Ammoyo Kadi?
Apay nga in-inut ti panangpaimbag ni Jesus iti bulsek a lalaki?
Iti Marcos 8:22-26, mabasatayo ti panangpaimbag ni Jesus iti bulsek a lalaki idiay Betsaida. Kuna ti salaysay nga immuna a tinupraan ni Jesus ti mata ti lalaki sa dinamagna no ania ti makitana. Impakita ti sungbat ti lalaki a kasla mariro: “Adda makitkitak a tattao, agsipud ta adda maim-imatangak a kasla kaykayo, ngem agpagnapagnada.” Kalpasanna, impatay manen ni Jesus ti imana kadagiti mata ti lalaki, ket kastoy ti napasamak: “Ti lalaki nakakita a silalawag, ket immimbag, ket silalawag a makitkitanan ti isuamin.” Nalawag nga in-inut ti panangpaimbag ni Jesus iti lalaki. Apay?
Saan a direkta ti sungbat ti Biblia, ngem usigentayo dagiti mabalin a makagapu iti daytoy. Ti damo a pannakakita kalpasan iti adu a tawen a kinabulsek—wenno iti intero pay ketdi a panagbiag—ket nagdakkel a panagbalbaliw. Kas pangyilustrar: Dagiti kabalio a maus-usar idi kadagiti pagminasan, nairuamdan iti kasipngetan ta no maipanda iti rabaw ti daga, masapul a maysa nga aldaw a makibagayda iti lawag. Nakarkaro pay iti panagbalin a bulsek. Iti kaaldawantayo, adda sumagmamano a kaso a dagiti siruhano nabaelanda nga inagasan dagiti problema iti mata dagiti bulsek, isu a naisubli ti panagkitada. Nupay kasta, masansan a marigatan dagiti pasiente gapu iti kinaadu ti impormasion a sumrek iti utekda babaen kadagiti makitkitada. Gapu ta saanda a maawatan ti nagadu a kolor, sukog, ken kapanunotan, mariroda ket saandan a mailasin uray dagiti ammoda a bambanag. Ngem iti panaglabas ti tiempo, ti utek masursurona nga ilasin no ania ti makita ti mata.
Mabalin a ti in-inut a panangagas ni Jesus iti bulsek ipakitana ti naayat a pannakaseknanna iti lalaki. Kamaudiananna, ti lalaki “silalawag a makitkitanan ti isuamin,” ket maawatannan ti amin a makitana.
Idi kaaldawan ni Jesus, apay a narigat a basaen ti maysa a lukot?
Dagiti binulong a nausar a mangaramid kadagiti lukot ket kadawyan a 23 agingga iti 28 sentimetro ti kaatiddogna ken 15 agingga iti 23 sentimetro ti kalawana. Napagsisilpo dagiti binulong babaen ti pigket wenno nadait iti sinulid a lienso. No dadduma, at-attiddog dagiti bulong a nausar. Ti lukot ni Isaias a nasarakan iti Natay a Baybay ket buklen ti 17 a pergamino, nga agdagup iti agarup 7 metro ti kaatiddogna. Ti lukot ni Isaias a binasa ni Jesus iti sinagoga idiay Nazaret ket mabalin a kasta ti kaatiddogna. —Lucas 4:16, 17.
Maipapan iti daytoy a salaysay, kinuna ni Alan Millard iti librona a Discoveries From the Time of Jesus: “Ti agbasa iggamanna ti libro [lukot] ket ukradenna dayta babaen ti kannigid nga imana sa iggaman ti kannawanna ti bangir a pungto, ken in-inut a lukotenna kalpasan a mabasana ti kada benneg. Idi imbasa ni Jesus ti Isaias 61 idiay sinagoga, mabalin nga inukradna sana linukot manen ti kaaduan a paset ti lukot.”
Saan idi a nabennebenneg kadagiti kapitulo ken bersikulo ti libro nga Isaias a kas iti ammotayo ita. Idi nayawat ken Jesus ti lukot ni Isaias idiay sinagoga ti Nazaret, masapul a birokenna ti bersikulo a namarkaan itan nga Isaias 61:1, 2 kadagiti Bibliatayo. Nagbiit a nasarakan ni Jesus “ti lugarna,” a mangipakita a kabesadona ti Sao ti Dios.