Umadanika iti Dios
Dios a Sidadaan a Mamakawan
“SIKA, O Jehova, naimbagka ken sisasagana a mamakawan.” (Salmo 86:5) Babaen kadagita a makaliwliwa a sasao, ipanamnama kadatayo ti Biblia a sisasagana a mamakawan ni Jehova a Dios. Maysa a pasamak iti biag ni apostol Pedro ti nalawag a mangipakita a mamakawan ni Jehova iti ‘dakkel’ a pamay-an.—Isaias 55:7.
Ni Pedro ti maysa kadagiti kasingedan a kadua ni Jesus. Ngem iti rabii sakbay ti ipapatay ni Jesus, nakaaramid ni Pedro iti nadagsen a basol gapu iti panagbutengna iti tao. Iti asideg ti pakaang-angayan ti ilegal a panangbista ken Jesus, inlibak ni Pedro iti publiko nga am-ammona ni Jesus—saan laeng a naminsan no di ket namitlo. Kalpasan ti maikatlo a napinget a panaglibak ni Pedro, “timmaliaw [ni Jesus] ket minatmatanna ni Pedro.” (Lucas 22:55-61) Mariknayo kadi ti narikna ni Pedro idi kimmita kenkuana ni Jesus? Gapu ta nabigbigna ti kinadagsen ti basolna, napalalo ti ‘sangit’ ni Pedro. (Marcos 14:72) Nalabit a pinanunot ti agbabbabawi nga apostol a saanen a mapakawan ti Dios ti namitlo a panangilibakna ken Jesus.
Idi nagungar ni Jesus, nakasaritana ni Pedro—banag a nangikkat iti panagduadua ti apostol no isu ket napakawan met laeng. Saan a pinagsasawan wenno kinondenar ni Jesus. Imbes ketdi, inimtuodna ken Pedro: “Ay-ayatennak kadi?” Simmungbat ni Pedro: “Wen, Apo, ammom nga adda panagayatko kenka.” Kinuna ngarud ni Jesus: “Pakanem dagiti korderok.” Kalpasanna, inulit ni Jesus ti saludsodna, ket isu met laeng ti sungbat ni Pedro ngem nalabit a mas determinado ita. Gapuna, kinuna ni Jesus: “Ipastoram dagiti babassit a karnerok.” Iti maikatlo a gundaway, inyimtuod ni Jesus ti isu met laeng a saludsod: “Adda kadi panagayatmo kaniak?” Iti dayta a gundaway, “nagleddaang ni Pedro” ket kinunana: “Apo, ammom amin a bambanag; ammom nga adda panagayatko kenka.” Simmungbat ni Jesus: “Pakanem dagiti babassit a karnerok.”—Juan 21:15-17.
Apay nga inyimtuod ni Jesus dagiti saludsod nga ammona met ti sungbat? Mabasa ni Jesus dagiti puso. Ammona nga isu ket ay-ayaten ni Pedro. (Marcos 2:8) Ngem babaen ti panagsaludsodna, naaddaan ni Pedro iti gundaway a mangpasingked iti panagayatna kenkuana. Dagiti sungbat ni Jesus a: “Pakanem dagiti korderok. . . . Ipastoram dagiti babassit a karnerok. . . . Pakanem dagiti babassit a karnerok,” pinasingkedanna iti agbabbabawi nga apostol nga agtalek pay laeng kenkuana ni Jesus. Dayta ti makagapu nga impaannong kenkuana ni Jesus ti panangaywan iti nakapatpateg a sanikua—dagiti arig karnero a pasurot ni Jesus. (Juan 10:14, 15) Sigurado a nabang-aran ni Pedro a makaammo nga agtalek pay laeng kenkuana ni Jesus!
Nalawag a pinakawan ni Jesus ti nagbabawi nga apostolna. Yantangay naan-anay nga iyan-anninaw ni Jesus dagiti galad ken pamay-an ni Amana, masiguradotayo nga uray ni Jehova pinakawanna met ni Pedro. (Juan 5:19) Wen, ni Jehova ket naasi a Dios ken “sisasagana a mamakawan” kadagiti nakabasol nga agbabbabawi. Saan kadi a makaliwliwa dayta?