Ti Pammati ti Maysa nga Ina Dinaeranna ti Trahedia
“No basbasaenyo daytoy a surat, kayatna a sawen a diak nalasatan ti operasion ket saandakton a makalangen.”
DAGITOY dagiti panglukat a sasao ti surat ti maysa a Kristiano nga ina a ni Carmen kadagiti tallo a babbalasangna nga agtawen iti 25, 19, ken 16. Nakalkaldaang ta saan a nalasatan ni Carmen ti operasion.
Talaga a makadudog iti puso a makita ti tallo a babbalasang a matayan iti ina. Ngem ti nabileg a pammati daytoy nga ina kenni Jehova ken iti karkarina ti nangtulong kenkuana a nangdaer iti trahedia, a nalawag a nangted kenkuana iti talna ti panunot nga agminar iti makatukay puso a suratna. Imutektekanyo ti suratna kadagiti annakna.
“Umuna iti amin, kayatko nga ibaga nga ay-ayatenkayo iti amin a pusok. . . . Dakayo ti kasasayaatan nga annak ti maysa nga ina, ket ipagpannakkelkayo.
“Kayatko koma nga agkakaduatayo agingga iti baro a lubong nga inkari ti Dios . . . , ngem gapu ta saan a posible dayta, idawdawatko iti Dios a tulongannakayo nga agtalinaed a matalek. Adu a suot ti inibturantayo a sangsangkamaysa, ket dinatay pulos binaybay-an ni Jehova. . . . Itultuloyyo ngarud ti agpaiwanwan iti organisasionna, ken itultuloyyo a suportaran ti kongregasion ken dagiti papanglakayen. Sansanenyo ti mangasaba agingga a kabaelanyo ken ayatenyo ti amin a kakabsat.
“Temporario laeng ti panagsisinatayo. . . . Pakawanendak koma kadagiti amin a nagkurkurangak ken kadagiti tiempo a dikay natarusan wenno diak naibaga no kasano kadakkel ti panagayatko kadakayo. . . . Ammok nga adda kasapulan ti tunggal maysa kadakayo. Ngem ad-adda nga ammo dayta ni Jehova, ket ipaayna ti amin a kasapulanyo ken gunggonaanna ti amin a panagibturyo.
“Diyo liplipatan ti kalatyo—ti panagbiag idiay baro a lubong—ken ikagumaanyo a gun-oden dayta. Sapay koma ta bendisionan ken pabilgennakayo ni Jehova tapno makapagtalinaedkayo a matalek agingga iti panungpalan. . . . Dikay koma malmaldaangan, ing-ingungotek nga annak. Ay-ayatenkayo!”
Dumteng ti trahedia iti asinoman ken iti aniaman nga oras. “Ti tiempo ken ti di mapakpakadaan a pasamak mapagteng kadakuada amin,” insurat ni Ari Solomon idi un-unana. (Eclesiastes 9:11) Ngem dagidiay addaan iti nabileg a pammati iti Dios kombinsidoda met iti kinuna ni apostol Pablo: “Kombinsidoak nga uray ti ipapatay wenno ti biag . . . wenno ti aniaman a sabali pay a parsua saandatayto a kabaelan nga isina iti ayat ti Dios nga adda ken Kristo Jesus nga Apotayo.”—Roma 8:38, 39; Hebreo 6:10.