Maikari nga Umawat iti Pagarian

“Daytoy ket pammaneknek iti nalinteg a panangukom ti Dios, a mangiturturong iti pannakaibilangyo a maikari iti pagarian ti Dios.”​—2 TES. 1:5.

1, 2. Ania ti panggep ti Dios mainaig iti panangukom, ken asino ti mangukom?

ADDA ni apostol Pablo idiay Atenas idi agarup 50 K.P. Gapu ta maseknan iti nasaknap nga idolatria a nakitana sadiay, natignay a mangted iti makagutugot a palawag. Ingngudona dayta babaen iti sasao a namagpanunot kadagiti pagano nga agdengdengngeg. Kinunana: “Ita ibagbaga [ti Dios] iti sangatauan nga isuda amin iti isuamin a disso masapul nga agbabawida. Agsipud ta nangituding iti aldaw nga iti dayta panggepna nga ukomen ti mapagnaedan a daga buyogen ti kinalinteg babaen ti maysa a lalaki a dinutokanna, ket nangipaay iti pammatalged kadagiti amin a tattao iti panangpagungarna kenkuana manipud kadagiti natay.”​—Ara. 17:30, 31.

² Serioso a banag ti panangipakitana nga adda aldaw ti panangukom nga inkeddeng ti Dios maipaay iti sangatauan! Iti palawagna idiay Atenas, saan a dinakamat ni Pablo ti nagan daydiay mangukom ngem ammotayo a ti napagungar a ni Jesu-Kristo dayta. Ti panangukom ni Jesus agbanagto iti biag wenno ipapatay.

3. Apay a nakitulag ni Jehova kenni Abraham, ken asino ti addaan iti naisangsangayan nga akem ti pannakaitungpalna?

³ Agpaut iti 1,000 a tawen ti Aldaw ti Panangukom. Kas Ari iti Pagarian ti Dios, ni Jesus ti mangibanag iti dayta iti nagan ni Jehova, ngem saan nga agmaymaysa. Nangpili ni Jehova kadagiti tattao a makipagturayto ken Jesus ken mangukom bayat ti milenio. (Idiligyo iti Lucas 22:29, 30.) Agarup 4,000 a tawen ti napalabasen, impasdek ni Jehova ti pundasion dayta nga Aldaw ti Panangukom idi nakitulag iti matalek nga adipenna a ni Abraham. (Basaenyo ti Genesis 22:17, 18.) Nangrugi nga agandar dayta a tulag idi 1943 K.K.P. Saan pay idi a naan-anay a maawatan ni Abraham no ania ti kaipapanan dayta a tulag iti sangatauan. Ngem ita, ammotayo nga iti sidong dayta a tulag, naisangsangayan ti akem ti bin-i ni Abraham iti pannakaitungpal ti panggep ti Dios a mangukom iti sangatauan.

4, 5. (a) Asino ti kangrunaan a paset ti bin-i ni Abraham, ken ania ti kinunana maipapan iti Pagarian? (b) Kaano a naluktan ti namnama nga agbalin a paset iti Pagarian?

⁴ Ti kangrunaan a paset ti bin-i ni Abraham ket ni Jesus, a napulotan iti nasantuan nga espiritu idi 29 K.P. ken nagbalin kas ti naikari a Mesias, wenno Kristo. (Gal. 3:16) Iti simmaruno a tallo ket kagudua a tawen, inkaskasaba ni Jesus ti naimbag a damag ti Pagarian kadagiti Judio. Kalpasan a naaresto ni Juan a Mammautisar, impakita ni Jesus nga adda dagiti makipagari iti Pagarian idi kinunana: “Nanipud iti kaaldawan ni Juan a Mammautisar agingga ita ti pagarian ti langlangit isu ti kalat a pagreggetan dagiti tattao, ket dagidiay agregregget nga agtultuloy isuda ti makagunggun-od iti dayta.”​—Mat. 11:12.

⁵ Makapainteres ta sakbay la unay a nadakamatna ti maipapan kadagidiay ‘makagun-od’ iti Pagarian idiay langit, kinuna ni Jesus: “Pudno kunak kadakayo, Kadagidiay nayanak kadagiti babbai awan ti naibangon a dakdakkel ngem ni Juan a Mammautisar; ngem daydiay a nanumnumo iti pagarian ti langlangit ket dakdakkel ngem isu.” (Mat. 11:11) Apay a kasta ti kinunana? Gapu ta sa la naan-anay a naluktan kadagidiay matalek ti namnama nga agbalin a paset iti Pagarian ti Dios idi naiparukpok ti nasantuan nga espiritu idi Pentecostes 33 K.P. Iti dayta a tiempo, natayen ni Juan a Mammautisar.​—Ara. 2:1-4.

Naibilang a Nalinteg ti Bin-i ni Abraham

6, 7. (a) Iti ania a pamay-an a ti bin-i ni Abraham nagbalin a “kas kadagiti bituen ti langlangit”? (b) Ania ti bendision a nagun-od ni Abraham, ken ania nga umasping a bendision ti magun-od ti bin-ina?

⁶ Naibaga ken Abraham nga umadu ti bin-ina ken agbalin a “kas kadagiti bituen ti langlangit” ken kas darat iti baybay. (Gen. 13:16; 22:17) Iti sabali a pannao, imposible a maammuan idi panawen ni Abraham no mano ti mangbukel iti dayta a bin-i. Ngem idi agangay, naipalgak ti eksakto a bilang dayta a naespirituan a bin-i. Malaksid ken Jesus, agdagup dayta iti 144,000.​—Apoc. 7:4; 14:1.

⁷ Maipapan iti pammati ni Abraham, kuna ti Sao ti Dios: “[Ni Abraham] naaddaan iti pammati ken Jehova; ket imbilangna dayta kenkuana kas kinalinteg.” (Gen. 15:5, 6) Pudno nga awan ti tao a naan-anay a nalinteg. (Sant. 3:2) Nupay kasta, gapu ta naisangsangayan ti pammati ni Abraham, imbilang ni Jehova a nalinteg ken inawaganna pay kas gayyemna. (Isa. 41:8) Maibilang met a nalinteg dagidiay mangbukel iti naespirituan a bin-i ni Abraham a pakairamanan ni Jesus, ket dakdakkel ti magun-odda a bendision ngem iti nagun-od ni Abraham.

8. Ania dagiti bendision a nalukatan kadagiti paset ti bin-i ni Abraham?

⁸ Naibilang a nalinteg dagiti napulotan a Kristiano gapu ta impakitada ti pammatida iti pangsubbot a daton ni Jesus. (Roma 3:24, 28) Iti panangmatmat ni Jehova, naluk-atandan manipud iti basol ken mabalindan a mapulotan iti nasantuan nga espiritu tapno agbalin kas naespirituan nga annak ti Dios ken kakabsat ni Jesu-Kristo. (Juan 1:12, 13) Nairamanda iti baro a tulag ken buklenda ti baro a nasion, ti “Israel ti Dios.” (Gal. 6:16; Luc. 22:20) Anian a naindaklan a pribilehio dayta! Kas resulta ti inaramid ti Dios maipaay kadakuada, saan a namnamaen dagiti napulotan a Kristiano nga agbiagda nga agnanayon ditoy daga. Tinallikudanda dayta a namnama gapu iti di matukod a rag-o ti pannakikadua ken Jesus bayat ti Aldaw ti Panangukom ken makipagturay kenkuana idiay langit.​—Basaenyo ti Roma 8:17.

9, 10. (a) Kaano a damo a napulotan iti nasantuan nga espiritu dagiti Kristiano, ken ania ti nasken nga itultuloyda nga aramiden? (b) Ania a tulong ti nagun-odan dagiti napulotan a Kristiano?

⁹ Idi Pentecostes 33 K.P., maysa a grupo dagiti matalek a tattao ti naikkan iti gundaway a makipagturay ken Jesus bayat ti Aldaw ti Panangukom. Agarup 120 kadagiti adalan ni Jesus ti nabautisaran iti nasantuan nga espiritu, a namagbalin kadakuada kas ti umuna a napulotan a Kristiano. Ngem pangrugian laeng dayta. Masapul nga agtultuloyda a nasungdo ken Jehova iti laksid ti amin a pannubok nga ipalak-am kadakuada ni Satanas. Nasken nga agmatalekda agingga ken patay tapno awatenda ti korona a nailangitan a biag.​—Apoc. 2:10.

¹⁰ Tapno maaramidda dayta, us-usaren ni Jehova ti Saona ken ti kongregasion Kristiano tapno ipaayna ti pammagbaga ken pammabileg a kasapulan dagiti napulotan a Kristiano. Kas pagarigan, sinuratan ni apostol Pablo dagiti Kristiano idiay Tesalonica: “Kas iti aramiden ti maysa nga ama iti annakna, a nagtultuloy a binagbagaanmi ti tunggal maysa kadakayo, ket nangliwliwa ken nangsaksikami kadakayo, iti panggep nga agtultuloykayo a magna a maikari iti Dios a mangay-ayab kadakayo iti pagarian ken dayagna.”​—1 Tes. 2:11, 12.

11. Ania a naisurat a rekord ti impaay ni Jehova kadagiti kameng ti “Israel ti Dios”?

¹¹ Kadagiti simmaruno a dekada kalpasan ti pannakapili dagiti immuna a kameng ti kongregasion dagiti napulotan a Kristiano, nakita ni Jehova a maitutop nga adda naisurat a permanente a rekord maipapan iti ministerio ni Jesus ditoy daga agraman dagiti pannakilangen ken balakadna kadagiti napulotan a Kristiano idi umuna a siglo. Gapuna, impaltiing ni Jehova ti Kristiano a Griego a Kasuratan kas kanayonan ti adda idin a naipaltiing a Hebreo a Kasuratan. Idi damo, naisurat ti Hebreo a Kasuratan agpaay iti nasion ti Israel idi panawen nga addaanda pay iti naisangsangayan a relasion iti Dios. Nangnangruna a naisurat ti Kristiano a Griego a Kasuratan agpaay iti “Israel ti Dios,” dagidiay napulotan a kakabsat ni Kristo ken naespirituan nga annak ti Dios. Ngem dina kayat a sawen dayta nga awan ti dakkel a magunggona dagiti saan nga Israelita no adalenda ti Hebreo a Kasuratan. Umasping iti dayta, dagiti Kristiano a saan a napulotan iti nasantuan nga espiritu dakkel met ti magunggonada no adalen ken iyaplikarda ti balakad ti Kristiano a Griego a Kasuratan.​—Basaenyo ti 2 Timoteo 3:15-17.

12. Ania a pammalagip ti inted ni Pablo kadagiti napulotan a Kristiano?

¹² Tapno magun-odda ti nailangitan a tawidda, masapul a maibilang a nalinteg ken mapulotan iti nasantuan nga espiritu dagiti Kristiano idi umuna a siglo. Ti pannakapulotda saanna a kayat a sawen nga iturayanda dagiti padada a napulotan a Kristiano bayat nga addada ditoy daga. Agparang a kasta ti kapanunotan ti dadduma a nagkauna a Kristiano isu a pinadasda nga inturayan dagiti kakabsatda iti kongregasion. Kas resultana, natignay ni Pablo a nagsaludsod: “Napnekankay kadin? Nabaknangkay kadin? Nangrugikay kadin nga agturay kas ar-ari nga awankami? Ket pudno a kayatko a nangrugikayon nga agturay kas ar-ari, tapno makipagturaykami met kadakayo kas ar-ari.” (1 Cor. 4:8) Pinalagipan ngarud ni Pablo dagiti napulotan idi kaaldawanna: “Saan a gapu ta dakami dagiti appo iti pammatiyo, no di ket katrabahuandakami a maipaay iti rag-oyo.”​—2 Cor. 1:24.

Panangkompleto iti Naipadto a Bilang

13. Kasano a nagtultuloy ti pannakaayab dagiti napulotan kalpasan ti 33 K.P.?

¹³ Saan nga amin a kameng ti 144,000 a napulotan a Kristiano ket napili idi umuna a siglo. Nangrugi ti pannakaayabda idi panawen dagiti apostol, ngem agparang a manmanon ti napili kadagiti simmarsaruno a siglo. Kaskasdi, nagtultuloy dayta agingga iti moderno a panawen. (Mat. 28:20) Idi agangay, kalpasan a naitrono ni Jesus idi 1914, nagsasarunon dagiti pasamak.

14, 15. Ania ti napasamak iti kaaldawantayo mainaig iti pannakaayab dagiti napulotan?

¹⁴ Umuna, inikkat ni Jesus ti amin a bumusbusor iti turay ti Dios idiay langit. (Basaenyo ti Apocalipsis 12:10, 12.) Kalpasanna, inummongna dagiti nabatbati a miembro ti Pagarianna tapno makompleto ti bilang a 144,000. Idi ngalay ti dekada 1930, agparang a dandanin makompleto daytoy a bilang ket adu kadagidiay nangipangag iti mensahe ti saan nga agtarigagay a mapan idiay langit. Saan a paneknekan ti espiritu nga annak ida ti Dios. (Idiligyo ti Roma 8:16.) Imbes ketdi, ibilangda ti bagida a kameng ti “sabsabali a karnero,” nga addaan iti namnama nga agbiag nga agnanayon iti paraiso a daga. (Juan 10:16) Gapuna, kalpasan ti 1935, naiturong ti trabaho a panangasaba iti pannakaurnong ti “dakkel a bunggoy,” dagidiay nasirmata ni Juan a makalasat iti “dakkel a rigat.”​—Apoc. 7:9, 10, 14.

¹⁵ Ngem kadagiti tawtawen kalpasan ti dekada 1930, adda latta sumagmamano a tattao a naikkan iti nailangitan a namnama. Apay? Mabalin a kasukat ida dagiti napulotan a saan a nagtultuloy a matalek. (Idiligyo iti Apocalipsis 3:16.) Adda pay ketdi dagiti am-ammo ni Pablo a nangtallikud iti kinapudno. (Fil. 3:17-19) Siasino ti isukat ni Jehova? Siempre, Isu ti mangikeddeng iti dayta. Ngem agparang a saan a nainkalintegan a mangala kadagiti kabbaro nga adalan kas kasukat no di ket mangala kadagiti adalan a nakapanekneken iti kinasungdoda kas kadagiti adalan a kasarsarita ni Jesus idi inyussuatna ti Panglaglagip iti ipapatayna.a​—Luc. 22:28.

16. Ania ti masiguradotayo maipapan kadagiti napulotan, ken iti ania a makapagtalektayo?

¹⁶ Nupay kasta, agparang a saan nga amin a naikkan iti nailangitan a namnama kalpasan ti dekada 1930 ket pangsandi kadagidiay simiasi iti kinapudno. Nalawag a sinigurado ni Jehova nga adda pay laeng dagiti napulotan a Kristiano a kaduatayo bayat dagiti maudi nga al-aldaw daytoy a sistema ti bambanag agingga iti pannakadadael ti “Babilonia a Dakkel.”b (Apoc. 17:5) Ken makapagtalektayo a makompleto ti naan-anay a bilang dagiti kameng ti 144,000 iti tiempo nga inkeddeng ni Jehova ken agturaydanto amin iti Pagarian. Manamnamatayo met nga agtalinaed a matalek ti naipadto iti Biblia nga umad-adu a dakkel a bunggoy. Iti din agbayag, malasatandanto ti “dakkel a rigat” nga agdissuor iti lubong ni Satanas ken siraragsakdanto a sumrek iti baro a lubong ti Dios.

Dandanin Makompleto ti Mangbukel iti Nailangitan a Gobierno ti Dios!

17. Sigun iti 1 Tesalonica 4:15-17 ken Apocalipsis 6:9-11, ania ti napasamak kadagidiay napulotan a Kristiano a nagtalinaed a matalek agingga ken patay?

¹⁷ Sipud idi 33 K.P., rinibu a napulotan a Kristiano ti nangiparangarang iti nabileg a pammati ken nagibtur a simamatalek agingga ken patay. Naibilangen dagitoy a maikari nga umawat iti Pagarian​—a nalawag a nangrugi kadagidi umuna nga al-aldaw ti kaadda ni Kristo​—ken inawatdan ti nailangitan a gunggonada.​—Basaenyo ti 1 Tesalonica 4:15-17; Apocalipsis 6:9-11.

18. (a) Ania ti masigurado dagiti napulotan nga adda pay laeng ditoy daga? (b) Ania ti panangmatmat dagiti kameng ti sabsabali a karnero kadagiti napulotan a Kristiano a kakabsatda?

¹⁸ Dagidiay napulotan nga adda pay la ditoy daga manamnamada a mabiiten a maawatda ti gunggonada no agtalinaedda a matalek. Bayat nga ut-utobenda ti pammati dagiti napulotan a kakabsatda, minilion kadagiti kameng ti sabsabali a karnero ti umanamong kadagiti sasao ni apostol Pablo, a nagkuna maipapan kadagiti napulotan a kakabsatda idiay Tesalonica: “Dakami a mismo ipagpannakkeldakayo iti nagtetengngaan dagiti kongregasion ti Dios gapu iti panagibtur ken pammatiyo kadagiti amin a pannakaidadanesyo ken kadagiti rigat a sagsagabaenyo. Daytoy ket pammaneknek iti nalinteg a panangukom ti Dios, a mangiturturong iti pannakaibilangyo a maikari iti pagarian ti Dios, a maigapu iti dayta pudno unay nga agsagsagabakayo.” (2 Tes. 1:3-5) Inton matay ti maudi a kameng ti napulotan ditoy daga, no kaanonto man dayta, makompleton ti nailangitan a gobierno ti Dios. Nakaragragsakto la ketdi dayta, idiay man langit wenno ditoy daga!

[Footnotes]

Mailawlawagyo Kadi?

• Ania ti impalgak ti Dios kenni Abraham mainaig iti Aldaw ti Panangukom?

• Apay a naibilang a nalinteg ni Abraham?

• Ania ti pagbanagan ti pannakaibilang a nalinteg dagiti kameng ti bin-i ni Abraham?

• Ania ti masigurado ti amin a Kristiano?

[Ladawan iti panid 20]

Pinaregta ni Jesus dagiti pasurotna a sipipinget a gun-odenda ti Pagarian

[Ladawan iti panid 21]

Idi Pentecostes 33 K.P., inrugi ni Jehova a pinili dagiti segundario a kameng ti bin-i ni Abraham

[Dagiti Ladawan iti panid 23]

Agyaman dagiti sabsabali a karnero kadagiti napulotan a Kristiano a kakaduada bayat ti maudi nga al-aldaw