Agtalinaedka iti Ayat ti Dios

“Pagtalinaedenyo ti bagbagiyo iti ayat ti Dios, bayat nga ur-urayenyo ti asi ni Apotayo a Jesu-Kristo a maipaay iti agnanayon a biag.”​—JUD. 21.

1, 2. Kasano nga impakita ni Jehova ti panagayatna kadatayo, ken kasanotayo nga ammo a saan nga automatiko a pagtalinaedennatayo iti ayatna?

IMPAKITA ni Jehova a Dios ti ayatna kadatayo iti nadumaduma a pamay-an. Ngem awan duadua a ti kangrunaan a pammaneknek iti ayatna ket ti panangipaayna iti daton a pangsubbot. Kasta unay ti panagayatna iti sangatauan nga imbaonna ditoy daga ti bugbugtong nga Anakna tapno matay maigapu kadatayo. (Juan 3:16) Inaramid daytoy ni Jehova gapu ta kayatna nga agbiagtayo nga agnanayon, ken kayatna pay a magunggonaantayo nga agnanayon iti ayatna!

² Ngem manamnamatayo kadi nga automatiko a pagtalinaedennatayo ni Jehova iti ayatna aniaman ti aramidentayo? Saan. Iti Judas bersikulo 21, naidagadag kadatayo: “Pagtalinaedenyo ti bagbagiyo iti ayat ti Dios, bayat nga ur-urayenyo ti asi ni Apotayo a Jesu-Kristo a maipaay iti agnanayon a biag.” Dagiti sasao a “pagtalinaedenyo ti bagbagiyo iti ayat ti Dios” ipasimudaagna nga adda masapul nga aramidentayo. Ania ngarud ti nasken nga aramidentayo tapno agtalinaedtayo iti ayat ti Dios?

Kasano a Makapagtalinaedtayo iti Ayat ti Dios?

3. Ania ti imbaga ni Jesus a napateg nga aramidenna tapno makapagtalinaed iti ayat ni Amana?

³ Masarakantayo ti sungbat dayta a saludsod kadagiti sinao ni Jesus iti maudi a rabii ti biagna ditoy daga. Kinunana: “No tungpalenyo dagiti bilinko, agtalinaedkayto iti ayatko, kas iti panangtungpalko kadagiti bilin ti Ama ken panagtalinaedko iti ayatna.” (Juan 15:10) Nalawag nga ammo ni Jesus a napateg ti panagtulnogna kadagiti bilin ni Jehova tapno mataginayonna ti nasayaat a takderna iti imatang ni Amana. No inaramid dayta ti perpekto nga Anak ti Dios, saan kadi a rumbeng a kasta met ti aramidentayo?

4, 5. (a) Ania ti kangrunaan a pamay-an a maipakitatayo nga ay-ayatentayo ni Jehova? (b) Apay nga awan ti rasontayo a mangibilang a makapadagsen ti panagtulnog kadagiti bilin ni Jehova?

⁴ Umuna iti amin, maipakitatayo ti ayattayo ken Jehova babaen ti panagtulnog kenkuana. Kastoy ti kinuna ni apostol Juan: “Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.” (1 Juan 5:3) Pudno, ti panagtulnog ket saan a kanayon a makaay-ayo iti daytoy a lubong. Ngem imutektekanyo dagitoy a sasao: “Kaskasdi a dagiti bilinna saanda a makapadagsen.” Saan a kidkiddawen ni Jehova nga aramidentayo ti ditay kabaelan.

⁵ Kas panangyilustrar: Kiddawem kadi iti nasinged a gayyemmo a bagkatenna ti maysa a banag nga ammom a dina kabaelan a bagkaten? Saan la ketdi! Adayo a naas-asi ni Jehova ngem kadatayo ken ad-adda nga ammona dagiti limitasiontayo. Ipasigurado kadatayo ti Biblia a ‘silalagip ni Jehova a tapoktayo.’ (Sal. 103:14) Pulos a dina ipaaramid kadatayo ti banag a ditay kabaelan. Gapuna, awan ti rason nga ibilangtayo a makapadagsen ti panagtulnog kadagiti bilin ni Jehova. Iti kasumbangirna, matmatantayo ti panagtulnog kas nagsayaat a gundaway tapno maipakitatayo a pudno nga ay-ayatentayo ti nailangitan nga Amatayo ken kayattayo ti agtalinaed iti ayatna.

Naisangsangayan a Sagut Manipud ken Jehova

6, 7. (a) Ania ti konsiensia? (b) Iyilustrar no kasano a makatulong ti konsiensia tapno makapagtalinaedtayo iti ayat ti Dios.

⁶ Iti narikut a lubong a pagbibiagantayo, maipaspasangotayo iti adu a pangngeddeng nga agkalikagum iti panagtulnog iti Dios. Kasano a masiguradotayo a dagiti pangngeddengtayo ket maitunos iti pagayatan ti Dios? Impaayannatayo ni Jehova iti sagut a pudno a makatulong kadatayo nga agbalin a natulnog​—ti konsiensia. Ania ti konsiensia? Maysa dayta a naisangsangayan nga abilidad a mangsukimat iti bagitayo. Agserbi dayta kas makin-uneg nga ukom, a tumulong kadatayo a mangutob kadagiti aramidentayo a pangngeddeng wenno mangusig kadagiti tignay nga inaramidtayo tapno matingitingtayo no umiso met laeng dagita wenno saan.​—Basaen ti Roma 2:14, 15.

⁷ Kasano a makatulong kadatayo ti konsiensiatayo? Usigenyo daytoy nga ilustrasion. Adda maysa nga agdaldaliasat iti nalawa a kabakiran. Awan ti desdes, dalan, wenno karatula a makitana. Ngem agtultuloy latta iti destinasionna. Apay? Adda ngamin sursurotenna a kompas. Namarkaan dayta iti uppat a kangrunaan a direksion ken addaan iti magnetiko a paratudo a kanayon a nakaturong iti amianan. No awan dayta a kompas, sigurado a mayaw-awan ti agdaldaliasat. Umasping iti dayta, no ti tao ket saan a naparaburan iti konsiensia, sigurado a saan a makaaramid kadagiti umiso ken nalinteg a pangngeddeng.

8, 9. (a) Ania ti limitasion ti konsiensiatayo a masapul a laglagipentayo? (b) Ania ti aramidentayo tapno sigurado a makatulong kadatayo ti konsiensiatayo?

⁸ Ngem kas iti kompas, adda limitasion ti konsiensia. No ti agdaldaliasat ket mangikabil iti magneto iti asideg ti kompasna, mabaliwan ti nakaiturongan ti paratudona. Umasping iti dayta, no palubosantayo a ti managimbubukodan a tarigagay ti pusotayo ti mangimpluensia kadagiti pangngeddengtayo, ania ti mapasamak? Mabalin nga iyaw-awannatayo ti konsiensiatayo. Pakdaarannatayo ti Biblia: “Ti puso nagulgulib ngem iti aniaman a banag ket desperado.” (Jer. 17:9; Prov. 4:23) Maysa pay, no ti agdaldaliasat ket awanan iti umiso ken mapagpannurayan a mapa, bassit laeng wenno awan pay ketdi ti maitulong kenkuana ti kompasna. Umasping iti dayta, no saantayo nga agpannuray iti natalged ken di agbalbaliw a panangiwanwan ti Sao ti Dios, nalabit dinatay matulongan ti konsiensiatayo. (Sal. 119:105) Nakalkaldaang ta adu a tattao ti mangipangpangruna iti tarigagay ti pusoda ken manmano wenno saanda pay ketdi nga ipangpangag dagiti pagannurotan a nailanad iti Biblia. (Basaen ti Efeso 4:17-19.) Dayta ti makagapu nga uray nasagudayan iti konsiensia ti adu a tattao, makaaramidda latta kadagiti dakes a bambanag.​—1 Tim. 4:2.

⁹ Ditay koma pulos tultuladen ida! Imbes ketdi, itultuloytayo a sursuruan ken sanayen ti konsiensiatayo babaen ti Sao ti Dios tapno pudno a makatulong dayta kadatayo. Masapul nga ipangagtayo ti konsiensiatayo a sinanay ti Biblia imbes nga agpaimpluensiatayo kadagiti managimbubukodan a pagannayasantayo. Malaksid iti dayta, ikagumaantayo a raemen ti konsiensia dagiti kapammatiantayo. Liklikantayo ti mangaramid iti pakaitibkolanda, bayat a sipapanunottayo a mabalin a nakapkapuy ti konsiensiada ngem kadatayo.​—1 Cor. 8:12; 2 Cor. 4:2; 1 Ped. 3:16.

10. Ania a tallo a benneg ti biag ti usigentayo?

¹⁰ Usigentayo ti tallo a benneg ti biag a maipakitatayo ti panagayattayo ken Jehova babaen ti panagtulnogtayo. Adda pakainaigan ti konsiensia iti tunggal maysa kadagita a benneg. Ngem umuna, masapul nga iwanwan dayta dagiti naipaltiing a pagalagadan ti Biblia. Ti tallo a pamay-an a maipakitatayo ti naimpusuan a panagtulnog ken Jehova ket: (1) Ayatentayo dagidiay ay-ayaten ni Jehova, (2) raementayo dagiti adda iti autoridad, ken (3) ikagumaantayo ti agtalinaed a nadalus iti imatang ti Dios.

Ayatentayo Dagidiay Ay-ayaten ni Jehova

11. Apay a nasken nga ayatentayo dagidiay ay-ayaten ni Jehova?

¹¹ Umuna, nasken nga ayatentayo dagidiay ay-ayaten ni Jehova. No maipapan iti pannakitimpuyog, kaslatayo espongha. Adda tendensiatayo a mangagsep iti aniaman nga adda iti aglawlawtayo. Ammo ti Namarsua no kasano kapeggad​—ken no kasano a makatulong​—kadagiti imperpekto a tattao ti pannakitimpuyogda. Gapuna, nainsiriban daytoy a balakadna: “Daydiay makipagna kadagiti masirib a tattao agbalinto a masirib, ngem daydiay addaan kadagiti pannakilangen kadagidiay maag nakadakdakesto ti pagtungpalanna.” (Prov. 13:20; 1 Cor. 15:33) Awan kadatayo ti mayat a “nakadakdakesto ti pagtungpalanna.” Kayattay amin ti ‘agbalin a masirib.’ Awan ti makaartap iti sirib ni Jehova, ken awan met ti makaimpluensia kenkuana. Kaskasdi, nangipakita iti nagsayaat nga ulidan no maipapan iti pannakitimpuyog. Panunotenyo​—siasino dagiti imperpekto a tattao a pinili ni Jehova kas gagayyemna?

12. Ania a kita ti gagayyem ti pilien ni Jehova?

¹² Ni Jehova tinukoyna ti patriarka a ni Abraham kas “gayyemko.” (Isa. 41:8) Naisangsangayan ti kinamatalek, kinalinteg, ken kinatulnog daytoy a tao. Isu ket nagbiag maitunos iti pammatina iti Dios. (Sant. 2:21-23) Kasta ti kayat ni Jehova nga agbalin a gayyemna uray ita. Gapuna, saan kadi a napateg a pilientayo ti makipagna kadagiti masirib tapno agbalintayo met a masirib?

13. Ania ti makatulong kadatayo tapno makapilitayo kadagiti umiso a gagayyem?

¹³ Ania ti makatulong kenka nga agpili kadagiti umiso a gagayyem? Makatulong ti panangadal kadagiti pagarigan manipud iti Biblia. Usigentayo ti panaggayyem da Ruth ken ti katuganganna a ni Noemi, da David ken Jonatan, wenno da Timoteo ken Pablo. (Ruth 1:16, 17; 1 Sam. 23:16-18; Fil. 2:19-22) Nasinged ti relasionda gapu iti kangrunaan a rason: Naibatay dayta iti pudno a panagayatda ken Jehova. Makasarakka kadi kadagiti gagayyem nga addaan iti kas iti kauneg ti panagayatmo ken Jehova? Sigurado nga adu ti kasta a kita ti gagayyem a masarakam iti kongregasion Kristiano. Didaka irubo a mangaramid iti saan a makaay-ayo ken Jehova. Imbes ketdi, tulongandaka nga agtulnog ken Jehova, rumang-ay iti naespirituan, ken agimula maipaay iti espiritu. (Basaen ti Galacia 6:7, 8.) Tulongandaka nga agtalinaed iti ayat ti Dios.

Raementayo Dagiti Adda iti Autoridad

14. Ania dagiti masansan a makagapu a narigat a raemen dagiti adda iti autoridad?

¹⁴ Ti maikadua a pamay-an a maipakitatayo ti panagayattayo ken Jehova ket mainaig iti autoridad. Masapul a raementayo dagiti adda iti autoridad. Apay a nagrigat nga aramiden daytoy no dadduma? Ti maysa a rason ket imperpekto dagiti adda iti autoridad. Maysa pay, imperpektotayo met. Makidangdangadangtayo iti naikasigudan a pagannayasan nga agrebelde.

15, 16. (a) Apay a napateg a raementayo dagidiay nangitalkan ni Jehova iti annongen a mangaywan iti ilina? (b) Ania a nagpateg a leksion ti maadaltayo iti panangmatmat ni Jehova kadagidiay nagrebelde nga Israelita maibusor ken Moises?

¹⁵ Mabalin a maisaludsodmo, ‘Nupay narigat, apay a masapul a raementayo latta dagiti adda iti autoridad?’ Ti sungbat ket mainaig iti isyu ti kinasoberano. Asino ti piliem kas soberano nga agturay? No ni Jehova ti pilientayo kas Soberano, masapul a raementayo ti autoridadna. Ta no saan, siuumiso kadi a maikunatayo nga Isu ti mangituray kadatayo? Kanayonanna, masansan nga usaren ni Jehova ti autoridadna babaen kadagiti imperpekto a tattao a nangitalkanna iti annongen a mangaywan iti ilina. No saantay nga agpasakup kadagita a tattao, ania ti panangmatmat kadatayo ni Jehova?​—Basaen ti 1 Tesalonica 5:12, 13.

¹⁶ Kas pagarigan, idi nagtanabutob ken nagrebelde dagiti Israelita maibusor ken Moises, imbilang dayta ni Jehova kas ibubusor a mismo kenkuana. (Num. 14:26, 27) Saan a nagbalbaliw ti Dios. No saantayo nga agpasakup kadagidiay inikkanna iti autoridad, panagrebelde dayta kenkuana!

17. Ania nga umiso a kababalin ti ikagumaantayo nga ipakita kadagidiay addaan iti autoridad iti kongregasion?

¹⁷ Impalgak ni apostol Pablo no ania ti umiso a kababalin nga ipakitatayo kadagidiay addaan iti annongen iti kongregasion Kristiano. Insuratna: “Agtulnogkayo kadagidiay mangidadaulo kadakayo ket agpasakupkayo, ta agtultuloy a bambantayanda dagiti kararuayo a kasla isudanto dagidiay manungsungbat; tapno aramidenda daytoy a buyogen ti panagrag-o ket saan a buyogen ti panagsennaay, ta daytoy ket makadangran kadakayo.” (Heb. 13:17) Pudno, masapul nga ikagumaantayo ti agbalin a natulnog ken managpasakup. Ngem laglagipentayo nga aramidentayo dayta gapu ta kayattayo ti agtalinaed iti ayat ti Dios. Gapuna, saan a sayang dayta a panagreggettayo.

Agtalinaedtayo a Nadalus iti Imatang ni Jehova

18. Apay a kayat ni Jehova nga agtalinaedtayo a nadalus?

¹⁸ Ti maikatlo a pamay-an a maipakitatayo ti panagayattayo ken Jehova ket ti panangikagumaantayo nga agtalinaed a nadalus iti imatangna. Masansan nga ikagumaan dagiti nagannak a taginayonen a nadalus dagiti annakda. Apay? Nasalsalun-at ken naragragsak ngamin ti ubing a nadalus. Maysa pay, ti nadalus nga ubing iyanninawna ti naggapuanna a pamilia, kasta met ti ayat ken panangaywan dagiti nagannakna. Umasping kadagita a rason a kayat ni Jehova nga agbalintayo a nadalus. Ammona a pagimbagantayo ti panagbalin a nadalus. Ammona pay a ti kinadalustayo iyanninawna ti kinasiasinona kas nailangitan nga Amatayo. Napateg dayta yantangay mabalin a matignay dagiti tattao nga agserbi iti Dios no makitada ti nakaidumaantayo kadagiti tattao iti daytoy narugit a lubong.

19. Kasanotayo nga ammo a napateg ti pisikal a kinadalus?

¹⁹ Kadagiti ania nga aspeto ti biag a masapul nga agtalinaedtayo a nadalus? Kinapudnona, iti amin nga aspeto ti biagtayo. Iti nagkauna nga Israel, imbatad ni Jehova iti ilina a napateg ti pisikal a kinadalus. (Lev. 15:31) Karaman iti Mosaiko a Linteg dagiti bambanag mainaig iti panangibelleng kadagiti rugit, panangdalus kadagiti basehas, panangbuggo kadagiti ima ken saka, ken pananglaba kadagiti kawes. (Ex. 30:17-21; Lev. 11:32; Num. 19:17-20; Deut. 23:13, 14) Naipalagip kadagiti Israelita a ni Jehova a Dios ket nasantuan​—kaipapananna “nadalus,” “nasin-aw,” ken “sagrado.” Masapul met a nasantuan dagiti adipen ti nasantuan a Dios.​—Basaen ti Levitico 11:44, 45.

20. Kadagiti ania a pamay-an a masapul nga agtalinaedtayo a nadalus?

²⁰ Ngarud, masapul a nadalus ti makin-uneg ken makinruar a kinataotayo. Ikagumaantayo a pagtalinaeden a nadalus ti panunottayo. Simamatalek nga annurotentayo dagiti pagalagadan ni Jehova mainaig iti moral a kinadalus, iti laksid ti seksual a kinalulok daytoy a lubong. Kangrunaanna, determinadotayo nga agtalinaed a nadalus iti panagdayawtayo, a liklikantayo a mamulitan dayta iti palso a relihion. Laglagipentayo ti naipaltiing a pakdaar iti Isaias 52:11: “Pumanawkayo, pumanawkayo, rummuarkayo dita, dikay sagiden ti aniaman a narugit; rummuarkayo iti tengngana, pagtalinaedenyo a nadalus ti bagbagiyo.” Ita, makapagtalinaedtayo a nadalus iti naespirituan babaen ti ditay pannakiraman iti aniaman a mainaig iti palso a panagdayaw. Dayta ti makagapu a saantayo a makiraman kadagiti narelihiosuan a selebrasion ken piesta a nalatak iti daytoy a lubong. Pudno a maysa a karit ti agtalinaed a nadalus. Ngem ikagumaan ti ili ni Jehova nga aramiden dayta tapno makapagtalinaedda iti ayat ti Dios.

21. Ania ti aramidentayo tapno agtalinaedtayo iti ayat ti Dios?

²¹ Kayat ni Jehova nga agtalinaedtayo iti ayatna iti agnanayon. Ngem masapul nga ikagumaan ti tunggal maysa nga aramiden ti amin a kabaelanna tapno agtalinaed iti ayat ti Dios. Maaramidtayo dayta no tuladentayo ti ulidan ni Jesus ken paneknekantayo ti ayattayo ken Jehova babaen ti panagtulnogtayo kadagiti bilinna. No aramidentayo dayta, masiguradotayo nga awan ti aniaman a ‘mangisina kadatayo iti ayat ti Dios nga adda ken Kristo Jesus nga Apotayo.’​—Roma 8:38, 39.

Malagipyo Kadi?

• Kasano a matulongannatayo ti konsiensiatayo nga agtalinaed iti ayat ti Dios?

• Apay a nasken nga ayatentayo dagiti ay-ayaten ni Jehova?

• Apay a napateg a raementayo dagidiay adda iti autoridad?

• Kasano kapateg iti ili ti Dios ti panagbalin a nadalus?

[Kahon/Ladawan iti panid 20]

PUBLIKASION A MANGUSURO ITI NASAYAAT A KONDUKTA

Bayat ti programa ti 2008/2009 a kombension distrito, nairuar ti 224 ti panidna a libro a napauluan iti Agtalinaedka iti Ayat ti Dios. Ania ti panggep daytoy a baro a libro? Nadisenio daytoy a tumulong kadagiti Kristiano a mangammo ken mangipateg kadagiti pagalagadan ni Jehova, a naisentro kangrunaanna iti Nakristianuan a kondukta. Ti panangadal a naimbag iti Agtalinaedka iti Ayat ti Dios pabilgenna ti panagtalekmo a ti panagbiag maitunos kadagiti pagalagadan ni Jehova ti kasayaatan a wagas ti panagbiag ita ken mangituggod iti biag nga agnanayon iti masanguanan.

Malaksid iti dayta, nadisenio daytoy a libro a tumulong kadatayo a mangbigbig a saan a makapadagsen ti panagtulnog ken Jehova. Imbes ketdi, pamay-an dayta tapno maipakitatayo ti kadakkel ti panagayattayo ken Jehova. Iti kasta, tignayennatayo daytoy a libro a mangisaludsod, ‘Apay nga agtulnogak ken Jehova?’

No maipapan kadagidiay nakalkaldaang a mangilaksid iti ayat ni Jehova, masansan a maigapu dayta iti kondukta saan ket nga iti doktrina. Ngarud, anian a nagpateg a patibkerentayo ti ayat ken panangapresiartayo kadagiti linteg ken prinsipio ni Jehova a mangiwanwan kadatayo iti inaldaw a panagbiagtayo! Makapagtalektayo a daytoy a baro a publikasion tulonganna dagiti karnero ni Jehova iti intero a lubong tapno sititibker a maitandudoda ti umiso, tapno mapaneknekanda nga ulbod ni Satanas, ken kangrunaan iti amin, tapno makapagtalinaedda iti ayat ti Dios!​—Jud. 21.

[Ladawan iti panid 18]

“No tungpalenyo dagiti bilinko, agtalinaedkayto iti ayatko, kas iti panangtungpalko kadagiti bilin ti Ama ken panagtalinaedko iti ayatna”