Ania ti Kaipapanan ti Panagbalin a Nasantuan?

Sungbat ti Biblia

Ti panagbalin a nasantuan ket tumukoy iti kasasaad a naisina iti kinarugit. Naggapu ti Hebreo a sao a naipatarus kas “nasantuan” iti termino a kaipapananna “naisina.” Isu a ti maibilang a nasantuan ket naisina iti bambanag a gagangay a maus-usar, wenno maibilang a sagrado, nangruna gapu iti kinadalus ken kinasin-awna.

Ti Dios ti kasasantuan. Kuna ti Biblia: “Awan ti asinoman a nasantuan a kas ken Jehova.”a (1 Samuel 2:2) Kalintegan ngarud ti Dios ti mangted iti estandarte no ania ti nasantuan.

Ti sao a “nasantuan” ket mabalin nga agaplikar iti aniaman a direkta a konektado iti Dios, nangruna kadagiti banag a mausar laeng iti panagdaydayaw. Kas pagarigan, dakamaten ti Biblia dagiti:

• Nasantuan a lugar: Kinuna ti Dios ken Moises iti asideg ti sumsumged a bassit a kayo: “Ti lugar a pagtaktakderam ket nasantuan a daga.”​—Exodo 3:2-5.

• Nasantuan a pasamak: Indaydayaw dagiti nagkauna nga Israelita ni Jehova kadagiti regular nga narelihiosuan a piesta a naawagan iti ‘nasantuan a kombension.’​—Levitico 23:37.

• Nasantuan a bambanag: Naawagan iti “nasantuan nga aruaten” dagiti banag a nausar iti panagdaydayaw iti Dios iti nagkauna a templo idiay Jerusalem. (1 Ar-ari 8:4) Masapul a marespeto dagita a sagrado a banag ngem saan a rumbeng a pagdayawan.b

Posible kadi nga agbalin a nasantuan ti imperpekto a tao?

Wen. Imbilin ti Dios kadagiti Kristiano: “Masapul a nasantuankayo, agsipud ta nasantuanak.” (1 Pedro 1:16) Siempre, saan a pulos maragpat ti imperpekto a tao ti perpekto nga estandarte ti Dios iti panagbalin a nasantuan. Ngem mabalin a maibilang a ‘nasantuan ken makaay-ayo iti Dios’ dagidiay agtultulnog kadagiti nalinteg a bilinna. (Roma 12:1) Makita iti sao ken aramid ti maysa a tao ti panangikagumaanna nga agbalin a nasantuan. Kas pagarigan, sursurotenna ti balakad ti Biblia nga ‘agbiag a nasantuan ket adaywan ti immoralidad’ ken ‘agbalin a nasantuan iti isuamin a kababalin.’​—1 Tesalonica 4:3, Ti Baro a Naimbag a Damag Biblia; 1 Pedro 1:15.

Mabalin kadi a mapukaw ti nasantuan a takder iti Dios?

Wen. No saanen a sursuroten ti maysa a tao ti estandarte ti Dios maipapan iti kababalin, saanen nga ibilang ti Dios kas nasantuan. Kas pagarigan, naiturong ti libro ti Biblia a Hebreo kadagiti “nasantuan a kakabsat,” ngem napakdaaranda a mabalin a maaddaanda iti ‘dakes a puso nga awanan pammati babaen ti iyaadayo iti sibibiag a Dios.’​—Hebreo 3:1, 12.

Di umiso a kapanunotan maipapan iti panagbalin a nasantuan

Di umiso: Ti celibacy, wenno saan a panagasawa, pagbalinenna ti maysa nga ad-adda a nasantuan.

Umiso: Mabalin a pilien ti maysa a Kristiano ti saan nga agasawa, ngem saan a ti celibacy ti mangted kenkuana iti nasantuan a takder iti Dios. Agpayso a dagidiay agtalinaed nga awan asawana mabalin a makapokusda iti panagdaydayawda. (1 Corinto 7:32-34) Ngem ipakita ti Biblia a posible nga agbalin a nasantuan uray dagiti naasawaan. Kinapudnona, nagasawa ni Pedro, a maysa nga apostol ni Jesus.​—Mateo 8:14; 1 Corinto 9:5.