Bambantayannatayo ni Jehova Agpaay iti Pagimbagantayo

‘Mapan nga agsublisubli dagiti mata ni Jehova iti intero a daga tapno ipakitana ti pigsana maigapu kadagidiay a ti pusoda naan-anay kenkuana.’​—2 CRON. 16:9.

1. Apay a suksukimatennatayo ni Jehova?

PERPEKTO nga Ama ni Jehova. Ammona ti amin a banag maipapan kadatayo agraman ti ‘pagannayasan ti pampanunottayo.’ (1 Cron. 28:9) Nupay kasta, saannatayo a suksukimaten tapno laeng agbirok iti bidduttayo. (Sal. 11:4; 130:3) Imbes ketdi, kayatnatayo a salakniban manipud iti aniaman a mabalin a mangdadael iti relasiontayo kenkuana wenno iti namnamatayo nga agbiag nga agnanayon.​—Sal. 25:8-10, 12, 13.

2. Siasino ti pangusaran ni Jehova iti pigsana?

² Awan ti umartap iti pannakabalin ni Jehova ken makitana ti amin. Gapu iti dayta, kabaelanna a tulongan dagiti nasungdo kenkuana tunggal umararawda ken saranayenna ida kadagiti pakasuotanda. ‘Mapan nga agsublisubli dagiti mata ni Jehova iti intero a daga tapno ipakitana ti pigsana maigapu kadagidiay a ti pusoda naan-anay kenkuana,’ kuna ti 2 Cronicas 16:9. Imutektekanyo ta us-usaren ni Jehova ti pigsana agpaay kadagiti agserserbi kenkuana buyogen ti naan-anay a puso, kayatna a sawen, maysa a puso a nasin-aw ken umiso ti motibona. Saanna nga ipakita ti kasta a pannakaseknan kadagidiay manangallilaw wenno managinsisingpet.​—Jos. 7:1, 20, 21, 25; Prov. 1:23-33.

Makipagna iti Dios

3, 4. Ania ti kayat a sawen ti ‘makipagna iti Dios,’ ken ania a pagarigan iti Biblia ti tumulong kadatayo a mangtarus iti daytoy a banag?

³ Adu ti mangibilang a kasla imposible a ti Namarsua iti nakalawlawa nga uniberso ipalubosna a makipagna kenkuana dagiti tattao iti naespirituan a pamay-an. Ngem dayta a talaga ti kayat ni Jehova nga aramidentayo. Idi tiempo ti Biblia, da Enoc ken Noe ‘nakipagnada iti Dios.’ (Gen. 5:24; 6:9) Ni Moises “nagtalinaed a natibker a kasla kitkitaenna daydiay Maysa a di makita.” (Heb. 11:27) Sipapakumbaba a nakipagna ni Ari David iti nailangitan nga Amana. Kinunana: “Agsipud ta [ni Jehova] adda iti makannawanko, saanakto a mapagdiwengdiweng.”​—Sal. 16:8.

⁴ Siempre, saan a literal a kibinennatayo ni Jehova tapno makipagna kenkuana. Ngem posible dayta iti piguratibo a pamay-an. Kasano? Insurat ni salmista nga Asaf: “Patinayon nga addaak kenka; tinengngelmo ti makannawan nga imak. Babaen iti pammatigmaanmo idalannakto.” (Sal. 73:23, 24) Iti sabali a pannao, makipagpagnatayo ken Jehova no ipangpangagtayo ti balakadna, a maipapaay kangrunaanna babaen ti naisurat a Saona ken babaen “ti matalek ken masirib nga adipen.”​—Mat. 24:45; 2 Tim. 3:16.

5. Kas maysa nga ama, kasano a bambantayan ni Jehova dagidiay nasungdo kenkuana, ken ania koma ti panangmatmattayo kenkuana?

⁵ Gapu ta ipatpateg ni Jehova dagidiay makipagna kenkuana, bambantayanna ida kas maysa nga ama, ken aywanan, salakniban, ken isurona ida. “Pagbalinenkanto nga addaan iti pannakatarus ket isuroka iti dalan a rebbeng a papanam,” kuna ti Dios. “Mangipaayakto iti balakad a ti matak situturong kenka.” (Sal. 32:8) Iyimtuodyo iti bagiyo: ‘Makitkitak kadi ti bagik nga arigna kibkibinen ni Jehova, a dumdumngeg iti pannursurona bayat a bambantayannak? Gapu ta ammok a kitkitaennak, apektaranna kadi ti panagpampanunot, panagsasao, ken panagtigtignayko? Ket no makabasolak, imbes nga ibilangko a nakayakay ken nauyong ni Jehova, matmatak kadi kas maysa a naayat ken naasi nga Ama a sidadaan a tumulong iti agbabbabawi tapno maisubli ti nasinged a relasionna iti Dios?’​—Sal. 51:17.

6. Ania ti nakaidumaan ni Jehova kadagiti natauan a nagannak?

⁶ No dadduma, tulongannatayo ni Jehova sakbay pay nga agturongtayo iti dakes a dana. Kas pagarigan, mabalin a makitana a mangrugi nga agtarigagay ti nagulib a pusotayo kadagiti dakes a bambanag. (Jer. 17:9) Iti kasta a kasasaad, kabaelanna ti agtignay a nasaksakbay ngem iti natauan a nagannak gapu ta dagiti ‘agsilnasilnag a matana’ masukimatna ti kaunggan a pampanunottayo. (Sal. 11:4; 139:4; Jer. 17:10) Usigentayo no kasano a nagtignay ti Dios iti maysa a pasamak iti biag ni Baruc, ti personal a sekretario ken nasinged a gayyem ni propeta Jeremias.

Nagbalin kas Pudno nga Ama ken Baruc

7, 8. (a) Asino ni Baruc, ken ania a dakes a tarigagay ti nangrugi a nagrusing iti pusona? (b) Kas maysa nga ama, kasano nga impakita ni Jehova ti pannakaseknanna ken Baruc?

⁷ Ni Baruc ket maysa a nasigo nga eskriba a simamatalek a nakipagserbi ken Jeremias iti maysa a narigat nga annongen​—ti panangiwaragawag iti panangukom ni Jehova iti Juda. (Jer. 1:18, 19) Dimteng ti panawen a ni Baruc, a nalabit naggapu iti maysa a prominente a pamilia, rinugianna a tarigagayan dagiti “naindaklan a bambanag,” kas iti personal nga ambision wenno tarigagay a bumaknang. Aniaman kadagita, nakita ni Jehova nga agrusrusing iti puso ni Baruc dayta a napeggad a tarigagay. Babaen ken Jeremias, dagus a tinaming ni Jehova dayta a banag, nga imbagana ken Baruc: “Kinunam: ‘Asiak pay, ita, ta ti rigatko ninayonan ni Jehova iti ladingit! Napakilak gapu iti panagsennaayko, ket awan nasarakak a lugar a paginanaan.’” Kalpasanna, kinuna ti Dios: “Agtultuloy nga isapsapulam ta bagim iti naindaklan a bambanag. Dika itultuloy ti agsapul.”​—Jer. 45:1-5.

⁸ Nupay saanna a pinanuynoyan ni Baruc, dina met pinagungtan, no di ket impakitaanna iti pudno a pannakaseknan kas maysa nga ama. Nalawag a nakita ti Dios a ti tarigagay ni Baruc ket saan a nagtaud iti maysa a dakes ken manangallilaw a puso. Ammo met ni Jehova nga asidegen a madadael ti Jerusalem ken Juda, ket dina kayat a kumapuy ti espiritualidad ni Baruc bayat kadagita a napeggad a tiempo. Gapuna, tapno maisubli ti umiso a panangmatmat ti adipenna, impalagip ti Dios ti ‘ipagtengna a didigra iti isuamin a lasag.’ No agtignay a nainsiriban ni Baruc, isu ket maispal. (Jer. 45:5) Kasla ibagbaga ti Dios: ‘Agpanunotka a naimbag, Baruc. Dimo liplipatan ti asidegen a mapasamak iti managbasol a Juda ken Jerusalem. Agtalinaedka a matalek tapno agbiagka! Salaknibanka.’ Nabatad a nadanon ni Jehova ti puso ni Baruc, ta impangagna ti pammalagip kenkuana ket naispal idi nadadael ti Jerusalem, a napasamak kalpasan ti 17 a tawen.

9. Ania ti sungbatyo kadagiti saludsod a naidatag iti parapo?

⁹ Bayat nga ut-utobenyo ti salaysay maipapan ken Baruc, usigenyo dagiti sumaganad a saludsod ken teksto: Ania ti maadaltayo maipapan kenni Jehova ken iti panangmatmatna kadagiti adipenna sigun iti wagas ti pannakilangenna ken Baruc? (Basaen ti Hebreo 12:9.) Yantangay agbibiagtayon iti napeggad a tiempo, ania ti maadaltayo iti balakad ti Dios kenni Baruc ken iti tignay nga inaramid ni Baruc? (Basaen ti Lucas 21:34-36.) Kas panangtulad ken Jeremias, kasano a maiparangarang dagiti Kristiano a panglakayen ti pannakaseknan ni Jehova kadagiti adipenna?​—Basaen ti Galacia 6:1.

Ti Ayat ti Ama nga Inyanninaw ti Anak

10. Apay a kabaelan ni Jesus nga ibaklay ti annongenna kas Ulo ti kongregasion Kristiano?

¹⁰ Sakbay ti panawen Kristiano, naipalgak ti panagayat ni Jehova iti ilina babaen kadagiti mammadto ken dadduma pay a matalek nga adipen. Iti kaaldawantayo, kangrunaan a naipalgak dayta babaen iti Ulo ti kongregasion Kristiano, ni Jesu-Kristo. (Efe. 1:22, 23) Gapuna, iti libro nga Apocalipsis, nailadawan ni Jesus kas maysa a kordero nga addaan iti “pito a mata, a dagiti mata kaipapananda ti pito nga espiritu ti Dios a naibaon iti intero a daga.” (Apoc. 5:6) Wen, perpekto ti abilidad ni Jesus a mangilasin gapu iti naan-anay a pannakabalin nga impaay ti nasantuan nga espiritu ti Dios. Makitana met ti kaunggantayo ken awan ti mailemmengtayo kenkuana.

11. Ania ti akem ni Kristo, ken kasano a ti panangmatmatna kadatayo iyanninawna ti panangmatmat ni Amana?

¹¹ Kas ken Jehova, saan a kasla polis ni Jesus nga agsipsiput iti kamali manipud langit. Suksukimatennatayo buyogen ti ayat. Ti titulo ni Jesus nga “Agnanayon nga Ama” ipalagipna kadatayo ti akemna a mangipaay iti biag nga agnanayon kadagiti amin a mangipakita iti pammati kenkuana. (Isa. 9:6) Maysa pay, kas Ulo ti kongregasion Kristiano, kabaelan ni Kristo a tignayen dagiti sidadaan ken nataengan iti naespirituan a Kristiano, nangnangruna dagiti panglakayen, tapno mangipaayda iti liwliwa wenno balakad kadagidiay agkasapulan.​—1 Tes. 5:14; 2 Tim. 4:1, 2.

12. (a) No maipapan ken Jesus, ania ti ipalgak dagiti surat iti pito a kongregasion idiay Asia Menor? (b) Kasano a matulad dagiti panglakayen ti panangmatmat ni Kristo iti arban ti Dios?

¹² Ti dakkel a pannakaseknan ni Kristo iti arban ket agminar iti surat kadagiti panglakayen iti pito a kongregasion idiay Asia Menor. (Apoc. 2:1–3:22) Kadagita a surat, impamatmat ni Jesus nga ammona no ania ti mapaspasamak iti tunggal kongregasion ken no kasano kadakkel ti pannakaseknanna kadagiti pasurotna. Kasta met laeng ita​—ken ad-adda pay​—yantangay ti sirmata iti Apocalipsis ket matungpal kabayatan ti “aldaw ti Apo.”a (Apoc. 1:10) Masansan a mayebkas ti ayat ni Kristo babaen kadagiti panglakayen, nga agserserbi kas naespirituan a pastor iti kongregasion. Kabaelanna a tignayen dagitoy a “sagut a tattao” a mangliwliwa, mangparegta, wenno mangbalakad no kasapulan. (Efe. 4:8; Ara. 20:28; basaen ti Isaias 32:1, 2.) Matmatanyo kadi dagiti panagreggetda kas ebkas ti personal a pannakaseknan ni Kristo kadakayo?

Tulong iti Umiso a Tiempo

13-15. Kasano a sungbatan ti Dios dagiti kararagtayo? Mangted kadagiti pagarigan.

¹³ Napadasanyo kadin ti nagkararag a sipapasnek maipaay iti tulong ket nasungbatan dayta babaen ti makapabileg nga isasarungkar ti maysa a Kristiano a nataengan iti naespirituan? (Sant. 5:14-16) Wenno nalabit natulongannakayo ti maysa a palawag iti Nakristianuan a gimong wenno impormasion manipud iti maysa kadagiti publikasiontayo. Masansan a sungbatan ni Jehova dagiti kararag kadagita a pamay-an. Kas pagarigan, kalpasan ti palawag ti panglakayen, isu ket inasitgan ti maysa a kabsat a babai a biktima ti nakaro a pannakairurumen sumagmamano a lawas sakbay dayta a palawag. Imbes a ti parikutna ti ibagana, inyebkasna ti nauneg nga apresasionna kadagiti naespirituan a punto iti palawag nga agaplikar iti kasasaadna ken nangted kenkuana iti dakkel a liwliwa. Anian a ragsakna ta tinabunuanna dayta a gimong!

¹⁴ No maipapan iti tulong a nagun-odan gapu iti kararag, usigentayo ti kapadasan ti tallo a balud a nakaammo iti kinapudno a linaon ti Biblia bayat ti pannakaibaludda ken nagbalin a di bautisado nga agibumbunannag. Gapu iti maysa a naranggas a pasamak, naikkat ti sumagmamano a pribilehio ti amin a balud. Nangpataud dayta iti panagprotesta. Nagnunumuan dagiti balud a kalpasan ti pammigat iti sumaganad nga aldaw, saanda nga isubli dagiti pingganda kas panangipakita iti panagprotestada. Nagparikut dagiti tallo a di bautisado nga agibumbunannag. No makiramanda iti protesta, masalungasingda ti balakad ni Jehova a masarakan iti Roma 13:1. No saanda met a makiraman, manamnamada ti ibubusor dagiti makapungtot a balud.

¹⁵ Gapu ta saanda a makapagsasarita, inkararag dagitoy a tallo a maaddaanda koma iti sirib. Kabigatanna, agpapada ti napanunotda a solusion​—saandan a mamigat. Idi a dagiti guardia alaendan dagiti plato, awan ti isubli dagiti tallo a lallaki. Anian a ragsakda ta tartarabayen ida ti “Managdengngeg iti kararag”!​—Sal. 65:2.

Panangsegga iti Masanguanan Buyogen ti Panagtalek

16. Kasano a ti panangasaba ket pammaneknek iti pannakaseknan ni Jehova kadagiti marakarnero?

¹⁶ Ti sangalubongan a panangasaba ti sabali pay a pammaneknek a maseknan ni Jehova kadagiti nasingpet ti panagpuspusona a tattao sadinoman ti pagnanaedanda. (Gen. 18:25) Kabaelan ni Jehova nga iturong dagiti adipenna kadagiti marakarnero a tattao, masansan babaen kadagiti anghelna​—uray no agnanaed dagitoy a tattao kadagiti lugar a saan pay a nakasabaan iti naimbag a damag. (Apoc. 14:6, 7) Alaentay a pagarigan ni Felipe, maysa nga ebanghelisador idi umuna a siglo. Babaen ti maysa nga anghel, imbilin ti Dios ken Felipe a birokenna ti opisial nga Etiope tapno ilawlawagna kenkuana ti Kasuratan. Ania ti resultana? Inawat ti Etiope ti naimbag a damag ken nagpabautisar kas pasurot ni Jesus.b​—Juan 10:14; Ara. 8:26-39.

17. Apay a saantayo koma a madanagan unay maipapan iti masanguanan?

¹⁷ Bayat nga umad-adanin ti panungpalan daytoy agdama a sistema ti bambanag, agtultuloy ti naipadto nga “ut-ot ti panagrigat.” (Mat. 24:8) Kas pagarigan, dakkel ti ngimminaan dagiti gagatangen gapu iti umad-adu nga agkasapulan, nakaro a kasasaad ti paniempo, wenno saan a natalged nga ekonomia. Narigrigaten ti agsapul iti panggedan, ken mabalin a mapilitan dagiti empleado nga agtrabaho iti ad-adu nga oras. Ngem aniaman ti mapasamak, saan koma a madanagan unay dagidiay mangyun-una iti naespirituan ken mangtagtaginayon iti ‘simple a mata.’ Ammoda nga ay-ayaten ken aywanan ida ti Dios. (Mat. 6:22-34) Kas pagarigan, usigenyo no kasano nga impaay ni Jehova ti kasapulan ni Jeremias kabayatan ti nariribuk a panungpalan ti Jerusalem idi 607 K.K.P.

18. Kasano nga impakita ni Jehova ti panagayatna ken Jeremias kabayatan ti pannakalakub ti Jerusalem?

¹⁸ Idi arinunos ti pananglakub ti Babilonia iti Jerusalem, naibalud ni Jeremias iti Paraangan ti Guardia. Nangalaanna ngay iti taraonna? Gapu ta nakabalud, naan-anay nga agpannuray kadagidiay adda iti aglikmutna, a kaaduan kadakuada ti manggurgura kenkuana! Kaskasdi, nagtalek ni Jeremias iti Dios a nangikari a mangaywan kenkuana, imbes nga iti tao. Tinungpal kadi ni Jehova ti karina? Wen! Siniguradona nga inaldaw nga umawat ni Jeremias iti “nagbukel a tinapay . . . agingga a ti isuamin a tinapay naibus iti siudad.” (Jer. 37:21) Ni Jeremias, agraman ni Baruc, Ebed-melec, ken dadduma pay, nalasatanda dayta a tiempo ti bisin, sakit, ken ipapatay.​—Jer. 38:2; 39:15-18.

19. Bayat a segseggaantayo ti masanguanan, ania koma ti determinasiontayo?

¹⁹ Wen, “dagiti mata ni Jehova addada kadagidiay nalinteg, ket dagiti lapayagna situturong iti ararawda.” (1 Ped. 3:12) Maragsakankayo kadi ta bambantayannakayo ti nailangitan nga Amayo? Natalged kadi ti riknayo gapu ta ammoyo a bambantayannakayo maipaay iti pagimbaganyo? No kasta, determinadokayo koma nga agtultuloy a makipagna iti Dios, aniaman ti mapasamak iti masanguanan. Masiguradotayo a kas maysa nga ama, kanayon a bantayan ni Jehova ti amin a nasungdo kenkuana.​—Sal. 32:8; basaen ti Isaias 41:13.

[Footnotes]

Mailawlawagyo Kadi?

• Kasanotayo a maipakita a ‘makipagpagnatayo iti Dios’?

• Kasano nga impakita ni Jehova ti panagayatna ken Baruc?

• Kas Ulo ti kongregasion Kristiano, kasano nga imparangarang ni Jesus dagiti galad ni Amana?

• Kadagiti ania a pamay-an a maipakitatayo nga agtalektayo iti Dios bayat dagiti napeggad a tiempo?

[Dagiti Ladawan iti panid 9]

Kas iti pannakaseknan ni Jeremias kenni Baruc, iyanninaw ita dagiti Kristiano a panglakayen ti pannakaseknan ni Jehova

[Ladawan iti panid 10]

Kasano a mangipapaay ni Jehova iti tulong iti umiso a tiempo?