Nasaknap a Pammati
“Mamin-adu idi a mabatibatak a maur-uramak idiay impierno! Matagtagainepko a maitaptappuakak iti umap-apuy a lugar isu a mariingak nga um-umkis. Dayta ti gapuna nga ikagkagumaak unay ti di agbasol.”—Arline.
PATIEM kadi a ti impierno ket maysa a lugar a pagtutuokan dagiti managbasol? Kasta ti pammati ti adu a tattao. Kas pagarigan, idi 2005, natakuatan ti maysa nga eskolar iti University of St. Andrews idiay Scotland a patien ti kakatlo kadagiti klero iti dayta a pagilian a dagidiay simmina iti Dios ket agsagaba iti “agnanayon a mental a pannakatutuok idiay impierno.” Kakalima ti mamati a dagidiay adda idiay impierno ket agsagaba iti pisikal a pannakatutuok.
Iti adu a pagilian, nasaknap ti panamati iti impierno. Kas pagarigan, iti surbey ti Gallup idiay Estados Unidos idi 2007, agarup 70 a porsiento kadagidiay napagsaludsodan ti mamati iti impierno. Uray kadagiti pagilian a kaaduan ket saan a relihioso, kaskasdi a mamatida iti impierno. Sigun iti surbey ti Gallup idi 2004 idiay Canada, 42 a porsiento kadagiti umili ket mamati iti impierno. Idiay met Gran Britania, kombinsido ti 32 a porsiento nga adda impierno.
No Ania ti Isursuro Dagiti Klero
Adu kadagiti klero ti saanen a mangisursuro a ti impierno ket literal nga umap-apuy a pagtutuokan. Ti isursurodan ket ti ideya nga umasping iti nadakamat iti Catechism of the Catholic Church a naipablaak idi 1994. Sigun iti dayta a reperensia, “ti kangrunaan a pannusa ti impierno ket ti agnanayon a pannakaisina iti Dios.”
Ngem adu latta dagiti mamati a ti impierno ket lugar ti mental ken pisikal a pannakatutuok. Sigun kadagidiay mangisursuro iti kasta a doktrina, naibasar dayta iti Biblia. Kinuna ni R. Albert Mohler a presidente ti Southern Baptist Theological Seminary: “Maysa dayta a kinapudno iti Biblia.”
Apay a Napateg no Ania ti Patiem?
No agpayso a ti impierno ket pagtutuokan, rumbeng laeng a pagbutngam dayta. Ngem no palso dayta a pannursuro, dagiti panguluen ti relihion a mangisursuro iti dayta ket mangpatpataud iti panagbuteng nga awan napaypayso a nakaibasaranna ken pannakariro kadagidiay mamati kadagita. Padpadaksenda pay ti Dios.
Ania ti kuna ti Biblia a Sao ti Dios maipapan iti daytoy a suheto? Kadagiti sumaganad nga artikulo, nakotar dagiti Biblia nga us-usaren dagiti Katoliko ken Protestante tapno masungbatan dagitoy tallo a saludsod: (1) Ania a talaga ti mapasamak no matay ti tao? (2) Ania ti insuro ni Jesus maipapan iti impierno? (3) Ania ti epekto kenka ti pannakaammom iti kinapudno maipapan iti impierno?