Ni Barzillai​—Lalaki nga Ammona Dagiti Limitasionna

‘APAY koma nga agbalinak a dadagsen pay laeng kenka?’ Ni lakayen a Barzillai, nga agtawen iti 80, ti nangibaga iti dayta kenni David nga ari ti nagkauna nga Israel. Kuna ti Biblia a ni Barzillai ket ‘naindaklan unay a tao,’ a nabatad gapu iti kinabaknangna. (2 Samuel 19:32, 35) Agnanaed idi ni Barzillai iti daga ti Galaad, maysa a kabambantayan a rehion iti daya ti Karayan Jordan.​—2 Samuel 17:27; 19:31.

Ania dagiti kasasaad idi imbaga dayta ni Barzillai kenni David? Ken apay a kasta ti imbaga dayta a lakay?

Panagrebelde Maibusor iti Ari

Agpegpeggad ni David gapu iti anakna a ni Absalom, a ‘nangagaw iti puso dagiti tattao ti Israel’ sa kalpasanna iti kinaari ni David. Determinado ni Absalom a mangdangran iti siasinoman a nasungdo kenni amana. Isu a pimmanaw ni David ken dagiti adipenna manipud Jerusalem. (2 Samuel 15:6, 13, 14) Idi simmangpet ni David idiay Mahanaim, maysa a lugar iti daya ti Jordan, isu ket tinulongan ni Barzillai.

Ni Barzillai ken ti dua a sabsabali pay, a da Sobi ken Maquir, sipaparabur nga inabastuanda ni David kadagiti kasapulanna. Dagitoy tallo a nasungdo nga iturayanna impakitada a maawatanda ti narigat a kasasaad ni David kas ibatad dagitoy a sasaoda kenkuana ken iti tattaona: “Mabisinda ken nabannogda ken mawawda idiay let-ang.” Da Barzillai, Sobi, ken Maquir inaramidda ti amin a kabaelanda a tumulong babaen ti panangipaayda kadagiti pagiddaan, trigo, sebada, arina, kinirog a bukbukel, patani, lentehas, diro, mantekilia, karnero, ken dadduma pay a kasapulan ni David ken ti tattaona.​—2 Samuel 17:27-29.

Napeggad ti tumulong kenni David ta dusaen la ketdi ni Absalom ti siasinoman a mangsuporta iti daydiay addaan kalintegan nga agari. Gapuna, impakita ni Barzillai ti kinaturedna idi sisusungdo a tinulonganna ni David.

Nagbaliw ti Kasasaad

Di nagbayag kalpasanna, dagiti rebelde a buyot ni Absalom nasabetda dagiti tattao ni David. Naggugubat dagitoy iti kabakiran ti Efraim, nalabit iti aglawlaw ti Mahanaim. Naabak ti buyot ni Absalom, “ket ti pananggudas sadiay nagbanag a dakkel iti dayta nga aldaw.” Inkagumaan ni Absalom ti aglibas, ngem di nagbayag isu ket napapatay.​—2 Samuel 18:7-15.

Naminsan pay, awan ti nakabael a nangbusor iti kinaari ni David iti Israel. Saanen a kasapulan pay nga aglibas dagiti pasurotna. Maysa pay, raraemen ida ni David ken agyamyaman kadakuada gapu iti kinasungdoda.

Idi agsublin ni David idiay Jerusalem, “ni met laeng Barzillai a Galaadita simmalog manipud Rogelim tapno lumasat iti Jordan a kadua ti ari tapno kuyogenna iti Jordan.” Iti dayta a gundaway, inyawis ni David iti lakayen a ni Barzillai: “Makipagballasiwka kaniak, ket sigurado nga abastuankanto iti taraon a mairaman kaniak idiay Jerusalem.”​—2 Samuel 19:15, 31, 33.

Awan duadua nga inapresiar unay ni David ti tulong ni Barzillai. Agparang a ti pampanunoten ti ari ket saan a tapno laeng makapagsubalit isu a kayatna ti mangipaay kadagiti material a bambanag. Ti nabaknang a ni Barzillai saanna a kasapulan ti kasta a tulong. Nalabit a kayat ni David a makaduana ni Barzillai iti palasio gapu kadagiti nagsayaat a galad dayta a lakay. Ti permanente a panagnaed ni Barzillai iti palasio ket maysa a pakaidayawan, a mangipaay kenkuana iti gundaway a mangtagiragsak kadagiti pribilehio ti pannakigayyem ti ari.

Kinaemma ken Kinarealistiko

Kas sungbat iti awis ni Ari David, kinuna ni Barzillai: “Ania aya ti al-aldaw dagiti tawen ti biagko, tapno makipagsang-atak iti ari agingga iti Jerusalem? Agtawenak iti walopulo ita nga aldaw. Mailasinko aya ti naimbag ken dakes, wenno maramanan aya ti adipenmo ti kinnanko ken ti ininumko, wenno maimdengak pay aya ti timek ti lallaki wenno babbai a kumakanta?” (2 Samuel 19:34, 35) Gapuna, siraraem a nagtukiad ni Barzillai iti awis ken saanna nga inawat ti natan-ok a pribilehio. Ngem apay?

Ti maysa a rason no apay a kasta ti pangngeddeng ni Barzillai ket nalabit gapu ta lakay ken nakapuyen. Nalabit a narikna ni Barzillai a saanen nga agpaut pay ti biagna. (Salmo 90:10) Inaramidna ti kabaelanna a tumulong kenni David, ngem ammona met dagiti limitasionna gapu iti kinalakayna. Nupay addaan iti gundaway nga agbalin a natan-ok, realistiko a tiningiting ni Barzillai dagiti abilidadna. Saan a kas iti ambisioso a ni Absalom, sisisirib nga impakita ni Barzillai ti kinaemma.​—Proverbio 11:2.

Ti sabali pay a rason iti pangngeddeng ni Barzillai ket nalabit a gapu ta saanna a kayat a dagiti limitasionna ti agbalin a lapped kadagiti aktibidad ti ari a dinutokan ti Dios. Inyimtuod ni Barzillai: “Apay koma nga agbalin ti adipenmo a dadagsen pay laeng iti apok nga ari? (2 Samuel 19:35) Nupay tinulonganna pay latta ni David, napanunot la ketdi ni Barzillai nga ad-adda nga epektibo ti ub-ubing ngem isuna a mangitungpal kadagiti annongen. Nalabit nga iti panangtukoyna iti bukodna nga anak, kastoy ti kinuna ni Barzillai: “Adtoy ni adipenmo a Kimham. Palubosam a makipagballasiw iti apok nga ari; ket aramidem kenkuana no ania ti naimbag kadagita matam.” Imbes a masuron, inawat ni David dayta a singasing. Kinapudnona, sakbay a bimmallasiw iti Jordan, ni David “inagkanna ni Barzillai ket binendisionanna.”​—2 Samuel 19:37-39.

Napateg ti Kinatimbeng

Ti salaysay maipapan kenni Barzillai itampokna ti kinapateg ti kinatimbeng. Iti sabali a bangir, saan a rumbeng nga agtukiadtayo iti pribilehio a panagserbi wenno ditay ragpaten dayta gapu ta kayattayo a natalna ti biagtayo wenno gapu ta mariknatayo a ditay kabaelan nga ibaklay ti annongen. Punnuan ti Dios dagiti pagkurangantayo no agpannuraytayo iti ipaayna a bileg ken sirib.​—Filipos 4:13; Santiago 4:17; 1 Pedro 4:11.

Iti sabali a bangir, nasken a bigbigentayo dagiti limitasiontayo. Kas pagarigan, nalabit nga okupado unayen ti maysa a Kristiano kadagiti naespirituan nga aktibidadna. Ammona a no awatenna ti kanayonan a pribilehio, mabalin a mabaybay-anna dagiti Nainkasuratan nga annongenna a kas iti panangipaay iti naespirituan ken material a kasapulan ti pamiliana. Iti kasta a kasasaad, saan kadi a maipakitana ti kinaemma ken kinanainkalintegan no pagkedkedanna pay laeng dagiti kanayonan a pribilehio?​—Filipos 4:5; 1 Timoteo 5:8.

Nangipasdek ni Barzillai iti nasayaat nga ulidan, ket rumbeng a mennamennaentayo dayta. Isu ket nasungdo, natured, naparabur, ken naemma. Kangrunaanna, determinado ni Barzillai a mangipangpangruna iti pagayatan ti Dios imbes nga iti pagayatanna.​—Mateo 6:33.

[Mapa iti panid 15]

(Para iti aktual a pannakaurnosna, kitaem ti publikasion)

Manipud adayo, siaanus a nagdaliasat ti walopulo ti tawenna a ni Barzillai tapno matulonganna ni David

GALAAD

Rogelim

Succot

Mahanaim

Karayan Jordan

Gilgal

Jerico

Jerusalem

EFRAIM

[Ladawan iti panid 13]

Apay a nagtukiad ni Barzillai iti awis ni David?