Rumang-aykayo iti Umiso a Pannakaammo Buyogen ti “Kinagagar ti Panunot”
AMIN nga adipen ni Jehova tarigagayanda ti anamongna. Gapu ta kayattayo a magun-od dayta, magagarantayo a mangparang-ay iti kalidad ti pammatitayo ken sireregta a mangipaay iti sagrado a panagserbi. Ngem iturong ni apostol Pablo ti atensiontayo iti maysa a posible a peggad, banag a nangapektar iti dadduma a Judio idi kaaldawanna: “Adda regtada iti Dios; ngem saan a maitunos iti umiso a pannakaammo.” (Roma 10:2) Nalawag a ti pammati ken panagdayawtayo ken Jehova ket saan koma a naibatay laeng iti emosion. Masapul nga umiso ti pannakaammotayo maipapan iti Namarsua ken iti pagayatanna.
Sigun kadagiti surat ni Pablo, ti sigagagar a pananggun-od iti pannakaammo ket adda pakainaiganna iti aramid a makaay-ayo iti Dios. Inkararagna a dagiti pasurot ni Kristo ‘mapnoda koma iti umiso a pannakaammo’ iti pagayatan ti Dios ‘tapno magnada a maikari ken Jehova iti panggep a panangay-ayo a naan-anay kenkuana’ bayat nga ‘agtultuloyda nga agbunga iti tunggal naimbag nga aramid ken rumang-ay iti umiso a pannakaammo iti Dios.’ (Col. 1:9, 10) Apay a napateg a maaddaantayo iti “umiso a pannakaammo”? Ken apay a rumbeng a rumang-aytayo iti kasta a pannakaammo?
Tulbek iti Pammati
Ti pammatitayo ket naibatay iti umiso a pannakaammo iti Dios ken iti pagayatanna a naipalgak iti Biblia. No awan ti kasta a mapagtalkan a pannakaammo, ti pammatitayo ken Jehova ket maipada iti kastilio a darat a nalaka a rebbaen ti uray nakapuy a dalluyon. Paregtaennatayo ni Pablo nga ipaaytayo ti sagrado a panagserbi iti Dios buyogen ti ‘pannakabalintayo nga agrason’ ken ti ‘panangpabarotayo iti panunottayo.’ (Roma 12:1, 2) Ti regular a panagadaltayo iti Biblia ket makatulong kadatayo iti dayta a banag.
Kuna ni Ewa, maysa a regular pioneer idiay Poland: “No saan a regular ti panagadalko iti Sao ti Dios, agsardengton ti panagrang-ayko iti umiso a pannakaammo ken Jehova. Mabalin nga in-inut a mapukaw ti pakabigbigak kas Kristiano ken kumapuy ti pammatik iti Dios—iti kasta, madadael ti relasionko iti Dios.” Sapay koma ta saan a mapasamak dayta kadatayo! Usigenyo ti maysa a lalaki a rimmang-ay iti umiso a pannakaammona ken Jehova isu a nagun-odna ti anamongna.
“Anian a Panagayatko iti Lintegmo!”
Ti naindaniwan a kanta a nailanad iti Salmo 119 iti Biblia ipakaammona ti rikrikna ti salmista maipapan kadagiti linteg, pammalagip, bilin, alagaden, ken hudisial a pangngeddeng ni Jehova. Insurat ti salmista: “Kadagiti paglintegam ipakitakto ti panangay-ayat. . . . Dagiti pammalagipmo isuda ti pakaay-ayatak.” Insuratna pay: “Anian a panagayatko iti lintegmo! Iti intero nga agmalem isu dayta ti pakaseknak.”—Sal. 119:16, 24, 47, 48, 77, 97.
Dagiti ebkas a “panangay-ayat” ken “pakaseknak” ipamatmatda ti panangutob iti Sao ti Dios, kinapudnona, maragragsakan a mangutob iti dayta. Dagidiay nga ebkas ipaganetgetda a kaay-ayo ti salmista nga adalen ti linteg ti Dios. Dayta ket saan a resulta ti panagbalin nga emosional ti salmista. Imbes ketdi, napasnek ti ‘pannakaseknanna’ iti linteg ken nasged ti tarigagayna a gumun-od iti nauneg a pannakaawat kadagiti sasao ni Jehova. Makitatayo iti kababalinna a kayatna a maam-ammo a naimbag ti Dios ken ti pagayatanna.
Nabatad ngarud a naimpusuan ti panagayat ti salmista iti Sao ti Dios. Imtuodentayo iti bagitayo: ‘Naimpusuan met kadi ti panagayatko iti Sao ti Dios? Kaay-ayok kadi a basaen ken usigen ti maysa a paset ti Biblia iti kada aldaw? Pagregreggetak kadi a basaen ti Sao ti Dios ken agkararagak sakbay a basaek?’ No wen ti sungbattayo kadagita a saludsod, mabalin a ‘parparang-ayentayo ti umiso a pannakaammotayo iti Dios.’
Kinuna ni Ewa: “Kanayon a padpadasek a parang-ayen ti kalidad ti personal a panagadalko. Sipud idi naaddaanak iti broshur a ‘Kitaem ti Nasayaat a Daga,’ us-usarekon dayta iti dandani tunggal panagadalko. No kasapulan, ikagkagumaak a kitaen dagiti bambanag iti Insight on the Scriptures ken ti dadduma a reperensia.”
Usigenyo met ti ulidan da Wojciech ken Małgorzata, nga addaan kadagiti dakkel a responsabilidad iti pamiliada. Kasano a maiwayaanda ti personal a panagadal iti Biblia? Kunada: “Ikagumaanmi ti agadal a personal iti Sao ti Dios. Kalpasanna, bayat ti panagadal ti pamiliami ken iti inaldaw a panagsasaritami, iranudmi dagiti makapainteres a punto a naammuanmi.” Ti napasnek a personal a panagadalda ket gubuayan ti dakkel a rag-oda ken tumulong kadakuada a ‘rumang-ay iti umiso a pannakaammo.’
Panagadal Buyogen ti Silulukat a Panunot
Kas Kristiano, patientayo a pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:3, 4) Daytoy ipaganetgetna ti kinapateg ti panagbasa iti Biblia ken ti panangikagumaan a ‘mangtarus iti kababagasna.’ (Mat. 15:10) Tapno maaramidyo dayta, kasapulan ti panagadal buyogen ti silulukat a panunot. Kastoy ti kababalin dagiti nagkauna a taga-Berea idi inranud ni Pablo kadakuada ti naimbag a damag: ‘Inawatda ti sao buyogen ti napalalo a kinagagar ti panunot, a siaannad a suksukimatenda ti Kasuratan iti inaldaw no agpayso dagitoy a banag.’—Ara. 17:11.
Tultuladem kadi ti ulidan dagiti taga-Berea nga addaan iti kinagagar ti panunot ket ikagumaam ti di agpasinga kadagiti babassit a banag bayat nga agad-adalka iti Biblia? Mabalin nga ikagumaan ti maysa a Kristiano a tuladen dagiti taga-Berea, uray no dati, saanna a kaay-ayo ti agadal. Kasta met, dadduma ti manmanon nga agadal bayat a lumaklakaydan, ngem saan koma a kasta kadagiti Kristiano. Aniaman ti edad ti maysa, ikagumaanna koma nga awan ti makasinga iti panagbasana. Bayat ti panagbasam, sigagagar a mangbirokka kadagiti impormasion a mabalinmo nga iranud kadagiti sabsabali. Kas pagarigan, mabalinmo kadi nga iranud iti asawam wenno iti gayyemmo a Kristiano dagiti bambanag a naammuam bayat ti panagadalmo? No aramidem dayta, maipasagepsep iti isip ken pusom dagiti bambanag a mangyeg iti positibo nga epekto iti dadduma.
No maipapan iti panagadalmo, tuladem ni Esdras, ti nagkauna nga adipen ti Dios a ‘nangisagana iti pusona nga umuman iti linteg ni Jehova.’ (Esd. 7:10) Kasano a maaramidmo dayta? Agadalka iti lugar a nawaya kadagiti pakasingaan ken makaay-ayo ti panagadal. Kalpasanna, ikararagmo kenni Jehova a tulongan ken ikkannaka iti sirib. (Sant. 1:5) Imtuodem iti bagim, ‘Ania ti namnamaek a maammuan iti panagadalko?’ Bayat ti panagbasam, siputam dagiti baro a kapanunotan. Mabalin nga inotar wenno markaam dagiti punto a kayatmo a tandaanan. Panunotem no kasano a mausarmo ti naadalmo iti panangasabam, panagdesision, wenno panangparegtam kadagiti kapammatiam. Sakbay nga agngudo ti panagadalmo, repasuem biit ti naadalmo. Makatulong dayta kenka tapno saanmo a malipatan ti naadalmo.
Kastoy ti komento ni Ewa iti panagbasana: “Bayat a basbasaek ti Biblia, usarek dagiti agkakanaig a teksto (cross-references), ti Watch Tower Publications Index, ken ti Watchtower Library iti CD-ROM. Aginotarak tapno adda mausarkonto iti ministeriok.”
Nabayagen a tagtagiragsaken ti dadduma ti napasnek a panagadalda maipapan kadagiti naespirituan a bambanag. (Prov. 2:1-5) Kaskasdi, adu ti responsabilidadda ken marigatanda a mangiwaya iti personal a panagadal. No kasta ti kasasaadmo, ania a panagbalbaliw ti mabalinmo nga aramiden iti eskediulmo?
Kasano a Maiwayaak?
Nalabit umanamongka a nalaklaka nga iwayaan dagiti bambanag a kaay-ayom nga aramiden. Adu ti nakatakuat a ti panangikeddeng kadagiti realistiko a kalat ket makatulong tapno maiwayaan ti napasnek a personal a panagadal, kas iti panangbasa iti intero a Biblia. Mabalin a makauma ti mangbasa iti nagatiddog a listaan ti kapkaputotan, detalyado a panangiladawan iti nagkauna a templo, wenno dagiti narigat a maawatan a padto a kasla awan pakainaiganna iti inaldaw a panagbiag. Ngem mangaramidka kadagiti praktikal nga addang tapno maragpatmo ti kalatmo. Kas pagarigan, sakbay a sukimatem ti maysa a paset ti Biblia a kasla narigat a maawatan, mabalin a basaem ti pakasaritaan dayta wenno ti praktikal nga aplikasionna. Masarakan ti kasta nga impormasion iti libro nga “Amin a Kasuratan Impaltiing ti Dios ket Naimbag,” a magun-odan iti dandani 50 a lenguahe.
Maparegtaka no usarem ti imahinasionmo bayat a basbasaem ti Biblia. Makatulong daytoy tapno mailadawanmo iti panunotmo dagiti karakter ken paspasamak. No iyaplikarmo dagitoy a sumagmamano a singasing, nalabit agbalin a naragragsak ken makagunggona ti panagadalmo. Iti kasta, ad-adda a magagaranka a mangiwaya iti panagadal. Nalaklakamto a mataginayon ti inaldaw a panagbasam iti Biblia.
Nupay dagita a singasing ket makatulong kadatayo kas indibidual, ania ti mabalinyo nga aramiden kas maysa a pamilia no okupadokayo? Apay a dikay pagsasaritaan dagiti gunggona nga itden ti panagadal ti pamilia? Mabalin nga iti dayta a panagsasarita adda mapanunotyo a praktikal a pamay-an, kas iti nasapsapa a panagriing iti kada aldaw wenno iti dadduma nga aldaw tapno usigen ti maysa a paset ti Biblia. Wenno iti panagsasaritayo, mabalin a maamirisyo a masapul a baliwanyo ti eskediul ti pamiliayo. Kas pagarigan, natakuatan ti dadduma a pamilia a praktikal a pagsasaritaanda ti teksto iti dayta nga aldaw wenno basaenda ti maysa a paset ti Biblia kalpasan ti pannanganda. Sakbay ti panagkalungkong wenno panangaramid iti sabali a trabaho, mangbusbos ti pamilia iti 10 wenno 15 a minuto a panagsasarita maipapan iti Kasuratan wenno panangbasa iti nayeskediul a basaen iti Biblia. Iti damo, mabalin a karit ti panangaramid iti dayta, ngem inton agangay, mayugalinton ti pamilia ket agbalinen a makaparagsak.
Inlawlawag da Wojciech ken Małgorzata no ania ti nakatulong iti pamiliada: “Idi, maibus ti panawenmi kadagiti di napateg ken babassit a bambanag. Inkeddengmi a kissayan ti panawenmi nga agipatulod kadagiti e-mail. Kinissayanmi met ti panawenmi nga agaliwaksay ken nangilatangkami iti aldaw ken oras para iti napasnek a panagadal.” Talaga a saan a nagbabawyan daytoy a pamilia ti panangaramidda iti panagbalbaliw, ket mabalin a masagrapto met ti pamiliayo ti kasta.
Makagunggona ti Panangparang-ay iti Umiso a Pannakaammo!
Ti napasnek a panagadal iti Sao ti Dios ket “agbunga iti tunggal naimbag nga aramid.” (Col. 1:10) Bayat a pumayso dayta iti biagyo, maiparangarang ti panagrang-ayyo iti amin. Agbalinkayo a naespirituan a tao nga addaan iti naan-anay a pannakaawat kadagiti kinapudno ti Biblia. Agbalin a natimtimbeng dagiti pangngeddengyo ken nasigsigokayo a tumulong kadagiti dadduma. Kangrunaanna, agbalinkayo a nasingsinged ken Jehova. Ad-adda a maapresiaryo dagiti galadna, ket maiparangarang daytoy bayat nga ipakaammoyo iti sabsabali ti maipapan kenkuana.—1 Tim. 4:15; Sant. 4:8.
Aniaman ti edad ken kapadasanyo, ikagumaanyo koma a pagraguan ti Sao ti Dios ket sipapasnek nga adalenyo dayta buyogen ti pannakaawat. Agtalekkayo a saanto a malipatan ni Jehova ti panangikagumaanyo. (Heb. 6:10) Iparukpoknanto kadakayo ti aglaplapusanan a bendisionna.
[Kahon iti panid 13]
NO ‘RUMANG-AYTAYO ITI UMISO A PANNAKAAMMO’. . .
Bumileg ti pammatitayo iti Dios ken maikaritayo a makipagna ken Jehova.—Col. 1:9, 10
Maaddaantayo iti nauneg a pannakaawat, ti abilidad a mangilasin tapno makaaramid kadagiti nainsiriban a desision.—Sal. 119:99
Ad-adda a maragsakantayo a tumulong iti sabsabali nga umadani ken Jehova.—Mat. 28:19, 20
[Dagiti Ladawan iti panid 14]
Mabalin a narigat ti makasarak iti maitutop a lugar a pagadalan, ngem makagunggona dayta
[Ladawan iti panid 15]
Dadduma a pamilia basaenda ti maysa a paset ti Biblia kalpasan ti pannangan