Tultuladenyo Kadi ti Panangmatmat ni Jehova Kadagiti Sagrado a Banag?
“Siputanyo a siaannad . . . tapno awan koma ti mannakiabig wenno uray asinoman a saan a mangtagipateg iti sagrado a bambanag.”—HEBREO 12:15, 16.
1. Iti kaaldawantayo, ania a panangmatmat ti saan a tultuladen dagiti adipen ni Jehova?
KAADUAN a tattao saanda unayen nga ipatpateg dagiti sagrado a banag. Kastoy ti kinuna ti Pranses a sosiologo a ni Edgar Morin: “Saan itan a maikabkabilangan ti amin a sigud a mabigbigbig a pundasion ti nasayaat a kababalin—ti Dios, nakaparsuaan, nakayanakan a pagilian, historia, rason. . . . Dagiti tattao ti makaammon nga agpili ken mangikeddeng kadagiti prinsipio a surotenda.” Iyanninaw dayta ti “espiritu ti lubong,” wenno “ti espiritu nga agtigtignay ita iti annak ti kinasukir.” (1 Corinto 2:12; Efeso 2:2) Dayta a kinaawan panagraem kadagiti sagrado a banag ket saan a tultuladen dagidiay nangidedikar iti biagda ken Jehova ken situtulok nga agpaituray iti nalinteg a kinasoberanona. (Roma 12:1, 2) Imbes ketdi, maamiris dagiti adipen ti Dios ti napateg a papel dayta a kinasagrado, wenno kinasanto, iti panagdayawda ken Jehova. Ania dagiti banag a rumbeng nga ibilangtayo a sagrado iti biagtayo? Daytoy nga artikulo usigenna ti lima a banag a nasantuan para iti amin nga adipen ti Dios. Naipamaysa ti sumaganad nga artikulo iti kinasagrado dagiti Nakristianuan a taripnongtayo. Ngem ania a talaga ti kayulogan ti sao a “nasantuan”?
2, 3. (a) Kasano ti panangipaganetget ti Biblia iti kinasanto ni Jehova? (b) Kasano ti panangibilangtayo a nasantuan ti nagan ni Jehova?
2 Iti Hebreo a pagsasao a nausar iti Biblia, ti sao a “nasantuan” kayuloganna ti pannakaisina. Iti panagdayaw, ti “nasantuan” tukoyenna ti maysa a banag a naisina manipud iti gagangay a maus-usar, wenno tukoyenna ti banag a maibilang a sagrado. Ni Jehova ket nasantuan iti naan-anay nga anag. Isu ket maawagan “Daydiay Kasasantuan.” (Proverbio 9:10; 30:3) Iti nagkauna nga Israel, ti nangato a padi ket agisuot iti turbante nga addaan iti balitok a plata a nakitikitan iti sasao a “Ti kinasanto kukua ni Jehova.” (Exodo 28:36, 37) Dagiti kerubin ken serafin sadi langit a nakatakder iti aglawlaw ti trono ni Jehova ket nailadawan iti Biblia a mangipukpukkaw iti: “Santo, santo, santo ni Jehova.” (Isaias 6:2, 3; Apocalipsis 4:6-8) Daytoy a panangulit-ulit ti mangipaganetget a naan-anay a nasantuan, nadalus, ken nasin-aw ni Jehova. Kinapudnona, isu ti Gubuayan ti amin a kinasanto.
3 Ti nagan ni Jehova ket sagrado, wenno nasantuan. Indir-i ti salmista: “Idayawda koma ti naganmo. Naindaklan ken nakaam-amak, nasantuan dayta.” (Salmo 99:3) Daytoy met ti insuro ni Jesus nga ikararagtayo: “Amami nga adda iti langlangit, masantipikar koma ti naganmo.” (Mateo 6:9) Kastoy ti kinuna ni Maria, ti ina ni Jesus idi adda ditoy daga: “Ti kararuak itan-okna ni Jehova . . . Daydiay a nabileg nangaramid maipaay kaniak iti naindaklan nga ar-aramid, ket nasantuan ti naganna.” (Lucas 1:46, 49) Kas ad-adipen ni Jehova, ibilangtayo a nasantuan ti naganna ken ditay agaramid iti aniaman a mangumsi iti dayta a nasantuan a nagan. Kanayonanna, tuladentayo ti panangmatmat ni Jehova iti kinasagrado, kayatna a sawen, ibilangtayo a sagrado dagiti banag nga ibilangna a sagrado.—Amos 5:14, 15.
No Apay a Nauneg ti Panagraemtayo ken Jesus
4. Apay a ti Biblia deskribirenna ni Jesus kas “Daydiay Santo”?
4 Ni Jesus kas ti “bugbugtong nga anak” ti nasantuan a Dios a ni Jehova, ket naparsua a nasantuan. (Juan 1:14; Colosas 1:15; Hebreo 1:1-3) Gapuna, isu ket napanaganan iti “Daydiay Santo ti Dios.” (Juan 6:69) Nataginayon ti kinasantona uray idi nayakar ditoy daga ti biagna manipud langit, agsipud ta ni Jesus ket impasngay ni Maria babaen iti pannakabalin ti nasantuan nga espiritu. Kinuna ti maysa nga anghel ken Maria: “Ti nasantuan nga espiritu umayto kenka . . . ti mayanak maawaganto iti nasantuan, Anak ti Dios.” (Lucas 1:35) Iti panagkararagda ken Jehova, namindua a dinakamat dagiti Kristiano sadi Jerusalem ti Anak ti Dios kas ti “nasantuan nga adipenmo a ni Jesus.”—Aramid 4:27, 30.
5. Ania ti sagrado nga annongen a tinungpal ni Jesus idi adda ditoy daga, ken apay a napateg ti darana?
5 Bayat ti kaadda idi ni Jesus ditoy daga, adda sagrado nga annongen a tinungpalna. Iti panagbautisarna idi 29 K.P., napulotan ni Jesus kas Nangato a Padi ti naindaklan a naespirituan a templo ni Jehova. (Lucas 3:21, 22; Hebreo 7:26; 8:1, 2) Isu ket natay met kas maysa a sakripisio. Ti naibukbok a darana ti nangipaay iti subbot a pakaisalakanan dagiti managbasol a tattao. (Mateo 20:28; Hebreo 9:14) Ibilangtayo ngarud a sagrado, wenno “napateg” ti dara ni Jesus.—1 Pedro 1:19.
6. Ania ti panangmatmattayo ken Kristo Jesus, ken apay?
6 Kas panangipakita a nauneg ti panagraemtayo iti Ari ken Nangato a Paditayo a ni Kristo Jesus, kastoy ti insurat ni apostol Pablo: “Intan-ok ti Dios iti nangatngato a saad [ti Anakna] ket siaasi nga inikkanna iti nagan a nangatngato ngem iti tunggal sabali pay a nagan, tapno iti nagan ni Jesus agparintumeng koma ti tunggal tumeng dagidiay adda sadi langit ken dagidiay adda ditoy daga ken dagidiay adda iti uneg ti daga, ket sipapanayag a bigbigen koma ti tunggal dila a ni Jesu-Kristo ket Apo iti dayag ti Dios nga Ama.” (Filipos 2:9-11) Ipakpakitatayo a tultuladentayo ti panangmatmat ni Jehova kadagiti sagrado a banag babaen ti sirarag-o a panagpasakuptayo iti Lidertayo ken agturturayen nga Aritayo a ni Kristo Jesus, ti Ulo ti kongregasion Kristiano.—Mateo 23:10; Colosas 1:18.
7. Kasano ti panangipakitatayo iti panagpasakuptayo ken Kristo?
7 Ti panagpasakup ken Kristo kaipapananna met ti panangipakitatayo iti umiso a panagraem kadagiti lallaki nga us-usarenna a mangidaulo iti trabaho nga iturturongna iti kaaldawantayo. Ti akem dagidiay napulotan iti espiritu a mangbukel iti Bagi a Manarawidwid ken dagiti manangaywan a dinutokanda kadagiti sanga nga opisina, distrito, sirkito, ken kongregasion ket rumbeng a maibilang a sagrado a rebbengen. Masapul ngarud nga ipakitatayo ti nauneg a panagraem ken panagpasakuptayo iti daytoy nga urnos.—Hebreo 13:7, 17.
Nasantuan nga Ili
8, 9. (a) Kasano a dagiti Israelita ket maysa a nasantuan nga ili? (b) Kasano nga impaganetget ni Jehova kadagiti Israelita ti prinsipio ti kinasagrado?
8 Nakitulag idi ni Jehova iti Israel. Gapu iti dayta a relasion, naaddaan dayta a nasion iti naisangsangayan a kasasaad. Nasantipikarda, wenno naisinada. Kinuna a mismo ni Jehova kadakuada: “Masapul nga agbalinkayo a nasantuan kaniak, agsipud ta siak ni Jehova nasantuanak; ket ilaslasinkayo kadagiti ili tapno agbalinkayo a kukuak.”—Levitico 19:2; 20:26.
9 Iti mismo a pannakaipasdek ti nasion ti Israel, impasagepsep ni Jehova kadagiti Israelita ti prinsipio maipapan iti kinasagrado. Tapno saanda a madusa iti ipapatay, masapul a saanda a sagiden uray ti bantay a nangyawatanna iti Sangapulo a Bilin. Ti Bantay Sinai ket naibilang idin a sagrado. (Exodo 19:12, 23) Ti kinapadi, ti tabernakulo, ken dagiti alikamen sadiay ket naibilang met a sagrado. (Exodo 30:26-30) Ania ti kasasaad iti kongregasion Kristiano?
10, 11. Apay a maikunatayo a sagrado ti kongregasion Kristiano dagiti napulotan, ket ania ti epekto dayta iti “sabsabali a karnero”?
10 Ti kongregasion Kristiano dagiti napulotan ket sagrado iti imatang ni Jehova. (1 Corinto 1:2) Kinapudnona, ti pakabuklan dagiti napulotan a Kristiano ditoy daga iti aniaman a tiempo ket nayarig iti nasantuan a templo, nupay saanda a buklen ti naindaklan a naespirituan a templo ni Jehova. Agnanaed ni Jehova iti dayta a templo babaen ti nasantuan nga espirituna. Kastoy ti insurat ni apostol Pablo: “Iti pannakaikaykaysa kenkuana [ni Kristo Jesus], ti intero a patakder, a natunos ti pannakasangalna, ket rumangrang-ay nga agbalin a nasantuan a templo maipaay ken Jehova. Iti pannakaikaykaysa kenkuana, mabangbangonkayo met a sangsangkamaysa nga agbalin a disso a pagnaedan ti Dios babaen ti espiritu.”—Efeso 2:21, 22; 1 Pedro 2:5, 9.
11 Kastoy ti kanayonan nga insurat ni Pablo maipapan kadagiti napulotan a Kristiano: “Dikay aya ammo a dakayo ti templo ti Dios, ket ti espiritu ti Dios agnaed kadakayo? . . . Ti templo ti Dios ket nasantuan, a dayta a templo ket dakayo.” (1 Corinto 3:16, 17) Babaen ti espirituna, ‘agtataeng’ ni Jehova kadagiti napulotan ken ‘magmagna iti tengngada.’ (2 Corinto 6:16) Agtultuloy nga iwanwanwanna ti matalek nga ‘adipenna.’ (Mateo 24:45-47) Ti “sabsabali a karnero” ipatpategda ti pribilehioda a makitimpuyog iti klase “templo.”—Juan 10:16; Mateo 25:37-40.
Dagiti Sagrado a Banag iti Nakristianuan a Panagbiagtayo
12. Aniada a bambanag ti sagrado iti biagtayo, ken apay?
12 Di pakasdaawan a maibilang a sagrado ti adu a banag a nainaig iti biag dagiti napulotan a miembro ti kongregasion Kristiano ken dagiti kakaduada. Ti relasiontayo ken Jehova ket sagrado a banag. (1 Cronicas 28:9; Salmo 36:7) Nakapatpateg dayta kadatayo ta ditay ipalubos nga adda aniaman wenno siasinoman a mangdadael iti relasiontayo iti Diostayo a ni Jehova. (2 Cronicas 15:2; Santiago 4:7, 8) Ti panagkararag ket maysa a napateg a paset ti panangtaginayontayo iti nasinged a relasiontayo ken Jehova. Ti panagkararag ket sagrado unay ken mammadto a Daniel ta uray nagpeggad idi ti biagna, simamatalek nga intultuloyna ti nakayugalianna a panagkararag ken Jehova. (Daniel 6:7-11) “Ti karkararag dagiti sasanto,” wenno dagiti napulotan a Kristiano, ket nayarig iti insienso a maus-usar iti panagdayaw iti templo. (Apocalipsis 5:8; 8:3, 4; Levitico 16:12, 13) Daytoy a simbolismo ipaganetgetna ti kinasagrado ti kararag. Anian a pribilehio ti makikomunikar iti Soberano iti uniberso! Di pakasdaawan a ti kararag ket sagrado iti biagtayo!
13. Ania a puersa ti nasantuan, ken kasano ti rumbeng a panangipalubostayo nga agtignay dayta iti biagtayo?
13 Adda puersa iti panagbiag dagiti napulotan a Kristiano ken ti kakaduada a sigurado nga ibilangda a sagrado—ti nasantuan nga espiritu. Dayta nga espiritu isut’ aktibo a puersa ni Jehova. Yantangay kanayon nga agtigtignay dayta a maitunos iti pagayatan ti nasantuan a Dios, maitutop a maawagan dayta iti “nasantuan nga espiritu,” wenno “espiritu ti kinasanto.” (Juan 14:26; Roma 1:4) Babaen ti nasantuan nga espirituna, mangipapaay ni Jehova kadagiti adipenna iti bileg a mangikasaba iti naimbag a damag. (Aramid 1:8; 4:31) Mangmangted ni Jehova iti espirituna kadagidiay “agtultulnog kenkuana kas agturay,” kadagidiay ‘agtultuloy a magna babaen ti espiritu,’ saan ket a maitunos kadagiti nainlasagan a tarigagayda. (Aramid 5:32; Galacia 5:16, 25; Roma 8:5-8) Daytoy nabileg a puersa ti tumultulong kadagiti Kristiano a mangpataud iti “bunga ti espiritu”—dagiti nagsayaat a galad—ken “nasantuan a panagbibiag ken ar-aramid ti nadiosan a debosion.” (Galacia 5:22, 23; 2 Pedro 3:11) No sagrado kadatayo ti nasantuan nga espiritu, pulos a ditay agaramid iti aniaman a mabalin a mamagleddaang iti dayta nga espiritu, wenno manglapped iti panagtignayna iti biagtayo.—Efeso 4:30.
14. Ania a pribilehio ti ibilang dagiti napulotan kas sagrado, ken kasano a nairaman ti sabsabali a karnero iti dayta a pribilehio?
14 Ti pribilehiotayo a mangawit iti nagan ti nasantuan a Dios a ni Jehova, ken ti panagbalintayo a dagiti Saksina ket maysa pay kadagiti ibilangtayo a sagrado. (Isaias 43:10-12, 15) Dagiti napulotan a Kristiano ket pinili ni Jehova kas dagiti “ministro ti maysa a baro a tulag.” (2 Corinto 3:5, 6) Gapuna, naibilin kadakuada nga ikasabada “daytoy naimbag a damag ti pagarian” ken ‘agaramidda iti ad-adalan kadagiti tattao iti amin a nasion.” (Mateo 24:14; 28:19, 20) Simamatalek a tungtungpalenda dayta a bilin ket minilion a marakarnero ti mangipangpangag nga arigna ibagbagada kadagiti napulotan: “Kumuyogkaminto kadakayo, ta nangngegmi a ti Dios adda kadakayo.” (Zacarias 8:23) Dagitoy a naemma ti siraragsak nga agserserbi iti naespirituan a wagas, kas ‘dagiti mannalon’ ken ‘agay-aywan iti kaubasan’ dagiti napulotan a “ministro ti Diostayo.” Iti kasta a pamay-an, dakkel ti maitultulong ti sabsabali a karnero kadagiti napulotan iti panangitungpalda iti ministerioda iti intero a lubong.—Isaias 61:5, 6.
15. Ania a trabaho ti imbilang ni apostol Pablo a sagrado, ken apay a kasta met ti panangmatmattayo?
15 Ni apostol Pablo, kas maysa a pagarigan, imbilangna a sagrado, wenno nasantuan a banag ti panangasaba. Dinakamatna ti bagina kas ‘publiko nga adipen ni Kristo Jesus kadagiti nasion, a makipaspaset iti nasantuan a trabaho iti naimbag a damag ti Dios.’ (Roma 15:16) Iti panagsuratna kadagiti Kristiano sadi Corinto, tinukoyna ti ministeriona kas maysa a “gameng.” (2 Corinto 4:1, 7) Babaen ti panangasabatayo, ipakpakaammotayo dagiti “sagrado a pammakdaar ti Dios.” (1 Pedro 4:11) Gapuna, napulotantayo man wenno sabsabali a karnero, ibilangtayo a sagrado a pribilehio ti trabaho a panangasaba.
“An-anayentayo ti Kinasanto iti Panagbuteng iti Dios”
16. Ania ti makatulong kadatayo tapno ditay agbalin a kas kadagidiay ‘saan a mangap-apresiar kadagiti sagrado a bambanag’?
16 Pinakdaaran ni apostol Pablo dagiti padana a Kristiano maibusor kadagiti tattao a “saan a mangtagipateg iti sagrado a bambanag.” Imbes ketdi, binalakadanna ida a ragpatenda ‘ti pannakasantipikar,’ a ‘siputanda a siaannad . . . tapno awan ti tumanor a makasabidong a ramut ket mangpataud iti riribuk ken tapno dagiti adu saanda a matulawan iti dayta.’ (Hebreo 12:14-16) Ti sasao a “makasabidong a ramut” tukoyenna dagidiay sumagmamano iti kongregasion Kristiano a mabalin a mangbabalaw iti wagas ti pannakaaramid dagiti bambanag. Kas pagarigan, nalabit kontraenda dagiti panangmatmat ni Jehova maipapan iti kinasagrado ti panagasawa wenno iti kinapateg ti nadalus a kababalin. (1 Tesalonica 4:3-7; Hebreo 13:4) Wenno nalabit makipaspasetda kadagiti saritaan dagiti apostata, “dagiti ubbaw a panagsasao a sumalungasing iti nasantuan,” nga ilunglungalong dagidiay ‘simiasi iti kinapudno.’—2 Timoteo 2:16-18.
17. Apay a nasken a kanayon nga ikagumaan dagiti napulotan a tuladen ti panangmatmat ni Jehova iti kinasanto?
17 Kadagiti napulotan a kakabsatna, kastoy ti insurat ni Pablo: “Dungdungnguen, dalusantayo koma ti bagbagitayo iti tunggal pakatulawan iti lasag ken iti espiritu, nga an-anayentayo ti kinasanto iti panagbuteng iti Dios.” (2 Corinto 7:1) Dagita a sasao ti mangipakita a dagiti napulotan a Kristiano, dagiti “makiramraman iti nailangitan a pannakaayab,” ket masapul nga ikagumaanda a paneknekan a kanayon a tultuladenda ti panangmatmat ni Jehova iti kinasanto iti tunggal aspeto ti panagbiagda. (Hebreo 3:1) Umasping iti dayta, kastoy ti indagadag ni apostol Pedro kadagiti kakabsatna a napulotan iti espiritu: “Kas natulnog nga annak, sumardengkayo a maisuksukog maitunos kadagiti tarigagay a sigud nga adda kadakayo iti kinaignoranteyo, no di ket, maitunos iti Daydiay Santo a nangayab kadakayo, agbalinkayo met a nasantuan a mismo iti isuamin a kababalinyo.”—1 Pedro 1:14, 15.
18, 19. (a) Kasano a maipakita dagiti kameng ti “dakkel a bunggoy” a tultuladenda ti panangmatmat ni Jehova kadagiti sagrado a banag? (b) Ania pay a dadduma a sagrado a paset ti Nakristianuan a biagtayo ti mausig iti sumaganad nga artikulo?
18 Komusta ngay dagiti miembro ti “dakkel a bunggoy,” a makalasat iti “dakkel a rigat”? Masapul met a paneknekanda a tultuladenda ti panangmatmat ni Jehova kadagiti sagrado a banag. Iti libro nga Apocalipsis, nailadawanda a mangipapaay ken Jehova iti “sagrado a serbisio” iti naindagaan a paraangan ti naespirituan a templona. Adda pammatida iti pangsubbot a sakripisio ni Kristo. Arigna a ‘lablabaanda dagiti pagan-anayda ket pappapudawenda ida iti dara ti Kordero.’ (Apocalipsis 7:9, 14, 15) Daytoy ti mangmangted kadakuada iti nadalus a takder iti imatang ni Jehova ken mangipapaay kadakuada iti rebbengen a ‘mangdalus iti bagida iti tunggal pakatulawan iti lasag ken iti espiritu, nga an-anayenda ti kinasanto iti panagbuteng iti Dios.’
19 Ti maysa a napateg a paset iti biag dagiti napulotan a Kristiano ken dagiti kakaduada ket ti regular nga itatabunoda iti panagdayaw ken ni Jehova ken panagadal iti Saona. Para ken Jehova, sagrado a banag ti panagtataripnong ti ilina. Iti sumaganad nga artikulo, mausig no kasano ken apay a rumbeng a tuladentayo ti panangmatmat ni Jehova kadagiti sagrado a bambanag iti daytoy napateg a benneg.
Kas Pangrepaso
• Ania a nailubongan a panangmatmat ti saan a tultuladen dagiti adipen ni Jehova?
• Apay a ni Jehova ti Gubuayan ti amin a nasantuan a banag?
• Kasano a maipakitatayo a raraementayo ti kinasanto ni Kristo?
• Ania dagiti nasken nga ibilangtayo a sagrado iti biagtayo?
[Ladawan iti panid 23]
Iti nagkauna nga Israel, naibilang a sagrado ti kinapadi, ti tabernakulo, ken dagiti alikamen sadiay
[Ladawan iti panid 24]
Dagiti napulotan a Kristiano ditoy daga buklenda ti nasantuan a templo
[Dagiti Ladawan iti panid 25]
Ti panagkararag ken ministeriotayo iti publiko ket sagrado a pribilehio