Maysa a Mangpalpaliiw a Kumitkita iti Pategtayo

Umadanika iti Dios

Maysa a Mangpalpaliiw a Kumitkita iti Pategtayo

‘KONDENARENNATAYO dagiti pusotayo.’ Babaen kadagita a sasao, bigbigen ti Biblia a no dadduma, mabalin nga ituggodnatayo ti pusotayo nga agbalin a manangbabalaw unay iti bagitayo. Kinapudnona, mabalin a kanayon a mariknatayo a ditay maikari iti panagayat ken pannakaseknan ti Dios. Nupay kasta, ipatalged kadatayo ti Biblia: “Ti Dios dakdakkel ngem kadagiti pusotayo ket ammona ti amin a bambanag.” (1 Juan 3:19, 20) Ad-adda nga am-ammonatayo ti Dios ngem iti bagitayo. Ti panangmatmatna kadatayo ket mabalin a naiduma unay iti panangmatmattayo iti bagitayo. Kasano ngarud ti kapategtayo iti imatang daydiay addaan iti kapatgan a kapanunotan nga isu ni Jehova a Dios? Maammuantayo ti sungbat babaen iti makatukay nga ilustrasion nga inusar ni Jesus iti dua a nagduma a kasasaad.

Iti maysa a kasasaad, kinuna ni Jesus a ti “dua a billit-tuleng mailako iti sinsilio a bassit ti pategna.” (Mateo 10:29, 31) Sigun iti Lucas 12:6, 7, kinuna pay ni Jesus: “Saan kadi a ti lima a billit-tuleng mailako iti dua a sinsilio a bassit ti pategna? Kaskasdi awan uray maysa kadakuada ti malipatan iti sanguanan ti Dios. . . . Dikay agbuteng; napatpategkayo ngem iti adu a billit-tuleng.” Dayta a simple ngem nabileg nga ilustrasion isurona kadatayo no kasano ti panangmatmat ni Jehova iti tunggal maysa kadagiti agdaydayaw kenkuana.

Dagiti billit-tuleng ket karaman kadagiti kalakaan iti amin a tumatayab a mabalin a pagtaraon. Awan duadua a napaliiw ni Jesus dagiti napanglaw a babbai ken nalabit uray ti mismo nga inana nga adda iti tiendaan a gumatgatang kadagita a billit tapno adda pagtaraon ti pamiliada. Ti presio idi ti dua a billit-tuleng ket maysa nga assarion a sinsilio, a ti agdama a gatadna ket awan pay tallo a pisos. Dagita a billit ket nakalaklaka ta para iti dua a sinsilio, saan la nga uppat ti magatangmo no di ket lima a billit-tuleng, ta ti maysa ket buntok a kasla awan ti pategna.

Inlawlawag ni Jesus nga awan uray maysa a billit-tuleng a “malipatan iti sanguanan ti Dios” wenno matnag “iti daga a saan” nga ammo ni Amatayo. (Mateo 10:29) Makita ni Jehova ti tunggal billit-tuleng a matnag iti daga wenno nalabit gapu ta nadunor wenno nagdisso tapno agbirok iti taraonna. Dagita a kasla awan pategna a billit ket saan a nakabasbassit tapno di parsuaen ni Jehova ken saanda a bassit unay tapno dina ida lagipen. Kinapudnona, ipatpategna ida agsipud ta napategda kas sibibiag a parsua. Naawatam kadi ti leksion iti ilustrasion ni Jesus?

Iti panangisurona, masansan a nagusar ni Jesus kadagiti panamaggidiat ken nangisuro babaen iti simple a leksion sa impakitana no kasano nga agaplikar dayta kadagiti mas serioso a banag. Kas pagarigan, kinuna pay ni Jesus: “Dagiti wak saanda nga agmula iti bin-i wenno uray agani, ket awananda iti kamarin wenno uray kamalig, ket kaskasdi taraonan ida ti Dios. Anian a napatpategkayo pay ngem dagiti tumatayab?” (Lucas 12:24) Ita bimmatad ti punto ni Jesus maipapan kadagiti billit-tuleng: No aywanan ni Jehova dagitoy babassit a billit, anian nga ad-adda pay nga aywananna dagiti tattao nga agay-ayat ken agdaydayaw kenkuana!

Gapuna, ditay koma panunoten nga awan serserbitayo isu a ditay maikari iti panangaywan ti Dios a “dakdakkel ngem kadagiti pusotayo.” Saan kadi a makaliwliwa a maammuan a ti Namarsua kadatayo ket makitana dagiti ditay makita a mismo iti bagitayo?

[Picture Credit Line iti panid 9]