Dagiti Papel iti Sirok ti Washing Machine

Kalpasan ti panagbautisar ni Zarina kas maysa a Saksi ni Jehova, nagsubli iti pagilianna iti Central Asia manipud iti Russia. Desidido a mangpadakkel iti dua nga annakna a babbai iti pammatina. Gapu iti pinansial a kasasaadna, agkakabbalayda kadagiti nagannakna ken ti kabsatna ken ipagna. Imbaga dagiti nagannakna a saanna nga isuro kadagiti annakna ti kinapudno iti Biblia. Binilinda pay dagiti annakna a saanda a makisarita ken nanangda iti maipapan iti Biblia.

Pinanunot a naimbag ni Zarina no kasanona nga isuro kadagiti annakna ti maipapan ken Jehova. (Proverbio 1:8) Isu a sipapasnek a nagkararag tapno dumawat iti panangiwanwan ken sirib. Nagtignay ni Zarina maitunos kadagiti kararagna babaen ti panangikuyogna kadagiti annakna nga agpagnapagna ken insarsaritana kadakuada ti maipapan kadagiti nakaskasdaaw a parsua. Nakatulong dagitoy kadagiti annakna tapno aginteresda iti Namarsua.

Kalpasanna, nangaramid ni Zarina iti pamay-an tapno ad-adda pay a maisurona ida babaen ti panangusarna iti libro nga Ania a Talaga ti Isursuro ti Biblia?a Sao por sao nga insuratna dagiti parapo ken saludsod manipud iti libro iti sumagmamano a papel. Nangisurat pay iti kanayonan a sentensia tapno ad-adda a matarusan dagiti annakna ti material. Kalpasanna, inlemmengna dagiti papel ken lapis iti sirok ti washing machine iti banio. No mapan dagiti annakna iti banio, basaenda dagiti parapo ken isuratda dagiti sungbatda.

Babaen dayta a pamay-an, naiyadal ni Zarina ti dua a kapitulo ti libro nga Isursuro ti Biblia kadagiti annakna sakbay a nakabirokda iti sabali a pagyananda. Nawaywaya itan a mangpadakkel kadagiti annakna nga awan ti makalapped. Idi Oktubre 2016, nabautisaran dagiti annakna ket maragsakanda ta nagbalin a masirib ken nataktika ni nanangda tapno mapakanna ida iti naespirituan.