Umadanika iti Dios
“Siak ni Jehova a Diosyo Nasantuanak”
“SANTO, santo, santo ni Jehova a Dios.” (Apocalipsis 4:8) Babaen kadagita a sasao, ilawlawag ti Biblia a nasantuan ni Jehova. Kaipapanan dayta nga awan umartap ken pumada kenkuana iti kinasin-aw ken kinalinteg. Ti Dios ket naan-anay a naisina iti amin a kinakillo; saan a mamulitan iti aniaman a basol. Kaipapanan kadi dayta nga awanen ti namnama dagiti imperpekto a tattao a makaadani iti kasasantuan a Dios? Saan! Usigentayo dagiti mangyeg namnama a sasao a nailanad iti Levitico kapitulo 19.
Kinuna ni Jehova ken Moises: “Agsaoka iti intero a gimong ti annak ti Israel.” Dagiti simmaruno nga imbagana ket agaplikar iti tunggal maysa iti dayta a nasion. Ania ti ibaga ni Moises kadakuada? Intuloy a kinuna ti Dios: “Masapul a kunaem kadakuada, ‘Rebbeng nga agbalinkayo a nasantuan, agsipud ta siak ni Jehova a Diosyo nasantuanak.’” (Bersikulo 2) Tunggal Israelita masapul nga ipakitana ti kinasanto. Ti sao a “rebbeng” ipasimudaagna a dayta ket maysa a bilin, saan a singasing. Imposible kadi a maaramidan dagiti tattao ti kidkiddawen ti Dios?
Imutektekam ta dinakamat ni Jehova ti mismo a kinasantona, saan a kas maysa a pagalagadan a surotenda no di ket kas maysa a rason a nakaibasaran ti bilinna. Iti sabali a pannao, saan nga imbaga ni Jehova kadagiti imperpekto nga agdaydayaw kenkuana iti Israel a makipadada iti kinasantona. Ngamin, imposible dayta. Awan a pulos ti kapada ti kinasanto ni Jehova kas “Daydiay Kasasantuan.” (Proverbio 30:3) Ngem gapu ta nasantuan ni Jehova, namnamaenna nga agbalin a nasantuan dagiti agdaydayaw kenkuana—kayatna a sawen, iti wagas a kabaelan dagiti imperpekto a tattao. Kadagiti ania a wagas nga agbalinda a nasantuan?
Kalpasan nga imbilin ni Jehova nga agbalinda a nasantuan, imbinsabinsana babaen ken Moises dagiti pagannurotan nga agaplikar iti tunggal aspeto ti biagda. Tunggal Israelita ket mainanama nga agtulnog kadagiti pagalagadan ti kababalin a kas kadagiti sumaganad: ipakitana ti umiso a panagraem kadagiti nagannak ken natataengan (bersikulo 3, 32); ipakitana ti kinaasina kadagiti tuleng, bulsek, ken dadduma pay a marigrigat (bersikulo 9, 10, 14); agbalin a mapagpiaran ken di mangidumduma iti pannakilangenna iti sabsabali (bersikulo 11-13, 15, 35, 36); ken ayatenna dagiti padana nga agdaydayaw a kas iti panagayatna iti bagina. (Bersikulo 18) No tungpalenna dagita ken ti dadduma pay a nadakamat a pagalagadan, ti Israelita ket ‘pudno nga agbalin a nasantuan iti Dios[na].’—Numeros 15:40.
Ti bilin maipapan iti kinasanto paunegenna ti pannakaawattayo kadagiti pampanunot ken daldalan ni Jehova a Dios. Masursurotayo a tapno maaddaantayo iti nasinged a relasion kenkuana, masapul nga aramidentayo ti amin a kabaelantayo nga agbiag a maitunos kadagiti pagalagadanna iti nasantuan a kababalin. (1 Pedro 1:15, 16) No annurotentayo dagita a pagalagadan, matagiragsaktayo ti kasayaatan a biag.—Isaias 48:17.
Ti bilin nga agbalintayo a nasantuan iyanninawna met ti panagtalek ni Jehova kadagiti agdaydayaw kenkuana. Dina pulos namnamaen ti nalablabes ngem iti kabaelantayo nga aramiden. (Salmo 103:13, 14) Ammona a datayo a tattao a naaramid sigun iti ladawanna ket addaan iti potensial nga agbalin a nasantuan iti relatibo nga anag, uray kaskasano. (Genesis 1:26) Gapu iti dayta, magutugotka kadi a mangammo iti ad-adu pay no kasano nga ad-adda a makaadanika iti nasantuan a Dios a ni Jehova?
[Ladawan iti panid 9]
Addaantayo iti potensial nga agbalin a nasantuan