Ania ti Masakbayantayo?
APAY A NAPATEG A SAPULEN TI SUNGBAT? Ti panangmatmat ti maysa a tao iti masanguanan apektaranna ti wagas ti agdama a panagbiagna. Kas pagarigan, dagidiay awan unay ti namnamada iti masanguanan mabalin a matuladda ti prinsipio a: “Mangan ken uminumtayo, ta inton bigat mataytayo.” (1 Corinto 15:32) Imbes a mangyeg iti napaypayso a kinatalingenngen, ti kasta a kababalin ket masansan nga agbanag iti nalabes a pampannangan, panaginum iti arak, ken panagdanag.
Kinaagpaysuanna, no tao laeng ti pagpampannurayantayo, nalidem ti masanguanantayo. Nakarkaro itan ti polusion iti angin, danum, ken daga. Dumakdakkel ti posibilidad a mapasamak ti nuklear a gubat ken ti iraraut dagiti terorista. Masaksakit ken napanglaw ti binilion a tattao iti intero a lubong. Ngem adda dagiti nasayaat a rason a pangnamnamaan.
Saan a kas kadagiti tattao a dida siuumiso a maipakpakauna ti masanguanan, ni Jehova a Dios dineskribirna ti bagina kas “Daydiay a manipud punganay ibagbagana ti pagnguduan, ken manipud iti nabayagen a tiempo ti bambanag a saan pay a naaramid.” (Isaias 46:10) Ania ti ibagbaga ni Jehova maipapan iti namnamatayo iti masanguanan?
Ti Isursuro ti Biblia
Saan nga ipalubos ni Jehova nga interamente a madadael ti daga wenno dagiti sibibiag iti dayta. Kinapudnona, ikarkari ti Biblia a ti Dios ‘dadaelenna dagidiay mangdaddadael iti daga.’ (Apocalipsis 11:18) Babaen ti Pagarianna, wenno ti nailangitan a gobierno, pukawento ni Jehova ti kinadakes ditoy daga ken pataudenna dagiti kasasaad a kas iti pinanggepna idi punganay. (Genesis 1:26-31; 2:8, 9; Mateo 6:9, 10) Dagiti sumaganad a bersikulo iti Biblia ket mangted kadatayo iti panirpatan iti masanguanan, a deskribirenna dagiti pasamak nga asidegen a mangapektar iti tunggal tao ditoy daga.
Salmo 46:8, 9. “Umaykayo, imatanganyo ti ar-aramid ni Jehova, no kasano a nangipasdek iti makapamalanga a paspasamak iti daga. Pagsardengenna dagiti gubat agingga iti ungto ti daga. Rungrungduenna ti bai ket putedputedenna ti pika; dagiti kareson ipuorna iti apuy.”
Isaias 35:5, 6. “Iti dayta a tiempo maluktanto ti matmata dagidiay bulsek, ket maluktanto ti mismo a laplapayag dagidiay tuleng. Iti dayta a tiempo kumalay-atto daydiay pilay a kas iti panagkalay-at ti kalakian nga ugsa, ket ti dila daydiay umel umkisto gapu iti ragsak. Ta iti let-ang pimsuakton ti dandanum, ken ti naapres nga ayus iti desierto a tanap.”
Isaias 65:21, 22. “Pudno unay a mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; saandanto nga agmula ket sabali ti mangan.”
Daniel 2:44. “Mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.”
Juan 5:28, 29. “Um-umayen ti oras nga amin dagidiay adda kadagiti pakalaglagipan a tanem mangngegdanto ti timekna [ni Jesus] ket rummuarda.”
Apocalipsis 21:3, 4. “Ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”
No Kasano a ti Sungbat ti Biblia ket Makaipaay iti Napaypayso a Talna ti Panunot
Kasla saan a nakappapati dagita a kasasaad. Ngem saan a tao no ket ti Dios a mismo ti nangikari kadagita. Ket ni Jehova a Dios “saanna a mabalin ti agulbod.”—Tito 1:2.
No sursuruem ti agtalek kadagiti kari ti Dios ken tungpalem dagiti bilinna, masagrapmo ti manayon a kinatalingenngen uray pay kasano karigat dagiti mapasaram a kasasaad. Ti gubat, kinapanglaw, sakit, ken uray dagiti rigat a kakuyog ti panaglakay ken ti umadani nga ipapatay—awan kadagita ti agnanayon a mangpukaw iti kinatalingenngenmo. Apay? Agsipud ta makapagtalekka a pukawento ti Pagarian ti Dios dagiti dakes nga epekto dagita a pakarigatan.
Kasanom a masagrap ti kasta a namnama agpaay iti masanguanan? Rumbeng a ‘pabaruem ti panunotmo’ tapno mapaneknekam iti bagim “ti naimbag ken makaay-ayo ken naan-anay a pagayatan ti Dios.” (Roma 12:2) Mabalin pay ketdi a kasapulam ti kanayonan a pammaneknek a talaga a mapangnamnamaam dagiti kari ti Biblia. Makagunggona ti kasta a panagsukimat. Babaen laeng iti dayta a maaddaanka iti nataltalingenngen a biag.
[Dagiti Ladawan iti panid 8, 9]
Ania ti ibagbaga ti Sao ti Dios maipapan iti masanguanan?