Ammoyo Kadi?

Siasino dagiti eskriba a nangbusor ken Jesus?

Bayat ti ministerio ni Jesus, nakasaritana dagiti eskriba saan laeng nga idiay Jerusalem no di ket kadagiti babbabassit pay nga ili ken purok. Iti ruar ti Jerusalem​—ken uray kadagiti komunidad dagiti Judio iti ruar ti Palestina​—dagita a lallaki ket segundario nga opisial, nasursuruan iti Linteg, ken mabalin a nagserbi kas parakopia ken ukom iti lugarda.​—Marcos 2:6; 9:14; Lucas 5:17-21.

Iti Jerusalem, adda napateg nga akem dagiti eskriba iti gobierno dagiti Judio. (Mateo 16:21) Sigun iti The Anchor Bible Dictionary, ti akemda ket “agparang a katulongan dagiti papadi, agpadpada iti pangukoman ken iti panangipatungpal kadagiti kostumbre ken linteg dagiti Judio, ken kadagiti inaldaw nga aktibidad iti Sanhedrin.” Kas nangato ti akemda a mannursuro iti Linteg, dadduma kadagitoy nga eskriba ket miembro ti Sanhedrin, wenno nangato a pangukoman dagiti Judio. Agserbida a kadua dagiti nangato a padi ken Fariseo.

Kaaduanna, dagiti eskriba ket agparang a bumusbusor ken Jesus. Ngem adda dagidiay saan. Kas pagarigan, kinuna ti maysa nga eskriba ken Jesus: “Surotenkanto sadinoman ti papanam.” Kinuna met ni Jesus iti sabali pay: “Saanka nga adayo iti pagarian ti Dios.”​—Mateo 8:19; Marcos 12:28-34.

Ania ti kayat a sawen no ti maysa a tao ket napulotan?

Iti Makintengnga a Daya idi panawen ti Biblia, ti panangsapsapo iti lana ti ulo ti maysa a tao ket tanda ti pananganamong wenno naragsak a panangsangaili. Kaaduanna, ti lana a mausar ket lana ti olibo a nalaokan iti bangbanglo. Bukbokan met dagiti Hebreo ti ulo ti maysa, wenno pulotan, no isu ket opisial a madutokan agpaay iti naisangsangayan a posision iti turay. Kas pagarigan, napulotan ni Aaron apaman a nadutokan nga agserbi kas nangato a padi. (Levitico 8:12) Iti kaso ni Ari David, “innala ni Samuel ti sara ti lana ket pinulotanna . . . , ket ti espiritu ni Jehova nangrugi nga agtignay ken David manipud iti dayta nga aldaw ken agpatpatuloy.”​—1 Samuel 16:13.

Iti Hebreo a lenguahe, ti termino a nausar para iti panangpulot ket ma·shachʹ, a nagtaudan ti sao a ma·shiʹach, wenno Mesias. Ti Griego a sao a katupag dayta ket khriʹo, manipud iti sao a khri·stosʹ, wenno Kristo. Gapuna, mabalin a matukoy da Aaron ken David kas mesias, wenno daydiay napulotan. Maawagan met ni Moises kas kristo, wenno daydiay napulotan, iti anag a ti Dios ti nangdutok kenkuana kas pannakabagina.​—Hebreo 11:24-26.

Ni Jesus a taga-Nazaret ket personal a dinutokan ti Dios agpaay iti akem nga addaan iti dakkel nga autoridad. Imbes a napulotan babaen iti literal a lana, ni Jesus ket napulotan babaen ti nasantuan nga espiritu ti Dios. (Mateo 3:16) Kas daydiay pinili ni Jehova a Napulotan, maitutop a maawagan ni Jesus kas ti Mesias, wenno Kristo.​—Lucas 4:18.