“Masapul nga Agtulnogkami iti Dios kas Agturay Imbes a Kadagiti Tattao”

Naispal Babaen ti “Napateg a Dara”

TI KATAN-OKAN a panangipakita ni Jehova iti panagayatna isu ti panangibaonna iti bugbugtong nga Anakna tapno idatonna ti perpekto a natauan a biagna kas subbot. Kas managbasol a tattao, il-iliwentayo ti pannakaispal, tangay awan ti imperpekto a tao a ‘makabalin iti aniaman a pamay-an a mangsubbot uray pay iti maysa a kabsat, wenno uray mangted iti Dios iti subbot maipaay kenkuana; . . . tapno isu agbiag koma iti agnanayon.’ (Salmo 49:6-9) Anian a panagyamantayo ta ti Dios “intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag”!​—Juan 3:16.

Kasano a maispalnatayo ti subbot? Amirisentayo ti uppat a pamay-an a nawayawayaantayo gapu iti daytoy nagdakkel a panagayat ni Jehova a Dios.

Pannakaluk-at Babaen ti Subbot

Umuna, maispalnatayo ti daton ni Jesus manipud iti natawid a basol. Naipasngaytayo amin iti basol. Wen, managbasoltayon sakbay pay ti damo a panangsalungasingtayo iti linteg ni Jehova. Kasano a kasta? Kastoy ti kuna ti Roma 5:12: “Babaen iti maysa a tao [ni Adan] simrek ti basol iti lubong ken ti ipapatay babaen iti basol.” Kas annak ti managbasol a ni Adan, natawidtayo ti kinaimperpektona. Nupay kasta, gapu iti pannakaipaay ti subbot, nagbalin a posible ti pannakawayawayatayo manipud iti panangadipen ti natawid a basol. (Roma 5:16) Ni Jesus ‘naramananna ni patay maipaay iti tunggal tao,’ nga inawitna dagiti supapak ti basol para kadagiti annak ni Adan.​—Hebreo 2:9; 2 Corinto 5:21; 1 Pedro 2:24.

Maikadua, ti subbot ikkatenna dagiti makapapatay nga epekto ti basol. “Dagiti isupapak ti basol isu ti ipapatay.” (Roma 6: 23) Babaen iti sakripisio nga ipapatay ti Anak ti Dios naaddaan dagiti natulnog a tattao iti gundaway nga agbiag nga agnanayon. Kinapudnona, “ti mangwatwat iti pammati iti Anak adda agnanayon a biagna; ti sumukir iti Anak saannanto a makita ti biag.”​—Juan 3:36.

Paliiwenyo a mabalin laeng a maispaltayo manipud kadagiti epekto ti basol no ipakitatayo a mamatitayo iti Anak ti Dios. Daytoy ramanenna ti panangbalbaliw iti biagtayo ken panangitunos iti dayta iti pagayatan ti Dios. Masapul nga iwaksitayo ti aniaman a dakes nga ar-aramidtayo ken agaramidtayo iti makaay-ayo iti Dios. Imbaga ni apostol Pedro a masapul nga ‘agbabawitayo, ken agbaw-ingtayo tapno mapunas dagiti basoltayo.’​—Aramid 3:19.

Maikatlo, ti daton nga impaay ni Jesus wayawayaannatayo manipud iti masidsidir a konsiensia. Makarikna iti gin-awa ti amin nga agdedikar ken Jehova ken agbalin a nabautisaran nga adalan ti Anakna. (Mateo 11:28-30) Iti laksid ti kinaimperpektotayo, napalaus ti rag-otayo nga agserbi iti Dios buyogen ti nadalus a konsiensia. (1 Timoteo 3:9; 1 Pedro 3:21) No ipudnotayo dagiti basoltayo ken isardengtayo dagitoy, maipakitaantayo iti asi ken saan a masidir ti konsiensiatayo.​—Proverbio 28:13.

Mangipaay iti Tulong ken Namnama

Kamaudiananna, no mamatitayo iti subbot, saantayo a pakadanagan no ania ti takdertayo iti imatang ti Dios. Insurat ni apostol Juan: “No ti asinoman makaaramid iti basol, addaantayo iti katulongan iti Ama, ni Jesu-Kristo.” (1 Juan 2:1) Maipapan iti paset ni Jesus kas katulongan, kastoy ti insurat ni apostol Pablo: “Kabaelanna met nga isalakan a naan-anay dagidiay umadani iti Dios baeten kenkuana, agsipud ta isu kankanayon a sibibiag tapno agdawat maipaay kadakuada.” (Hebreo 7:25) Agingga a natulawantayo iti basol, kasapulantayo ti serbisio ti Nangato a Padi a ni Jesu-Kristo a tumulong kadatayo a maaddaan iti nalinteg a takder iti imatang ti Dios. Kasano a nagserbi ni Jesus kas nangato a padi maipaay kadatayo?

Uppat a pulo nga aldaw kalpasan ti panagungarna idi 33 K.P., immuli ni Jesus idiay langit, a sadiay imparangna ti pateg ti “napateg a darana” iti Dios. Nagbanaganna, iti mabiiten wayawayaan ni Jesus ti natulnog a sangatauan manipud iti basol ken ipapatay.a (1 Pedro 1:18, 19) Ngarud, dikay kadi umanamong a maikari ni Jesu-Kristo iti panagayat ken panagtulnogtayo?

Kanayonanna, maikari ni Jehova a Dios iti ayat ken panagtulnogtayo. Buyogen iti ayat pinagbalinna a posible ti ‘pannakaluk-attayo babaen iti subbot.’ (1 Corinto 1:30) Utangtayo kenkuana saan laeng a ti biagtayo itatta no di ket ti aniaman a namnamatayo a mangtagiragsak iti biag nga agnanayon. Ngarud, addaantayo ti amin a rason nga “agtulnog iti Dios kas agturay imbes a kadagiti tattao.”​—Aramid 5:29.

[Footnote]

[Kahon/Dagiti Ladawan iti panid 9]

AMMOYO KADI?

• Immuli ni Jesus idiay langit manipud iti Bantay Dagiti Olibo.​—Aramid 1:9, 12.

• Dagiti laeng matalek nga apostol ni Jesus ti nakakita iti iyuulina.​—Aramid 1:2, 11-13.