Salsaludsod Dagiti Agbasbasa

Kinuna ni apostol Pablo a “maisalakanto ti intero nga Israel.” (Roma 11:26) Kayatna kadi a sawen nga adda panawen nga agpakomberte iti Kristianidad ti amin a Judio?

Saan a kasta ti kayat a sawen ni Pablo. Kas maysa a nasion, dagiti kaputotan ni Abraham dida binigbig a ni Jesus isu ti Mesias. Uray kadagiti simmaruno a tawtawen kalpasan ti ipapatay ni Jesus, nabatad nga awan ti napasamak a pannakakomberte ti amin a Judio tapno agbalinda a Kristiano. Kaskasdi, umiso ti kinuna ni Pablo a “maisalakanto ti intero nga Israel.” Kasano?

Kinuna ni Jesus kadagiti lider ti relihion dagiti Judio idi kaaldawanna: “Ti pagarian ti Dios maikkatto kadakayo ket maited iti nasion a mangpatpataud kadagiti bungana.” (Mat. 21:43) Kas maysa a nasion, ti Israel inlaksidna ni Jesus. Gapuna, inturong ni Jehova ti atensionna iti maysa a baro a nasion, maysa a naespirituan a nasion. Inawagan ni Pablo dayta a nasion kas ti “Israel ti Dios.”​—Gal. 6:16.

Paneknekan ti dadduma a teksto iti Kristiano a Griego a Kasuratan a ti “Israel ti Dios” ket buklen dagiti 144,000 a Kristiano a napulotan iti espiritu. (Roma 8:15-17; Apoc. 7:4) Pasingkedan met ti Apocalipsis 5:9, 10 nga adda dagiti saan a Judio a karaman iti dayta a grupo, a mangipakita a dagiti napulotan a Kristiano ket naggapu “iti tunggal tribu ken pagsasao ken ili ken nasion.” Dagiti kameng ti naespirituan nga Israel ket pinili ti Dios kangrunaanna tapno agbalinda a “pagarian ken papadi . . . , ket agturayda a kas ar-ari iti daga.” Nupay inlaksid ni Jehova ti Israel kas ti pinilina a nasion, mabalin a makikappia kenkuana dagiti indibidual nga Israelita. Kasta ti napasamak kadagiti apostol ken iti dadduma a nagkauna a Kristiano. Siempre, dagita a Judio ken ti asinoman a tao masapul a magatangda iti dara ni Jesu-Kristo.​—1 Tim. 2:5, 6; Heb. 2:9; 1 Ped. 1:17-19.

Nupay kaaduan kadagiti nainlasagan a Judio idi umuna a siglo napukawda ti gundaway a makipagturayto ken Jesus, saan a nagbalbaliw ti panggep ti Dios. Awan ti makalapped iti panggepna yantangay kinuna ni Jehova babaen iti propetana: “Kasta ti pagbalinanto ti saok a rummuar manipud iti ngiwatko. Saanto nga agsubli kaniak nga awanan kadagiti nagbanagan, no di ket sigurado nga aramidennanto daydiay pagragsakak, ket sigurado nga agballiginto iti banag a nangibaonak iti dayta.”​—Isa. 55:11.

Agaplikar dayta uray iti panggep ti Dios a mangisaad iti 144,000 a makipagturay iti Anakna idiay langit. Nalawag nga ipakita ti Biblia a mangpulot ti Dios iti kompleto a bilang a 144,000. Saan nga agkurang dayta iti uray maysa!​—Apoc. 14:1-5.

Gapuna, idi insurat ni Pablo a “maisalakanto ti intero nga Israel,” saanna nga ibagbaga nga addanto panawen nga agpakomberte iti Kristianidad ti amin a Judio. Imbes ketdi, ibagbagana a matungpalto ti panggep ti Dios nga adda 144,000 a naespirituan nga Israelita a makipagturay iti Anakna a ni Jesu-Kristo idiay langit. Iti panawen nga inkeddeng ti Dios, ti kompleto a bilang​—“ti intero nga Israel”​—​maragpatdanto ti naisalakan a kasasaad, ket makipagturaydanto kas ar-ari ken papadi iti Mesianiko a Pagarian.​—Efe. 2:8.

[Dagiti Ladawan iti panid 28]

Aggapu dagiti napulotan “manipud iti tunggal tribu ken pagsasao ken ili ken nasion”