Ti Masursurotayo ken Jesus

Maipapan iti Pudno a Dios

Adda kadi nagan ti Dios?

Insuro ni Jesus nga adda nagan ti Dios. Kinunana: “Agkararagkayo, ngarud, a kastoy: ‘Amami nga adda iti langlangit, masantipikar koma ti naganmo.’” (Mateo 6:9) Ipakaammo ti Biblia a ti nagan ti Dios ket Jehova. (Salmo 83:18) Maipapan kadagiti adalanna, inkararag ni Jesus ken Amana: “Impakaammok kadakuada ti naganmo.”​—Juan 17:26.

Siasino ni Jehova?

Ni Jesus inawaganna ni Jehova a “ti maymaysa a pudno a Dios” agsipud ta ni Jehova isu ti Namarsua. (Juan 17:3) Kinuna ni Jesus: “Saanyo aya a nabasa a ti nangparsua kadakuada nanipud idi damo inaramidna ida a lalaki ken babai?” (Mateo 19:4) Kinunana pay: “Ti Dios maysa nga Espiritu.” (Juan 4:24) Saantayo ngarud a makita ti Dios.​—Exodo 33:17-20.

Ania ti kalikaguman ti Dios kadatayo?

Idi adda nangyimtuod ken Jesus no ania ti kapatgan a bilin, insungbatna: “Ti umuna ket, ‘Denggem, O Israel, ni Jehova a Diostayo ket maymaysa a Jehova, ket masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo ken buyogen ti intero a pigsam.’ Ti maikadua isu daytoy, ‘Masapul nga ayatem ti padam a tao a kas iti bagim.’”​—Marcos 12:28-31.

Kasanotayo a maipakita nga ay-ayatentayo ti Dios?

Kinuna ni Jesus: “Ay-ayatek ti Ama.” Kasanona nga impakita dayta? “No kasano a ti Ama inikkannak iti bilin nga aramiden, kasta ti ar-aramidek,” inlawlawagna. (Juan 14:31) Kinunana pay: “Kankanayon nga aramidek ti bambanag a makaay-ayo kenkuana.” (Juan 8:29) Maay-ayotayo ti Dios babaen ti panangammotayo iti maipapan kenkuana. Idi inkararaganna dagiti adalanna, kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios.”​—Juan 17:3; 1 Timoteo 2:4.

Kasanotayo a maammuan ti maipapan iti Dios?

Ti maysa a pamay-an a maammuantayo ti maipapan iti Dios ket babaen ti panangusigtayo kadagiti banag nga inaramidna. Kas pagarigan, kinuna ni Jesus: “Paliiwenyo a sipapasnek dagiti tumatayab iti langit, agsipud ta saanda nga agmula iti bin-i wenno agani wenno agipempen kadagiti kamalig; kaskasdi a ti nailangitan nga Amayo taraonanna ida. Saan kadi a napatpategkayo ngem isuda?” Ania ti kayat nga isuro ni Jesus? Isursurona a ditay koma ipalubos a dagiti pakadanagan maipapan kadagiti masapsapultayo ti mangpasardeng kadatayo nga agserbi iti Dios.​—Mateo 6:26-33.

Ti kasayaatan a pamay-an a maammuantayo ti maipapan ken Jehova ket babaen ti panangadal iti Biblia a Saona. Sigun ken Jesus, ti Kasuratan ket “sao ti Dios.” (Lucas 8:21) Kinuna ni Jesus iti Dios: “Ti saom ket kinapudno.”​—Juan 17:17; 2 Pedro 1:20, 21.

Tinulongan ni Jesus dagiti tattao a mangammo iti kinapudno maipapan ken Jehova. Maipapan ken Jesus, kinuna ti maysa kadagiti adalanna: “Saan kadi a rumayrayray ti pusota bayat nga agsasao idi kadata iti dalan, bayat a lukluktanna idi a naan-anay kadata dagiti Kasuratan?” (Lucas 24:32) Tapno maammuantayo ti maipapan iti Dios, masapul a napakumbabatayo, a situtuloktayo nga agpaisuro. Kinuna ni Jesus: “Malaksid no agbaw-ingkayo ken agbalinkayo a kas ub-ubbing, saankayto a pulos makastrek iti pagarian ti langlangit.”​—Mateo 18:3.

Apay a ti pannakaammo iti Dios ket mangyeg iti kinaragsak?

Ipapaay ti Dios dagiti kasapulantayo tapno maawatantayo ti panggep ti biag nga intedna. Kinuna ni Jesus: “Naragsak dagidiay sipapanunot iti naespirituan a kasapulanda.” (Mateo 5:3) Isursuro kadatayo ni Jehova ti kasayaatan a wagas ti biag. “Naragsak dagidiay dumdumngeg iti sao ti Dios ken mangsalsalimetmet iti dayta!” kinuna ni Jesus.​—Lucas 11:28; Isaias 11:9.

Para iti kanayonan nga impormasion, kitaem ti kapitulo 1 ti libro nga Ania a Talaga ti Isursuro ti Biblia?a

Impablaak dagiti Saksi ni Jehova.

[Ladawan iti panid 16]

“Impakaammok kadakuada ti naganmo.”​—Juan 17:26

[Dagiti Ladawan iti panid 16]

Mabalintayo nga ammuen ti maipapan ken Jehova babaen ti panangusigtayo iti nakaparsuaan ken iti Biblia