Agpaidalankayo iti Sao ti Dios
“Ti saom ket pagsilawan iti sakak, ken silaw iti danak.”—SALMO 119:105.
1, 2. Apay a saan a nabirokan ti kaaduan a tattao ti pudpudno a talna ken kinaragsak?
MALAGIPYO kadi ti maysa a gundaway a nagsaludsodkayo iti direksion? Nalabit nga asidegkayon iti birbirokenyo ngem saanyo la a masigurado ti eksakto a lugar. Wenno nalabit talaga a nayaw-awankayo ket masapul a birokenyo ti umiso a dalan. Aniaman kadagita, saan kadi a nainsiriban a suroten ti ibaga ti maysa a makaammo iti dayta a lugar? Matulongannakayo dayta a tao a makagteng iti birbirokenyo a lugar.
2 Iti rinibun a tawen, pinadas dagiti tattao ti agbiag nga awan ti tulong ti Dios. Nupay kasta, naan-anay a napaay dagiti imperpekto a tattao. Saanda a nasarakan ti dalan nga agturong iti pudpudno a talna ken kinaragsak. Apay? Nasurok a 2,500 a tawen ti napalabas, kinuna ni propeta Jeremias: “Saan a kukua ti tao a magmagna uray ti panangiturong iti addangna.” (Jeremias 10:23) Sigurado a mapaay ti asinoman a mangpadas a mangiturong iti bukodna nga addang a di agpatulong kadagidiay makabael a tumulong kenkuana. Wen, kasapulan ti sangatauan ti panangiwanwan!
3. Apay a naan-anay a maipaay ni Jehova ti kasayaatan a panangiwanwan iti sangatauan, ken ania ti inkarina?
3 Naan-anay a maipaay ni Jehova a Dios ti kasta a panangiwanwan. Apay? Gapu ta isu ti kasayaatan a makaawat iti pakabuklan dagiti tattao. Naan-anay nga ammona no kasano a naiwawa ti sangatauan. Ammona met no ania ti kasapulan tapno maisublida iti umiso a dana. Ken kas ti Namarsua, kanayon nga ammo ni Jehova no ania ti kasayaatan para kadatayo. (Isaias 48:17) Gapuna, naan-anay a mapagtalkantayo ti karina a nairekord iti Salmo 32:8: “Pagbalinenkanto nga addaan iti pannakatarus ket isuroka iti dalan a rebbeng a papanam. Mangipaayakto iti balakad a ti matak situturong kenka.” Awan duadua, ni Jehova ti makaipaay iti kasayaatan a panangiwanwan. Ngem kasanonatayo nga idalan?
4, 5. Apay a makaiwanwan dagiti sasao ti Dios?
4 Maysa a salmista ti nangikararag ken ni Jehova: “Ti saom ket pagsilawan iti sakak, ken silaw iti danak.” (Salmo 119:105) Naglaon ti Biblia kadagiti sasao ken pammalagip ti Dios a makatulong kadatayo a mangdaer kadagiti tubeng a pakaipasanguantayo. Wen, no basaen ken agpaidalantayo iti Biblia, personal a mapasarantayo ti kinuna ti Isaias 30:21: “Dagiti bukodmo a lapayag makangngegto iti sao iti likudam a kunkunana: ‘Daytoy ti dalan. Magnakayo iti dayta.’”
5 Ngem imutektekanyo ta ipatuldo ti Salmo 119:105 ti dua nga agkanaig a panggep ti Sao ti Dios. Umuna, agserbi kas pagsilawan kadagiti sakatayo. No maipasangotayo kadagiti inaldaw a parikut, agpaiwanwantayo koma kadagiti prinsipio ti Biblia tapno makaaramidtayo kadagiti nainsiriban a desision ken maliklikantayo dagiti silo daytoy a lubong. Maikadua, dagiti pammalagip ti Dios agserbida kas silaw iti danatayo tapno makaaramidtayo kadagiti desision a maitunos iti namnamatayo a biag nga agnanayon iti Paraiso nga inkari ti Dios. Gapu ta nalawag ti danatayo, mabigbigtayo no nasayaat wenno dakes ti pagbanagan ti maysa a tignay. (Roma 14:21; 1 Timoteo 6:9; Apocalipsis 22:12) Usigentayo a naimbag no kasano a dagiti sasao ti Dios a linaon ti Biblia ket agserbi a pagsilawan iti sakatayo ken silaw iti danatayo.
“Pagsilawan iti Sakak”
6. Kadagiti ania a kasasaad a dagiti sasao ti Dios agserbida a pagsilawan kadagiti sakatayo?
6 Iti tunggal aldaw, mangar-aramidtayo kadagiti desision. Mabalin a simple laeng ti dadduma kadagita, ngem adda met dagiti situasion a mangsubok iti moralidad, kinamapagpiaran, wenno neutral a takdertayo. Tapno mapagballigiantayo dagita, nasken a ‘nasanay dagiti pannakabalin ti pannakaawattayo a mangilasin agpadpada iti umiso ken di umiso.’ (Hebreo 5:14) Babaen ti pananggun-od iti umiso a pannakaammo iti Sao ti Dios ken panangtarus kadagiti prinsipio a linaonna, sansanayentayo ti konsiensiatayo a mangaramid kadagiti desision a makaay-ayo ken ni Jehova.—Proverbio 3:21.
7. Mangdakamat iti situasion a mabalin nga agannayas ti maysa a Kristiano a makikadua kadagiti saan a manamati a katrabahuanna.
7 Usigentayo ti maysa a pagarigan. Maysaka kadi a nataengan a sipapasnek a mangikagkagumaan a mangparagsak iti puso ni Jehova? (Proverbio 27:11) No wen, makomendaranka. Ngem ipapantayon nga adda dagiti katrabahuam a mangitukon kenka iti tiket tapno kaduaem ida nga agbuya iti maysa nga ay-ayam. Magustuanda ti panagkakaduayo iti pagtrabahuan ket kayatda ti makilangen kenka iti ruar ti pagtrabahuan. Nalabit a patiem a saanda met a dakes a tattao. Nalabit a nasayaat pay ketdi ti dadduma nga an-annurotenda a prinsipio. Ania ti aramidem? Adda kadi aniaman a peggad no patgam ti awisda? Kasano a makatulong ti Sao ti Dios tapno makaaramidka iti umiso a desision mainaig iti daytoy a banag?
8. Ania dagiti Nainkasuratan a prinsipio a makatulong kadatayo nga agpanunot maipapan iti pannakitimpuyog?
8 Sukimatentayo ti sumagmamano a Nainkasuratan a prinsipio. Nalabit a dagus a malagiptayo ti 1 Corinto 15:33, nga agkuna: “Dagiti dakes a pannakitimpuyog dadaelenda dagiti makagunggona nga ugali.” Kayat kadi a sawen daytoy a masapul a naan-anay a liklikam dagiti saan a manamati? Ti sungbat ti Kasuratan ket saan. Mismo a ni apostol Pablo nangipakita iti naayat a konsiderasion kadagiti “amin a kita ti tattao,” agraman kadagiti saan a manamati. (1 Corinto 9:22) Ti mismo nga anag ti Kinakristiano kalikagumanna a mangipakitatayo iti interes kadagiti sabsabali—agraman kadagidiay saantayo a kapammatian. (Roma 10:13-15) Kinapudnona, kasanotayo a masurot ti balakad a ‘mangaramidtayo iti naimbag kadagiti amin’ no adaywantayo dagiti tattao a mabalin nga agkasapulan iti tulongtayo?—Galacia 6:10.
9. Ania a balakad ti Biblia ti makatulong kadatayo tapno umiso ti pannakilangentayo kadagiti katrabahuantayo?
9 Nupay kasta, adda nalawag a nagdumaan ti panagbalin a mannakigayyem kadagiti katrabahuan ken ti panagbalin a nasinged a kaduada. Ditoy a sumrek ti sabali pay a Nainkasuratan a prinsipio. Pinakdaaran ni apostol Pablo dagiti Kristiano: “Dikay agbalin a di agkaasmang a naisangol kadagiti di manamati.” (2 Corinto 6:14) Ania ti kayat a sawen ti “dikay agbalin a di agkaasmang a naisangol”? Dadduma a bersion ti Biblia impatarusda dagita a sasao kas “dikay makialiansa,” “dikay makipagtrabaho a kaslakay agpada,” wenno “isardengyo ti di maiparbeng a pannakirelasion.” Kaano a saanen a maiparbeng ti pannakikadua iti maysa a katrabahuan? Kaano a makuna a limbeskan iti beddeng ket natnagka iti di agkaasmang a pannakisangol? Maiwanwannaka ti Sao ti Dios, ti Biblia, mainaig iti daytoy a banag.
10. (a) Siasino dagiti pinili ni Jesus a pakikaduaanna? (b) Ania dagiti saludsod a makatulong iti maysa a tao tapno mapilina dagiti umiso a pakitimpuyoganna?
10 Usigentayo ti ulidan ni Jesus, a managayat kadagiti tattao sipud pay idi punganay. (Proverbio 8:31) Bayat ti kaaddana ditoy daga, nakisinninged kadagiti pasurotna. (Juan 13:1) ‘Nakarikna pay ketdi iti panagayat’ iti maysa a tao a di umiso ti relihionna. (Marcos 10:17-22) Ngem nalawag nga impakita ni Jesus no siasino laeng dagiti nakisinningedanna. Saan a nakisinninged kadagiti tattao a saan a pudno nga interesado a mangaramid iti pagayatan ni Amana. Naminsan, kinuna ni Jesus: “Dakayo ti gagayyemko no aramidenyo ti ibilbilinko kadakayo.” (Juan 15:14) Pudno, mabalin nga agkatunosankayo iti maysa a katrabahuam. Ngem imtuodem iti bagim: ‘Sidadaan kadi dayta a tao a mangtungpal kadagiti bilin ni Jesus? Kayatna kadi a masursuro ti maipapan ken ni Jehova, daydiay imbilin ni Jesus a pagdayawantayo? Agpada kadi dagiti moral a pagalagadan nga an-annurotenmi?’ (Mateo 4:10) Agbalin a nalawag kenka dagiti sungbat kadagita a saludsod no paliiwem ti reaksion dagiti katrabahuam bayat nga isarsaritam kadakuada ti maipapan kadagiti naespirituan a bambanag ken itultuloymo nga ipakita kadakuada a salsalimetmetam dagiti pagalagadan ti Biblia.
11. Mangted kadagiti pagarigan a makaiwanwan dagiti sasao ti Dios.
11 Adu pay ti situasion nga agserbi a pagsilawan iti sakatayo dagiti sasao ti Dios. Kas pagarigan, maysa nga awan trabahona a Kristiano ti mabalin a maitukonan iti kasapulanna unay a trabaho. Ngem makabannog ti eskediul ken no awatenna dayta, malangananna ti sumagmamano a Nakristianuan a gimong ken dadduma pay nga aktibidad mainaig iti pudno a panagdayaw. (Salmo 37:25) Nalabit a napigsa ti pagannayasan ti maysa a Kristiano nga agbuya iti paglinglingayan a nalawag a maisalungasing kadagiti prinsipio ti Biblia. (Efeso 4:17-19) Wenno mabalin nga adda Kristiano a nalaka a maitibkol kadagiti pagkapuyan dagiti kapammatian. (Colosas 3:13) Kadagita a situasion, agserbi koma a pagsilawan iti sakatayo ti Sao ti Dios. Wen, babaen ti panangannurot kadagiti prinsipio ti Biblia, madaerantayo ti aniaman a karit iti biag. Ti Sao ti Dios ket “makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg.”—2 Timoteo 3:16.
“Silaw iti Danak”
12. Kasano nga agserbi a silaw iti danatayo dagiti sasao ti Dios?
12 Ibaga pay ti Salmo 119:105 a dagiti sasao ti Dios ket agserbi kas silaw iti danatayo, a manglawag iti pagturongantayo. Saantayo a pugpugtuan ti maipapan iti masanguanan, yantangay ilawlawag ti Biblia ti kaipapanan dagiti makaparigat a kasasaad ti lubong ken no anianto ti pagbanaganna. Wen, ammotayo nga agbibiagtayo “kadagiti maudi nga aldaw” daytoy dakes a sistema dagiti bambanag. (2 Timoteo 3:1-5) Ti pannakaammotayo no ania ti mapasamak iti masanguanan apektaranna koma ti wagas ti panagbiagtayo. Insurat ni apostol Pedro: “Yantangay marunawto a kasta dagitoy amin a banag, anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion, nga ur-urayenyo ken agtaltalinaedkayo a silalagip unay iti kaadda ti aldaw ni Jehova!”—2 Pedro 3:11, 12.
13. Kasano a ti kinaganat ti panawentayo apektaranna ti panagpampanunot ken estilo ti panagbiagtayo?
13 Ipakita koma ti panagpampanunot ken estilo ti panagbiagtayo a talaga a patientayo a “ti lubong aglabas ken kasta met ti tarigagayna.” (1 Juan 2:17) Makaaramidtayo kadagiti nainsiriban a desision mainaig kadagiti kalattayo iti masanguanan no iyaplikartayo dagiti pagalagadan ti Biblia. Kas pagarigan, kinuna ni Jesus: “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.” (Mateo 6:33) Pudno a makomendaran ti adu nga agtutubo a mangipakpakita iti panagtalekda kadagita a sasao ni Jesus babaen ti iseserrekda iti amin-tiempo a ministerio! Adda met dagiti indibidual wenno sangapamiliaan a boluntario nga immakar kadagiti lugar nga addaan iti dakkel a panagkasapulan kadagiti manangiwaragawag iti Pagarian.
14. Kasano a pinalawa ti maysa a Kristiano a pamilia ti ministerioda?
14 Idiay Estados Unidos, maysa a Kristiano a pamilia a buklen ti uppat a miembro ti immakar idiay Dominican Republic tapno agserbi iti maysa a kongregasion iti ili nga addaan iti populasion a 50,000. Agarup 130 nga agibumbunannag ti mangbukel iti dayta a kongregasion. Ngem idi Abril 12, 2006, agarup 1,300 ti timmabuno iti Pananglaglagip iti ipapatay ni Kristo! Ti tay-ak iti dayta a lugar ket ‘nakapurpurawen maipaay iti pannakaani’ ta kalpasan laeng ti lima a bulan, mangikonkondukta daytoy a pamilia iti 30 a panangyadal iti Biblia. (Juan 4:35) Kinuna ti ama: “Adda 30 a kakabsat nga immakar ditoy tapno tumulong. Agarup 20 ti naggapu iti Estados Unidos, ket ti dadduma naggapuda idiay Bahamas, Canada, Italia, New Zealand, ken Espania. Magagaranda a makipaset iti ministerio, banag nga ad-adda a nangparayray iti regta dagiti lumugar a kakabsat.”
15. Ania dagiti bendision a tinagiragsakyo gapu ta inyun-unayo iti biagyo dagiti interes ti Pagarian?
15 Adu dagidiay saan a makabael nga umakar kadagiti lugar nga addaan iti dakdakkel a panagkasapulan gapu ta saan nga ipalubos ti kasasaadda. Ngem kadagidiay makabael—wenno kadagidiay mabalin a mangbalbaliw kadagiti kasasaadda tapno mabaelanda—sigurado a masagrapda ti adu a bendision no makiramanda iti daytoy a benneg ti ministerio. Ngem sadinoman ti pagserbianyo, diyo koma ipalubos a mapukawyo ti rag-o nga itden ti panagserbi ken ni Jehova iti amin a pigsayo. No iyun-unayo iti biagyo dagiti interes ti Pagarian, ikari ni Jehova nga ‘ibukboknanto kadakayo ti bendision agingga nga awanen panagkasapulan.’—Malakias 3:10.
Makagunggona ti Panangiwanwan ni Jehova
16. Kasanotayo a magunggonaan no agpaiwanwantayo kadagiti sasao ti Dios?
16 Kas nausigtayon, iwanwannatayo dagiti sasao ni Jehova iti dua nga agkanaig a pamay-an. Agserbida kas pagsilawan iti sakatayo, a tumulong kadatayo a magna iti umiso a direksion ken iwanwandatayo no mangaramidtayo kadagiti desision. Kasta met, silawanda ti danatayo isu a silalawag nga ammotayo ti mapasamak iti masanguanan. Dayta ti tumulong kadatayo a mangtungpal iti balakad ni Pedro: “Patibkerenyo dagiti panunotyo maipaay iti trabaho, sipupuotkayo a naan-anay; isaadyo ti namnamayo iti di kaikarian a kinamanangngaasi a maiyeg kadakayo inton pannakaipanayag ni Jesu-Kristo.”—1 Pedro 1:13.
17. Kasano a makatulong ti panagadal iti Biblia tapno masurottayo ti panangiwanwan ti Dios?
17 Awan duadua a mangiwanwan ni Jehova. Ti saludsod ket, Agpaiwanwankayo kadi kenkuana? Tapno maawatanyo no kasano a mangiwanwanwan ni Jehova, aramidenyo a kalat ti mangbasa iti maysa a paset ti Biblia iti kada aldaw. Utobenyo ti mabasayo, ikagumaanyo a tarusan no ania ti pagayatan ni Jehova kadagiti bambanag, ken panunotenyo ti nadumaduma a pamay-an a mayaplikaryo dayta a nabasayo. (1 Timoteo 4:15) Kalpasanna, usarenyo ti “pannakabalinyo nga agrason” no mangaramidkayo kadagiti personal a desision.—Roma 12:1.
18. No agpaiwanwantayo iti Sao ti Dios, ania dagiti gunggona a matagiragsaktayo?
18 No aramidentayo dayta, dagiti prinsipio a masarakan iti Sao ti Dios ti manglawag ken mangiwanwan kadatayo a mangaramid kadagiti umiso a desision. Makapagtalektayo a dagiti nailanad a sasao ni Jehova ket “mamagsirib iti daydiay awanan kapadasan.” (Salmo 19:7) No agpaiwanwantayo iti Biblia, maaddaantayo iti nadalus a konsiensia ken pannakapnek gapu ta ammotayo a maay-ayotayo ni Jehova. (1 Timoteo 1:18, 19) No inaldaw nga agpaiwanwantayo kadagiti sasao ti Dios, gunggonaannatayo ni Jehova iti kasayaatan a bendision a biag nga agnanayon.—Juan 17:3.
Malagipyo Kadi?
• Apay a napateg nga agpaiwanwantayo ken ni Jehova a Dios?
• Iti ania a pamay-an nga agserbi a pagsilawan iti sakatayo dagiti sasao ti Dios?
• Kasano nga agserbi a silaw iti danatayo dagiti sasao ti Dios?
• Kasano a matulongannatayo ti panagadal iti Sao ti Dios tapno masurottayo ti panangiwanwan ti Dios?
[Ladawan iti panid 15]
Kaano a saan a nainsiriban ti pannakitimpuyog kadagiti saan a manamati?
[Ladawan iti panid 16]
Dagidiay mangar-aramid iti pagayatan ni Jehova ti nagbalin a nasinged a kakadua ni Jesus
[Dagiti Ladawan iti panid 17]
Ipakita kadi ti estilo ti panagbiagtayo nga iyun-unatayo dagiti interes ti Pagarian?