Naasi ni Amayo

“Itultuloyyo ti agbalin a naasi, a kas ken ni Amayo a naasi.”​—LUCAS 6:36.

1, 2. Ania ti imbaga ni Jesus kadagiti eskriba ken Fariseo ken kadagiti pasurotna a mangipakita a makaay-ayo a galad ti kinaasi?

TI Linteg a naited ken Moises ket naglaon iti agarup 600 a bilin ken pagalagadan. Nupay napateg ti panangannurot iti Mosaiko a Linteg, nakapatpateg met ti panangipakita iti asi. Usigenyo ti kinuna ni Jesus kadagiti saan a naasi a Fariseo. Iti namindua a gundaway, tinubngarna ida nga imbatadna ti bilin ti Dios: “Kalikagumak ti asi, ket saan a sakripisio.” (Mateo 9:10-13; 12:1-7; Oseas 6:6) Iti arinunos ti ministeriona, kastoy ti kinuna ni Jesus: “Asikayo pay, eskriba ken Fariseo, a managinsisingpet! agsipud ta itedyo ti apagkapullo ti yerbabuena ken ti eneldo ken ti kumino, ngem saanyo nga inkankano ti nadagdagsen a bambanag iti Linteg, nga awan sabali, ti kinahustisia ken asi ken kinamatalek.”​—Mateo 23:23.

² Nalawag a binigbig ni Jesus ti kinapateg ti panangipakita iti asi. Kinunana kadagiti pasurotna: “Itultuloyyo ti agbalin a naasi, a kas ken ni Amayo a naasi.” (Lucas 6:36) Nupay kasta, tapno ‘matuladtayo ti Dios’ iti dayta a banag, masapul nga ammuentayo no ania a talaga ti ramanen ti panagbalin a naasi. (Efeso 5:1) Kanayonanna, matignaytayo nga ad-adda a mangiparangarang iti dayta a galad no maawatantayo dagiti pagimbagan ti panagbalin a naasi.

Panangngaasi Kadagiti Agkasapulan

3. Apay a ni Jehova ti pakasursuruantayo iti pudno a kaipapanan ti asi?

³ Inkanta ti salmista: “Ni Jehova managparabur ken naasi, nabannayat nga agunget ken naindaklan iti naayat a kinamanangngaasi. Ni Jehova naimbag iti isuamin, ket dagiti asina addada iti amin nga ar-aramidna.” (Salmo 145:8, 9) Ni Jehova “ti Ama dagiti nadungngo nga asi ken ti Dios ti amin a liwliwa.” (2 Corinto 1:3) Ti asi ramanenna ti panangtrato kadagiti sabsabali buyogen ti kinamannakipagrikna. Ti asi ket maysa a kangrunaan nga aspeto ti personalidad ti Dios. Masursurotayo ti pudno a kaipapanan ti asi babaen iti ulidan ken kadagiti instruksionna.

4. Ania ti isuro kadatayo ti Isaias 49:15 maipapan iti asi?

⁴ Kas nailanad iti Isaias 49:15, kuna ni Jehova: “Mabalinan aya ti asawa a babai a lipatan ti agsussusona iti kasta saanna a kaasian ti anak ti tianna?” Ti Hebreo a sasao a nainaig unay iti sao a naipatarus ditoy a “kaasian” ket mainaig iti sao nga asi a nausar iti Salmo 145:8, 9 a nadakamat iti parapo 3. Ti rikna a mangtigtignay ken Jehova nga agbalin a naasi ket umasping iti dungngo ti maysa nga agpaspasuso nga ina para iti anakna. Ti maladaga ket nalabit mabisin wenno adda pay dadduma a kasapulanna. Ti asi wenno simpatia a nainkasigudan iti maysa nga ina ti mangtignay kenkuana a mangasikaso iti kasapulan ti maladagana. Kasta ti kinadungngo ni Jehova kadagidiay pangipakpakitaanna iti asi.

5. Kasano a ni Jehova impakitana iti Israel nga isu ket “nabaknang iti asi”?

⁵ Nasayaat ti pannakarikna iti asi ngem nasaysayaat no buyogantay dayta iti aramid a pakagunggonaan dagiti agkasapulan. Usigenyo ti panagtignay ni Jehova idi a dagiti agdaydayaw kenkuana ket naadipen idiay Egipto, agarup 3,500 a tawen ti napalabasen. Kinunana ken Moises: “Di mapagduaduaan a nakitak ti pannakaparigat ti ilik nga adda idiay Egipto, ket nangngegko ti ikkisda kas imbunga dagidiay mangdagdagdag kadakuada nga agtrabaho; agsipud ta ammok unay dagiti rigat a sagsagabaenda. Ket bumabaak tapno ispalek ida iti ima dagiti Egipcio ken tapno aonek ida iti dayta a daga nga ipan iti maysa a daga a nasayaat ken nalawa, iti maysa a daga a pagay-ayusan ti gatas ken diro.” (Exodo 3:7, 8) Agarup 500 a tawen kalpasan a nawayawayaan ti Israel manipud Egipto, impalagip ni Jehova kadakuada: “Siak ti nangaon iti Israel manipud Egipto ken nangispal kadakayo iti ima ti Egipto ken iti ima dagiti amin a pagarian a nangirurrurumen kadakayo.” (1 Samuel 10:18) Gapu iti isisiasida kadagiti nalinteg a pagalagadan ti Dios, kanayon idi nga agsagaba dagiti Israelita iti nakaro a pakarigatan. Ngem kinaasian ida ni Jehova ken maulit-ulit nga inispalna ida. (Uk-ukom 2:11-16; 2 Cronicas 36:15) Dayta ti mangipakita no kasano a tulongan ni Jehova dagidiay agkasapulan, agpegpeggad, wenno marigrigatan. Ni Jehova ket “nabaknang iti asi.”​—Efeso 2:4.

6. Kasano a tinulad ni Jesu-Kristo ti kinaasi ni Amana?

⁶ Naan-anay a tinulad ni Jesu-Kristo ti kinaasi ni Amana. Naminsan, nagpakpakaasi kenkuana ti dua a bulsek tapno simimilagro a paimbagenna ida. Kinunada: “Apo, maasianka kadakami, Anak ni David.” Ania ti inaramid ni Jesus? Bueno, pinaimbagna ida ngem saan laeng a gapu ta kabaelanna nga aramiden dayta. Kuna ti Biblia nga “idi simnek ti asina, sinagid ni Jesus dagiti matada, ket dagus a nakakitada.” (Mateo 20:30-34) Gapu iti asi, natignay ni Jesus a nangaramid iti adu a milagro. Dayta ti nangyeg iti bang-ar kadagiti bulsek, nagunggan iti sairo, agkukutel, ken nagannak a dagiti annakda ket agsagsagaba.​—Mateo 9:27; 15:22; 17:15; Marcos 5:18, 19; Lucas 17:12, 13.

7. Ania ti maadaltayo iti ulidan nga impasdek ni Jehova a Dios ken ti Anakna maipapan iti kinaasi?

⁷ Ipakita ti ulidan nga impasdek ni Jehova a Dios ken ni Jesu-Kristo nga adda dua nga aspeto ti asi​—ti pannakarikna iti simpatia kadagiti marigrigatan ken panagtignay tapno mabang-aran ti umawat iti dayta. Agpada a kasapulan dagita tapno maipakitatayo ti asi. Iti Kasuratan, kaaduanna a ti asi ket matuktukoy kas panangipakita iti naasi a konsiderasion kadagidiay agkasapulan iti tulong. Nupay kasta, kasano a maipakat ti asi iti panangtaming kadagiti hudisial a banag? Ti kadi asi ramanenna met ti maibilang a negatibo nga addang, kas iti di panangipakat iti maiparbeng a pannusa?

Panangngaasi Kadagiti Nakabasol

8, 9. Ania ti iraman ti asi a naipakita kada David ken Bat-seba idi nagbasolda?

⁸ Usigenyo ti napasamak idi impabigbig ni propeta Natan kenni Ari David ti maipapan iti pannakikamalalana ken Bat-seba. Inkararag ti agbabbabawi a ni David: “Ipaayannak iti parabur, O Dios, maitunos iti naayat a kinamanangngaasim. Maitunos iti kinaruay dagiti asim punasem dagiti salungasingko. Naan-anay a bugguannak iti biddutko, ket dalusannak uray pay iti basolko. Ta siak ammok dagiti salungasingko, ket ti basolko adda a patinayon iti sanguanak. Maikaniwas kenka, kenka laeng, nagbasolak, ket no ania ti dakes kadagita matam inaramidko.”​—Salmo 51:1-4.

⁹ Nagbabawi ni David iti kasta unay. Pinakawan ni Jehova ti basolna ken nalaglag-an ngem iti manamnama a pannusa ti impatawna kadakuada ken Bat-seba. Sigun iti Mosaiko a Linteg, maikari a matay da David ken Bat-seba. (Deuteronomio 22:22) Nupay sinagabada ti amin nga imbunga ti panagbasolda, saanda a nadusa iti ipapatay. (2 Samuel 12:13) Ti asi ti Dios iramanna ti panangpakawanna iti basol. Nupay kasta, sigurado nga ipatawna ti maiparbeng a pannusa.

10. Nupay naasi ni Jehova iti panangtamingna iti basol, apay a rumbeng a ditay abusuen dayta?

¹⁰ Matay amin a tattao yantangay “babaen iti maysa a tao [a ni Adan] simrek ti basol iti lubong” ket “dagiti supapak ti basol isu ti ipapatay.” (Roma 5:12; 6:23) Anian a yamantayo ta ipakpakita ni Jehova ti asi iti panangtamingna iti basol! Nupay kasta, rumbeng a ditay abusuen ti asi ti Dios. “Amin a daldalan [ni Jehova] kinahustisia,” kuna ti Deuteronomio 32:4. Iti panangipakitana iti asi, kanayon nga ipakat ti Dios ti awan pagkuranganna a hustisiana.

11. Kasano nga impakat ni Jehova ti kinahustisia iti panangtamingna iti basol da David ken Bat-seba?

¹¹ No maipapan kada David ken Bat-seba, masapul a mapakawan nga umuna ti basolda sakbay a mapalag-an ti dusada nga ipapatay. Saan nga impabiang ni Jehova kadagiti ukom ti Israel ti panangpakawan kadagiti basol. No isuda koma ti nangtaming iti kaso da David ken Bat-seba, obligadoda a mangipataw iti pannusa nga ipapatay agsipud ta dayta ti ipapaannurot ti Linteg. Ngem gapu iti tulagna kenni David, kayat a paneknekan ni Jehova no adda pakaibatayan ti panangpakawanna iti basol ni David. (2 Samuel 7:12-16) Gapuna, kas “Ukom ti intero a daga” a “manangsukimat iti puso,” inkeddeng ni Jehova a Dios nga isuna ti mangtaming iti kaso ni David. (Genesis 18:25; 1 Cronicas 29:17) Kabaelan ti Dios nga ammuen ti pudno a kasasaad ti puso ni David, no naimpusuan met laeng ti panagbabawina, tapno isu ket pakawanenna.

12. Kasano a dagiti managbasol a tattao magun-odda ti asi ti Dios?

¹² Mayalubog iti kinahustisia ni Jehova ti asi nga impakitana tapno mawayawayaantayo manipud iti supapak ti natawidtayo a basol. Tapno posible ti pannakapakawan ti basoltayo ken saan a maikompromiso ti hustisia, impaay ni Jehova ti katan-okan pay laeng nga ebkas ti asi​—ti pangsubbot a sakripisio ni Jesu-Kristo nga Anakna. (Mateo 20:28; Roma 6:22, 23) Tapno magun-odtayo ti asi ti Dios, a mangispal kadatayo iti supapak ti natawidtayo a basol, masapul a ‘watwatentayo ti pammati iti Anak.’​—Juan 3:16, 36.

Dios ti Asi ken Hustisia

13, 14. Maksayan kadi ti bileg ti hustisia ti Dios gapu iti asina? Ilawlawagyo.

¹³ Nupay ti asi ni Jehova ket maitunos iti pagalagadanna iti hustisia, addada kadi pamay-an a makaapektar dayta iti hustisiana? Ti kadi asi pakapuyenna ti hustisia ti Dios? Saan.

¹⁴ Babaen ken propeta Oseas, kinuna ni Jehova kadagiti Israelita: “Itulagkanto kaniak iti tiempo a di nakedngan, ket itulagkanto kaniak iti kinalinteg ken iti kinahustisia ken iti naayat a kinamanangngaasi ken kadagiti asi.” (Oseas 2:19) Ibatad dagita a sasao a ti asi ni Jehova ket kanayon a maitunos iti dadduma a galadna, agraman iti kinahustisiana. Ni Jehova ket “maysa a Dios a naasi ken managparabur, . . . mamakpakawan iti biddut ken salungasing ken basol, ngem nikaanoman saanto a mangipaay iti pannakailaksid iti dusa.” (Exodo 34:6, 7) Ni Jehova ket maysa a Dios ti asi ken hustisia. Kuna ti Biblia maipapan kenkuana: “Ti Bato, naan-anay ti aramidna, ta amin a daldalanna kinahustisia.” (Deuteronomio 32:4) No kasano a perpekto ti asi ti Dios, kasta met ti kinahustisiana. Agpada dagitoy a napateg ket saan a maksayan ti bileg ti maysa no maipakat ti sabali. Imbes ketdi, naan-anay nga agdangdanggay dagita a galad.

15, 16. (a) Ania ti mangipakita a saan a naulpit ti hustisia ti Dios? (b) Inton ukomen ni Jehova ti dakes a sistema ti bambanag, ania ti masigurado dagiti agdaydayaw kenkuana?

¹⁵ Saan a naulpit ti hustisia ni Jehova. Ti kinahustisia ket dandani kanayon nga adda pakainaiganna iti legal a bambanag, ken ti hudisial a pangngeddeng iramanna ti panangipataw iti maiparbeng a pannusa kadagiti nakabasol. Nupay kasta, ti hustisia ti Dios mabalin nga iramanna met ti panangispal kadagidiay maikari. Kas pagarigan, idi nadadael dagiti nadangkes kadagiti siudad ti Sodoma ken Gomorra, naispal ni patriarka a Lot ken ti dua a babbalasangna.​—Genesis 19:12-26.

¹⁶ Makapagtalektayo nga inton ukomen ni Jehova ti agdama a dakes a sistema ti bambanag, maispalto ti “dakkel a bunggoy” dagiti pudno nga agdaydayaw, a ‘nanglaba kadagiti pagan-anayda ken nangpapudaw kadagita iti dara ti kordero.’ Gapuna, maispaldanto iti “dakkel a rigat.”​—Apocalipsis 7:9-14.

Apay nga Agbalintayo a Naasi?

17. Ania ti kangrunaan a rason nga agbalintayo a naasi?

¹⁷ Ti ulidan ni Jehova ken ni Jesu-Kristo nabatad nga isurona kadatayo ti pudno a kaipapanan ti asi. Dakamaten ti Proverbio 19:17 ti kangrunaan a rason no apay nga agbalintayo a naasi. Kunana: “Daydiay mangipakpakita iti pabor iti daydiay nanumo agpapautang ken Jehova, ket ti panangtratona Isu supapakannanto kenkuana.” Maragsakan ni Jehova no tuladentayo ti ulidanna ken ti ulidan ti Anakna babaen ti panagbalintayo a naasi iti maysa ken maysa. (1 Corinto 11:1) Maysa pay, no naasitayo, matignay met ti sabsabali nga agbalin a naasi kadatayo.​—Lucas 6:38.

18. Apay nga ikagumaantayo ti agbalin a naasi?

¹⁸ Ti asi ket kombinasion ti adu a nagsasayaat a galad. Ramanenna ti kinamanagparabur, ayat, kinamanangngaasi, ken kinaimbag. Ti kinamannakipagrikna wenno simpatia ket nairamut kadagiti naasi nga aramid. Nupay ti asi ti Dios dina pakapuyen ti hustisiana, ni Jehova ket nabannayat nga agpungtot ken siaanus nga ipapaayanna dagiti managbasol iti umdas a tiempo tapno agbabawida. (2 Pedro 3:9, 10) Gapuna, ti asi ket mainaig iti kinaanus ken mabayag a panagitured. Yantangay ti asi ket kombinasion ti adu a nagsasayaat a galad​—agraman ti nadumaduma nga aspeto ti bunga ti espiritu ti Dios​—ti panangiparangarang iti asi ket makatulong tapno mapatanortayo dagiti galad a nairaman iti dayta. (Galacia 5:22, 23) Anian a nagpateg nga ikagumaantayo ti agbalin a naasi!

“Naragsak Dagiti Naasi”

19, 20. Iti ania nga anag a ti asi sibaballigi a rimbawanna ti panangukom?

¹⁹ Inlawlawag ni adalan a Santiago no apay a rumbeng a pagbalinentayo ti asi a napateg a paset ti kinataotayo. Insuratna: “Ti asi agragsak a sibaballigi a mangringbaw iti panangukom.” (Santiago 2:13b) Ti tuktukoyen ni Santiago ket ti asi iti sabsabali nga iparparangarang ti maysa nga agdaydayaw kenni Jehova. Ti asi sibaballigi a rimbawanna ti panangukom. Ngamin, inton ti maysa a tao “makikuentanto iti Dios maipaay iti bagina,” ikabilangan ni Jehova ti kinaasi dayta a tao ket pakawanenna maibatay iti pangsubbot a sakripisio ti Anakna. (Roma 14:12) Awan duadua, ti maysa a makagapu no apay a napakitaan iti asi ni David idi nagbasolda ken ni Bat-seba ket gapu ta isu a mismo ket naasi a tao. (1 Samuel 24:4-7) Iti sabali a bangir, “daydiay saan a mangannurot iti asi awatennanto ti pannakaukomna nga awanan asi.” (Santiago 2:13a) Di pakasdaawan a daydiay “awanan asi” ket nairaman kadagiti ibilang ti Dios a ‘maikari iti ipapatay’!​—Roma 1:31, 32.

²⁰ Iti Sermonna iti Bantay, kinuna ni Jesus: “Naragsak dagiti naasi, yantangay maipakitaandanto iti asi.” (Mateo 5:7) Ibatad dagita a sasao a dagidiay agsapsapul iti asi ni Jehova ket rumbeng nga agbalinda met a naasi. Ilawlawag ti sumaganad nga artikulo no kasanotayo a mayugali ti agbalin a naasi.

Ania ti Naadalyo?

• Ania ti asi?

• Kadagiti ania a pamay-an a maiparangarang ti asi?

• Apay a makuna a ni Jehova ket Dios ti asi ken hustisia?

• Apay a rumbeng nga agbalintayo a naasi?

[Ladawan iti panid 21]

Ti kinadungngo ni Jehova kadagiti agkasapulan ket mayasping iti rikna ti ina agpaay iti maladagana

[Ladawan iti panid 23]

Ania ti maadaltayo maipapan iti asi manipud kadagiti milagro nga inaramid ni Jesus?

[Ladawan iti panid 24]

Inkompromiso kadi ni Jehova ti hustisiana idi kinaasianna ni David?

[Ladawan iti panid 25]

Ti asi ti Dios kadagiti managbasol ket maitunos iti hustisiana