Saludsod Dagiti Agbasbasa
Patien Kadi Dagiti Saksi ni Jehova nga Isuda Laeng ti Maisalakan?
Patien dagiti Saksi ni Jehova a nasarakandan ti pudno a relihion. Ta no saan, nagbirokda koma iti sabali a relihion. Kas kadagiti kameng ti adu a relihion, mangnamnama dagiti Saksi ni Jehova a maisalakanda. Nupay kasta, patienda met a saan nga isuda ti mangikeddeng no asino ti maisalakan. Ti laeng Dios ti mangikeddeng iti dayta ta Isu ti Ukom.—Isaias 33:22.
Sigun iti Sao ti Dios, dagidiay maispal saanda laeng a basta kayat ti maisalakan no di ket nasken nga agpaiwanwanda met iti daydiay Manangisalakan. Kas panangyilustrar: Ipapantayon a nayaw-awan iti let-ang ti maysa nga agdaldaliasat. Gapuna, kayatna a maammuan ti umiso a dalan. Mabirokanna ngata? Bueno, agpannuray dayta no kasano nga agtignay iti maipaay a tulong. No natangsit, mabalin a pagkedkedanna ti tulong. Ngem no napakumbaba, awatenna ti tulong ket sitatalged a mabirokanna ti umiso a dalan.
Umasping iti dayta, ti laeng maisalakan ket dagidiay agpaiwanwan iti Manangispal iti sangatauan a ni Jehova a Dios. Ti pannakaisalakan ket sagut ti Dios ngem saan nga amin a tao ti makagun-od iti dayta. Kinuna ni Jesus, ti Anak ti Dios: “Saan a tunggal maysa nga agkunkuna kaniak, ‘Apo, Apo,’ makastrekto iti pagarian ti langlangit, no di ket daydiay mangar-aramid ti pagayatan ni Amak nga adda iti langlangit.”—Mateo 7:21.
Patien dagiti Saksi ni Jehova nga isalakan laeng ti Dios dagidiay mangiparparangarang iti pammati iti daton a subbot ni Jesus ken sisisinged a mangannurot kadagiti pannursurona. (Aramid 4:10-12) Usigentayo ti tallo a napateg a kalikagum agpaay iti pannakaisalakan, kas nailanad iti Sao ti Dios.
(1) “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa,” kinuna ni Jesus kadagiti adalanna. (Juan 13:35) Ti panangipaay ni Jesus iti biagna para iti sabsabali ipaganetgetna ti kinapateg ti ayat. Dagidiay agayat kadagiti padada a tattao iparparangarangda ti nagpateg a galad a makalikaguman agpaay iti pannakaisalakan.
(2) “Impakaammok kadakuada ti naganmo,” inkararag ni Jesus iti Amana. (Juan 17:26) Ammo ni Jesus a nagpateg para iti Amana ti personal a naganna a Jehova. Inkararag ni Jesus a “masantipikar koma” ti nagan ni Amana. (Mateo 6:9) Ti panangsantipikar iti nagan ti Dios ramanenna ti panangammo ken panangibilang a napateg ken nasantuan dayta a nagan. Kas ken Jesus, dagidiay agtarigagay a maisalakan nasken nga usarenda ti nagan ti Dios. Masapul met nga isuroda kadagiti sabsabali ti maipapan iti nagan ti Dios ken kadagiti galadna. (Mateo 28:19, 20) Kinapudnona, dagidiay laeng umawag iti nagan ti Dios ti maisalakan.—Roma 10:13.
(3) “Ti pagariak saan a paset daytoy a lubong,” kinuna ni Jesus kenni Poncio Pilato. (Juan 18:36) Manmano ita ti mangiparparangarang iti pammati iti Pagarian ti Dios, wenno gobierno, nga iturayan ni Jesus. Imbes ketdi, insadagda ti namnamada kadagiti gobierno ti tao. Ngem dagidiay maisalakan sisusungdo a suportaranda ti Pagarian ti Dios ken isuroda kadagiti sabsabali no kasano a wayawayaan dayta a Pagarian ti amin a matalek a tattao.—Mateo 4:17.
Kalpasan a naammuanda ti dadduma a makalikaguman agpaay iti pannakaisalakan, kinuna dagiti adalan ni Jesus: “Asino ti mabalin a maisalakan?” Simmungbat ni Jesus: “Ti bambanag a di mabalin iti tao mabalin iti Dios.” (Lucas 18:18-30) Sipapasnek dagiti Saksi ni Jehova a mangitungtungpal kadagita a kalikagum agpaay iti pannakaisalakan. Ikagkagumaanda met a tulongan ti sabsabali tapno maisalakan dagitoy.