Awanan iti Ima​—Ngem Sigagagar nga Agserbi

NO DAMOM a makita ni Leonardo, nalabit ipagarupmo a saan a kualipikado nga agbalin a trabahador iti panagibangon. Awanan itan iti dua nga ima gapu iti pannakaaksidentena idi iti trabaho. Ngem iti laksid dayta, siaanep nga agtartrabaho ni Leonardo iti maysa a maibangbangon a pasdek idiay Acajutla, El Salvador, kas nailadawan ditoy.

Tapno makatulong iti dayta a proyekto a panagibangon, nangdisenio ni Leonardo kadagiti bukodna a remienta. Iyusokna ti kannawan a takkiagna iti metal a naikonektar iti putan ti pala ket sisisigo a palaenna ti daga sana ikarga iti karomatilia. Yantangay dina mapetpetan dagiti pagiggaman ti karomatilia, isulbongna dagiti takkiagna iti metal a naikonektar iti karomatilia sana iduron dayta. Ania ti nangtignay kenkuana a makipaset iti dayta a proyekto?

Kayat ni Leonardo ti makiraman iti pannakaibangon ti maysa a Kingdom Hall, maysa a lugar a pagdayawan ti kongregasion dagiti Saksi ni Jehova iti lugarna. Adu ti rason tapno saan latta koman a makipaset iti trabaho a panagibangon. Amin-tiempo ti panggedanna, awanen ti dua nga imana, ken agserserbin kas ministerial nga adipen iti nakaitimpuyoganna a kongregasion. Kaskasdi, kayatna met nga aramiden ti amin a kabaelanna tapno makapagserbi iti Dios iti lugar a pagibangonan.

Addaanka met kadi iti sidadaan a kababalin nga agserbi iti Dios? Imbes a pagpambarna ti kasasaadna, inusar ni Leonardo ti kinasariritna a mangdisenio kadagiti bukodna a remienta tapno maaramidna dagiti trabaho nga imposible koma a magapuananna. Ni Leonardo ket agserserbi iti Dios ‘buyogen ti intero a panunotna.’ (Mateo 22:37) Addaanda man iti pisikal a depekto wenno awan, sidadaan nga agbolboluntario dagiti trabahador a makipaspaset iti pannakaibangon dagiti Kingdom Hall dagiti Saksi ni Jehova iti intero a lubong. Dagiti gimongda ket silulukat iti publiko, ket aw-awisendaka a tumabuno.