Ammo ni Jehova ti Bilang “Dagiti Mismo a Buok ti Uloyo”

“Awan maysa [a billit-tuleng]ti matnag iti daga a saan nga ammo ni Amayo. Ngem dagiti mismo a buok ti uloyo nabilangda amin.”​—MATEO 10:29, 30.

1, 2. (a) Apay nga impagarup ni Job nga isu ket binaybay-an ti Dios? (b) Ti kadi insawang ni Job ipakitana a tinallikudanna ni Jehova? Ilawlawagyo.

“UMAWAGAK kenka, O Dios, ngem pulos a dika sumungbat. No agkararagak, dinak met ipangag. Naranggaska la unay kaniak; idadanesnak iti amin a pigsam.” Nakaro ti leddaang ti tao a nangisawang kadagita a sasao, ket matarusantayo no apay. Napukawna dagiti sanikuana, maysa a karkarna a didigra ti nangpapatay kadagiti annakna, ken nagsagaba iti nakaro a sakit. Dayta a tao isu ni Job, ket nailanad iti Biblia ti nakalkaldaang a kapadasanna tapno pakaadalantayo.​—Job 30:20, 21, Ti Baro a Naimbag a Damag Biblia.

² Babaen iti dayta nga inyebkasna, agparang a tinallikudan ni Job ti Dios, ngem saan a kasta. Iyes-esngawna laeng ti linaon ti mariribukan a pusona. (Job 6:2, 3) Dina ammo a ni Satanas ti pakaigapuan dagiti suotna isu a sibibiddut nga impagarupna nga isu ket binaybay-an ti Dios. Naminsan, kinunana pay ketdi ken ni Jehova: “Apay nga ilingedmo ti mismo a rupam ken ibilangnak kas kabusormo?”a​—Job 13:24.

3. No dumteng dagiti pakarigatan, ania ti mabalin a panunotentayo?

³ Iti kaaldawantayo, adu nga adipen ni Jehova ti agtultuloy nga agsagsagaba gapu kadagiti gubat, kinagulo iti politika wenno kagimongan, natural a didigra, panaglakay, sakit, nakaro a kinapanglaw, ken panangiparit ti gobierno. Nalabit nga uray dakayo madama a maipaspasangokayo met iti maysa a kita ti pakasuotan. No dadduma, mabalin a panunotenyo nga arigna nga ilinglinged ni Jehova ti rupana kadakayo. Sigurado nga ammoyo ti sasao ti Juan 3:16: “Ti Dios inayatna ti lubong iti kasta unay isu nga intedna ti bugbugtong nga Anakna.” Ngem no agsagabakayo ket awan ti makitayo a pannakabang-ar, mabalin a panunotenyo: ‘Talaga kadi nga ay-ayatennak ti Dios? Ammona kadi ti agdama a mapaspasarak? Ipatpategnak kadi kas indibidual?’

4. Ania nga agtultuloy a kasasaad ti masapul nga ibturan idi ni Pablo, ket kadagiti ania a wagas a mabalin nga apektarannatayo ti kasta a kasasaad?

⁴ Usigentayo ti napasamak ken ni apostol Pablo. “Adda naited kaniak a siit iti lasag, maysa nga anghel ni Satanas, tapno agtultuloy a mangtungpa kaniak,” insuratna sana innayon, “Namitlo a nagpakaasiak iti Apo tapno sumina koma kaniak dayta.” Impangag ni Jehova ti pakaasina. Nupay kasta, impamatmatna ken ni Pablo a saan a bumallaet babaen ti maysa a milagro a solusion. Imbes ketdi, masapul nga agpannuray ni Pablo iti pannakabalin ti Dios a tumulong kenkuana a mangdaer iti ‘siit iti lasagna.’b (2 Corinto 12:7-9) Kas ken Pablo, mabalin a madama nga agpaspasarkayo iti maysa a suot. Nalabit a pinanunotyo, ‘Saan ngata nga ammo ni Jehova ti kasasaadko wenno saan a maseknan kaniak gapu ta agparang nga awan ti tignayna iti madama a pakasusuotak?’ Sigurado nga ammona! Naipaganetget ti dakkel a pannakaseknan ni Jehova iti tunggal matalek nga adipenna babaen iti kinuna ni Jesus kadagiti apostolna di nagbayag kalpasan ti panangpilina kadakuada. Kitaentayo no kasano a mapabilegnatayo dagiti sinaona.

“Dikay Agbuteng”​—Apay?

5, 6. (a) Kasano a pinakired ni Jesus ti pakinakem dagiti apostolna mainaig iti mapasamak iti masanguanan? (b) Kasano nga impakita ni Pablo nga adda panagtalekna nga isu ket aywanan ni Jehova?

⁵ Immawat dagiti apostol iti naisangsangayan a pannakabalin manipud ken ni Jesus, agraman ti “kinaturay kadagiti narugit nga espiritu, tapno paruarenda dagitoy ken tapno agasanda ti tunggal kita ti sagubanit ken tunggal kita ti an-annayen.” Kaskasdi, dina kayat a sawen a dida pulos makapasar kadagiti suot ken rigat. Iti kasumbangirna, detalyado a dineskribir ni Jesus dagiti bambanag a mapasaranda. Nupay kasta, indagadagna kadakuada: “Dikay agbuteng kadagidiay mangpapatay iti bagi ngem saanda a kabaelan a papatayen ti kararua; no di ket agbutengkayo iti daydiay makabalin a mangdadael agpadpada iti kararua ken bagi idiay Gehenna.”​—Mateo 10:1, 16-22, 28.

⁶ Tapno matulonganna dagiti apostolna a mangtarus no apay a dida rumbeng nga agbuteng, nangted ni Jesus iti dua nga ilustrasion. Kinunana kadakuada: “Saan aya a ti dua a billit-tuleng mailako iti sinsilio a bassit ti pategna? Kaskasdi awan maysa kadakuada ti matnag iti daga a saan nga ammo ni Amayo. Ngem dagiti mismo a buok ti uloyo nabilangda amin. Gapuna dikay agbuteng: napatpategkayo ngem iti adu a billit-tuleng.” (Mateo 10:29-31) Imutektekanyo ta ipaspasimudaag ni Jesus a ditay masapul ti agbuteng iti sidong ti pakarigatan yantangay makapagtalektayo nga aywanannatayo ni Jehova kas indibidual. Nalawag nga addaan iti kasta a panagtalek ni apostol Pablo. Insuratna: “No ti Dios adda kadatayo, siasinonto ti bumusor kadatayo? Daydiay saan a nangipaidam uray pay ti bukodna nga Anak no di ket inyawatna a maipaay kadatayo amin, apay a saannanto a siaasi nga ipaay met kadatayo mairaman kenkuana ti amin a dadduma a bambanag?” (Roma 8:31, 32) Aniaman a suot ti pakaipasanguanyo, masiguradoyo met nga aywanannakayo ni Jehova kas indibidual no la ket ta agtalinaedkayo a nasungdo kenkuana. Ad-adda pay a mapatalgedan ti panangaywan ni Jehova kadakayo kas indibidual bayat a sukimatentayo ti indagadag ni Jesus kadagiti apostolna.

Pateg ti Maysa a Billit-Tuleng

7, 8. (a) Ania ti panangmatmat kadagiti billit-tuleng idi kaaldawan ni Jesus? (b) Ania ti nalawag a makagapu a nausar iti Mateo 10:29 ti Griego a sao a mangiladawan iti kinabassit ti “billit-tuleng”?

⁷ Dagiti ilustrasion ni Jesus silalawag a deskribirenna ti panangipateg ni Jehova iti tunggal adipenna. Usigentayo nga umuna dagiti billit-tuleng. Idi kaaldawan ni Jesus, dagiti billit-tuleng ket nagserbi kas taraon, ngem gapu ta agdadaelda kadagiti mula, adu ti nangibilang kadakuada kas peste. Nagadu ken nalaka ti billit-tuleng nga uray la makagatangka iti dua a billit iti presio nga awan pay tallo a piso no iti agdama a panawen. No madoble dayta a gatad, saan laeng nga uppat no di ket lima ti magatangmo​—a mainayon laengen ti maikalima a billit, a kasla awan ti pategna!​—Lucas 12:6.

⁸ Panunotenyo met ti kabassit daytoy a gagangay a billit. No idilig kadagiti nagadu a sabali a tumatayab, nakabasbassit uray ti nataenganen a billit-tuleng. Ngem ti Griego a sao a naipatarus kas “billit-tuleng” iti Mateo 10:29 espesipiko a tukoyenna dagiti babassit a billit-tuleng. Nalawag a kayat ni Jesus a ti kabassitan ken kalakaan a billit ti mapanunot dagiti apostolna. Kas kunaen ti maysa a reperensia, “tinukoy ni Jesus ti nakabasbassit a billit ken inusarna ti sao a mangiladawan iti kinabassit.”

9. Ania ti nabileg a punto ti ilustrasion ni Jesus maipapan kadagiti billit-tuleng?

⁹ Nabileg ti punto nga isuro ti panangidilig ni Jesus kadagiti billit-tuleng: Napateg ken ni Jehova ti kasla awan pategna kadagiti tattao. Ad-adda nga impaganetget ni Jesus daytoy a kinapudno babaen ti pananginayonna a saan a “matnag iti daga” ti maysa a bassit a billit-tuleng a di ammo ni Jehova.c Nalawag ti leksion. No maseknan ni Jehova a Dios iti kabassitan ken kalakaan a billit, anian nga ad-adda a maseknan iti kasasaad ti maysa a tao a nangikeddeng nga agserbi kenkuana!

10. Ania ti ipaganetget ti ebkas a: “Dagiti mismo a buok ti uloyo nabilangda amin”?

¹⁰ Malaksid iti ilustrasionna maipapan iti billit-tuleng, kinuna ni Jesus: “Dagiti mismo a buok ti uloyo nabilangda amin.” (Mateo 10:30) Daytoy nga ababa ngem nabagas a sasao ipaganetgetna ti punto ti ilustrasion ni Jesus maipapan kadagiti billit-tuleng. Panunotenyo: Agarup 100,000 ti buok iti ulo ti tao. Kaaduanna a kasla agpapada dagiti buok, ket awan ti maysa a buok a maikari iti naisangsangayan nga atension. Nupay kasta, tunggal buok ket ammo ken nabilang ni Jehova a Dios. Gapuna, adda kadi aniaman a benneg ti biagtayo a di ammo ni Jehova? Sigurado a maawatan ni Jehova ti naisangsangayan a pakabuklan ti tunggal maysa kadagiti adipenna. Kinapudnona, ‘makitana no ania ti puso.’​—1 Samuel 16:7.

11. Kasano nga inyebkas ni David ti panagtalekna a maseknan kenkuana ni Jehova kas indibidual?

¹¹ Ni David, a nakapasar a mismo iti rigat, agtalek a maseknan kenkuana ni Jehova. “O Jehova, sinukimatnak, ket ammonak,” insuratna. “Sika naammuam ti panagtugawko ken itatakderko. Naimutektekam ti panunotko manipud adayo.” (Salmo 139:1, 2) Makapagtalekkayo met nga ammonakayo ni Jehova kas indibidual. (Jeremias 17:10) Diyo dagus a panunoten nga awan serbiyo ken dinakayo makita dagiti mata ni Jehova a sisisiput kadagiti amin a banag!

“Ikabilmo Dagiti Luak iti Lalat a Boteliam”

12. Apay nga ammotayo a naan-anay nga ammo ni Jehova dagiti rigat a sagsagabaen dagiti adipenna?

¹² Saan laeng nga ammo ni Jehova ti tunggal maysa kadagiti adipenna no di ket naan-anay pay nga ammona dagiti sagsagabaenda kas indibidual. Kas pagarigan, idi mairurrurumen dagiti Israelita kas tagabo, kinuna ni Jehova ken ni Moises: “Di mapagduaduaan a nakitak ti pannakaparigat ti ilik nga adda idiay Egipto, ket nangngegko ti ikkisda kas imbunga dagidiay mangdagdagdag kadakuada nga agtrabaho; agsipud ta ammok unay dagiti rigat a sagsagabaenda.” (Exodo 3:7) Anian a makaliwliwa a panunoten a no masusuottayo, makita ni Jehova no ania ti mapaspasamak ket ipangagna dagiti arungaingtayo! Sigurado nga ikabilanganna ti panagsagabatayo.

13. Ania ti mangipakita a pudno a makipagrikna ni Jehova kadagiti adipenna?

¹³ Ti panagrikna ni Jehova kadagiti Israelita ti ad-adda pay a mangipakita iti pannakaseknan ni Jehova kadagidiay nasinged kenkuana. Nupay ti panagsagabada ket masansan a resulta ti bukodda a kinasubeg, insurat ni Isaias maipapan ken ni Jehova: “Bayat ti isuamin a pannakaparigatda isu naparigatan.” (Isaias 63:9) No kasta, kas maysa a matalek nga adipen ni Jehova, masiguradoyo a no masaksaktankayo, masaksaktan met ni Jehova. Saannakay kadi a tignayen dayta a mangsango a situtured iti pakarigatan ket itultuloyyo nga ipaay ti kasayaatan a panagserbi ken ni Jehova?​—1 Pedro 5:6, 7.

14. Iti sidong dagiti ania a kasasaad a naputar ti Salmo 56?

¹⁴ Nagtalek ni Ari David nga isu ket ipatpateg ni Jehova ken marikna ti Dios ti rigat a mapaspasaranna, kas ipakita ti Salmo 56, a pinutar ni David bayat nga itartarayanna ni Ari Saul a mangganggandat iti biagna. Nagtalaw ni David idiay Gat, ngem maamak a matiliw idi isu ket nabigbig dagiti Filisteo. Insuratna: “Dagiti kalabanko nagsiksikbabda iti intero nga agmalem, ta adu ti sipapalangguad a makigubgubat kaniak.” Gapu iti napeggad a kasasaadna, immadani ni David ken ni Jehova. “Iti intero nga agmalem saksaktanda dagiti kabukbukodak nga aramid,” kinunana. “Amin dagiti panunotda bumusor kaniak maipaay iti dakes.”​—Salmo 56:2, 5.

15. (a) Ania ti kayat a sawen ni David idi kiniddawna ken ni Jehova nga ikabilna dagiti luana iti maysa a lalat a botelia wenno isuratna iti maysa a libro? (b) No maipasangotayo iti kasasaad a mangsubok iti pammatitayo, ania ti masiguradotayo?

¹⁵ Kalpasanna, kas nairekord iti Salmo 56:8, kastoy ti makapikapik a sinao ni David: “Sika impadamagmo ti kinapugantek. Ikabilmo dagiti luak iti lalat a boteliam. Saanda aya nga adda iti librom?” Anian a makatukay a panangiladawan iti nadungngo a panangaywan ni Jehova! No marigrigatantayo, mabalin a silulua nga umararawtayo ken ni Jehova. Kasta ti inaramid uray ti perpekto a tao a ni Jesus. (Hebreo 5:7) Kombinsido ni David a kumitkita ni Jehova ken laglagipenna ti rigat a napasaranna, nga arigna a ti Dios inkabilna dagiti lua ni David iti maysa a lalat a botelia wenno insuratna iti maysa a libro.d Nalabit nga iti panagriknayo, mapunno dayta a lalat a botelia wenno mausar ti adu a panid dayta a libro no maikabil wenno mailanad dita dagiti luluayo. No kasta, maliwliwakayo koma. Ipanamnama kadatayo ti Biblia: “Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.”​—Salmo 34:18.

Panagbalin a Nasinged iti Dios

16, 17. (a) Apay nga ammotayo a saan a bulsek ni Jehova kadagiti parikut dagiti adipenna? (b) Ania ti inaramid ni Jehova tapno matagiragsak dagiti adipenna ti kinasinged kenkuana?

¹⁶ Ti kinapudno nga ammo ni Jehova ti bilang ‘dagiti mismo a buok ti ulotayo,’ ikkannatayo iti pamalatpatan no ania a klase a Dios ti pribilehiotayo a pagdaydayawan, maysa a manangpaliiw ken manangipateg a Dios. Nupay masapul nga urayentayo ti naikari a baro a lubong tapno maikkat ti amin a saem ken panagsagaba, adda nagsayaat nga ar-aramiden ita ni Jehova agpaay kadagiti adipenna. Insurat ni David: “Ti kinasinged ken Jehova kukua dagidiay agbuteng kenkuana, kasta met ti tulagna, tapno ipakaammona dayta kadakuada.”​—Salmo 25:14.

¹⁷ “Kinasinged ken Jehova.” Kasla narigat a matarusan dayta a kapanunotan no kadagiti imperpekto a tattao! Kaskasdi, aw-awisen ni Jehova nga agbalin a sangaili iti toldana dagidiay agbuteng kenkuana. (Salmo 15:1-5) Ket ania ti aramiden ni Jehova kadagiti sangailina? Isurona kadakuada ti tulagna, sigun ken ni David. Pakaammuan ida ni Jehova, nga ipalgakna ti “kompidensial a banagna” kadagiti mammadto tapno maammuanda dagiti panggepna ken no ania ti rumbeng nga aramidenda tapno makapagbiagda maitunos kadagita.​—Amos 3:7.

18. Apay nga ammotayo a kayat ni Jehova a maaddaantayo iti nasinged a relasion kenkuana?

¹⁸ Pudno a makaliwliwa a maammuan a datayo nga imperpekto a tattao mabalintayo ti makisinninged iti Kangatuan, ni Jehova a Dios. Kinapudnona, idagadagna kadatayo nga aramidentayo dayta. “Umadanikayo iti Dios, ket isu umadaninto kadakayo,” kuna ti Biblia. (Santiago 4:8) Kayat ni Jehova a maaddaantayo iti nasinged a relasion kenkuana. Kinapudnona, adda inaramidnan tapno matagiragsak ti kasta a relasion. Ti pangsubbot a daton ni Jesus linuktanna ti dana tapno mabalintayo ti makigayyem iti Mannakabalin-amin a Dios. Kuna ti Biblia: “No maipapan kadatayo, agayattayo, agsipud ta isu ti immuna a nagayat kadatayo.”​—1 Juan 4:19.

19. Kasano a ti panagibtur pasingedenna ti relasiontayo ken ni Jehova?

¹⁹ Ad-adda a suminged dayta a relasion no ibturantayo dagiti narigat a kasasaad. Insurat ni adalan a Santiago: “Bay-anyo a ti panagibtur an-anayenna ti aramidna, tapno maan-anay ken nasalun-atkayo iti amin a bambanag, a saan nga agkurang iti aniaman.” (Santiago 1:4) Ania nga ‘aramid’ ti resulta ti panangibtur iti rigat? Lagipenyo ti “siit iti lasag” ni Pablo. Ania ti resulta ti panagibturna? Kastoy ti kinuna ni Pablo maipapan kadagiti pakasuotanna: “Siraragsak unay, ngarud, nga agpasindayagakto pay ketdi no maipapan kadagiti pagkapuyak, tapno ti pannakabalin ti Kristo agtalinaed koma kaniak kas iti maysa a tolda. Gapuna pagragsakak dagiti kinakapuy, dagiti pannakainsulto, dagiti panagkasapulan, dagiti pannakaidadanes ken pakarigatan, maipaay ken Kristo. Ta inton nakapuyak, iti kasta nabilegak.” (2 Corinto 12:9, 10) Napaneknekan ni Pablo nga ipaay ni Jehova ti kasapulan a pannakabalin​—“ti pannakabalin a nalablabes ngem ti gagangay”​—tapno makapagibtur. Dayta ti namagsinged kenkuana ken ni Jehova a Dios ken ni Kristo.​—2 Corinto 4:7; Filipos 4:11-13.

20. Kasano a masiguradotayo a saranayen ken liwliwaennatayo ni Jehova no maipasangotayo iti rigat?

²⁰ Nalabit nga ipalubos ni Jehova nga agtultuloy ti pakasuotanyo. No kasta, diyo liplipatan ti karina kadagidiay agbuteng kenkuana: “Saankanto a pulos panawan ket saankanto a pulos baybay-an.” (Hebreo 13:5) Matagiragsakyo dayta a saranay ken liwliwa. Ammo ni Jehova ti bilang “dagiti mismo a buok ti uloyo.” Makitkitana ti panagibturyo. Mariknana ti mapaspasaranyo a saem. Pudno a maseknan kadakayo. Ken dinanto pulos ‘lipaten ti aramidyo ken ti ayat nga impakitayo maipaay iti naganna.’​—Hebreo 6:10.

[Footnotes]

Malagipyo Kadi?

• Ania dagiti mabalin a makagapu a marikna ti maysa nga isu ket binaybay-an ti Dios?

• Ania ti maadaltayo kadagiti ilustrasion ni Jesus maipapan kadagiti billit-tuleng ken iti panangbilangna kadagiti buok ti ulotayo?

• Ania ti kayat a sawen ti pannakaikabil ti lua ti maysa iti “lalat a botelia” wenno iti “libro” ni Jehova?

• Kasanotay a matagiragsak ti “kinasinged ken ni Jehova”?

[Ladawan iti panid 22]

Apay a saan nga inikkat ni Jehova ti “siit iti lasag” ni Pablo?

[Ladawan iti panid 23]

Ania ti maadaltayo iti ilustrasion ni Jesus maipapan kadagiti billit-tuleng?

[Credit Line]

© J. Heidecker/VIREO

[Ladawan iti panid 25]

Babaen ti regular a panagbasa iti Biblia, makasaraktayo iti pammatalged nga ipatpategnatayo ti Dios kas indibidual