Ania ti Ipalgak Dagiti Kararagmo Maipapan Kenka?
“O Managdengngeg iti kararag, kenka a mismo umayto dagiti tattao iti isuamin a lasag.”—SAL. 65:2.
1, 2. Apay a makapagtalek dagiti adipen ni Jehova nga ipangagna dagiti kararagda?
KANAYON nga ipangag ni Jehova ti araraw dagiti nasungdo nga adipenna. Makapagtalektayo nga ipangagna met dagiti kararagtayo. Uray aggigiddan nga agkararag ken Jehova ti minilion a Saksina, mangngegna latta ti tunggal maysa kadakuada.
2 Gapu ta agtalek ni salmista a David a denggen ti Dios dagiti pakaasina, inkantana: “O Managdengngeg iti kararag, kenka a mismo umayto dagiti tattao iti isuamin a lasag.” (Sal. 65:2) Naipangag dagiti kararag ni David gapu ta isu ket nasungdo nga agdaydayaw ken Jehova. Mabalin nga isaludsodtayo: ‘Ipakpakita kadi dagiti ararawko nga agtalekak ken ni Jehova ken ti nasin-aw a panagdayaw ti kangrunaan a pakaseknak? Ania ti ipalgak dagiti kararagko maipapan kaniak?’
Agkararag ken Jehova Buyogen ti Kinapakumbaba
3, 4. (a) Ania koma ti kababalintayo no agkararagtayo iti Dios? (b) Ania ti masapul nga aramidentayo no buriborennatayo ti ‘makariribuk a kapanunotan’ gapu iti nadagsen a basol?
3 Tapno masungbatan dagiti kararagtayo, masapul nga umadanitayo iti Dios buyogen ti kinapakumbaba. (Sal. 138:6) Nasken a kiddawentayo ken Jehova a sukimatennatayo, kas inaramid idi ni David: “Sukisokennak, O Dios, ket ammuem ti pusok. Sukimatennak, ket ammuem ti mangrirriribuk a pampanunotko, ket kitaem no adda kaniak ti aniaman a nasaem a dana, ket iturongnak iti dalan ti tiempo a di nakedngan.” (Sal. 139:23, 24) Saantayo laeng nga agkararag no di ket agpasukimattayo pay iti Dios ken agpaiwanwantayo iti Saona. Maiturongnatayo ni Jehova “iti dalan ti tiempo a di nakedngan,” a tulongannatayo a mangsalimetmet iti dana nga agturong iti biag nga agnanayon.
4 Kasanon no buriborennatayo dagiti ‘makariribuk a kapanunotan’ gapu iti naaramidantayo a nadagsen a basol? (Basaen ti Salmo 32:1-5.) No kasano a ti mula ket malaylay gapu iti nakaro a pudot bayat ti kalgaw, mabalin a mapaksuyantayo met no ditay ikankano ti masidsidir a konsiensiatayo. Gapu iti basol ni David, napukawna ti rag-ona ken nalabit a nagsakit pay. Ngem anian a pannakabang-arna idi impudnona ti basolna iti Dios! Panunotem ti ragsak ni David idi nariknana a ‘pinakawan ni Jehova ti iyaalsana.’ Ti panangipudno iti basol iti Dios ket makapabang-ar, ken makatulong met dagiti Kristiano a panglakayen tapno maisubli ti naespirituan a salun-at ti maysa a nagbasol.—Prov. 28:13; Sant. 5:13-16.
Umararaw ken Agyaman iti Dios
5. Ania ti kaipapanan ti iyaararaw ken Jehova?
5 No adda aniaman a pakaringgorantayo, nasken nga iyaplikartayo ti balakad ni Pablo: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios.” (Fil. 4:6) “Ti iyaararaw” kaipapananna “ti napakumbaba a panagpakaasi.” Nangruna nga ipakaasitayo ti tulong ken panangiwanwan ni Jehova no agpeggad wenno maidadanestayo.
6, 7. Ania dagiti rumbeng a pagyamanantayo no agkararagtayo?
6 Ngem no agkararagtayo laeng no adda kasapulantayo, ania ti ipalgakna a motibotayo? Kinuna ni Pablo nga ipakaammotayo iti Dios dagiti kiddawtayo “agraman [ti] panagyaman.” Sigurado la ketdi a kayattayo nga iyebkas ti narikna ni David: “Kukuam, O Jehova, ti kinanaindaklan ken ti kinamannakabalin ken ti kinapintas ken ti kinatan-ok ken ti dayaw; ta ti isuamin nga adda iti langlangit ken iti daga kukuam. Kukuam ti pagarian, O Jehova, Daydiay mangipangato met iti bagim kas pannakaulo ti isuamin. . . . O Diosmi, agyamankami kenka ken idaydayawmi ti napintas a naganmo.”—1 Cron. 29:11-13.
7 Nagyaman ni Jesus iti Dios gapu iti impaayna a taraon ken iti tinapay ken arak a nausar iti Pangrabii ti Apo. (Mat. 15:36; Mar. 14:22, 23) Malaksid kadagita a probision, masapul met nga ‘agyamantayo ken Jehova’ gapu iti “nakaskasdaaw nga ar-aramidna iti annak ti tattao,” iti ‘nalinteg a hudisial a pangngeddengna,’ ken iti saona, wenno mensahena, a linaon ti Biblia.—Sal. 107:15; 119:62, 105.
Ikararagam ti Sabsabali
8, 9. Apay a nasken nga ikararagantayo dagiti padatayo a Kristiano?
8 Nupay agkararagtayo maipaay iti bagitayo, nasayaat nga ikararagantayo met ti sabsabali—uray dagiti Kristiano a ditay am-ammo. Nalabit a saan nga amin a manamati idiay Colosas ket am-ammo ni apostol Pablo. Kaskasdi nga insuratna: “Agyamankami a kankanayon iti Dios nga Ama ni Apotayo a Jesu-Kristo no ikararagandakayo, yantangay nangngegmi ti maipapan iti pammatiyo mainaig ken Kristo Jesus ken ti ayat nga adda kadakayo maipaay kadagiti amin a sasanto.” (Col. 1:3, 4) Inkararagan met ni Pablo dagiti Kristiano idiay Tesalonica. (2 Tes. 1:11, 12) Dagiti kasta a kararag ket adu ti ipalgakda maipapan kadatayo ken iti panangmatmattayo kadagiti kapammatiantayo.
9 Ti panangikararagtayo kadagiti napulotan a Kristiano ken iti kakaduada a “sabsabali a karnero” ket pammaneknek a maseknantayo iti organisasion ti Dios. (Juan 10:16) Kiniddaw ni Pablo nga isu ket ikararagan dagiti kapammatianna tapno ti ‘pannakabael nga agsao maited koma kenkuana ket maipakaammona ti sagrado a palimed ti naimbag a damag.’ (Efe. 6:17-20) Umasping iti dayta, personal kadi nga ikarkararagantayo dagiti padatayo a Kristiano?
10. Ania ti epektona kadatayo ti panangikararag iti sabsabali?
10 Ti panangikararag iti sabsabali mabalin a baliwanna ti panangmatmattayo kadakuada. No ikararagantayo ti maysa a ditay kasinged, adda pay kadi rason a saantay a maipateg dayta a tao? (1 Juan 4:20, 21) Makapabileg dagiti kasta a kararag ken itandudona ti panagkaykaysatayo kas agkakabsat. Kanayonanna, ipakita dagiti kasta a kararag a tultuladentayo ti ayat ni Kristo. (Juan 13:34, 35) Dayta a galad ket paset ti bunga ti espiritu ti Dios. Personal kadi nga ikarkararagtayo ti nasantuan nga espiritu, a kiddawentayo ken Jehova a tulongannatayo a mangiparangarang iti bungana nga ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, ken panagteppel? (Luc. 11:13; Gal. 5:22, 23) No kasta, makita iti panagsasao ken panagtigtignaytayo nga agpapaiwanwan ken agbibiagtayo maitunos iti espiritu.—Basaen ti Galacia 5:16, 25.
11. Apay a maikunatayo a maitutop a kiddawentayo iti sabsabali nga ikararagandatayo?
11 No maammuantayo a magargari nga agkopia dagiti annaktayo no panawen ti eksamen idiay eskuelaan, masapul nga ikararagantayo ken ipaayantayo ida kadagiti Nainkasuratan a balakad tapno agbalinda a napudno ken saanda nga agaramid iti aniaman a di umiso. Kinuna ni Pablo kadagiti Kristiano idiay Corinto: “Ikararagmi iti Dios a dikay koma makaaramid iti aniaman a dakes.” (2 Cor. 13:7) Makaay-ayo ken Jehova dagiti kasta a napakumbaba a kararag ken nasayaat ti ipalgakda maipapan kadatayo. (Basaen ti Proverbio 15:8.) Mabalintayo met a kiddawen iti sabsabali nga ikararagandatayo, a kas iti inaramid idi ni apostol Pablo. “Itultuloydakami nga ikararagan,” insuratna, “ta agtalekkami nga addaankami iti napudno a konsiensia, yantangay kayatmi ti agbiag a mapagtalkan iti amin a bambanag.”—Heb. 13:18.
Adda Pay Ipalgak Dagiti Kararagtayo
12. Ania koma dagiti kangrunaan a paset ti kararagtayo?
12 Ipakita kadi dagiti kararagtayo a naragsak ken naregtatayo a Saksi ni Jehova? Naipamaysa kadi dagiti ararawtayo iti panangtungpal iti pagayatan ti Dios, iti panangikasaba iti mensahe ti Pagarian, iti pannakaalangon ti kinasoberano ni Jehova, ken iti pannakasantipikar ti naganna? Dagita koma ti kangrunaan a paset ti kararagtayo, kas ipakita ti pagtuladan a kararag ni Jesus, a mangrugi kadagitoy a sasao: “Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti daga.”—Mat. 6:9, 10.
13, 14. Ania ti ipalgak dagiti kararagtayo maipapan kadatayo?
13 Dagiti kararagtayo iti Dios ipalgakda dagiti motibo, interes, ken tarigagaytayo. Ammo ni Jehova no ania ti pudno a kinataotayo. Kuna ti Proverbio 17:3: “Ti paggugoran a banga agpaay iti pirak ket ti urno agpaay iti balitok, ngem ni Jehova isu ti manangsukimat kadagiti puso.” Makita ni Jehova ti linaon ti pusotayo. (1 Sam. 16:7) Ammona no ania ti panangmatmattayo kadagiti gimong, ministerio, ken kapammatiantayo. Ammona pay ti panangmatmattayo kadagiti ‘kakabsat’ ni Kristo. (Mat. 25:40) Ammona no talaga a naimpusuan ti kararagtayo wenno naikabesa laeng dayta. “No agkarkararagkayo,” kinuna ni Jesus, “dikay ulit-uliten a sawen ti isu met laeng a bambanag, a kas iti ar-aramiden dagiti tattao iti nasnasion, ta [sibibiddut a] pagarupenda a maipangagdanto gapu iti panagusarda iti adu a sasao.”—Mat. 6:7.
14 Dagiti sasao nga usarentayo kadagiti kararagtayo ipalgakda no kasano kadakkel ti panagtalektayo iti Dios. “Nagbalinka [Jehova] a kamang maipaay kaniak,” kinuna ni David, “maysa a nalagda a torre iti sanguanan ti kabusor. Maysaakto a sangaili iti toldam kadagiti tiempo a di nakedngan; agkamangakto iti talimeng dagiti payakmo.” (Sal. 61:3, 4) No piguratibo nga ‘isallukob kadatayo ti Dios ti toldana,’ matagiragsaktayo ti kinatalged ken ti panangaywanna. (Apoc. 7:15) Anian a makaliwliwa nga umadanitayo ken Jehova babaen ti kararag buyogen ti panagtalek nga isu ket adda iti ‘dasigtayo’ bayat ti aniaman a pannakasubok ti pammatitayo!—Basaen ti Salmo 118:5-9.
15, 16. Ti kararag tulongannatayo a mangilasin iti ania maipapan iti tarigagaytayo a rumagpat iti pribilehio?
15 Maammuantayo ti pudno a motibotayo no sipupudno nga ikararagtayo dayta ken Jehova. Kas pagarigan, tarigagayantayo kadi ti agbalin a manangaywan iti ili ti Dios gapu ta kayattayo ti tumulong buyogen ti kinapakumbaba ken gapu ta kayattayo nga aramiden ti amin a kabaelantayo a mangyadelantar kadagiti interes ti Pagarian? Wenno kayattayo ti “umuna a saad” wenno tarigagayantayo nga ‘iturayan’ ti sabsabali? Awan ti lugar ti kasta a tao iti ili ni Jehova. (Basaen ti 3 Juan 9, 10; Lucas 22:24-27.) No adda di umiso a tarigagaytayo, makatulong ti napudno a panangikararag ken Jehova a Dios tapno mailasin ken mabalbaliwantayo dagita sakbay a rumamutda.
16 Dagiti Kristiano a babbai nalabit a tarigagayanda met nga agbalin a ministerial nga adipen wenno panglakayen pay ketdi dagiti assawada. Nalabit nga agtignayda pay maitunos iti dayta a tarigagay nga ikarkararagda babaen ti panangikagumaanda nga agbalin a mapagwadan. Napateg dayta yantangay ti panagsasao ken panagtigtignay ti pamilia ti lalaki ket adda epektona iti panangmatmat kenkuana ti kongregasion.
Panangidaulo iti Publiko a Kararag
17. Apay nga adda pagsayaatanna ti pribado a panagkararag?
17 Masansan nga umadayo ni Jesus iti bunggoy tapno pribado a makapagkararag ken Amana. (Mat. 14:13; Luc. 5:16; 6:12) Adda met dagiti gundaway a kasapulantayo ti agmaymaysa. No agkararagtayo kadagiti naulimek a lugar, dakdakkel ti posibilidadna a makaaramidtayo kadagiti pangngeddeng a makaay-ayo ken ni Jehova ken pagsayaatan ti espiritualidadtayo. Ngem nagkararag met ni Jesus iti publiko isu a nasayaat nga usigentayo no kasano a maaramidtayo dayta iti umiso a pamay-an.
18. Ania ti sumagmamano a punto a masapul a laglagipen dagiti kakabsat a lallaki no mangidauloda iti publiko a kararag?
18 Kadagiti gimong, dagiti nasungdo a lallaki idauluanda ti kongregasion iti publiko a kararag. (1 Tim. 2:8) Iti ngudo dagita a kararag, ibaga koma dagiti agdengdengngeg ti sao nga “amen” a kaipapananna “sapay koma.” Ngem tapno maaramidda dayta, masapul nga umanamongda iti naikararag. Awan ti makapakigtot wenno makasair a sasao iti pagtuladan a kararag ni Jesus. (Luc. 11:2-4) Saanna met nga imbinsabinsa ti amin a kasapulan wenno parikut ti tunggal indibidual nga agdengdengngeg. Dagiti personal a pakaseknan ket maitutop nga ikararag laeng iti pribado, saan nga iti publiko. Ken saan met koma a mairaman iti publiko a kararag dagiti kompidensial a bambanag.
19. Kasano ti rumbeng a panagtignaytayo bayat ti publiko a kararag?
19 Bayat nga adda mangidadaulo iti publiko a kararag, mangipakitatayo koma iti nadayaw a ‘panagbuteng iti Dios.’ (1 Ped. 2:17) Adda dagiti tignay a maitutop iti maysa a tiempo ken lugar ngem saan a maitutop iti Nakristianuan a gimong. (Ecl. 3:1) Kas pagarigan, nalabit a kiddawen ti maysa kadagiti agdengdengngeg nga agiinniggemda iti ima bayat ti kararag. Mabalin a makaitibkol wenno makasinga dayta iti dadduma, a pakairamanan dagiti bisita a saantay a kapammatian. Bayat ti publiko a kararag, adda dagiti agassawa a di agpadlaw nga aginniggem iti ima. Ngem no aginnarakupda, mabalin a maitibkol dagiti makataldiap kadakuada. Nalabit a panunotenda nga ad-adda a maseknan dagiti agassawa iti romantiko a relasionda imbes nga iti panangidayawda ken Jehova. Kas nauneg a panagraem iti Dios, ‘aramidentayo koma ti amin a bambanag a maipaay iti dayagna’ ken liklikantayo dagiti kondukta a makasinga, makapakigtot, wenno makaitibkol iti asinoman.—1 Cor. 10:31, 32; 2 Cor. 6:3.
Ania ti Ikararagtayo?
20. Ania ti kayat a sawen ti Roma 8:26, 27?
20 No dadduma, ditay ammo ti iyebkastayo iti pribado a kararagtayo. “Ti parikut a no ania ti ikararagtayo a kasapulantayo saantayo nga ammo,” insurat ni Pablo, “ngem ti [nasantuan nga] espiritu a mismo agdawat a maipaay kadatayo buyogen dagiti asug a di mayebkas. Ngem [ti Dios a] mangsukimat iti puspuso ammona no ania ti panggep ti espiritu.” (Roma 8:26, 27) Impaisurat ni Jehova iti Biblia ti adu a kararag. Awatenna dagitoy a naipaltiing nga araraw kas kiddawtayo ket patganna dagita. Am-ammonatayo ti Dios ken ammona ti kaipapanan dagiti bambanag nga impaltiingna kadagiti mannurat ti Biblia babaen ti espirituna. Sungbatan ni Jehova dagiti ararawtayo no “agdawat,” wenno bumallaet ti espiritu para kadatayo. Ngem no pamiliartayo iti Sao ti Dios, nalaklaka a malagiptayo dagiti kayattayo nga ikararag.
21. Ania ti usigentayo iti sumaganad nga artikulo?
21 Kas nausigtayon, adu ti ipalgak dagiti kararagtayo maipapan kadatayo. Kas pagarigan, ipalgakda no kasanotayo kasinged ken ni Jehova ken kasano kauneg ti pannakaammotayo iti Saona. (Sant. 4:8) Iti sumaganad nga artikulo, usigentayo ti sumagmamano a kararag ken ebkas ti panangidayaw ken ni Jehova a nailanad iti Biblia. Kasano a ti panangusig kadagita a linaon ti Kasuratan apektaranna ti panagkararagtayo iti Dios?
Ania ti Sungbatyo?
• Ania koma ti kababalintayo no agkararagtayo ken Jehova?
• Apay a masapul nga ikararagantayo dagiti kapammatiantayo?
• Ania ti mabalin nga ipalgak dagiti kararagtayo maipapan kadatayo ken kadagiti motibotayo?
• Ania koma ti konduktatayo bayat ti publiko a kararag?
[Ladawan iti panid 4]
Kanayon kadi nga idaydayawmo ni Jehova ken agyamyamanka kenkuana?
[Ladawan iti panid 6]
Kanayon koma a pakaidayawan ni Jehova ti konduktatayo bayat ti publiko a kararag