Saludsod Dagiti Agbasbasa
Makalasat Ngata ti Daga?
Saan a madadael ti planetatayo a Daga babaen ti aniaman a didigra. Apay a masiguradotayo dayta? Gapu ta inkari ti Dios a ‘saanto a mapagdiwengdiweng ti daga agingga iti tiempo a di nakedngan, wenno iti agnanayon.’ (Salmo 104:5) Nupay ti “maysa a kaputotan mapan, ket umay ti sabali a kaputotan,” kuna ti Biblia, “ti daga agtaeng iti agnanayon.”—Eclesiastes 1:4, Ti Biblia.
Iti Salmo 104:5, napasingkedan nga agtalinaed ti daga babaen ti dua a sao a nausar iti orihinal a Hebreo a teksto—ʽoh·lamʹ para iti “tiempo a di nakedngan” ken ʽadh para iti “agnanayon.” Ti ʽoh·lamʹ ket mabalin nga ipatarus kas “adu a tawtawen” wenno “agtultuloy.” Sigun iti Students’ Hebrew and Chaldee Dictionary ni Harkavy, ti ʽadh kaipapananna “kapaut, kinaagnanayon, awan inggana.” Dagitoy a dua a Hebreo a sasao patalgedanda nga agtalinaed ti daga. Usigenyo ti tallo a kanayonan a rason a naibatay iti Biblia a mangpaneknek nga agtalinaed nga agnanayon ti daga.
Umuna, ti Dios inaramidna ti daga tapno pagnaedan dagiti tattao—maysa a naraber, makaay-ayo a sangalubongan a paraiso, saan ket a maysa a langalang a lugar. Ti Isaias 45:18 deskribirenna ni Jehova kas “ti Namarsua iti langlangit, Isu ti pudno a Dios, ti Nangporma iti daga ken ti Nangaramid iti dayta, Isu Daydiay sititibker a nangipasdek iti dayta, a saanna a pinarsua a maipaay laeng iti awan kapapay-anna, a nangbukel iti dayta tapno mapagnaedan a mismo.”
Maikadua, nabayagen nga inkari ti Dios a dagidiay agtulnog kenkuana agbiagda a natalna ken agnanayon ditoy daga. Ikari ti Mikas 4:4: “Pudno nga agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada; ta ti mismo a ngiwat ni Jehova ti buybuyot sinaona dayta.” Gapuna, maitunos iti daytoy a panggep ti Dios, masapul nga agtalinaed nga agnanayon ti daga tapno pagnaedan ti sangatauan. Ta no saan, awan serserbi dagiti karina.—Salmo 119:90; Isaias 55:11; 1 Juan 2:17.
Maikatlo, ti Dios intalekna iti tao ti panangaywan iti daga. “No maipapan iti langlangit, kukua ni Jehova ti langlangit, ngem ti daga intedna iti annak ti tattao,” kuna ti Sao ti Dios. (Salmo 115:16) Adda kadi naayat nga ama a mangted iti napintas a regalo iti anakna ngem kalpasanna, dadaelenna met laeng dayta? Awan la ketdi! Umasping iti dayta, saan nga aramiden ni Jehova ti kasta iti daga ken kadagiti agnanaed iti dayta, yantangay ti “Dios ket ayat.”—1 Juan 4:8.
Kastoy ti pammatalged ni Jesu-Kristo maipapan kadagiti sasao ni Amana: “Ti saom ket kinapudno.” (Juan 17:17) Ken ti Dios a dina ammo ti agulbod inkarina: “Dagiti nalinteg tagikuaendanto ti daga, ket agtaengdanto nga agnanayon iti dayta.”—Salmo 37:29; Tito 1:2.
[Picture Credit Line iti panid 31]
Globo: Naibatay iti rinetrato ti NASA