Tuladenyo ti Impakita ni Jesus a Pannakaseknan Kadagiti Napanglaw
ADDAN ti kinapanglaw ken panangirurumen dandani sipud pay panangrugi ti sangatauan. Nupay ti Linteg ti Dios kadagiti Israelita ket nairanta a mangsalaknib kadagiti napanglaw ken mangkissay iti panagsagabada, masansan latta a masalungasing dayta a Linteg. (Amos 2:6) Ni propeta Ezequiel kinondenarna ti pannakatrato dagiti napanglaw. Kinunana: “Dagiti met laeng umili iti daga intungpalda ti gandat a panangsaur ket nangaramidda iti panangalat-at iti panagtakawda, ket inrurumenda daydiay naparigatan ken daydiay napanglaw, ket ti ganggannaet nga agnanaed sinaurda nga awanan kinahustisia.”—Ezequiel 22:29.
Kasta met laeng ti kasasaad idi adda ni Jesus ditoy daga. Dagiti lider ti relihion impakitada nga awan pulos pannakaseknanda kadagiti marigrigat. Nadeskribir dagiti lider ti relihion kas “managayat iti kuarta” a ‘nangalun-on iti balbalay dagiti balo a babbai’ ken ad-adda a maseknanda iti panangannurot kadagiti tradisionda ngem iti panangaywan kadagiti lallakay, babbaket, ken kadagiti agkasapulan. (Lucas 16:14; 20:47; Mateo 15:5, 6) Makapainteres ta iti pangngarig ni Jesus maipapan iti naimbag a Samaritano, maysa a padi ken maysa a Levita nga agdaldaliasat ti nakakita iti maysa a nadangran a tao, ngem liniklikanda a tulongan babaen ti pannagnada iti bangir a dalan.—Lucas 10:30-37.
Impakita ni Jesus ti Pannakaseknan Kadagiti Napanglaw
Ti salaysay ti Ebanghelio maipapan iti biag ni Jesus ipakitana a naan-anay a naawatanna ti panagrigrigat dagiti napanglaw ken ti panagkasapulanda iti tulong. Nupay nagbiag ni Jesus idiay langit, tinallikudanna dayta ket nagbalin a tao, a ‘pimmanglaw maigapu kadatayo.’ (2 Corinto 8:9) Idi makita ni Jesus ti bunggoy, “simnek ti asina kadakuada, agsipud ta nalalatan ken naiwarawarada a kasla karkarnero nga awanan pastor.” (Mateo 9:36) Ti salaysay maipapan iti napanglaw a balo ipakitana a naay-ayo ni Jesus, saan nga iti dadakkel a sagsagut dagiti nabaknang a nangited “kadagiti teddada,” no di ket iti bassit a kontribusion ti napanglaw a balo. Natignay ti puso ni Jesus gapu ta ti balo “manipud iti panagkasapulanna impisokna ti isuamin a pagbiag nga adda kenkuana.”—Lucas 21:4.
Saan laeng a naasian ni Jesus kadagiti napanglaw no di ket nangipakita pay iti personal a pannakaseknan kadagiti kasapulanda. Isu ken dagiti apostolna addaanda iti pondo nga agpaay kadagiti marigrigat nga Israelita. (Mateo 26:6-9; Juan 12:5-8; 13:29) Pinaregta ni Jesus dagidiay agtarigagay nga agbalin a pasurotna, a bigbigenda nga adda obligasionda a tumulong kadagiti agkasapulan. Kinunana iti maysa a nabaknang nga agtutubo nga agturay: “Ilakom amin a bambanag nga adda kenka ket ibunongmo kadagiti napanglaw a tattao, ket maaddaankanto iti gameng iti langlangit; ket umayka agbalinka a pasurotko.” Yantangay saan a timmulok ti lalaki a mapukawan kadagiti ik-ikutan, impakitana a dakdakkel ti panagayatna iti kinabaknang ngem iti panagayatna iti Dios ken iti padana a tattao. Gapuna, awanan daytoy a lalaki kadagiti galad a makalikaguman kadagidiay agbalin nga adalan ni Jesus.—Lucas 18:22, 23.
Dagiti Pasurot ni Jesus Maseknanda Kadagiti Napanglaw
Kalpasan ti ipapatay ni Jesus, dagiti apostol ken dadduma a pasurot ni Jesus intultuloyda nga impakita ti pannakaseknan kadagiti napanglaw. Idi agarup 49 K.P., nakitaripnong ni Pablo kada Santiago, Pedro, ken Juan ket nagsasaritaanda ti annongen nga impabaklay kadakuada ni Apo Jesu-Kristo a panangikasaba iti naimbag a damag. Nagnunumuanda a nasken a mapan da Pablo ken Bernabe “kadagiti nasion,” nga ipamaysada ti mangasaba kadagiti Gentil. Ngem da Santiago ken dagiti kakaduana indagadagda kada Pablo ken Bernabe a ‘sipapanunotda koma kadagiti napanglaw.’ Dayta ti ‘sipapasnek met nga inkagumaan nga inaramid’ ni Pablo.—Galacia 2:7-10.
Bayat ti panagturay ni Emperador Claudio, nakaro ti bisin iti nadumaduma a paset ti Imperio ti Roma. Kas panagtignay, dagiti Kristiano idiay Antioquia “inkeddengda, tunggal maysa kadakuada sigun iti kabaelan ti asinoman, a mangipatulodda iti tulong a pagserbi kadagiti kakabsat nga agnanaed idiay Judea; ket inaramidda daytoy, nga impatulodda dayta kadagiti lallakay babaen ti ima da Bernabe ken Saulo.”—Aramid 11:28-30.
Bigbigen met dagiti pudno a Kristiano ita a masapul nga ipakita dagiti pasurot ni Jesus ti pannakaseknanda kadagiti napanglaw ken agkasapulan, nangruna kadagiti kapammatianda. (Galacia 6:10) Iti kasta, maipakitada ti pudno a pannakaseknan kadagiti material a kasapulan dagiti marigrigat. Idi 1998, kas pagarigan, nadidigra ti adu a paset ti makin-amianan a daya ti Brazil gapu iti nakaro a tikag. Nadadael dagiti mula a pagay, bukbukel, ken mais, a nakaigapuan ti panagsaknap ti bisin—ti kadaksan iti uneg ti 15 a tawen. Kadagiti dadduma a lugar, nagkurang ti mainum a danum. Dagiti Saksi ni Jehova kadagiti dadduma a paset ti pagilian dagus a nangorganisarda kadagiti komite ti saranay, ket di nagbayag, nakaurnongda iti tinontonelada a taraon ken naibaklayda ti gastos ti panangibiahe kadagiti abasto.
Insurat dagiti Saksi a timmulong iti panangsaranay: “Nakaragragsakkami gapu ta natulonganmi dagiti kakabsatmi ken nangnangruna gapu ta masiguradomi a naparagsakmi ti puso ni Jehova. Saanmi a malipatan ti sasao iti Santiago 2:15, 16.” Kuna dagita a bersikulo ti Biblia: “No ti kabsat a lalaki wenno kabsat a babai a lamolamo ti kasasaadna ket agkurang iti taraon nga umdas a maipaay iti aldaw, ngem ti maysa kadakayo kunaenna kadakuada: ‘Mapankayo a sitatalna, aginudo ken agbussogkayo,’ ngem saanyo nga ited kadakuada dagiti masapsapul a maipaay iti bagida, ania ti pagimbagan dayta?”
Iti maysa kadagiti kongregasion dagiti Saksi ni Jehova iti siudad ti São Paulo, maysa a napakumbaba ken naregta a Saksi ti marigrigatan nga agsapul iti pagbiagna. Kunana: “Nupay napanglawak, napnuan kaipapanan ti biagko gapu iti mensahe ti Biblia. Diak la ammo ti nagbanagak no didak tinulongan dagiti padak a Saksi.” Kasapulan idi a maoperaan daytoy a nagaget a Kristiano a babai ngem awan ti pagbayadna iti ospital. Iti daytoy a partikular a kasasaad, dagiti kakabsat a Kristiano iti kongregasion nabaelanda a binayadan ti operasionna. Dagiti pudno a Kristiano iti sangalubongan tultulonganda dagiti kapammatianda nga agkasapulan.
Ngem uray pay kasano kaimbag dagita a kapadasan, nalawag a dagiti kasta a napasnek a panagregget saanda a masolusionan ti kinapanglaw. Uray dagiti nabileg a gobierno ken internasional nga ahensia ti saranay, nupay adda maar-aramidanda, saanda a kabaelan a risuten a naan-anay ti kinapanglaw a nabayagen a parikut ti tao. Gapuna, tumaud daytoy a saludsod, Ania a talaga ti solusion ti kinapanglaw ken dagiti dadduma a parikut a mangparparigat iti sangatauan?
Dagiti Pannursuro ti Biblia Mangyegda Kadagiti Manayon a Tulong
Sigun kadagiti salaysay ti Ebanghelio, kanayon a nangipakita ni Jesu-Kristo iti kinaimbag kadagiti napanglaw wenno kadagiti dadduma nga agkasapulan. (Mateo 14:14-21) Ngem ania ti impangpangrunana a trabaho? Iti maysa a gundaway, kalpasan ti sumagmamano a tiempo a binusbosna iti panangtulong kadagiti agkasapulan, kinuna ni Jesus kadagiti adalanna: “Mapantayo iti sabali pay a lugar, kadagiti pimmurok nga ili iti kabangibang, tapno mangasabaak met sadiay.” Apay nga insardeng ni Jesus ti panangtulongna kadagiti masakit ken agkasapulan tapno maitultuloyna ti panangasabana? Inlawlawagna: “Gapu itoy a panggep [kayatna a sawen, ti panangasabana] a rimmuarak.” (Marcos 1:38, 39; Lucas 4:43) Nupay napateg ken ni Jesus ti panangaramid iti naimbag kadagiti tattao nga agkasapulan, ti panangikasaba iti Pagarian ti Dios ti kangrunaan a misionna.—Marcos 1:14.
Yantangay idagadag ti Biblia kadagiti Kristiano a ‘surotenda dagiti addang ni Jesus,’ adda nabatad a mangiwanwanwan kadagiti agdama a Kristiano no maipapan iti panangikeddeng kadagiti prioridad iti panagreggetda a tumulong kadagiti agkasapulan. (1 Pedro 2:21) Kas ken Jesus, tulonganda dagiti tattao nga agkasapulan. Ngem kas met laeng ken Jesus, kapatgan kadakuada ti trabaho a panangisuro iti mensahe ti Biblia maipapan iti naimbag a damag ti Pagarian ti Dios. (Mateo 5:14-16; 24:14; 28:19, 20) Ngem apay a ti panangikasaba iti mensahe ti Sao ti Dios rumbeng a maipangpangruna ngem kadagiti sabali a kita ti panangtulong kadagiti agkasapulan?
Dagiti pudno a kapadasan iti intero a lubong ipakitada a no maawatan ken suroten dagiti tattao ti praktikal a balakad ti Biblia, ad-adda a nakasaganada a mangsango kadagiti inaldaw a parikut iti biag, agraman ti kinapanglaw. Kanayonanna, ti mensahe ti Biblia maipapan iti Pagarian ti Dios nga ikaskasaba ita dagiti Saksi ni Jehova ipaayanna dagiti tattao iti namnama para iti masanguanan—namnama a mamagbalin a nakapatpateg ti biag, uray iti sidong dagiti karigatan a kasasaad. (1 Timoteo 4:8) Ania a namnama dayta?
Ipanamnama kadatayo ti Sao ti Dios maipapan iti masanguanan: “Adda baro a langlangit ken baro a daga nga ur-urayentayo sigun iti kari [ti Dios], ket kadagitoy agtaeng ti kinalinteg.” (2 Pedro 3:13) No dakamaten ti Biblia ti “daga,” tuktukoyenna no dadduma dagiti tattao nga agnanaed ditoy daga. (Genesis 11:1) Isu a ti nalinteg a “baro a daga” a naikari nga umay ket maysa a baro a kagimongan dagiti tattao nga addaan iti anamong ti Dios. Ikarkari pay ti Sao ti Dios nga iti sidong ti turay ni Kristo, dagidiay inanamongan ti Dios awatenda ti sagut a biag nga agnanayon ken maaddaanda iti makapnek a biag iti paraiso a daga. (Marcos 10:30) Amin a tattao, agraman dagiti napanglaw, mabalinda a tagiragsaken dayta a nakaskasdaaw a masanguanan. Iti dayta a “baro a daga,” awanton nga agnanayon ti parikut a kinapanglaw.
[Kahon/Ladawan iti panid 7]
KASANO A NI JESUS “ISPALENNANTO DAYDIAY NAPANGLAW”?—Salmo 72:12
KINAHUSTISIA: “Ukomenna koma dagidiay naparigatan kadagiti umili, isalakanna koma ti annak daydiay napanglaw, ket rumekenna koma ti manangsaur.” (Salmo 72:4) Bayat ti panangituray ni Kristo iti daga, matagiragsakto ti isuamin ti kinahustisia. Awanton ti panagkunniber, maysa a saplit a pakaigapuan ti kinapanglaw kadagiti pagilian a nabaknang koma.
TALNA: “Iti al-aldawna agtubonto daydiay nalinteg, ken ti kinaruay ti talna agingga nga awanen ti bulan.” (Salmo 72:7) Adu kadagiti kinapanglaw ditoy lubong ket maigapu iti panagbibinnusor ken panaggugubat dagiti tattao. Iyeg ni Kristo ti naan-anay a talna ditoy daga, isu a maikkat ti maysa kadagiti kangrunaan a pakaigapuan ti kinapanglaw.
KINAMANANGNGAASI: “Maasianto iti daydiay nanumo ken iti daydiay napanglaw, ket dagiti kararua dagidiay napanglaw isalakannanto. Iti pannakairurumen ken iti kinaranggas subbotennanto ti kararuada, ket ti darada napategto kadagiti matana.” (Salmo 72:12-14) Dagiti nanumo, napanglaw, ken mairurrurumen agbalindanto a paset ti maysa a naragsak a pamilia dagiti tattao, a nagkaykaysa iti sidong ti panangidaulo ni Jesu-Kristo nga Ari.
KINARUAY: “Maaddanto ti naruay a bukbukel iti daga.” (Salmo 72:16) Bayat ti panagturay ni Kristo, naruay ken aglaplapusananto dagiti material a banag. Dagiti tattao saandanton nga agsagaba iti kinakirang ti taraon ken panagbisin a masansan a pakaigapuan ti kinapanglaw ita.
[Ladawan iti panid 4, 5]
Nangipakita ni Jesus iti personal a pannakaseknan kadagiti kasapulan dagiti napanglaw
[Ladawan iti panid 6]
Ti mensahe ti Biblia mangyeg iti pudno a namnama