Di Pulos Mapaay ti Sao ni Jehova

“Awan napaay a maysa a sao manipud iti amin a naimbag a sasao a sinao kadakayo ni Jehova a Diosyo. Pimmudnoda amin maipaay kadakayo.”​—JOSUE 23:14.

1. Asino ni Josue, ken ania ti inaramidna idi dandanin agngudo ti biagna?

NI Josue ket nabileg ken natured a komandante ti militar, lalaki a matalek ken natarnaw. Nakipagna kenni Moises ken isu ti pinili ni Jehova a mangiruar iti nasion ti Israel manipud iti let-ang nga agturong iti daga a pagay-ayusan ti gatas ken diro. Kas maysa a mararaem a lider, nangted iti makatukay a pammakada a palawag kadagiti lallakay iti Israel idi dandanin agngudo ti biagna. Awan duadua a napabileg ti pammati dagidiay agdengdengngeg kenkuana. Mabalin met a mapabileg ti pammatiyo.

2, 3. Ania ti kasasaad ti nasionda idi nagpalawag ni Josue kadagiti lallakay ti Israel, ken ania ti imbaga ni Josue?

² Iladawanyo iti panunotyo ti kuna ti Biblia: “Naaramid adu nga aldaw kalpasan a ni Jehova impaayanna ti Israel iti inana manipud kadagiti amin a kabusorda iti intero nga aglikmut, idi a ni Josue lakayen ken aduanen iti aldaw, a ni Josue inayabanna ti intero nga Israel, dagiti lallakayna ken dagiti pannakaulona ken dagiti ukomna ken dagiti opisialna, ket kinunana kadakuada: ‘No maipapan kaniak, lakayakon, aduanakon iti aldaw.’”​—Josue 23:1, 2.

³ Dandani 110 ti tawen idin ni Josue, a nagbiag kabayatan ti maysa kadagiti makapikapik a panawen ti pakasaritaan ti ili ti Dios. Nakitana dagiti milagro nga inaramid ti Dios, agraman ti pannakatungpal ti adu kadagiti kari ni Jehova. Gapu kadagita a kapadasanna, naikunana: “Pagaammoyo unay iti amin a pusoyo ken iti amin a kararuayo nga awan napaay a maysa a sao manipud iti amin a naimbag a sasao a sinao kadakayo ni Jehova a Diosyo. Pimmudnoda amin maipaay kadakayo. Awan uray maysa a sao kadakuada ti napaay.”​—Josue 23:14.

4. Ania ti impanamnama ni Jehova kadagiti Israelita?

⁴ Ania dagiti kari ni Jehova a natungpal idi kaaldawan ni Josue? Usigentayo ti tallo kadagiti kari ni Jehova kadagiti Israelita. Umuna, ispalen ida ti Dios manipud iti pannakaadipen. Maikadua, salaknibanna ida. Maikatlo, aywananna ida. Kasta met laeng ti inkari ni Jehova kadagiti adipenna ita, ket makitkitatayo ti pannakatungpalda iti unos ti panagbiagtayo. Ngem sakbay nga usigentayo dagiti ar-aramiden ni Jehova iti kaaldawantayo, pagsasaritaantayo pay nga umuna ti inaramidna idi kaaldawan ni Josue.

Ispalen ni Jehova ti Ilina

5, 6. Kasano nga inispal ni Jehova dagiti Israelita manipud Egipto, ken ania ti paneknekan dayta?

⁵ Idi a dagiti Israelita immararawda iti Dios gapu iti pannakaadipenda idiay Egipto, impangag ida ni Jehova. (Exodo 2:23-25) Iti umap-apuy a bassit a kayo, kinuna ni Jehova kenni Moises: “Bumabaak tapno ispalek [ti ilik] iti ima dagiti Egipcio ken tapno aonek ida iti dayta a daga nga ipan iti maysa a daga a nasayaat ken nalawa, iti maysa a daga a pagay-ayusan ti gatas ken diro.” (Exodo 3:8) Makapagagar la ketdi a makita no kasano a tinungpal ni Jehova dayta! Idi nagkedked ni Faraon a mangwayawaya iti Israel, namakdaar ni Moises a ti Dios pagbalinenna a dara ti danum ti Karayan Nilo. Pimmudno ti sinao ni Jehova. Nagbalin a dara ti danum ti karayan isu a natay dagiti ikan ken saan a mabalin nga inumen ti danumna. (Exodo 7:14-21) Ngem gapu ta natangken ti lengnges ni Faraon, impakpakauna ni Jehova ti panangyegna iti siam a sabali pay a saplit. (Exodo, kapitulo 8-12) Idi immapay ti maikasangapulo a saplit a nagresulta iti pannakapapatay dagiti inauna nga annak dagiti Egipcio, winayawayaan met laeng ni Faraon dagiti Israelita!​—Exodo 12:29-32.

⁶ Kalpasan dayta a panangispal, ti Israel ti nagbalin a pinili a nasion ni Jehova. Naitandudo ni Jehova kas Daydiay manangitungpal kadagiti karina, daydiay saan a pulos a mapaay ti saona. Napaneknekan nga awan serserbi ti didiosen dagiti nasion no idilig ken Jehova. Mapabileg ti pammatitayo no mabasatayo dayta a panangispal. Anianto la ketdin no mapasarantayo a mismo dayta! Napaneknekan ni Josue a talaga a ni Jehova “ti Kangatuan iti intero a daga.”​—Salmo 83:18.

Salakniban ni Jehova ti Ilina

7. Kasano a sinalakniban ni Jehova ti Israel manipud iti buyot ni Faraon?

⁷ Tungpalen kadi ni Jehova ti maikadua a karina a salaknibanna ti ilina? Naiparipirip daytoy idi inkari ni Jehova nga ispalenna ti Israel manipud Egipto ken ipanna ida iti Naikari a Daga. Laglagipenyo a ti sipupungtot a ni Faraon kinamatna ti Israel babaen ti nabileg a buyotna, a nakabalan iti ginasut a karuahe. Nakatangtangsit daytoy a tao, nangnangruna idi agparang a napupok dagiti Israelita iti nagbaetan dagiti bantay ken ti baybay! Iti dayta a kanito, bimmallaet ti Dios tapno salaknibanna ti ilina babaen ti ulep. Nakubong iti sipnget dagiti Egipcio gapu kadagiti ulep isu a dida makadarup ngem adda lawag iti ayan dagiti Israelita. Kabayatanna, inyunnat ni Moises ti sarukodna ket nabingay ti Nalabaga a Baybay isu a nagserbi dayta a pagnaan dagiti Israelita ken silo kadagiti Egipcio. Naan-anay a tinalipupos ni Jehova ti nabileg a buyot ni Faraon, isu a nasalakniban ti ilina manipud iti sigurado a pannakaparmek.​—Exodo 14:19-28.

8. Kasano a nasalakniban dagiti Israelita (a) idiay let-ang ken (b) idi simrekda iti Naikari a Daga?

⁸ Kalpasan ti panagballasiwda iti Nalabaga a Baybay, nagalla-alla dagiti Israelita iti daga a nadeskribir kas “dakkel ken nakaam-amak a let-ang, nga addaan kadagiti nagita a serpiente ken manggagama ken addaan iti mawaw a daga nga awanan danum.” (Deuteronomio 8:15) Sinalakniban ni Jehova ti ilina bayat ti kaaddada sadiay. Komusta met ngay idi simrekda iti Naikari a Daga? Sinaranget ida dagiti nabileg a Canaanita. Kaskasdi, kinuna ni Jehova kenni Josue: “Tumakderka, ballasiwem daytoy Jordan, sika ken daytoy intero nga ili, nga agturong iti daga nga itedko kadakuada, iti annak ti Israel. Awanto ti asinoman nga agtakder a sititibker iti sanguanam iti amin nga al-aldaw ti panagbiagmo. No kasano nga addaak idi ken Moises addaakto kenka. Saankanto a baybay-an wenno panawan a naan-anay.” (Josue 1:2, 5) Saan a napaay ti sinao ni Jehova. Iti las-ud ti agarup innem a tawen, pinarmek ni Josue ti 31 nga ar-ari ken sinakupna ti dakkel a paset ti Naikari a Daga. (Josue 12:7-24) Naaramidanda dayta gapu iti pannalaknib ni Jehova.

Aywanan ni Jehova ti Ilina

9, 10. Kasano nga inaywanan ni Jehova ti ilina idiay let-ang?

⁹ Usigentayo ti maikatlo a kari ni Jehova nga aywananna ti ilina. Di nagbayag kalpasan ti pannakaispalda idiay Egipto, inkari ti Dios kadagiti Israelita: “Adtoy pagtuduek iti tinapay maipaay kadakayo manipud langlangit; ket dagiti umili masapul a rummuar ken agpidutda tunggal maysa ti kaitutopanna iti inaldaw-aldaw.” Talaga a nangipaay ti Dios iti ‘tinapay manipud langit.’ “Idi nakita dayta ti annak ti Israel, rinugianda a kunaen iti maysa ken maysa: ‘Ania daytoy?’” Dayta ti manna, ti tinapay nga inkari ni Jehova kadakuada.​—Exodo 16:4, 13-15.

¹⁰ Iti las-ud ti 40 a tawen idiay let-ang, inaywanan ni Jehova dagiti Israelita, nga impaayanna ida iti taraon ken danum. Siniguradona met a di marunot dagiti kawesda ken di lumteg dagiti sakada. (Deuteronomio 8:3, 4) Nakita amin dagita ni Josue. Inispal, sinalakniban, ken inaywanan ni Jehova ti ilina, kas inkarina kadakuada.

Panangispal iti Moderno a Panawen

11. Ania ti napasamak idiay Brooklyn, New York, idi 1914, ken tiempo dayta ti ania?

¹¹ Komusta met ita? Idi agsapa ti Biernes, Oktubre 2, 1914, ti mangidadaulo idi kadagiti Estudiante iti Biblia a ni Charles Taze Russell simrek iti siled a panganan ti Bethel idiay Brooklyn, New York. “Naimbag a bigatyo,” siraragsak a kinunana. Ngem sakbay a nagtugaw, sigagagar nga impakaammona: “Nagpatinggan ti Panawen dagiti Gentil; nalpasen ti al-aldaw dagiti arida.” Wen, ti Soberano iti uniberso a ni Jehova masapul nga agtignay manen maipaay iti ilina. Ket talaga a kasta ti inaramidna!

12. Ania a pannakaispal ti dimteng idi 1919, ken ania dagiti resultana?

¹² Lima laeng a tawen kalpasanna, inispal ni Jehova ti ilina manipud iti “Babilonia a Dakkel,” ti nabileg a sangalubongan nga imperio ti palso a relihion. (Apocalipsis 18:2) Manmano laengen kadatayo ti sibibiag a nakasaksi iti dayta a makabang-ar a pannakaispal. Kaskasdi, makitkitatayo dagiti nalawag a resultana. Impasdek manen ni Jehova ti nasin-aw a panagdayaw ken pinagkaykaysana dagidiay agtarigagay nga agdayaw kenkuana. Impadto dayta ni propeta Isaias: “Mapasamakto iti kamaudianan a paset dagiti aldaw a ti bantay ti balay ni Jehova sititibkerto ti pannakaipasdekna a nangatngato ngem iti tapaw ti bambantay, ket sigurado a maipangatonto iti ngatuen dagiti turod; ket amin dagiti nasion agayusdanto nga agturong iti dayta.”​—Isaias 2:2.

13. Ania ti nakitayon a panagrang-ay iti ili ni Jehova?

¹³ Saan a napaay dagiti sasao ni Isaias. Idi 1919, rinugian dagiti napulotan a natda ti sangalubongan a panangasaba a nangitandudo iti panagdayaw iti pudno a Dios. Idi dekada 1930, nalawag a maur-urnong ti “sabsabali a karnero.” (Juan 10:16) Rinibu la idi damo, kalpasanna, ginasut a ribu, ket ita minilionen ti dimmasig iti nasin-aw a panagdayaw! Iti sirmata ni apostol Juan, nadeskribirda kas “maysa a dakkel a bunggoy, nga awan ti tao a nakabael a mangbilang, manipud kadagiti amin a nasion ken kadagiti tribu ken kadagiti ili ken kadagiti pagsasao.” (Apocalipsis 7:9) Ania ti nakitayon a mismo? Mano ti Saksi ni Jehova ditoy daga idi damo a naammuanyo ti kinapudno? Ita, nasuroken nga 6,700,000 ti bilang dagidiay agserserbi ken Jehova. Gapu iti panangispal ni Jehova iti ilina manipud iti Babilonia a Dakkel, makitkitatayon dagiti nakaragragsak a naespirituan a panagrang-ay iti intero a lubong.

14. Ania a panangispal ti ur-urayentayo?

¹⁴ Adda sabali pay a panangispal nga aramiden ni Jehova a pakairamanan ti amin a tattao ditoy daga. Ipakitanto ni Jehova ti nakaskasdaaw a pannakabalinna babaen ti panangikisapna kadagiti amin a bumusbusor kenkuana, ket ispalenna ti ilina nga agturong iti maysa a baro a lubong a pagnaedan ti kinalinteg. Anian a makaparagsak a makitatayto ti panagpatingga ti kinadakes ken ti panagbannawag ti karaniagan a panawen iti intero a pakasaritaan ti tao!​—Apocalipsis 21:1-4.

Ti Pannalaknib ni Jehova iti Kaaldawantayo

15. Apay a kasapulan ti ili ni Jehova ti pannalaknibna ita?

¹⁵ Kas nakitatayon, dagiti Israelita idi panawen ni Josue kasapulanda ti pannalaknib ni Jehova. Kasapulan met kadi dayta ti ili ni Jehova iti moderno a panawen? Sigurado! Pinakdaaran ni Jesus dagiti pasurotna: “Dagiti tattao iyawatdakayto iti rigat ken papatayendakayto, ket puntiriakayto ti pananggura ti amin a nasnasion maigapu iti naganko.” (Mateo 24:9) Iti naglabas a tawtawen, dagiti Saksi ni Jehova iti adu a pagilian inib-ibturanda ti nakaro nga ibubusor ken naulpit a panangidadanes. Ngem di mailibak a tultulongan ni Jehova ti ilina. (Roma 8:31) Ipanamnama kadatayo ti Saona nga awan​—uray ‘aniaman nga igam a nabukel maibusor kadatayo’​—ti makapasardeng iti trabahotayo a panangasaba ken panangisuro.​—Isaias 54:17.

16. Ania ti nakitayon a pammaneknek a salsalakniban ni Jehova ti ilina?

¹⁶ Iti laksid ti pananggura ti lubong, rumangrang-ay ti ili ni Jehova kadagiti 236 a pagilian. Dayta ti mangpaneknek a salsalaknibannatayo ni Jehova manipud kadagidiay mangganggandat a mangtalipupos wenno mangpaulimek kadatayo. Malagipyo kadi ti nagan dagiti nabileg a lider ti politika wenno relihion a nangirurumen iti ili ti Dios bayat ti kaaldawanyo? Komustada itan? Addada pay kadi? Kaaduan kadakuada ti napukawen, kas iti napasamak ken Faraon idi kaaldawan da Moises ken Josue. Ngem komusta met dagiti moderno-aldaw nga adipen ti Dios a natay a simamatalek? Addada iti katalgedan a lugar​—iti lagip ni Jehova. Nalawag a sinalimetmetan ni Jehova ti karina nga ipaayna ti pannalaknib.

Ay-aywanan ni Jehova ti Ilina Ita

17. Ania ti impanamnama ni Jehova maipapan iti naespirituan a taraon?

¹⁷ Inaywanan ni Jehova ti ilina idiay let-ang, ket kasta ti ar-aramidenna agingga ita. Tartaraonannatayo iti naespirituan babaen “ti matalek ken masirib nga adipen.” (Mateo 24:45) Naammuantayo pay dagiti naespirituan a kinapudno a nagtalinaed a palimed iti adu a siglo. Kinuna ti anghel kenni Daniel: “Ilimedmo ti sasao ket selioam ti libro, agingga iti tiempo ti panungpalan. Adunto ti agdakiwas, ket ti pudno a pannakaammo umadunto.”​—Daniel 12:4.

18. Apay a maikuna nga agrangrangpaya ita ti pudno a pannakaammo?

¹⁸ Agbibiagtayon iti tiempo ti panungpalan, ket agrangrangpaya ti pudno a pannakaammo. Iti intero a lubong, ti nasantuan nga espiritu ti mangiturturong kadagiti napasnek nga agbirbirok iti umiso a pannakaammo maipapan iti pudno a Dios ken kadagiti panggepna. Nagadu ti Biblia ita, agraman dagiti publikasion a mangilawlawag kadagiti agkakapateg a kinapudno a linaon ti Biblia. Kas pagarigan, kitaenyo ti listaan dagiti linaon ti publikasion nga Ania a Talaga ti Isursuro ti Biblia?a Adda dagiti kapitulona a napauluan iti: “Ania ti Pudno Maipapan iti Dios?,” “Sadino ti Ayan Dagiti Natay?,” “Ania ti Pagarian ti Dios?,” ken “Apay nga Ipalubos ti Dios ti Panagsagaba?” Nabayagen nga ut-utoben dagiti tattao dagita a saludsod. Ngem ita, magun-odanen dagiti sungbat. Adun a siglo nga ignorante dagiti tattao maipapan iti Biblia ken irakrakurak ti Kakristianuan dagiti ulbod a sursuro, ngem nagballigi ti Sao ti Dios a mangisuro kadagiti amin nga agtarigagay nga agserbi ken Jehova.

19. Ania dagiti kari ti Dios a nakitayo a natungpal, ken ania ti makunayo iti dayta?

¹⁹ Maibatay kadagiti mismo a naimatangantayo, maikunatayo: ‘Awan napaay a maysa a sao manipud iti amin a naimbag a sasao a sinao kadatayo ni Jehova a Diosyo. Pimmudnoda amin maipaay kadatayo. Awan uray maysa a sao kadakuada ti napaay.’ (Josue 23:14) Ispalen, salakniban, ken aywanan ni Jehova dagiti adipenna. Adda kadi ammoyo a karina a di natungpal iti tiempo nga inkeddengna? Awan la ketdi. Nainsiriban nga agtalektayo iti mapagpiaran a Sao ti Dios.

20. Apay a manamnamatayo ti maysa a naraniag a masanguanan?

²⁰ Ania ti agur-uray iti masanguanan? Imbaga ni Jehova a kaaduan kadatayo ti agbiagto iti maysa a makaay-ayo a paraiso. Adda met sumagmamano a makipagturayto ken Kristo idiay langit. Ngem aniaman ti namnamatayo, adda rasontayo nga agtalinaed a matalek kas ken Josue. Asidegen ti aldaw a pumudno ti namnamatayo. Iti kasta, taliawentayto ti amin nga inkari ni Jehova ket kunaentayto: “Pimmudnoda amin.”

[Footnote]

Mailawlawagyo Kadi?

• Ania dagiti kari ni Jehova a nakita ni Josue a natungpal?

• Ania dagiti kari ti Dios a nakitayo a natungpal?

• Ania ti masiguradotayo maipapan iti sao ti Dios?

[Ladawan iti panid 23]

Bimmallaet ni Jehova tapno ispalenna ti ilina

[Ladawan iti panid 23]

Kasano a sinalakniban ni Jehova ti ilina idiay Nalabaga a Baybay?

[Ladawan iti panid 24]

Kasano nga inaywanan ni Jehova ti ilina idiay let-ang?

[Dagiti Ladawan iti panid 25]

Ay-aywanan ni Jehova ti ilina ita