Pinagbalinda nga Ad-adda a Makapnek ti Biagda Maaramidyo Met Kadi ti Kasta?

NI Marc, maysa a regular pioneer a taga-Canada, ket agtartrabaho iti paset-tiempo iti maysa a kompania nga agar-aramid kadagiti moderno nga alikamen a maus-usar iti law-ang. Intukon ti superbisorna a maingato ti saad ken sueldona no agtrabaho iti amin-tiempo. Ania ti inaramid ni Marc?

Ni Amy, a taga-Pilipinas, ket regular pioneer bayat nga ages-eskuela. Kalpasan a nagraduar, natukonan iti amin-tiempo a trabaho nga agkalikagum iti adu nga oras ngem dakkel ti sueldo. Ania ti inaramid ni Amy?

Nagduma ti desision da Marc ken Amy, ket ti resulta ti inaramidda ipakitana a nainsiriban ti naibalakad kadagiti Kristiano iti nagkauna a Corinto. Insurat ni apostol Pablo: ‘Agbalin koma dagidiay mangus-usar iti lubong kas kadagidiay di mangus-usar a naan-anay.’​—1 Cor. 7:29-31.

Diyo Naan-anay nga Usaren ti Lubong

Sakbay nga ammuentayo ti napasamak kada Marc ken Amy, usigentayo biit ti kaipapanan ti sao a “lubong” (wenno, koʹsmos iti Griego) nga inusar ni Pablo iti suratna kadagiti taga-Corinto. Iti dayta a teksto, tuktukoyen ti koʹsmos ti sistema ti lubong a pagbibiagantayo ita​—ti kagimongan dagiti tattao​—a pakairamanan dagiti gagangay a bambanag a paset ti inaldaw a panagbiag kas iti balay, taraon, ken kawes.a Tapno magun-odan dagita nga inaldaw a kasapulan, kaaduan kadatayo ti masapul a mangged. Dayta ti makagapu nga usarentayo ti lubong tapno maitungpaltayo ti Nainkasuratan nga obligasiontayo a mangipaay iti kasapulantayo ken ti pamiliatayo. (1 Tim. 5:8) Nupay kasta, ammotayo a “ti lubong aglabas.” (1 Juan 2:17) Ngarud, usarentayo ti lubong agpaay laeng kadagiti kasapulantayo ket saan koma a “naan-anay.”​—1 Cor. 7:31.

Gapu ta natignayda iti balakad ti Biblia a limitaranda ti panangusarda iti lubong, adu a kakabsat ti nangtingiting iti kasasaadda, kinissayanda ti panawenda nga agtrabaho, ket pinasimpleda ti panagbiagda. Kas resultana, nagbalin a makapnek ti biagda gapu ta ad-adu ti panawenda iti pamiliada ken iti panagserbida ken Jehova. Maysa pay, gapu iti simple a panagbiagda, ad-addan nga agpannurayda ken Jehova imbes nga iti lubong. Mapasimpleyo met kadi ti biagyo tapno mayun-unayo dagiti interes ti Pagarian ti Dios?​—Mat. 6:19-24, 33.

“Nasingsingedkamin ken Jehova”

Ni Marc, a nadakamat itay, impangagna ti balakad ti Biblia a dina usaren a naan-anay ti lubong. Saanna nga inawat ti makaawis a tukon kenkuana. Kalpasan ti sumagmamano nga aldaw, nangatngato a sueldo ti intukon ti superbisorna tapno awatenna ti baro a trabaho. “Maysa a pannubok dayta,” kuna ni Marc, “ngem pinagkedkedak latta.” Imbagana no apay: “Kayatmi ken baketko a Paula nga ipamaysa ti biagmi iti panagserbi ken Jehova agingga iti kabaelanmi. Gapuna, pinasimplemi ti panagbiagmi. Inkararagmi ken Jehova nga ikkannakami iti sirib a mangragpat iti kalatmi ket inkeddengmi no kaano a mangrugikami nga agpayunir.”

Kinuna ni Paula: “Kada lawas, tallo nga aldaw nga agtrabahoak kas sekretaria iti maysa nga ospital a nangted kaniak iti umdas a sueldo. Agserserbiak met kas regular pioneer. Ngem kas ken Marc, ti tarigagayko ket agserbi ken Jehova iti lugar a dakdakkel ti panagkasapulan kadagiti manangiwaragawag iti Pagarian. Idi imbagak nga agikkatakon, imbaga ti superbisorko a kualipikadoak para iti bakante a saad nga executive secretary. Nangato ti sueldo iti dayta a saad, ngem desididoak latta nga agikkat. Idi imbagak iti superbisorko no apay a diak inawat dayta a saad, pinadayawanna ti pammatik.”

Di nagbayag kalpasanna, naibaon da Marc ken Paula kas special pioneer iti bassit a kongregasion iti naiputputong a paset ti Canada. Ania ti nagbanagan ti iyaakarda? Kinuna ni Marc: “Dandani kagudua iti panagbiagko a tinagiragsakko ti trabahok a nangato ti sueldona. Gapuna, madanaganak idi nagikkatak, ngem binendisionan ni Jehova ti ministeriomi. Kasta unay ti ragsakmi gapu iti panangtulongmi kadagiti tattao nga agserbi iti Dios. Nakatulong met ti panagpayunirmi iti relasionmi nga agassawa. Naisentro dagiti saritaanmi kadagiti pudno a napateg​—dagiti naespirituan a bambanag. Nasingsingedkamin ken Jehova.” (Ara. 20:35) Kinuna pay ni Paula: “No agikkatka iti trabahom ken panawam ti nakairuamam a nanam-ay a biag, masapul a naan-anay nga agtalekka ken Jehova. Kasta ti inaramidmi, ket binendisionannakami ni Jehova. Imparikna dagiti kakabsat iti baro a kongregasionmi nga ipatpateg ken kasapulandakami. Ita, imbes nga usarek ti pigsak iti sekular a trabaho, us-usarek dayta a tumulong kadagiti tattao nga agserbi iti Dios. Nakaragragsakak iti daytoy nga annongek.”

‘Natalged iti Pinansial Ngem Saan a Naragsak’

Sabali ti inaramid ni Amy, a nadakamat itay. Inawatna ti makaawis ken amin-tiempo a saad a naitukon kenkuana. Kuna ni Amy: “Iti umuna a tawen, naregtaak pay met iti ministerio, ngem ti panangragpat iti nangatngato a saad ti in-inut a nagbalin a kalatko imbes a ti panagserbik ken Jehova. Naitukon kaniak ti makaawis ken nangatngato a saad ket dayta ti nangbusbosak iti pigsak. Bayat nga umad-adu ti annongek, bumasbassit ti tiempok a mangasaba. Idi agangay, saanakon a mangaskasaba.”

No lagipenna ti napalabas, kuna ni Amy: “Nagbalinak a natalged iti pinansial. Makapasiarak iti kayatko a papanan ken tinagiragsakko ti natan-ok a saad. Ngem saanak a naragsak. Nupay adda kuartak, adu ti parikutko. Diak ammo no apay. Ngem idi agangay, nabigbigko a gapu iti panangyun-unak iti karerak iti daytoy a lubong, gistay ‘nayaw-awanak manipud iti pammati.’ Kas resultana, agsagsagabaak iti ‘adu nga ut-ot’ nga eksakto nga imbaga ti Biblia.”​—1 Tim. 6:10.

Ania ti inaramid ni Amy? Kunana: “Nagpatulongak kadagiti panglakayen tapno maisubli ti relasionko iti Dios ket rinugiakon ti makigimong. Bayat ti kanta, nakasangitak. Nalagipko ti naragsak a lima a tawen a pannakipasetko iti panagani kas payunir, uray pay napanglawak la idi. Ammok a masapul nga isardengkon ti panangipangpangrunak iti kuarta ken iyun-unak dagiti interes ti Pagarian. Nagpayakarak iti nababbaba a saad, a mangted kaniak iti kagudua laeng iti dati a sueldok. Ngem nangrugiak manen a mangasaba.” Kinuna ni Amy: “Naragsakak idin nga agpaypayunir iti sumagmamano a tawen. Tagtagiragsakek itan ti pannakapnek a diak pay napadasan idi ad-adu ti panawen a busbusbosek iti sekular a trabaho.”

Mabalinyo met kadi a balbaliwan ti kasasaadyo ken pasimplien ti panagbiagyo? No usarenyo ti panawenyo a mangyun-una kadagiti interes ti Pagarian, ad-adda a makapnekto met ti biagyo.​—Prov. 10:22.

[Footnote]

[Blurb iti panid 19]

Mabalinyo kadi a balbaliwan ti kasasaadyo ken pasimplien ti panagbiagyo?

[Kahon/Ladawan iti panid 19]

‘Dagus a Nagustuak!’

Ni David, maysa a panglakayen iti Estados Unidos, kayatna a danggayan ti pamiliana iti amin-tiempo a panagserbi. Inyurnosna nga agtrabaho laengen iti paset-tiempo, ket nagpayunir. Nagbalin kadi a naragragsak ti biagna? Kalpasan ti sumagmamano a bulan, nagsurat ni David iti gayyemna: “Awanen ti ad-adda a makapnek ngem iti naan-anay a panagserbik ken Jehova a kadua ti pamiliak. Pagarupko a mabayag pay sakbay a mairuamak iti panagpayunir, ngem dagus met a nagustuak! Talaga a makapagin-awa.”

[Ladawan iti panid 18]

Da Marc ken Paula iti pangasabaan