Panangsukimat iti “Nauneg a Bambanag ti Dios”

“Ti espiritu sukimatenna ti amin a bambanag, uray pay ti nauneg a bambanag ti Dios.”​—1 CORINTO 2:10.

1. Ania ti dadduma kadagiti kinapudno ti Biblia a makaparagsak kadagiti kabbaro nga agad-adal iti Biblia?

KAADUAN kadatayo nga adda iti kongregasion Kristiano malagiptayo a nakaragragsaktayo idi damo a naammuantayo ti kinapudno. Naammuantayo ti kinapateg ti nagan ni Jehova, no apay nga ipalpalubosna ti panagsagaba, no apay a dadduma a tattao mapanda idiay langit, ken no ania ti namnama dagiti matalek a tattao. Nalabit sinukimattayo idi ti Biblia, ngem nailimed dagitoy a bambanag kadatayo a kas iti pannakailimedda iti kaaduan a tattao. Mayarigtay iti tao nga agbatbatok iti kadilian. No awan dagiti instrumentona a pagbatok, bassit laeng ti makitana kadagiti napintas a bambanag iti uneg ti danum. Ngem babaen ti tulong ti pagbatok nga antipara wenno bilog a sarming ti kaskona, maragsakan a makakita iti damo a gundaway kadagiti nagpintas ti kolorda a korales, ikan, ken dagiti kasla masetas nga animal iti baybay (sea anemone) ken dadduma pay a napintas a parsua. Umasping iti dayta, no adda tumulong kadatayo a mangadal iti Biblia, maammuantayo iti damo a gundaway “ti nauneg a bambanag ti Dios.”​—1 Corinto 2:8-10.

2. Kasano nga agtultuloy ti rag-o nga itden ti panagadal iti Sao ti Dios?

² Mapnektayo kadi no narabaw laeng ti pannakaammotayo kadagiti kinapudno ti Biblia? Ti ebkas a “ti nauneg a bambanag ti Dios” ramanenna ti pannakaawat iti kinasirib ti Dios nga impalgak ti nasantuan nga espiritu kadagiti Kristiano ngem nailimed kadagiti sabsabali. (1 Corinto 2:7) Talaga nga awan patingga ti kinasirib ti Dios ken makaparagsak ti panangsukisok kadagiti danana! Saantayto a matukod ti amin a banag maipapan iti kinasirib dagiti dana ti Dios. No awan sarday a sukimatentayo “ti nauneg a bambanag ti Dios,” saanto a bumaaw ti rag-o a nariknatayo idi damo a naammuantayo dagiti kangrunaan a pannursuro ti Biblia.

3. Apay a masapul a maawatantayo a naan-anay dagiti nakaibatayan dagiti patpatientayo?

³ Apay a nasken a maawatantayo dagita a “nauneg a bambanag”? No maawatantayo saan laeng a ti patpatientayo no di ket no ania ti nakaibatayanda, bumileg ti pammati ken panagtalektayo. Ibaga ti Kasuratan nga usarentayo ti ‘pannakabalintayo nga agrason’ tapno ‘mapaneknekantayo iti bagbagitayo ti naimbag ken makaay-ayo ken naan-anay a pagayatan ti Dios.’ (Roma 12:1, 2) Sidadaan nga agtulnogtayo ken Jehova no maawatantayo no apay a kidkiddawenna nga agbiagtayo sigun iti pagayatanna. No kasta, ti pannakaammo kadagiti “nauneg a bambanag” pabilgennatayo nga agkedked iti sulisog nga agaramid iti dakes ken tignayennatayo nga agbalin a “naregta iti nasayaat nga ar-aramid.”​—Tito 2:14.

4. Ania ti ramanen ti panagadal iti Biblia?

⁴ Tapno maawatantayo dagiti nauneg a bambanag, masapul nga agadaltayo. Ngem ti panagadal ket saan laeng a basta parparawpaw a panagbasa. Masapul a sukimatentayo a naimbag ti impormasion no kasano a mainaig dayta iti ammotayon. (2 Timoteo 1:13) Masapul a maawatantayo no apay a kasta ti naibaga. Karaman iti panagadal ti Biblia ti panangutob no kasano nga usarentayo ti naammuantayo tapno makaaramidtayo kadagiti nainsiriban a desision ken matulongantayo ti sabsabali. Maysa pay, tangay “amin a Kasuratan impaltiing ti Dios ken makagunggona,” rumbeng nga adalentayo ti “tunggal sao a rumrummuar iti ngiwat ni Jehova.” (2 Timoteo 3:16, 17; Mateo 4:4) Talaga a masapul ti panangikagumaan nga agadal iti Biblia! Ngem makaparagsak met dayta, isu a saan met unay a narigat a tarusan dagiti “nauneg a bambanag ti Dios.”

Ipaay ni Jehova ti Pannakaawat Kadagiti Napakumbaba

5. Siasino ti makaawat kadagiti “nauneg a bambanag ti Dios”?

⁵ Uray no saanka a nalaing idiay eskuelaan ken saanka a nairuam nga agadal, dimo pagarupen a saanmo a maawatan “ti nauneg a bambanag ti Dios.” Bayat ti ministerio ni Jesus ditoy daga, saan nga impalgak ni Jehova ti panggepna kadagiti mamasirib ken nasaririt, no di ket kadagiti awan adalna ken ordinario a tattao a sipapakumbaba a paisuro iti adipen ti Dios. Kasda la ubbing no idilig kadagiti de adal. (Mateo 11:25; Aramid 4:13) Maipapan kadagiti “bambanag nga insagana ti Dios kadagidiay agayat kenkuana,” insurat ni apostol Pablo kadagiti kapammatianna: “Kadatayo nga impalgak ida ti Dios babaen ti espirituna, ta ti espiritu sukimatenna ti amin a bambanag, uray pay ti nauneg a bambanag ti Dios.”​—1 Corinto 2:9, 10.

6. Ania ti kayat a sawen ti 1 Corinto 2:10?

⁶ Kasano a sukimaten ti nasantuan nga espiritu ti Dios “ti amin a bambanag, uray pay ti nauneg a bambanag ti Dios”? Imbes nga ipalgakna ti kinapudno iti tunggal Kristiano, usaren ni Jehova ti espirituna a mangiturong iti organisasionna, tapno ti nagkaykaysa nga ilina maawatanda ti Biblia. (Aramid 20:28; Efeso 4:3-6) Iti intero a lubong, tagtagiragsaken ti amin a kongregasion ti agpapada a programa ti panagadal iti Biblia. Adun a tawen nga ad-adalenda ti amin a pannursuro ti Biblia. Babaen ti kongregasion, agtignay ti nasantuan nga espiritu tapno tulonganna dagiti tattao a mangpatanor iti kababalin a kasapulan tapno maawatanda “ti nauneg a bambanag ti Dios.”​—Aramid 5:32.

No Ania ti Ramanen “ti Nauneg a Bambanag ti Dios”

7. Apay a saan a maawatan ti adu a tattao dagiti “nauneg a bambanag ti Dios”?

⁷ Ditay koma ipagarup a “ti nauneg a bambanag” ket narigat a maawatan. Nalidem ti pannakaammo ti kaaduan a tattao iti “nauneg a bambanag ti Dios” saan a gapu ta nakarigrigat a gun-oden ti kinasirib ti Dios no di ket gapu ta al-allilawen ni Satanas dagiti tattao a mangilaksid iti tulong ni Jehova babaen ti organisasionna.​—2 Corinto 4:3, 4.

8. Ania a nauneg a bambanag ti tuktukoyen ni Pablo iti maikatlo a kapitulo ti suratna kadagiti taga-Efeso?

⁸ Ti maikatlo a kapitulo ti surat ni Pablo kadagiti taga-Efeso ipakitana a “ti nauneg a bambanag ti Dios” ramanenna ti adu a kinapudno a nalawag a maawatan ti kaaduan nga adipen ni Jehova ita, kas ti pakabigbigan iti naikari a Bin-i, ti pannakapili dagiti tattao nga addaan iti nailangitan a namnama, ken ti Mesianiko a Pagarian. Insurat ni Pablo: “Iti sabsabali a kaputotan saan a naipakaammo daytoy a palimed iti annak ti tattao a kas ti pannakaipalgakna ita kadagiti nasantuan nga apostolna ken kadagiti mammadto babaen ti espiritu, awan sabali, tapno dagiti tattao iti nasnasion agbalinda a kadua a makipagtawid ken pada a kamkameng iti bagi ken makiraman kadatayo iti kari a maikaykaysa ken Kristo Jesus.” Imbaga ni Pablo nga isu ket natudingan a ‘mangipakita kadagiti tattao no kasano a matarawidwidan ti sagrado a palimed a manipud iti di nakedngan a napalabas naitalimeng iti Dios.’​—Efeso 3:5-9.

9. Apay a maysa a pribilehio ti maaddaan iti pannakaawat kadagiti “nauneg a bambanag ti Dios”?

⁹ Intuloy nga inlawlawag ni Pablo ti pagayatan ti Dios a ‘kadagiti nailangitan a disso maipakaammo met koma ti kasta unay panagdudumana a sirib ti Dios babaen ti kongregasion.’ (Efeso 3:10) Makasursuro dagiti anghel no mapaliiw ken maawatanda a nainsiriban ti pannakilangen ni Jehova iti kongregasion Kristiano. Nagsayaat ketdin a pribilehio ti pannakaawat kadagiti bambanag a paginteresan pay dagiti anghel! (1 Pedro 1:10-12) Sumaganad, imbaga ni Pablo nga ikagumaantayo koma a tarusan ‘agraman ti amin a sasanto no ania ti kaakaba ken kaatiddog ken kangato ken kauneg’ ti Nakristianuan a pammati. (Efeso 3:11, 18) Usigentayo itan dagiti sumagmamano a pagarigan a mabalin a mangpauneg iti pannakaawattayo.

Pagarigan Dagiti Nauneg a Bambanag

10, 11. Sigun iti Biblia, kaano a nagbalin ni Jesus a kangrunaan a paset ti ‘bin-i’ ti nailangitan a “babai” a kukua ti Dios?

¹⁰ Ammotayo a ni Jesus ti kangrunaan a paset ti ‘bin-i’ ti nailangitan a “babai” a kukua ti Dios a nadakamat iti Genesis 3:15. Tapno umuneg ti pannakaawattayo, mabalin nga imtuodentayo: ‘Kaano a nagbalin ni Jesus kas ti naikari a Bin-i? Sakbay kadi a nagbalin a tao, idi nayanak kas tao, idi nabautisaran, wenno idi napagungar?’

¹¹ Inkari ti Dios a ti nailangitan a paset ti organisasionna, a nadakamat iti padto kas ti “babai” a kukuana, ket mangpataudto iti bin-i a mangsugat iti ulo ti serpiente. Rinibu a tawenen ti napalabas ngem awan ti bin-i a napataud ti babai a kukua ti Dios a makabael a mangdadael ken Satanas ken kadagiti ar-aramidna. Isu nga iti padto ni Isaias, inawaganna ti babai a “lupes” ken “nasaktan iti espiritu.” (Isaias 54:1, 5, 6) Idi agangay, naipasngay ni Jesus idiay Betlehem. Ngem kalpasan laeng a nabautisaran, idi napulotan iti espiritu tapno agbalin nga anak nga addaan iti naisangsangayan a relasion iti Dios, nga impakaammo ni Jehova: “Daytoy ti Anakko.” (Mateo 3:17; Juan 3:3) Nagparang met laengen ti kangrunaan a paset ti ‘bin-i’ ti babai. Kalpasanna, dagiti pasurot ni Jesus napulotanda met iti nasantuan nga espiritu. Ti “babai” a kukua ni Jehova a nabayagen a naibilang kas “babai a di nagpasngay,” mabalinnan ti ‘agdir-i a sirarag-o.’​—Isaias 54:1; Galacia 3:29.

12, 13. Ania dagiti teksto ti Biblia a mangipakita nga amin dagiti napulotan a Kristiano buklenda “ti matalek ken masirib nga adipen”?

¹² Ti panggep ti Dios a mangpili iti 144,000 manipud iti sangatauan ti maysa pay kadagiti nauneg a bambanag a naipalgak kadatayo. (Apocalipsis 14:1, 4) Patientayo ti pannursuro nga amin a napulotan a nagbiag ditoy daga buklenda “ti matalek ken masirib nga adipen” a kinuna ni Jesus a mangipapaay iti ‘taraon’ iti umiso a tiempo iti sangakabbalayanna. (Mateo 24:45) Ania dagiti teksto ti Biblia a mangpaneknek nga umiso daytoy a pannakaawat? Mabalin kadi nga ibaga a tuktukoyen ni Jesus ti asinoman a Kristiano a mangipapaay iti naespirituan a pammabileg kadagiti kakabsatna?

¹³ Imbaga ti Dios iti nasion ti Israel: “Dakayo dagiti saksik . . . ti mismo nga adipenko a pinilik.” (Isaias 43:10) Ngem idi Nisan 11 idi tawen 33 K.P., imbaga ni Jesus kadagiti panguluen ti Israel nga inlaksid ti Dios ti nasionda kas adipenna. Kinunana: “Ti pagarian ti Dios maikkatto kadakayo ket maited iti nasion a mangpatpataud kadagiti bungana.” Kinuna ni Jesus iti bunggoy: “Adtoy! Ti balayyo mabaybay-an kadakayo.” (Mateo 21:43; 23:38) Kas adipen ni Jehova, saan a matalek wenno masirib ti balay ti Israel. (Isaias 29:13, 14) Iti dayta met la nga aldaw, nagimtuod ni Jesus: “Siasino a pudpudno ti matalek ken masirib nga adipen?” a kasla damdamagenna, ‘Ania a masirib a nasion ti mangsukat iti Israel tapno agbalin a matalek nga adipen ti Dios?’ Sinungbatan dayta ni apostol Pedro idi imbagana iti kongregasion dagiti napulotan a Kristiano: “Dakayo ket . . . ‘maysa a nasantuan a nasion, maysa nga ili nga agpaay a naisangsangayan a sanikua.’” (1 Pedro 1:4; 2:9) Dayta a naespirituan a nasion, ti “Israel ti Dios,” ti nagbalin a kabbaro nga adipen ni Jehova. (Galacia 6:16) No kasano nga amin a kameng ti nagkauna nga Israel buklenda ti maymaysa nga “adipen,” amin a napulotan a Kristiano ditoy daga buklenda met ti maymaysa a “matalek ken masirib nga adipen.” Anian a pribilehio ti umawat iti ‘taraon’ nga ipapaay dayta nga adipen ti Dios!

Matagiragsakyo ti Personal a Panagadal

14. Apay nga ad-adda a makaparagsak ti panagadal iti Biblia ngem ti basta panagbasa iti dayta?

¹⁴ No adda mailawlawag kadatayo a baro a pannakaawat iti Kasuratan, saantayo kadi a maragsakan a mapabileg ti pammatitayo? Isu nga ad-adda a makaparagsak ti panagadal ngem ti basta panagbasa iti Biblia. Ngarud, no agbasakayo kadagiti naibatay iti Biblia a publikasion, imtuodenyo ti bagiyo: ‘Ania ti pakainaigan daytoy a pannakailawlawag iti ammokon maipapan iti daytoy a tema? Ania pay dagiti mapanunotko a teksto ken panagrason a mangsuporta iti pannakaawat a naiparang iti daytoy nga artikulo?’ No kasapulan ti ad-adu pay a panagsukimat, isuratyo ti saludsod a kayatyo a masungbatan, ket dayta ti adalenyo iti sumaganad a panagadalyo.

15. Ania dagiti mabalinyo nga adalen a mangyeg iti rag-o kadakayo, ken kasano a mabalin nga agpaut dayta a pakagunggonaan?

¹⁵ Ania dagiti mabalinyo nga adalen a mangpauneg iti pannakaawatyo ket iti kasta, mangyeg iti rag-o kadakayo? Adu ti maammuantayo no detalyado nga usigentayo dagiti nagduduma a tulag nga inusar ti Dios tapno magunggonaan ti sangatauan. Mapabileg ti pammatitayo babaen iti panagadal kadagiti padto maipapan ken Jesu-Kristo wenno ti bersikulo por bersikulo a panangusig kadagiti libro a naglaon kadagiti padto iti Biblia. Makapabileg met iti pammati ti panangrepaso iti pakasaritaan dagiti Saksi ni Jehova, nga usaren ti libro a Dagiti Saksi ni Jehova​—Manangiwaragawag iti Pagarian ti Dios.a Ti panangrepaso kadagiti napalabas a “Salsaludsod Dagiti Agbasbasa” a naipablaak iti Ti Pagwanawanan sigurado a lawlawaganna ti pannakaawatyo iti dadduma a teksto. Amirisenyo a naimbag ti pannakailawlawag ti Kasuratan tapno maawatanyo ti naidatag a kinapudno. Makatulong daytoy kadakayo a mangpatanor iti panangilasin ken mangsanay iti ‘pannakabalin ti pannakaawatyo.’ (Hebreo 5:14) Bayat nga agad-adalkayo, aginotarkayo iti Bibliayo wenno iti papel tapno ti naadalyo ket agpaut a pakagunggonaanyo ken dagidiay tultulonganyo.

Tulonganyo Dagiti Agtutubo Tapno Maragsakanda nga Agadal iti Biblia

16. Kasano a matulonganyo dagiti annakyo tapno maragsakanda nga agadal iti Biblia?

¹⁶ Dakkel ti maitulong dagiti nagannak tapno matignay dagiti annakda a mangpatanor iti nasinged a relasion iti Dios. Diyo pagarupen a saan a maawatan dagiti agtutubo dagiti nauneg a bambanag ti Dios. No ikkanyo dagiti annakyo iti tema nga isaganada agpaay iti panagadal ti pamilia iti Biblia, mabalin a damagenyo kadakuada no ania ti naadalda. Mabalin met nga iraman dagiti panagsanay kabayatan ti panagadal ti pamilia tapno matulongan dagiti annak a mangidepensa iti pammatida ket paneknekanda a kinapudno ti naisuro kadakuada. Kasta met, mabalin nga usarenyo ti broshur a ‘Kitaem ti Nasayaat a Daga’b tapno isuro ti geograpia ti Biblia ken malawlawagan dagiti nabasayo iti linawas a panagbasayo iti Biblia.

17. Apay a masapul a natimbengtayo iti personal a panagadaltayo iti Biblia?

¹⁷ Makaparagsak ken makapabileg iti pammati ti personal a panagadal iti Biblia, ngem agannadkayo di la ket ta maibus ti panawenyo iti dayta ket awanen ti tiempoyo nga agsagana agpaay kadagiti gimong ti kongregasion. Dagiti gimong ti sabali pay a pamay-an ti panangisuro ni Jehova kadatayo babaen “ti matalek ken masirib nga adipen.” Nupay kasta, makatulong met ti panagsukimat tapno makaipaaykayo kadagiti makaisuro a komento kadagiti gimong​—kas pagarigan iti Panagadal ti Libro iti Kongregasion wenno kadagiti tampok iti linawas a panagbasa iti Biblia para iti Teokratiko nga Eskuelaan ti Panagministro.

18. Apay a saan a sayang ti panangikagumaanyo nga agadal kadagiti “nauneg a bambanag ti Dios”?

¹⁸ Ti napasnek a personal a panagadal iti Sao ti Dios ket makatulong kadakayo nga umadani ken Jehova. Tapno ipakita ti kinapateg ti kasta a panagadal, kuna ti Biblia: “Ti sirib agpaay a salaknib kas met laeng ti kuarta agpaay a salaknib; ngem ti pagsayaatan ti pannakaammo ket ti met laeng sirib taginayonenna a sibibiag dagiti agik-ikut iti dayta.” (Eclesiastes 7:12) Ngarud, saan a sayang ti panangikagumaanyo a mangpauneg iti pannakaawatyo kadagiti naespirituan a bambanag. Ikari ti Biblia kadagidiay agtultuloy nga agsukimat: ‘Masarakanto ti mismo a pannakaammo iti Dios.’​—Proverbio 2:4, 5.

[Footnotes]

Mailawlawagyo Kadi?

• Ania dagiti “nauneg a bambanag ti Dios”?

• Apay a ditay koma isardeng ti agadal kadagiti nauneg a bambanag?

• Apay a mabalin a matagiragsak ti amin a Kristiano ti pannakaawat kadagiti “nauneg a bambanag ti Dios”?

• Kasano a naan-anay a magunggonaankayo kadagiti “nauneg a bambanag ti Dios”?

[Ladawan iti panid 28]

Kaano a nagbalin ni Jesus a naikari a Bin-i?

[Ladawan iti panid 31]

Dagiti nagannak mabalinda nga ikkan dagiti annakda kadagiti sukimatenda a tema kas panagsaganada iti panagadal ti pamilia