Ti Biblia Balbaliwanna ti Biag Dagiti Tattao

Ania ti mabalin a mangtignay iti maysa a miembro ti Mexicano a delingkuente a grupo dagiti agtutubo a maaw-awagan iti Junior Satans tapno agbalbaliw ken agbalin a mapagpiaran, nagaget nga umili? Apay a ti maysa a naballigi a negosiante a Haponesa insardengna ti pananggun-od iti kinabaknang kas kangrunaan a kalatna iti biag, ken ania ti panangmatmatna kadagita a panagbalbaliw nga inaramidna? Ania ti mabalin a nangtignay iti maysa a Ruso nga aglaklako kadagiti igam tapno isardengna ti dakkel a panguartaan ngem ilegal a trabahona? Usigenyo ti komento dagitoy nga indibidual.

PERSONAL NGA IMPORMASION

NAGAN: ADRIAN PEREZ

EDAD: 30

PAGILIAN: MEXICO

PAKASARITAANNA: MIEMBRO TI DELINGKUENTE A GRUPO

TI NALIKUDAK: Agarup 13 idi ti tawenko idi immakar ti pamiliami idiay Ecatepec de Morelos, Mexico State. Kadagidi a panawen, nasaknap iti dayta a lugar ti panagdroga, bandalismo, ken dagiti delingkuente nga agtutubo. Di nagbayag, nagbalinak a mammartek, mangrugrugit kadagiti sanikua ti sabali, ken mannakiabig.

Idi agangay, nagsublikami idiay San Vicente, ti ili a nakayanakak. Nupay kasta, ti panagdroga ket dakkel a parikut iti dayta a lugar. Gagangay a buya kadagiti lansangan ti nakawara a bangkay dagiti agtutubo. Nakimiembroak iti maysa a delingkuente a grupo a maaw-awagan iti Junior Satans. Agtakaw ken agusarkami iti droga, thinner, wenno rugby. Masansan a diak ammo no kasanoak a nakaawid wenno no dadduma, awanan puot a nakaiddaak lattan iti lansangan. Idi agangay, adda dagiti gagayyemko a naibalud gapu iti panagtakaw ken pammapatay.

Iti laksid amin dagita, mamatiak iti Dios. Tapno maksayan ti pannakaburibor ti konsiensiak, makiramanak kadagiti narelihiosuan a seremonia, kas iti panagpenitensia bayat ti Semana Santa. Ngem kalpasanna, agbartekkami amin, agraman ti lalaki a nagakem kas Kristo, kas ragragsak iti pannakiramanmi iti dayta a piesta.

NO KASANO A BINALBALIWAN TI BIBLIA TI BIAGKO: Idi arinunos ti kinatin-edyerko, nakipagadalak iti Biblia kadagiti Saksi ni Jehova. Ammok nga awan pudno a panggep ti biagko ken awan naimbag a pagturonganna no itultuloyko ti kastoy nga estilo ti panagbiag. Natignayak iti kuna ti Galacia 6:8: “Ti agimulmula a maipaay iti lasagna apitennanto ti panagrupsa manipud iti lasagna, ngem ti agimulmula maipaay iti espiritu apitennanto ti agnanayon a biag manipud iti espiritu.” Pinagpanunotnak daytoy a teksto; no kayatko nga adda pagbanagan ti biagko, masapul nga agimulaak maipaay iti masanguanan.

Bayat nga umun-uneg ti pannakaammok iti Biblia, nabigbigko a ni Jehova ket maysa a sibibiag a Dios a pudno a maseknan kaniak ken sidadaan a mangpakawan kadagiti basol a naaramidak iti naglabas. Napaneknekak a mismo nga ipangag ken sungbatanna dagiti kararag.

Saan a nalaka ti mangaramid kadagiti panagbalbaliw iti biagko. Nagrigat ti lumapsut iti nakaitimpuyogak a grupo. Adda dagiti teritoria a diak mabalin ti lumabas uray saanakon a miembro dayta a grupo. No dadduma, masapul nga ilemmengak dagiti sigud a gagayyemko gapu ta kayatdak a piliten nga agsubli kadagiti dati nga aramidko.

Iti kasumbangirna, nariknak ti pudno nga ayat ken panangipateg ti kongregasion sipud idi rinugiak ti tumabuno kadagiti gimong dagiti Saksi idiay Kingdom Hall. Nagutugotak iti nabileg a pammati dagitoy a tattao ken an-annurotenda dagiti mismo nga isursuroda. Naan-anay a naiduma daytoy a grupo no idiligko iti dati a kakaduak.

NO KASANO A NAGUNGGONAANAK: Sangapulo a tawenen a bautisadoak kas maysa a Saksi ni Jehova. Ikagkagumaak nga iyaplikar dagiti pannursuro ti Biblia. Kas resultana, nagun-odko ti panagraem ti pamiliami. Am-ammodak itan kas maysa a nagaget a trabahador, ken matultulongakon ida iti pinansial. Nakipagadal met ni nanangko iti Biblia ket maysa itan a Saksi ni Jehova. Mangar-aramid met itan ni tatangko kadagiti panagbalbaliw. Saan a Saksi ni Jehova ti kaaduan iti pamiliami. Ngem kalpasan a napaliiwda ti panagbalbaliwko, bigbigenda a makatulong ti Biblia a mangpasayaat iti biag ti maysa a tao.

PERSONAL NGA IMPORMASION

NAGAN: YAYOI NAGATANI

EDAD: 50

PAGILIAN: JAPAN

PAKASARITAANNA: NABALLIGI A NEGOSIANTE

TI NALIKUDAK: Dimmakkelak iti bassit nga ili a mannakigayyem dagiti lumugar. Addaan iti dakkel a pagtagilakuan ni tatangko iti dayta nga ili ken sangapulo dagiti trabahadorna. Ti balaymi ket dumna iti dayta a pagtagilakuan, isu nga uray okupado da Tatang ken Nanang, saanko a pulos a narikna ti panagmaymaysa.

Siak ti inauna kadakami a tallo nga agkakabsat a babbai. Nasapa a naisuro kaniak ti panangibaklay iti negosio ti pamiliami. Ubingak a nakiasawa. Nagikkat ni lakayko iti trabahona iti banko ket timmulong iti negosio ti pamiliami. Naaddaankami iti tallo nga agsasaruno nga annak. Ni nanangko ti nagtagibalay ken nagaw-awir kadagiti annakmi, bayat a nagtrabahoak iti pagtagilakuanmi manipud iti bigat agingga iti rabii. Kaskasdi, adda latta panawenmi nga aglalangen a sangapamiliaan.

Idi agangay, naapektaran ti lugarmi iti panagbaba ti ekonomia, ket nangrugi a malugi ti negosiomi. Tapno saan a maapektaran ti pagsapulanmi, inkeddengmi ti mangipatakder iti maysa a pagtagilakuan kadagiti materiales a pangtarimaan wenno pangpasayaat iti pagtaengan iti asideg ti haywey. Ni tatangko ti presidente ti negosiomi. Iti aldaw sakbay a mangrugi ti seremonia ti panagpatakdermi, natalimudaw ni Tatang maigapu iti panagdepekto ti utekna. Kas resultana, naapektaran ti abilidadna nga agsao, isu a naipabaklay kaniak ti panangasikaso iti baro a pagtagilakuanmi. Ni lakayko ti nangasikaso iti dati a pagtagilakuanmi. Nagbalinkami amin nga okupado.

Kasta unay ti rimmang-ayan ti baro a negosiomi. Maipagpannakkelko dagiti nagapuanak isu nga uray kurang ti turogko, inggaedko ti nagtrabaho. Nupay ipatpategko dagiti annakmi, ti trabaho ti nakaiturongan ti atensionko. Dandani awanen ti panawenmi nga agsarita ken lakayko, ket no adda man, kanayonkami nga agsubang. Tapno maikkat ti bannogko, dandani rinabii a rummuarkami kadagiti gagayyem ken kakaduak iti negosio tapno agiinum. Naisentro ti biagko iti trabaho, arak, ken pannaturog. Naballigiak iti pinansial ngem kumarkaro ti pannakariknak iti kinaawan ragsak ket diak maawatan no apay.

NO KASANO A BINALBALIWAN TI BIBLIA TI BIAGKO: Idi rinugiak ti makipagadal iti Biblia kadagiti Saksi ni Jehova, adda tallo a teksto a pudno a nakatignayak. Nakasangitak idi maawatak ti kayat a sawen ti Mateo 5:3: “Naragsak dagidiay sipapanunot iti naespirituan a kasapulanda, yantangay kukuada ti pagarian ti langlangit.” Daytoy a teksto ti mangilawlawag no apay a kasla adda kurang iti biagko nupay naballigiak iti pinansial ken raraemen dagiti padak a negosiante. Nabigbigko a magun-odko laeng ti pudpudno a kinaragsak no agbalinak a sipapanunot kadagiti naespirituan a kasapulak ken pennekek dayta.

Kadagidi a tiempo, nagbalinsuek ti ekonomia ti Japan, ket nakitak kadagiti padak a negosiante ti kinapudno ti 1 Timoteo 6:9: “Dagidiay determinado a bumaknang matnagda iti sulisog ken iti silo ken iti adu a minamaag ken makapasakit a tartarigagay, a mangipalned kadagiti tattao iti pannakadadael ken pannakarba.” Iti panagriknak, agaplikar kaniak ti sasao ni Jesus a nairekord iti Mateo 6:24 a “saanyo a mabalin ti agpaadipen iti Dios ken iti Kinabaknang,” isu nga inkeddengko ti mangaramid iti sumagmamano a panagbalbaliw iti biagko.

Nabigbigko a naliwayak dagiti dadakkelko, ti asawak, ken annakmi. Nakadkadlaw met dagiti saan a makaay-ayo a kababalin a napatanorko. Nagbalinak a nauyong. Ababa ti pasensiak ken managpungpungtotak. Idi damo, impagarupko nga imposible a makapagbalbaliwak pay ken agbalin a Kristiano. Nupay kasta, ay-ayatek unay dagiti annakmi ket nadlawko a bayat nga iyap-aplikarko dagiti balakad ti Biblia iti pannakilangenko iti pamiliami, nasayaat ti epektona kadagiti annakko. Ad-adu a panawen ti binusbosko kadakuada ken inkuyogko ida kadagiti Nakristianuan a gimong.

NO KASANO A NAGUNGGONAANAK: Gapu ta naammuak ti panggep ti biag ken gapu ta agserserbiakon iti Dios, ti panagbiag iti wagas a makaay-ayo kenkuana ti nangted kaniak iti pudno a rag-o ken pannakapnek. Ad-adda a prioridadko itan ti pamiliami imbes a ti trabaho, isu a nagun-odko manen ti napukawko a panagraem iti bagik.

Idi nakita ni nanangko a simmayaat ti personalidadko bayat nga iyap-aplikarko dagiti prinsipio ti Biblia, natignay nga agpayadal iti Biblia agingga a nagbalin a Kristiano. Imbag laengen ta saan a binusor da tatang ken lakayko ti desisionmi ken nanangko. Nasingsingedkami itan kadagiti annakko, ken pudno a nakaragragsaken ti pamiliami.

PERSONAL NGA IMPORMASION

NAGAN: MIKHAIL ZUYEV

EDAD: 51

PAGILIAN: RUSSIA

PAKASARITAANNA: AGLAKLAKO KADAGITI ILEGAL NGA IGAM

TI NALIKUDAK: Nalikmut kadagiti nalasbang a mula ti ilimi a Krasnogorsk. Agayus ti Karayan Moscow iti abagatan. Iti laud ken amianan, dandani saanen a makita dagiti purok iti kabakiran.

Idi ubingak pay, pagragragsakak ti makidinnanog ken agay-ayam kadagiti igam. Adu a panawen ti binusbosko iti pisikal a panagsanay. Nangaramidak met kadagiti ilegal a paltog, bala, ken kutsilio. Idi agangay, daytoy ti nagbalin a negosiok. Organisado dagiti garawko isu a nakabalballigi ti panaglakok iti armas kadagiti kriminal.

NO KASANO A BINALBALIWAN TI BIBLIA TI BIAGKO: Idi rugrugi ti dekada 1990, naam-ammok dagiti Saksi ni Jehova, ngem diak pagtalkan ida idi damo. Para kaniak, adu unay ti saludsodda.

Naminsan, maysa kadakuada ti nangibasa kaniak iti Roma 14:12: “Tunggal maysa kadatayo makikuentanto iti Dios maipaay iti bagina.” Diak ammo no anianto ti ibagak iti Dios. Daytoy a teksto ti nangtignay kaniak a mangadal no ania ti kalikaguman ti Dios kaniak.

Pinagreggetak nga inyaplikar ti balakad ti Biblia a nairekord iti Colosas 3:5-10: “Papatayenyo, ngarud, dagiti kameng ti bagiyo nga adda iti rabaw ti daga no maipapan iti pannakiabig, kinarugit, panaggartem iti sekso, makapasakit a tarigagay, ken kinaagum, a dayta ket idolatria. Maigapu kadagidiay a bambanag umay ti pungtot ti Dios. . . . Iwaksiyo amin dagita manipud kadakayo, pungtot, unget, kinadakes, nabassawang a sasao, ken naalas a sasao manipud iti ngiwatyo. Dikay pagulbodan ti maysa ken maysa. Uksobenyo ti daan a personalidad agraman dagiti aramidna, ket kawesanyo ti bagbagiyo iti baro a personalidad.”

Narigatanak a mangaramid kadagita a panagbalbaliw. Dagiti sigud a klientek a kriminal itultuloydak nga itukonan iti kuarta a kasukat dagiti armas, ken diak makapagteppel no adda manginsulto kaniak. Kaskasdi, dinadaelko ti adu a lakok nga armas. Bayat a maad-adalko ti ayat nga impakita kaniak ti Dios ken ni Kristo, natignayak a mangsubad iti dayta nga ayat. Impapusok ti personal a panagadalko iti Biblia, nakigimongak, ken inkarkararagko ti tulong ti Dios.

NO KASANO A NAGUNGGONAANAK: Buyogen ti dakkel a panagregget ken tulong dagiti Kristiano a kakabsat, in-inut a simmayaat ti personalidadko. Makaliwliwa unay kaniak ti pannakaammo a ni Jehova a Dios ipatpategna ti tunggal maysa kadatayo, uray dagiti natayen. (Aramid 24:15) Apresiarek ti kinapasnek ken kinamapagtalkan dagiti Saksi ni Jehova agraman ti pudno a pannakaseknanda kaniak ken ti kinasungdoda iti Dios.

Idi damo, binusor ti dadduma a kapamilia ken gagayyemko ti baro a pammatik. Ngem kaykayatda laengen a makimiembroak iti maysa a relihion ngem iti maysa nga organisado a sindikato. Anian a ragsakko ta saanakon nga aglaklako kadagiti armas no di ket naipamaysan ti biagko iti panangtulong kadagiti sabsabali a mangammo iti Dios ti talna.

[Ladawan iti panid 27]

Nakiramanak kadagiti seremonia dagiti Katoliko tapno maksayan ti pannakaburibor ti konsiensiak

[Ladawan iti panid 28]

Bimmaknangak ngem saanak a naragsak