Papigsaenyo Dagiti Imayo

“Pumigsa koma dagiti imayo, dakayo a kadagitoy nga aldaw makangkangngeg kadagitoy a sasao manipud iti ngiwat dagiti mammadto.”​—ZACARIAS 8:9.

1, 2. Apay a rumbeng nga ipaayantayo iti atension dagiti libro a Haggeo ken Zacarias?

NUPAY naisurat dagiti padto da Haggeo ken Zacarias agarup 2,500 a tawenen ti napalabas, awan duadua a napateg dagitoy iti biagyo. Dagiti salaysay iti Biblia a masarakan kadagitoy a dua a libro ket saan laeng a basta pakasaritaan. Karamanda kadagiti “amin a bambanag a naisurat a nasaksakbay . . . a pakasursuruantayo.” (Roma 15:4) Adu kadagiti linaonna a mabasatayo ti mamagpanunot kadatayo maipapan kadagiti pudno a mapaspasamak sipud idi naipasdek ti Pagarian idiay langit idi 1914.

² Iti panangtukoy ni apostol Pablo kadagiti pasamak ken kasasaad a napasaran idi dagiti adipen ti Dios, kinunana: “Ita dagitoy a banag napagteng kadakuada kas pagulidanan, ket naisuratda a pammakdaar kadatayo a nadatngan dagiti panungpalan dagiti sistema ti bambanag.” (1 Corinto 10:11) Gapuna, nalabit pampanunotenyo, ‘Ania ti pateg dagiti libro a Haggeo ken Zacarias iti kaaldawantayo?’

3. Ania ti intampok da Haggeo ken Zacarias?

³ Kas nadakamat iti immuna nga artikulo, dagiti padto da Haggeo ken Zacarias saklawenna ti panawen idi a dagiti Judio nagsublida iti daga nga intuding ti Dios kalpasan ti pannakawayawayada manipud pannakaadipen idiay Babilonia. Intampok dagiti dua a propeta ti pannakaibangon manen ti templo. Insaad dagiti Judio ti pundasion ti templo idi 536 K.K.P. Nupay dadduma a lallakay a Judio dida latta malipatan ti napalabas, iti pangkaaduan adda dakkel a “panagdir-i gapu iti rag-o.” Ngem adda napatpateg a mapaspasamak iti kaaldawantayo. Ania dayta?―Esdras 3:3-13.

4. Ania ti napasamak di nagbayag kalpasan ti Gubat Sangalubongan I?

⁴ Di nagbayag kalpasan ti Gubat Sangalubongan I, dagiti pinulotan ni Jehova nawayawayaanda manipud pannakaadipen iti Babilonia a Dakkel. Maysa dayta a dakkel a pammaneknek ti suporta ni Jehova. Idi damo, agparang a dagiti narelihiosuan a lider ken dagiti napolitikaan a kakaduada nalapdanda ti publiko a panangasaba ken panangisuro dagiti Estudiante ti Biblia. (Esdras 4:8, 13, 21-24) Nupay kasta, ni Jehova a Dios inikkatna dagiti lapped iti trabaho a panangasaba ken panangaramid iti adalan. Kadagiti simmaruno a dekada sipud idi 1919, rimmang-ay ti trabaho ti Pagarian ket awan ti nakabael a nanglapped iti dayta.

5, 6. Ania a naindaklan a gapuanan ti ipatpatuldo ti Zacarias 4:7?

⁵ Masiguradotayo nga agtultuloy ti panangasaba ken panangisuro dagiti natulnog nga adipen ni Jehova iti kaaldawantayo babaen ti tulong ti Dios. Kastoy ti mabasatayo iti Zacarias 4:7: “Sigurado nga iyegnanto ti pannakaulo a bato. Addanto dagiti panagdir-i iti dayta: ‘Anian a makakayaw! Anian a makakayaw!’” Ania a naindaklan a gapuanan iti kaaldawantayo ti ipatpatuldo daytoy?

⁶ Ipatpatuldo ti Zacarias 4:7 ti tiempo inton ti pudno a panagdayaw iti Soberano nga Apo ket naan-anay nga agsaknap iti naindagaan a paraangan ti naespirituan a templona. Dayta a templo isu ti urnos ni Jehova mainaig iti panagdayaw kenkuana a naibatay iti pangikappia a sakripisio ni Kristo Jesus. Pudno, naipasdeken ti naespirituan a templo sipud pay idi umuna a siglo K.P. Nupay kasta, maan-anayto pay laeng ti pudno a panagdayaw iti naindagaan a paraanganna. Minilion nga agdaydayaw ita ti agserserbi iti naindagaan a paraangan ti naespirituan a templo. Maisublidanto iti kinaperpekto agraman ti umariwekwek a mapagungar kabayatan ti Sangaribu a Tawen a Panagturay ni Jesu-Kristo. Iti ngudo ti sangaribu a tawen, dagiti laeng pudno nga agdaydayaw iti Dios ti mabati ditoy nadalusanto a daga.

7. Ania ti akem ni Jesus no maipapan iti naan-anay a pannakaipasdek ti pudno a panagdayaw iti kaaldawantayo, ken apay a mapabilegtayo iti dayta?

⁷ Da Gobernador Zorobabel ken Nangato a Padi a ni Josue nasaksianda ti pannakairingpas ti templo idi 515 K.K.P. Impadto ti Zacarias 6:12, 13 ti maipapan iti umasping nga akem ni Jesus iti naan-anay a pannakaisaad ti pudno a panagdayaw: “Daytoy ti kinuna ni Jehova ti buybuyot: ‘Adtoy ti lalaki nga agnagan Tarubong. Ket manipud iti bukodna a lugar agtarubongto, ket sigurado a bangonennanto ti templo ni Jehova. Ket . . . iti biangna, awitennanto ti dayaw; ket isu agtugawto ken agturay iti tronona, ket agbalinto a maysa a padi iti tronona.’” Gapu ta ni Jesus nga adda idiay langit pinagtarubongna dagiti ar-ari nga agtaud ken ni David ken supsuportaranna ti trabaho ti Pagarian iti naespirituan a templo, adda kadi asinoman a makalapped iti panagrang-ay dayta a trabaho? Pulos nga awan! No kasta, saantay kadi a mapabileg a mangitultuloy iti ministeriotayo, a ditay agpasinga kadagiti inaldaw a pakakumikoman?

Dagiti Prioridad

8. Apay a nasken nga iyun-unatayo iti biagtayo ti trabaho iti naespirituan a templo?

⁸ Tapno matagiragsaktayo ti suporta ken pamendision ni Jehova, nasken nga iyun-unatayo iti biagtayo ti trabaho iti naespirituan a templo. Saan a kas kadagiti Judio a nagkuna, “Ti tiempo saan pay a dimteng,” nasken a laglagipentayo nga agbibiagtayon “kadagiti maudi nga aldaw.” (Haggeo 1:2; 2 Timoteo 3:1) Impakpakauna ni Jesus a dagiti nasungdo a pasurotna ikasabada ti naimbag a damag ti Pagarian ken mangaramidda kadagiti adalan. Masapul a ditay liwliwayan dagita a napateg a trabahotayo. Nupay naisubli idi 1919 ti panangasaba ken panangisuro a trabaho a temporario a pinasardeng ti sangalubongan nga ibubusor, saan pay a nalpas dayta. Ngem makapagtalekkayo a sigurado a mairingpas dayta a trabaho!

9, 10. Iti ania nga agpannuray ti pamendision ni Jehova, ket ania ti kaipapananna dayta kadatayo?

⁹ Bayat a sireregta nga itultuloytayo ti agtrabaho, masagraptayo ti bendision―kas maysa nga ili ken kas indibidual. Imutektekanyo ti makapabileg a kari ni Jehova. Apaman nga insubli dagiti Judio ti amin-kararua a panagdayawda ken sigagaget a tinarimaanda ti pundasion ti templo, kinuna ni Jehova: “Manipud itoy nga aldaw mangipaayakto iti pamendision.” (Haggeo 2:19) Naan-anay a matagiragsakda manen ti anamongna. Ita, usigenyo dagiti bendision nga inkari ti Dios: “Addanto ti bin-i ti talna; ti met laeng ubas itdennanto ti bungana, ket ti met laeng daga itdennanto ti apitna, ket ti met laeng langlangit itdendanto ti linnaawda; ket dagidiay nabatbati iti daytoy nga ili sigurado a pagtawidekto kadagitoy amin a banag.”​—Zacarias 8:9-13.

¹⁰ No kasano a ni Jehova binendisionanna iti naespirituan ken material a banag dagidi a Judio, bendisionannatayto met no sireregta ken siraragsak nga ibanagtayo ti trabaho nga intalekna kadatayo. Karaman kadagita a bendision ti talna iti nagbabaetantayo, kinatalged, kinawadwad, ken naespirituan a kinarang-ay. Makapagtalekkayo nga agtultuloy ti pamendision ti Dios no ti impaannongna a trabaho iti naespirituan a templo ket aramidentayo iti pamay-an a kayatna.

11. Kasanotay a masukimat ti bagitayo?

¹¹ Itan ti tiempo nga ‘isaadtayo ti pusotayo iti daldalantayo.’ (Haggeo 1:5, 7) Masapul a sukimatentayo a naimbag no ania dagiti prioridadtayo iti biag. Ti pamendision ni Jehova kadatayo ita ket agpannuray iti kadakkel ti panagreggettayo a mangitandudo iti naganna ken no kasano karegtatayo iti trabaho a naitalek kadatayo iti naespirituan a templo. Mabalinmo nga imtuoden iti bagim: ‘Nagbaliw kadin dagiti prioridadko? Komusta ti kinaregtak mainaig ken ni Jehova, iti kinapudno, ken iti trabaho nga intalekna no idiligko iti kinaregtak idi kababautisarko? Ti kadi tarigagayko a manggun-od iti nasalsaliwanwan a biag ap-apektarannan ti panawen nga ipapaayko ken ni Jehova ken iti Pagarianna? Malaplappedannak kadi gapu iti panagbuteng iti tao―ti pannakaseknan iti ibaga ti dadduma?’―Apocalipsis 2:2-4.

12. Ania a kasasaad dagiti Judio ti intampok ti Haggeo 1:6, 9?

¹² Ditay kayat nga ikkaten ti Dios ti nabaknang a pamendisionna gapu iti panangliwaytayo iti trabaho a mangitandudo iti naganna. No malagipyo, naregta idi damo dagiti nagsubli a Judio, ngem idi agangay ‘nagtartarayda, tunggal maysa maigapu iti bukodna a balay,’ kas kunaen ti Haggeo 1:9. Nagbalinda nga okupado kadagiti inaldaw a kasapulanda ken iti estilo ti panagbiagda. Kas resultana, adda laeng ‘bassit a maiyeg,’ kayatna a sawen, adda kinakirang ti naimas a taraon, inumen, ken pagkawes. (Haggeo 1:6) Saanen a nangipaay ni Jehova kadagiti bendision. Adda kadi maadaltayo iti dayta?

13, 14. Kasanotayo a mayaplikar ti leksion a linaon ti Haggeo 1:6, 9, ken apay a napateg dayta?

¹³ Umanamongkayo kadi a tapno agtultuloy a matagiragsaktayo ti pamendision ti Dios, masapul a ditay ipalubos a masinga ti panagdayawtayo ken ni Jehova gapu laeng iti pananggun-od kadagiti personal a pagnam-ayan? Kasta ti rumbeng nga aramidentayo, dayta man nga aktibidad wenno paginteresan a makasinga iti atensiontayo ket panagbirok iti kinabaknang, napartak a panguartaan, arapaap a manggun-od iti nangato nga edukasion tapno maaddaan iti karera a matartarigagayan iti daytoy a sistema, wenno dagiti programa agpaay iti personal a pannakapnek.

¹⁴ Saan met ketdi a dakes dagita a bambanag. Ngem no ikabilangantayo ti biag nga agnanayon, saan kadi a “natay nga ar-aramid” dagita? (Hebreo 9:14) Iti ania nga anag? Natay, ubbaw, ken awan mamaay dagita no iti panagdayaw ken relasiontayo iti Dios. No dagita ti ipangpangruna ti maysa, mabalin a mapukawna ti relasionna iti Dios. Kasta ti napasamak kadagiti dadduma a napulotan a Kristiano idi kaaldawan dagiti apostol. (Filipos 3:17-19) Kasta met ti napasamak kadagiti dadduma iti kaaldawantayo. Nalabit nga adda am-ammoyo nga in-inut a limmammiis kadagiti Nakristianuan nga aktibidad ken iti kongregasion; ita, awan ti pagilasinan a kayatda ti agsubli nga agserbi ken ni Jehova. Ikarkararagtayo nga agsubli koma dagita ken ni Jehova, ngem saan a mailibak ti kinapudno a ti panagtultuloy kadagiti “natay nga ar-aramid” agbanag dayta iti pannakapukaw ti anamong ken pamendision ni Jehova. Makapaladingit la ketdi no kasta ti mapasamak. Kaipapananna ti pannakapukaw iti rag-o ken talna a bunga ti espiritu ti Dios. Ken anian a pukawtayo no maikapistayo manipud iti nabara a Nakristianuan a panagkakabsat!―Galacia 1:6; 5:7, 13, 22-24.

15. Kasano nga impakita ti Haggeo 2:14 ti kinaserioso ti panagdayawtayo?

¹⁵ Serioso daytoy a banag. Imutektekanyo iti Haggeo 2:14 no ania ti panangmatmat ni Jehova kadagiti Judio a nangbaybay-a iti balayna a pagdayawan gapu iti panangyun-unada iti panangpapintas kadagiti balbalayda, iti literal man wenno piguratibo a pamay-an. “‘Kasta daytoy nga ili, ket kasta daytoy a nasion iti sanguanak,’ kuna ni Jehova, ‘ket kasta ti isuamin nga aramid ti im-imada, ken ti aniaman nga idiayada sadiay. Narugit.’” Agingga a ti pudno a panagdayaw ket binaybay-an dagiti saan unay a napasnek a Judio, saan a maawat ti aniaman a pammarang a sakripisio nga idatonda iti temporario nga altar idiay Jerusalem.―Esdras 3:3.

Naipanamnama ti Suporta

16. Maibatay kadagiti sirmata a naipakita ken ni Zacarias, ania ti masigurado dagiti Judio?

¹⁶ Impanamnama ti Dios a suportaranna dagiti natulnog a Judio iti panangibangonda manen iti templo, kas impamatmat ti Dios kadagiti agsasaruno a sirmata a naipakita ken ni Zacarias. Impanamnama ti umuna a sirmata a mairingpas ti templo ken rumang-ay ti Jerusalem ken Juda agingga a situtulnog nga itungpal dagiti Judio ti trabahoda. (Zacarias 1:8-17) Inkari ti maikadua a sirmata nga agpatingga ti amin a gobierno a bumusbusor iti pudno a panagdayaw. (Zacarias 1:18-21) Impasigurado dagiti dadduma pay a sirmata a salakniban ti Dios ti trabaho a panagbangon, nga agayus dagiti tattao manipud iti adu a nasion agturong iti nairingpas a balay a pagdayawan ken ni Jehova, nga agari ti talna ken talged, a maikkat dagiti nakaad-adu a lapped iti trabaho nga impaannong ti Dios, a maikkat ti kinadakes, ken mangipaay dagiti anghel iti panangiwanwan ken pannalaknib. (Zacarias 2:5, 11; 3:10; 4:7; 5:6-11; 6:1-8) Dagita ti makagapu no apay a dagiti natulnog a tattao binalbaliwanda ti estilo ti panagbiagda ket impamaysada ti atensionda iti trabaho a pakaigapuan ti panangwayawaya kadakuada ti Dios.

17. Gapu iti naipanamnama kadatayo, ania ti nasken nga iyimtuodtayo iti bagitayo?

¹⁷ Umasping iti dayta, gapu iti naipanamnama kadatayo a sigurado nga agballigi ti pudno a panagdayaw, matignaytayo koma nga agbalin a naregta iti trabaho ken serioso a panunoten ti maipapan iti balay a pagdayawan ken ni Jehova. Imtuodem iti bagim: ‘Dagiti kadi kalat ken estilo ti panagbiagyo paneknekanda a talaga a patiek nga itan ti tiempo a rumbeng a maikasaba ti naimbag a damag ti Pagarian ken mangaramid kadagiti adalan? Umdas kadi ti tiempo a busbusbosek iti panagadal iti naimpadtuan a Sao ti Dios, nga agbalin a dayta ti pakaseknak, ken dayta ti saritaek kadagiti padak a Kristiano agraman kadagiti dadduma pay a makasaritak?’

18. Ania ti agur-uray iti masanguanan, sigun iti Zacarias kapitulo 14?

¹⁸ Dinakamat ni Zacarias ti pannakadadael ti Babilonia a Dakkel, a sarunuen ti gubat ti Armagedon. “Agbalinto a maysa nga aldaw a maammuan kas kukua ni Jehova. Saanto nga aldaw, saanto met a rabii; ket mapasamakto nga iti tiempo ti rabii agbalinto a lawag.” Wen, ti aldaw ni Jehova ket maysanto a nasipnget, awan biagna nga aldaw para kadagiti kabusorna ditoy daga! Nupay kasta, kaipapananna dayta ti agtultuloy a lawag ken anamong para kadagiti matalek nga agdaydayaw ken ni Jehova. Inladawan met ni Zacarias no kasano a ti amin a banag iti baro a lubong ipakaammodanto ti kinasanto ni Jehova. Ti pudno a panagdayaw iti Dios iti naindaklan a naespirituan a templo ti kakaisunanto a kita ti panagdayaw ditoy daga. (Zacarias 14:7, 16-19) Anian a pammasiguro! Matagiragsaktayo ti kaitungpalan ti naipadto ken makitatayo ti pannakaalangon ti kinasoberano ni Jehova. Anian a naisangsangayanto dayta nga aldaw a kukua ni Jehova!

Agnanayon a Gunggona

19, 20. Apay a makaparegta kadakayo ti Zacarias 14:8, 9?

¹⁹ Kalpasan dayta a naisangsangayan a pannakaalangon, maigarangugongto ni Satanas ken dagiti sairona iti mangliwengliweng ti kinaawan gaway. (Apocalipsis 20:1-3, 7) Kalpasanna, agayusto dagiti bendision kabayatan ti Sangaribu a Tawen a Panagturay ni Kristo. Kuna ti Zacarias 14:8, 9: “Mapasamakto iti dayta nga aldaw a ti nabiag a dandanum rummuarto manipud Jerusalem, ti kagudua kadakuada agturong iti makindaya a baybay ket ti kagudua kadakuada agturong iti makinlaud a baybay. Mapasamakto dayta iti kalgaw ken iti kalam-ekna. Ket ni Jehova agbalinto nga ari iti intero a daga. Iti dayta nga aldaw maymaysanto ni Jehova, ket ti naganna maymaysa.”

²⁰ Manipud iti Mesianiko a Pagarian, agtultuloyto nga agayus ti “nabiag a dandanum,” wenno “maysa a karayan ti danum ti biag,” a mangiladawan kadagiti urnos ni Jehova a mangsustiner iti biag. (Apocalipsis 22:1, 2) Kalpasan a makalasatda iti Armagedon, maysa a dakkel a bunggoy nga agdaydayaw ken ni Jehova ti magunggonaanto babaen ti pannakawayawayada manipud iti pannakailunod ken patay nga impatawid ni Adan. Uray dagiti natay magunggonaanda met babaen ti panagungarda. Iti kasta, mangrugi ti maysa a baro a panawen ti panangituray ni Jehova iti daga. Amin a tattao iti intero a lubong bigbigenda a ni Jehova ti Sapasap a Soberano, ti maymaysa a rumbeng a pagdayawan.

21. Ania ti rumbeng a determinasiontayo?

²¹ Maitunos kadagiti amin nga impadto da Haggeo ken Zacarias ken kadagiti amin a natungpal a padto, adda natalged a rasontayo a mangitultuloy iti trabaho nga ipapaaramid kadatayo ti Dios iti naindagaan a paraangan ti naespirituan a templona. Agingga a saan pay a naan-anay a naipasdek ti pudno a panagdayaw, sapay koma ta ikagumaantayo amin nga iyun-una dagiti interes ti Pagarian. Idagadag kadatayo ti Zacarias 8:9: “Pumigsa koma dagiti imayo, dakayo a kadagitoy nga aldaw makangkangngeg kadagitoy a sasao manipud iti ngiwat dagiti mammadto.”

Malagipyo Kadi?

• Ania a panagpada iti historia ti namagbalin a napateg ita dagiti libro a Haggeo ken Zacarias?

• Ania a leksion maipapan iti prioridad ti isuro kadatayo da Haggeo ken Zacarias?

• Apay a ti panangadaltayo iti Haggeo ken Zacarias patalgedenna ti panagtalektayo iti masanguanan?

[Ladawan iti panid 26]

Da Haggeo ken Zacarias pinaregtada dagiti Judio nga amin-puso koma ti panagtrabahoda tapno awatenda ti gunggona

[Dagiti Ladawan iti panid 27]

‘Agtartaraykayo kadi maigapu iti bukodyo a balay’?

[Ladawan iti panid 28]

Inkari ni Jehova ti pamendision, ket imburayna dayta