Apay a Nagpateg Ita ti Panangasaba iti Binalaybalay?

“Tunggal aldaw idiay templo ken iti binalaybalay nagtultuloyda nga awan sarday a mangisuro ken mangideklara iti naimbag a damag maipapan iti Kristo, a ni Jesus.”​—ARA. 5:42.

1, 2. (a) Ania a pamay-an ti panangasaba ti pakabigbigan dagiti Saksi ni Jehova? (b) Ania ti usigentayo iti daytoy nga artikulo?

GAGANGAYEN daytoy nga eksena iti dandani amin a pagilian: Dua a nanakman ti panagkawkawesda a tattao ti agtuktok iti maysa a balay tapno iranudda ti ababa a mensahe ti Biblia maipapan iti Pagarian ti Dios. No interesado ti bumalay, mangipaimada iti naibatay-Biblia a literatura ken mangitukonda iti libre a panagadal iti Biblia iti pagtaengan. Kalpasanna, mapandan iti sumaganad a balay. No makiramramanka iti daytoy a trabaho, masansan a mailasindaka a dagus kas maysa a Saksi ni Jehova uray dika pay nagsasao. Pudno a nagbalinen a pakabigbigantayo ti panangasaba iti binalaybalay.

² Nadumaduma a pamay-an ti us-usarentayo a mangitungpal iti inted ni Jesus nga annongentayo a mangasaba ken mangaramid iti ad-adalan. (Mat. 28:19, 20) Mangasabatayo kadagiti tiendaan, lansangan, ken iti dadduma pay a publiko a lugar. (Ara. 17:17) Adu met ti makasabaantayo babaen ti telepono ken surat. Iranranudtayo ti kinapudno manipud iti Biblia kadagidiay makasaritatayo iti inaldaw nga aktibidadtayo. Addaantayo pay iti opisial a Web site a mangipaay iti impormasion a naibatay iti Biblia a mabasa iti nasurok a 300 a lenguahe.a Amin dagitoy ket mangyeg iti nasayaat a resulta. Kaskasdi, iti kaaduan a lugar, ti kangrunaan a pamay-an tapno maisaknaptayo ti naimbag a damag ket babaen ti panangasaba iti binalaybalay. Ania ti nakaibatayan daytoy a wagas ti panangasaba? Kasano a nagbalin daytoy kas ti kasaknapan a pamay-an ti panangasaba ti ili ti Dios iti kaaldawantayo? Ken apay a nagpateg dayta ita?

Ti Pamay-an Dagiti Apostol

3. Ania dagiti imbilin ni Jesus kadagiti apostolna mainaig iti panangasaba, ket ania ti ipasimudaagna nga aramidenda no maipapan iti panangasabada?

³ Ti panangasaba iti binalaybalay ket naibatay iti Kasuratan. Idi imbaon ni Jesus dagiti apostolna a mangasaba, imbilinna kadakuada: “Iti aniaman a siudad wenno purok a serkanyo, birokenyo no siasino iti dayta ti maikari.” Kasano ti panangbirokda kadagiti maikari? Imbaga ni Jesus a mapanda kadagiti binalaybalay, a kunkunana: “No sumrekkayo iti balay, kablaawanyo ti sangakabbalayan; ket no ti balay maikari, ti talna a tarigagayanyo iti dayta dumteng koma iti dayta.” Urayenda pay kadi nga adda mangawis kadakuada sakbay a mangasabada? Imutektekanyo ti kinuna pay ni Jesus: “Sadinoman nga adda di umawat kadakayo wenno umimdeng kadagiti saoyo, iti iruruaryo iti dayta a balay wenno iti dayta a siudad pampagenyo ti tapok kadagiti sakayo.” (Mat. 10:11-14) Nalawag nga ipakita dagitoy a bilin kadagiti apostol a no ‘mapanda iti teritoria iti pinuronpurok, a mangideklara ti naimbag a damag,’ masapul a sidadaan a sarungkaranda dagiti tattao kadagiti balbalayda.​—Luc. 9:6.

4. Ania a teksto iti Biblia ti espesipiko a nangdakamat iti panangasaba iti binalaybalay?

⁴ Espesipiko a dinakamat ti Biblia a nangasaba dagiti apostol iti binalaybalay. Kas pagarigan, kuna ti Aramid 5:42 maipapan kadakuada: “Tunggal aldaw idiay templo ken iti binalaybalay nagtultuloyda nga awan sarday a mangisuro ken mangideklara iti naimbag a damag maipapan iti Kristo, a ni Jesus.” Kalpasan ti agarup 20 a tawen, pinalagipan ni apostol Pablo dagiti lallakay iti kongregasion ti Efeso: “Saanko a minedmedan ti panangibaga kadakayo ti aniaman kadagiti banag a makagunggona wenno uray ti panangisuro kadakayo iti publiko ken iti binalaybalay.” Sinarungkaran kadi ni Pablo dagita a lallakay sakbay a nagbalinda a manamati? Nalawag a kasta agsipud ta naisurona kadakuada dagiti bambanag “maipapan ti panagbabawi iti Dios ken ti pammati ken Apotayo a Jesus.” (Ara. 20:20, 21) Mainaig iti Aramid 20:20, kastoy ti komento ti Word Pictures in the New Testament ni Robertson: “Makapainteres ta nangasaba iti binalaybalay daytoy a napinget a manangaskasaba.”

Ti Moderno-Aldaw a Buyot Dagiti Dudon

5. Iti padto ni Joel, kasano ti pannakailadawan ti trabaho a panangasaba?

⁵ Ti panangasaba idi umuna a siglo ket pakpakauna laeng ti dakdakkel a panangasaba iti kaaldawantayo. Ti trabaho a panangasaba dagiti napulotan a Kristiano ket inyarig ni propeta Joel iti panangdidigra dagiti insekto a pakairamanan dagiti dudon. (Joel 1:4) Kas iti idadarup ti maysa a buyot, awan ti makalapped iti panangraut dagiti dudon, serkenda dagiti balbalay, ken ikisapda ti amin a madalapusda. (Basaen ti Joel 2:2, 7-9.) Anian a naglawag a panangiladawan iti kinapinget ken naan-anay a panangitungpal ti ili ti Dios iti trabaho a panangasaba iti kaaldawantayo! Ti panangasaba iti binalaybalay ti kangrunaan a pamay-an dagiti napulotan a Kristiano ken dagiti kakaduada a “sabsabali a karnero” tapno maitungpalda ti nailadawan a padto. (Juan 10:16) Kas Saksi ni Jehova, kasano a natuladtayo ti pamay-an ti panangasaba dagiti apostol?

6. Idi 1922, ania ti naiparegta mainaig iti panangasaba iti binalaybalay, ngem kasano a nagtignay ti dadduma?

⁶ Sipud pay idi 1919, maipagpaganetget ti annongen ti tunggal Kristiano a makiraman iti trabaho a panangasaba. Kas pagarigan, maysa nga artikulo iti Pagwanawanan nga Agosto 15, 1922 (iti Ingles) a napauluan iti “Napateg ti Panagserbi,” impalagipna kadagiti napulotan a Kristiano ti kinapateg ti “sireregta a panangipaima iti naisurat a mensahe kadagiti tattao ken ti panangasaba kadakuada iti pagtaenganda, nga ipakaammoda nga asidegen ti pagarian ti langlangit.” Masarakan idi dagiti detalyado a presentasion iti Bulletin (Ti Ministeriotayo iti Pagarian itan). Kaskasdi, manmano laeng idi damo ti mangaskasaba iti binalaybalay. Adda dagiti nagkitakit. Nupay agsasabali ti pambarda, ti kangrunaan a parikut ket matmatan ti dadduma a kasla mangipababa iti dignidadda ti panangasaba iti binalaybalay. Bayat a dimmegdeg ti pannakaipaganetget ti panagserbi iti tay-ak, adu ti in-inut a simmardeng a nakitimpuyog iti organisasion ni Jehova.

7. Ania ti nabatad a kasapulan idi dekada 1950?

⁷ Kadagiti simmaganad a dekada, immadu ti nakiraman iti trabaho a panangasaba. Ngem nalawag a kasapulan ti kanayonan a personal a panagsanay a mangasaba iti binalaybalay. Alaentayo a pagarigan ti kasasaad ti Estados Unidos. Idi rugrugi ti dekada 1950, adda 28 a porsiento a Saksi ni Jehova sadiay a mangaskasaba laeng babaen ti panagiwaras kadagiti polieto wenno panagtakder kadagiti lansangan a nakaiggem kadagiti magasin. Nasurok nga 40 a porsiento ti saan a regular iti panangasaba, nga adda dagiti bulan a dida man la pulos nangasaba. Kasano ngarud a matulongan dagiti amin a dedikado a Kristiano tapno makakasabada iti binalaybalay?

8, 9. Ania a programa a panangsanay ti narugian idi 1953, ket ania dagiti resultana?

⁸ Iti internasional a kombension a naangay idiay New York City idi 1953, naitampok ti kinapateg ti panangasaba iti binalaybalay. Impakaammo ni Kabsat Nathan H. Knorr a ti kangrunaan a trabaho ti amin a Kristiano a manangaywan ket ti panangtulongda iti tunggal Saksi nga agbalin a regular a manangaskasaba iti binalaybalay. Kinunana a “tunggal maysa ti masapul a mangikasaba iti naimbag a damag iti binalaybalay.” Tapno maragpat dayta a kalat, narugian ti sangalubongan a programa a panangsanay. Dagidiay saan pay idi a mangaskasaba iti binalaybalay ket naipaayan iti pannakasanay no kasano ti makisarita iti bumalay, makirinnason kadakuada manipud iti Biblia, ken mangsungbat kadagiti saludsodda.

⁹ Nagsayaat ti resulta daytoy a programa ti panangsanay. Iti las-ud ti maysa a dekada, immadu iti 100 a porsiento ti bilang dagiti agibumbunannag iti intero a lubong, iti 126 a porsiento ti bilang ti panagsarungkar, ken iti 150 a porsiento ti bilang dagiti panangyadal iti Biblia. Ita, dandanin pito a milion nga agibumbunannag iti Pagarian ti mangikaskasaba iti naimbag a damag iti intero a lubong. Daytoy a dakkel a panagrang-ay ket pammaneknek a bembendisionan ni Jehova ti panagregget ti ilina a mangasaba iti binalaybalay.​—Isa. 60:22.

Panangmarka Kadagiti Tattao Agpaay iti Pannakaisalakan

10, 11. (a) Ania ti nasirmata ni Ezequiel a nairekord iti Ezequiel kapitulo 9? (b) Kasano a matungtungpal dayta a sirmata iti kaaldawantayo?

¹⁰ Ti kinapateg ti panangasaba iti binalaybalay ket agminar iti sirmata a naited ken propeta Ezequiel. Iti dayta a sirmata, nakita ni Ezequiel ti innem a lallaki a nakaiggem kadagiti igam ken adda maikapito a lalaki a sikakawes iti lienso nga adda iti sikiganna ti tintero ti sekretario. Naibilin iti maikapito a lalaki a ‘lumasat iti tengnga ti siudad’ ken ‘markaanna ti muging dagiti tattao nga agsensennaay ken umas-asug gapu iti amin a nakarimrimon a bambanag a maar-aramid iti tengngana.’ Kalpasan dayta a panangmarka, dagiti innem a lallaki nga addaan iti igam nabilinda a mangikisap iti amin nga awanan iti marka.​—Basaen ti Ezequiel 9:1-6.

¹¹ Iti kaitungpalan daytoy a padto, maawatantayo a ti lalaki a “sikakawes iti lienso” irepresentarna dagiti natda a napulotan iti espiritu. Babaen ti trabaho a panangasaba ken panangaramid iti adalan, ti klase napulotan mangikabkabilda iti simboliko a marka kadagidiay agbalin a paset ti “sabsabali a karnero” a kukua ni Kristo. (Juan 10:16) Ania dayta a marka nga arig napatak iti mugingda? Dayta ti pammaneknek a dagita a karnero ket dedikado ken bautisadoda nga ad-adalan ni Jesu-Kristo ken inkawesda ti baro a Nakristianuan a personalidad. (Efe. 4:20-24) Dagitoy a marakarnero a tattao makikaduadanto kadagiti napulotan a Kristiano tapno agbalinda a maymaysa nga arban ken tumulongda iti nagpateg a trabaho a panangmarka kadagiti sabsabali pay.​—Apoc. 22:17.

12. Kasano a ti sirmata ni Ezequiel maipapan iti panangmarka kadagiti muging itampokna ti kinapateg ti agtultuloy a panangbiroktayo kadagiti marakarnero a tattao?

¹² Ti sirmata ni Ezequiel itampokna ti maysa a rason no apay a nakagangganat ti agtultuloy a panangbiroktayo kadagiti tattao nga “agsensennaay ken umas-asug.” Biag ngamin ti nairaman iti dayta. Iti mabiiten, dagiti nailangitan a mangpapatay a puersa ni Jehova, nga iladladawan dagiti innem a nagtagiigam a lallaki, dadaelendanto dagidiay awanan iti simboliko a marka. No maipapan iti dayta umad-adani a panangdadael, insurat ni apostol Pablo a kaduanto ni Apo Jesus “dagiti mannakabalin nga anghelna” ket iyegda ti “pammales kadagidiay saan a makaammo iti Dios ken kadagidiay saan nga agtulnog iti naimbag a damag maipapan ken Apotayo a Jesus.” (2 Tes. 1:7, 8) Imutektekanyo ta maukomto dagiti tattao maibatay iti tignayda iti naimbag a damag. Ngarud, ti pannakaiwaragawag ti mensahe ti Dios ket nasken nga agtultuloy agingga iti panungpalan. (Apoc. 14:6, 7) Dayta ti mangipakita nga adda nadagsen a responsabilidad ti amin a dedikado nga adipen ni Jehova.​—Basaen ti Ezequiel 3:17-19.

13. (a) Ania a responsabilidad ti narikna ni apostol Pablo, ken apay? (b) Ania ti mariknayo a responsabilidadyo kadagiti tattao iti teritoriayo?

¹³ Narikna ni apostol Pablo nga adda responsabilidadna a mangiranud iti naimbag a damag. Insuratna: “Siuutangak agpadpada kadagiti Griego ken kadagiti Barbaro, agpadpada kadagiti masirib ken kadagiti nakuneng: gapuna adda kinagagar iti biangko a mangideklara ti naimbag a damag kadakayo met nga adda dita Roma.” (Roma 1:14, 15) Kas panagyaman iti naipakita kenkuana nga asi, nagutugot ni Pablo a mangikagumaan a tumulong kadagiti sabsabali tapno magunggonaanda iti di kaikarian a kinamanangngaasi ti Dios a kas kenkuana. (1 Tim. 1:12-16) Matmatanna a kasla adda utangna iti tunggal tao a makasaritana, utang a mabayadan laeng babaen ti panangiranudna kadakuada iti naimbag a damag. Matmatanyo kadi a kasla addaankayo met iti utang kadagiti tattao iti teritoriayo?​—Basaen ti Aramid 20:26, 27.

14. Ania ti kangrunaan a rason a mangaskasabatayo iti publiko ken iti binalaybalay?

¹⁴ Nupay napateg ti pannakaisalakan dagiti tattao, adda napatpateg a rason no apay a mangasabatayo iti binalaybalay. Iti padto a nailanad iti Malakias 1:11, kinuna ni Jehova: “Manipud iti ileleggak ti init agingga a mismo iti ilelennekna naindaklanto ti naganko iti tengnga dagiti nasion, ket . . . maaramidto ti panangidiaya maipaay iti naganko, ti mismo a nadalus a sagut; agsipud ta naindaklanto ti naganko iti tengnga dagiti nasion.” Kas kaitungpalan daytoy a padto, dagiti dedikado nga adipen ni Jehova ket publiko nga idaydayawda ti naganna iti amin a daga bayat a sipapakumbaba nga itungtungpalda ti ministerioda. (Sal. 109:30; Mat. 24:14) Ti panangipaaytayo iti “sakripisio ti panagdaydayaw” kenni Jehova ti kangrunaan a rason a mangaskasabatayo iti publiko ken iti binalaybalay.​—Heb. 13:15.

Nakapatpateg a Pasamak iti Masanguanan

15. (a) Ania dagiti kanayonan nga inaramid dagiti Israelita bayat a nagmartsada iti aglikmut ti Jerico iti maikapito nga aldaw? (b) Ania ti ipasimudaag daytoy mainaig iti trabaho a panangasaba?

¹⁵ Ania pay a panagrang-ay ti agur-uray mainaig iti trabaho a panangasaba? Mangted iti pamalatpatan ti pannakalakub ti Jerico a nairekord iti libro a Josue. Lagipenyo a sakbay a ti Dios dinadaelna ti Jerico, naibilin kadagiti Israelita nga agmartsada iti aglikmut ti siudad maminsan iti kada aldaw iti las-ud ti innem nga aldaw. Ngem iti maikapito nga aldaw, addanto nakadkadlaw a kanayonan nga aramidenda. Imbilin ni Jehova kenni Josue: “Agmartsakayo iti likmut ti siudad iti pito a daras ket ti papadi puyotenda dagiti tangguyob. Ket mapasamakto nga inton agpagunida babaen iti tangguyob a sara ti kalakian a karnero, . . . amin dagiti tattao iriawda iti dakkel nga ikkis ti gubat; ket ti pader ti siudad marbanto a malantag.” (Jos. 6:2-5) Mabalin nga addanto umasping a dakdakkel a trabaho mainaig iti panangasaba. Awan duadua nga inton madadael ti agdama a sistema ti bambanag, nakitatayto ti kasaknapan a pannakaikasaba ti nagan ti Dios ken ti Pagarianna iti intero a pakasaritaan ti lubong.

16, 17. (a) Ania ti maibanag sakbay nga agpatingga ti “dakkel a rigat”? (b) Ania ti usigentayo iti sumaganad nga artikulo?

¹⁶ Dumtengto ti tiempo a ti iwarwaragawagtayo a mensahe ket agbalin a “dakkel nga ikkis ti gubat.” Iti libro nga Apocalipsis, dagiti nadagsen a mensahe ti panangukom ket nailadawan kas iti “dakkel nga uraro a ti tunggal bato agarup kadagsen ti maysa a talento.”b Kuna ti Apocalipsis 16:21: “Ti pannaplitna di gagangay ti kadakkelna.” Ditay pay ammo no ania ti paset ti panangasaba iti binalaybalay mainaig iti pannakaiwaragawag dagita a mensahe ti panangukom. Ngem masiguradotayo a sakbay a malpas ti “dakkel a rigat,” maipakaammonton ti nagan ni Jehova iti kasaknap a di pay pulos napasamak iti pakasaritaan ti tao.​—Apoc. 7:14; Ezeq. 38:23.

¹⁷ Bayat nga ur-urayentayo dagiti nakapatpateg a pasamak iti masanguanan, itultuloytayo koma nga ikasaba ti naimbag a damag ti Pagarian buyogen ti kinaregta. Bayat nga itungtungpaltayo dayta nga annongen, ania dagiti karit a pakaipasanguantayo no mangasabatayo iti binalaybalay, ken kasano a maparmektayo dagita? Mausig dagitoy a saludsod iti sumaganad nga artikulo.

[Footnotes]

Ania ti Sungbatyo?

• Ania a teksto iti Biblia ti nakaibatayan ti panangasaba iti binalaybalay?

• Kasano a naipaganetget iti kaaldawantayo ti panangasaba iti binalaybalay?

• Apay nga adda responsabilidad dagiti dedikado nga adipen ni Jehova a mangasaba?

• Ania dagiti nakapatpateg a pasamak nga agur-aray iti masanguanan?

[Dagiti Ladawan iti panid 4]

Kas ken apostol Pablo, mariknayo kadi nga adda responsabilidadyo a mangasaba kadagiti sabsabali?

[Ladawan iti panid 5]

Ni Kabsat Knorr idi 1953