala iti bungana ket kinnanna dayta. Kalpasanna nangted met iti asawana idi kaduanan ket rinugianna a kinnan dayta.” (Genesis 3:6) Namati ni Eva ken ni Satanas ket sinukirna ti Dios. Naimpluensiaanna met ni Adan a mangsalungasing iti linteg ti Dios. Nagballigi ngarud ti Diablo a nangisungsong iti umuna a pagassawaan nga agrebelde iti Dios. Sipud idin, di nakadkadlaw nga im-impluensiaan ni Satanas dagiti ar-aramid ti tattao. Ania ti kalatna? Panggepna nga iliklik dagiti tattao tapno saanda nga agdayaw iti pudno a Dios no di ket isu ti pagdayawanda. (Mateo 4:8, 9) Gapuna, adda naimbag a rason nga iballaag ti Kasuratan: “Agtalinaedkayo a sipupuot, managbantaykayo koma. Ti kabusoryo, ti Diablo, agsursursor a kasla leon a ngumerngernger, nga agsapsapul iti alun-onenna.”—1 Pedro 5:8.
Nakalawlawag ti panangipakita ti Biblia a ti Diablo ket talaga a maysa nga espiritu a persona—maysa nga anghel a nagbalin a dakes ken napeggad! Ti umuna a napateg nga addang tapno makapagtultuloytayo nga agbantay isu ti panangbigbigtayo a talaga nga adda ti Diablo. Ngem adu pay ti nairaman iti panagtalinaedtayo a nasiput ken managbantay. Napateg met a saantayo nga agbalin nga ignorante ‘kadagiti gakat’ ni Satanas ken kadagiti wagasna a mangyaw-awan kadagiti tattao. (2 Corinto 2:11) Ania ngarud dagiti pamuspusanna? Ken kasanotayo a makapagmatalek a sititibker iti laksid dagita?
Gundawayan ti Diablo ti Nainkasigudan a Kasapulan ti Tao
Sipud panangrugi ti sangatauan, pinalpaliiw ni Satanas dagiti tattao. Ammona ti kasisigud ti tao—dagiti kasapulanna, dagiti paginteresanna, ken dagiti tarigagayna. Pagaammo ni Satanas a naparsua ti tao nga addaan iti naespirituan a kasapulan, ket ti Diablo sisisikap a ginundawayanna dayta a kasapulan. Kasano? Babaen ti panangisaknapna iti sangatauan kadagiti narelihiosuan a kinaulbod. (Juan 8:44) Agkokontra ken makariro ti adu a narelihiosuan a sursuro maipapan iti Dios. Panagkunayo, siasino ti makinpagayatan iti dayta? Saan a mabalin a pudno amin dagiti agkokontra a sursuro. Saan kadi ngarud a posible nga adu a narelihiosuan a sursuro ti espesipiko nga inranta ken inusar ni Satanas a mangyaw-awan kadagiti tattao? Kinapudnona, isu ket tukoyen ti Biblia kas “ti dios daytoy a sistema ti bambanag,” a nangbulsek iti pampanunot dagiti tattao.—2 Corinto 4:4.
Ti nadibinuan a kinapudno salaknibanna ti maysa a tao kadagiti narelihiosuan a panangallilaw. Iti Biblia, inyarigna dayta iti barikes nga isuot ti maysa a nagkauna a soldado tapno maprotektaran dagiti lomona. (Efeso 6:14) No gumun-odka iti pannakaammo iti Biblia ken agbiagka maitunos iti dayta, nga arigna a nabariksanka iti dayta, ti Sao ti Dios saluadannaka tapno saanka a maallilaw kadagiti narelihiosuan a kinaulbod ken kamali.
Gapu ta adda pagannayasanna kadagiti naespirituan a bambanag, sinukisok ti tao ti di makita. Daytoy ti nangisarang kenkuana kadagiti sabali pay a makaallilaw a gakat ni Satanas. Ginundawayan ni Satanas ti kinausioso ti tao maipapan kadagiti bambanag a karkarna ken misterioso babaen ti panangusarna iti espiritismo tapno maiturayanna ti adu a tattao. Kas iti mangnganup nga agusar iti appan tapno makayawanna ti biktimana, agusar ni Satanas kadagiti wagas a kas iti panagipadles, astrolohia, hipnotismo, panagkulam, panangipalad, ken mahika a mangkayaw ken mangsilo kadagiti tattao iti sangalubongan.—Levitico 19:31; Salmo 119:110.
Kasano a masalaknibam ti bagim tapno saanka a masiluan iti espiritismo? Kuna ti Deuteronomio 18:10-12: “Awan koma ti masarakan kenka nga asinoman a mangpalasat iti anakna a lalaki wenno anakna a babai iti apuy, asinoman a mangaramat iti panagpadles, maysa a managsalamangka wenno asinoman nga agsapul kadagiti partaan wenno maysa a mangkukulam, wenno maysa a mangkayaw iti sabsabali babaen ti pagilabeg wenno asinoman nga umuman iti mannakiuman iti espiritu wenno maysa a propesional a managipadles kadagiti pasamak wenno asinoman nga agimtuod iti natay. Ta isuamin nga agar-aramid kadagitoy a banag ket nakarimrimon ken Jehova, ket maigapu kadagitoy a nakarimrimon a banag pagtalawen ida ni Jehova a Diosmo iti sanguanam.”
Nalawag ti balakad ti Kasuratan: Adaywan ti espiritismo. Kasanon no makiramramanka iti sumagmamano a kita ti espiritismo ket kayatmon nga isardeng dayta? Mabalinmo a suroten ti ulidan dagiti nagkauna a Kristiano iti siudad ti Efeso. Idi inawatda “ti sao ni Jehova,” kuna ti Biblia, “adu kadagidiay nangan-annurot kadagiti arte ti panagsalamangka inyegda a pinagkaykaysa dagiti libroda ket pinuoranda ida iti sanguanan ti isuamin.” Nangina dagidi a libro. Aggatadda iti 50,000 a kapisi ti pirak. (Aramid 19:19, 20) Kaskasdi, dagiti Kristiano iti Efeso saanda a bimdeng a nangdadael kadagita.
Gunggundawayan ni Satanas Dagiti Pagkapuyan ti Tao
Ti maysa a perpekto nga anghel ket nagbalin a Satanas a Diablo agsipud ta timmulok iti tarigagayna a maitan-ok. Tinignayna met ni Eva nga agtangsit, maaddaan iti naagum a tarigagay nga agbalin a kas iti Dios. Ita, adu ti agtultuloy nga iturturayan ni Satanas babaen ti panangdurogna kadakuada nga agtangsit. Kas pagarigan, marikna ti dadduma a ti puli, etniko a grupo, wenno nasionalidadda ket nasaysayaat ngem kadagiti sabsabali. Anian a maisungani dayta iti isursuro ti Biblia! (Aramid 10:34, 35) Silalawag nga ibaga ti Biblia: “Manipud iti maysa a tao inaramid [ti Dios] ti tunggal nasion dagiti tattao.”—Aramid 17:26.
Ti kinapakumbaba isu ti maysa nga epektibo a pangsumra iti panangikagumaan ni Satanas a mangitukit iti kinatangsit kadagiti tattao. Balakadannatayo ti Biblia a ‘saantayo a panunoten nga ad-adda ti bagitayo ngem iti rebbengna a panangpanunot.’ (Roma 12:3) “Ti Dios busorenna dagiti natangsit,” kunana, “ngem mangted iti di kaikarian a kinamanangngaasi kadagiti napakumbaba.” (Santiago 4:6) Ti maysa nga epektibo a pamay-an tapno masarangetmo dagiti panangikagumaan ni Satanas isu ti panangiparangarangmo iti kinapakumbaba ken kadagiti dadduma pay a galad nga anamongan ti Dios.
Napinget met ti Diablo a manggundaway iti pagkapuyan ti tao a tumulok kadagiti di umiso a nainlasagan a tarigagay. Pinanggep ni Jehova a Dios a tagiragsaken dagiti tattao ti biag. No mapennek dagiti tarigagay maitunos iti pagayatan ti Dios, agresulta dayta iti pudpudno a kinaragsak. Ngem ni Satanas sulisogenna dagiti tattao a mangpennek kadagiti tarigagayda kadagiti imoral a pamay-an. (1 Corinto 6:9, 10) Adayo a nasaysayaat nga ipamaysa ti panunot kadagiti banag a nadalus ken nadayaw. (Filipos 4:8) Daytoy ti tumulong kenka tapno sititibker a maigawidmo ti pampanunot ken riknam.
Itultuloymo a Sarangten ti Diablo
Mabaelam kadi a sarangten ti Diablo? Wen, kabaelam. Ipatalged kadatayo ti Biblia: “Busorenyo ti Diablo, ket isu agtalawto kadakayo.” (Santiago 4:7) Uray no busorem ni Satanas, saan a dagus nga agsardeng a mangriribuk kenka bayat a gumun-odka iti pannakaammo iti Dios. Kinapudnona, ti Diablo agtignay “iti sabali pay a mainugot a tiempo.” (Lucas 4:13) Ngem dimo rumbeng a pagbutngan ti Diablo. No itultuloymo a sarangten, saannakanto a mapagbaw-ing manipud iti pudno a Dios.
Nupay kasta, tapno masarangettayo ti Diablo, kasapulan a maaddaantayo iti pannakaammo maipapan iti kinasiasinona, no kasano nga iyaw-awanna dagiti tattao, ken no ania dagiti tignay a mabalintayo nga aramiden tapno masalaknibantayo kadagiti pamuspusanna. Adda laeng maymaysa nga umiso a gubuayan dayta a pannakaammo—ti Biblia a Sao ti Dios. Gapuna, patibkerem ti determinasionmo a mangadal iti naipaltiing a Kasuratan, ken iyaplikarmo iti biagmo dagiti naadalmo iti dayta. Dagiti Saksi ni Jehova iti lugarmo maragsakanda a tumulong kenka nga agadal nga awanan iti bayad iti aldaw a kombeniente kenka. Saanka koma a bumdeng a makisao kadakuada wenno agsurat kadagiti mangipabpablaak iti daytoy a magasin.
No agadalka iti Biblia, nasken a bigbigem a mabalin nga usaren ni Satanas ti ibubusor wenno panangidadanes a mangpasardeng kenka a mangadal iti kinapudno manipud iti Sao ti Dios. Dadduma kadagiti ipatpategmo ti mabalin a makaunget kenka gapu iti panagadalmo iti Biblia. Mabalin a mapasamak dayta agsipud ta saanda nga ammo dagiti naisangsangayan a kinapudno a masarakan iti dayta. Dadduma ti mabalin a manguyaw kenka. Ngem makaay-ayo kadi iti Dios no sumukoka gapu kadagiti ibubusor? Tarigagayan ti Diablo a maupayka tapno isardengmo ti panangammo iti maipapan iti pudno a Dios. Apay koma nga ipalubosmo nga agballigi ni Satanas? (Mateo 10:34-39) Awan ti sungsungbatam kenkuana. Utangmo ken ni Jehova ti mismo a biagmo. Gapuna, agbalinka koma a determinado a mangsaranget iti Diablo ken ‘mangparag-o iti puso ni Jehova.’—Proverbio 27:11.
[Ladawan iti panid 6]
Dagidi nagbalin a Kristiano inuramda dagiti libroda a mainaig iti espiritismo
[Ladawan iti panid 7]
Mangaramid iti natibker a pangngeddeng a mangadal iti Biblia