Itultuloyyo a Parayrayen ti Nainkabsatan nga Ayatyo
“Itultuloyyo ti magna iti ayat, no kasano a ti Kristo inayatnakayo met.”—EFE. 5:2.
1. Ania ti impatuldo ni Jesus a napateg a pakabigbigan dagiti pasurotna?
TI PANANGIKASABA iti naimbag a damag ti Pagarian ti Dios iti binalaybalay ket pakabigbigan dagiti Saksi ni Jehova. Kaskasdi, adda impatuldo ni Kristo Jesus a sabali a benneg ti Kristianidad a pakabigbigan dagiti pudno nga adalanna. Kinunana: “Mangtedak kadakayo iti baro a bilin, nga ayatenyo ti maysa ken maysa; kas iti panagayatko kadakayo, kasta met nga ayatenyo ti maysa ken maysa. Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”—Juan 13:34, 35.
2, 3. Ania ti epekto ti nainkabsatan nga ayat kadagidiay tumabtabuno kadagiti gimongtayo?
2 Awan ti pumada iti panagayat dagiti pudno a Kristiano kadagiti kakabsatda. No kasano a ti landok dumket iti magneto, ti nainkabsatan nga ayat pagkaykaysaenna dagiti adipen ni Jehova ken iyadanina dagiti napasnek a tattao iti pudno a panagdayaw. Kas pagarigan, usigenyo ni Marcelino a taga-Cameroon, a nabulsek gapu iti trabahona. Kalpasan dayta a pasamak, nagdinamag a nabulsek gapu ta isu ket maysa a manggagamud. Imbes a liwliwaen ti pastorda ken dagiti karelihionanna, inlaksidda ketdi. Idi inawis ti maysa a Saksi ni Jehova a makigimong, nagkedked ni Marcelino. Dina kayat a mapasaran manen ti pannakailaksid.
3 Ngem nasdaaw ni Marcelino idi pinadasna ti makigimong. Isu ket sibabara nga inabrasa dagiti kakabsat ken naliwliwa kadagiti nangngegna a pannursuro manipud iti Biblia. Nangrugi a tinabunuanna ti amin a gimong, rimmang-ay iti panagadalna iti Biblia, ken nabautisaran idi 2006. Iranranudna itan ti kinapudno iti pamiliana ken kadagiti kaarrubana, ken adda sumagmamanon nga iyad-adalanna iti Biblia. Kayat ni Marcelino a mapadasan met dagiti iyad-adalanna iti Biblia ti ayat a natagiragsakna iti ili ti Dios.
4. Apay a nasken nga ipapusotayo ti balakad ni Pablo nga ‘itultuloytayo ti magna iti ayat’?
4 Gapu ta makaay-ayo ti nainkabsatan nga ayat, nasken nga aramidentayo ti amin a kabaelantayo a mangtaginayon iti dayta. Panunotenyo ti maysa a paginuduan iti nalamiis a rabii, nga inasitgan dagiti tattao gapu iti bara nga ipapaayna. No saan a rubroban dayta dagiti agin-inudo, matay ti apuyna. Umasping iti dayta, bumaaw ti nabara nga ayat iti uneg ti kongregasion no saantayo nga agtitinnulong kas Kristiano a mangparayray iti dayta. Kasano a maaramidantayo dayta? Kinuna ni apostol Pablo: “Itultuloyyo ti magna iti ayat, no kasano a ti Kristo inayatnakayo met ken inyawatna ti bagina maipaay kadakayo kas daton ken sakripisio iti Dios nga agpaay a kas nasayamusom a banglo.” (Efe. 5:2) Ti saludsod nga usigentayo ket, Kadagiti ania a pamay-an a ‘maitultuloytayo ti magna iti ayat’?
‘Lumawakayo Met’
5, 6. Apay nga indagadag ni Pablo kadagiti Kristiano idiay Corinto a ‘lumawada’?
5 Insurat ni apostol Pablo kadagiti Kristiano iti nagkauna a Corinto: “Dagiti ngiwatmi naluktan kadakayo, taga Corinto, ti pusomi napalawa. Saankayo a nailetan kadakami, ngem nailetankayo kadagiti bukodyo a kinalailo. Gapuna, kas panangsubad—agsaoak a kas agpaay iti annak—dakayo, met, lumawakayo.” (2 Cor. 6:11-13) Apay nga indagadag ni Pablo kadagiti taga-Corinto a lumawada iti ayat?
6 Usigenyo no kasano a nabuangay ti kongregasion iti nagkauna a Corinto. Napan ni Pablo idiay Corinto idi arinunos ti 50 K.P. Nupay naipasango iti ibubusor idi damo a mangasaba sadiay, saan a simmardeng. Di nagbayag, adu nga umili iti dayta a siudad ti namati iti naimbag a damag. Iti uneg ti “makatawen ken innem a bulan,” insuro ken pinabileg ni Pablo ti kabbuangay a kongregasion. Nalawag a nasged ti panagayatna kadagiti Kristiano a taga-Corinto. (Ara. 18:5, 6, 9-11) Adu ti rason nga ayaten ken raemenda met ni Pablo. Ngem adda dagiti kakabsat nga immikay kenkuana. Nalabit a di nagustuan ti sumagmamano ti prangka a balakadna. (1 Cor. 5:1-5; 6:1-10) Mabalin a namati ti dadduma iti pammardaya dagiti ‘nalabes ti laingna nga apostol.’ (2 Cor. 11:5, 6) Kayat ni Pablo a naimpusuan ti panagayat kenkuana ti isuamin a kakabsat. Gapuna, impakaasina kadakuada a ‘lumawada’ babaen ti pannakisinningedda kenkuana ken kadagiti kapammatianda.
7. Kasano a ‘lumawatayo’ no iti panangipakita iti nainkabsatan nga ayat?
7 Kasanotayo met ita a ‘lumawa’ no iti panangipakita iti nainkabsatan nga ayat? Natural laeng a nalaka a suminged iti maysa ken maysa dagiti agkakasadaran wenno agkakapuli. Ken masansan nga ad-adu ti panawen nga agkakadua dagiti agpapada ti kayatda a paglinglingayan. Ngem no ti kaykayattayo laeng a pakikaduaan ket dagidiay kapadatayo iti paginteresan, masapul a ‘lumawatayo.’ Nainsiriban nga isaludsodtayo: ‘Manmano kadi a makikaduaak iti ministerio wenno makilangen kadagiti kakabsat a saanko a kasinged? Iti Kingdom Hall, likliklikak kadi ti makilangen kadagiti kabbaro a kakabsat gapu ta saanko pay ida a kasinged? Kabkablaawak kadi nga agpadpada dagiti natataengan ken ub-ubing iti kongregasion?’
8, 9. Kasano a ti balakad ni Pablo iti Roma 15:7 tulongannatayo nga agkikinnablaaw iti pamay-an a mangparayray iti nainkabsatan nga ayattayo?
8 No maipapan iti panagkikinnablaaw, dagiti sasao ni Pablo kadagiti taga-Roma tulongannatayo a maaddaan iti umiso a panangmatmat kadagiti kapammatiantayo. (Basaen ti Roma 15:7.) Ti Griego a sao nga ‘abrasaen’ kaipapananna ti “nabara a panangawat iti maysa kas kagrupo ken kas gayyem.” Idi panawen ti Biblia, ti nasayaat a bumalay ipariknana ti ragsakna a mangpasangbay kadagiti bisitana. Ni Kristo piguratibo nga inabrasanatayo iti kasta a pamay-an, ken naiparegta nga aramidentayo met dayta kadagiti kapammatiantayo.
9 No kablaawantayo dagiti kakabsat iti Kingdom Hall ken iti dadduma a lugar, nasaysayaat nga ipaayantayo met iti panawen dagiti nabayag a saantayo a nakalangen ken nakasarita. Apay a ditay iwayaan ti makisarita kadakuada? Iti sumaganad a gimong, kasta met ti aramidentayo kadagiti dadduma pay. Inton agangay, dandani amin a kakongregasiontayo ti siraragsak a nakasaritatayon. Ditay pakadanagan no saantay a makasarita ti amin iti maysa laeng nga aldaw. Awan koma ti masair no saantay a makablaawan ida iti tunggal gimong.
10. Ania a nagpateg a gundaway ti silulukat iti amin a kameng ti kongregasion, ken kasano a naan-anay a maaprobetsartayo dayta?
10 Ti umuna nga addang iti panangabrasa kadagiti sabsabali ket ti panangkablaaw kadakuada. Agturong dayta iti naragsak a saritaan ken agpaut a panaggayyem. Kas pagarigan, no agiinnammo ken agsasarita dagidiay tumabuno kadagiti kombension ken asamblea, magagarandanto nga agkikita manen. Masansan nga agbalin a nasinged nga aggagayyem dagiti boluntario iti panagibangon iti Kingdom Hall ken iti trabaho a panangsaranay gapu ta maammuanda dagiti agkakaimbag a galad ti tunggal maysa babaen kadagiti kapadasan nga iranranudda. Adu ti gundaway a makasaraktayo kadagiti nasinged a gagayyem iti uneg ti organisasion ni Jehova. No ‘lumawatayo,’ umadu dagiti gagayyemtayo, a mangparayray iti ayat a mamagkaykaysa kadatayo iti pudno a panagdaydayaw.
Nalakakayo Koma a Maas-asitgan
11. Kas ipakita ti Marcos 10:13-16, ania ti inyulidan ni Jesus?
11 Ikagumaan koma ti amin a Kristiano ti agbalin a nalaka a maas-asitgan, kas ken Jesus. Usigenyo ti reaksion ni Jesus idi a dagiti adalanna pinawilanda dagiti nagannak a mangyasideg kenkuana kadagiti annakda. “Bay-anyo dagiti ubbing nga umay kaniak,” kinunana. “Dikay padasen a pawilan ida, ta ti pagarian ti Dios kukua dagiti kasta.” Kalpasanna, “innalana dagiti ubbing kadagiti takiagna ket rinugianna a binendisionan ida, nga impatayna kadakuada dagiti imana.” (Mar. 10:13-16) Panunotenyo laengen ti ragsak dagidiay nga ubbing idi pinakitaan ida ti Naindaklan a Mannursuro iti kasta a naayat nga atension!
12. Ania ti manglapped kadatayo a makisarita iti sabsabali?
12 Nasken nga isaludsod ti tunggal Kristiano, ‘Adda kadi panawenko kadagiti kakabsat, wenno masansan nga ipakitak a kasla okupadoak unay?’ Adda dagiti ar-aramidentayo a saan met a dakes ngem mabalin a manglapped iti pannakisaritada kadatayo. Kas pagarigan, no masansan a makisarsarita wenno agtetekstayo iti selpon wenno naka-earphone-tayo nga agdengdengngeg iti musika bayat nga adda kakaduatayo, kasla ibagbagatayo a ditay kayat ti makilangen kadakuada. No masansan a makitada a nakasangotayo lattan iti kompiuter, mabalin a panunotenda a saantayo nga interesado a makisarita kadakuada. Siempre, adda “tiempo ti panagulimek.” Ngem no adda kakaduatayo, masansan a ‘tiempo dayta ti panagsao.’ (Ecl. 3:7) Mabalin a kunaen ti dadduma, “Kaykayatko nga awan ti kasarsaritak” wenno “Awan gaganaygayak a makitungtong iti bigat.” Ngem no nainggayyeman a makisaritatayo uray kadagiti panawen nga awan gaganaygayantayo, ipakpakitatayo ti ayat a ‘saan nga agsapsapul kadagiti bukodna a pagimbagan.’—1 Cor. 13:5.
13. Sigun ken Pablo, ania koma ti rumbeng a panangtrato ni Timoteo kadagiti Kristiano a kakabsat?
13 Ni Pablo pinaregtana ti agtutubo a ni Timoteo a mangraem iti amin a kameng ti kongregasion. (Basaen ti 1 Timoteo 5:1, 2.) Masapul met a tratuentayo dagiti natataengan a Kristiano a kas inna wenno ammatayo ken dagiti ub-ubing a kas kakabsattayo iti lasag. No kasta ti kababalintayo, saan a marikna dagiti kakabsat nga ipuerpueratayo ida.
14. Ania ti sumagmamano a pagimbaganna no makiramankayo iti makapabileg a saritaan?
14 No iramantayo dagiti dadduma iti makapabileg a saritaan, makatulongtayo a mangparayray iti espiritualidad ken kinaragsakda. Maragsakan ti maysa a kabsat a lalaki nga agtartrabaho iti sanga nga opisina no malagipna dagiti natataengan a Bethelite a kanayon a makisarita kenkuana idi isu ket kabbaro pay laeng iti Bethel. Dagiti makaparegta a sasaoda ti nangiparikna kenkuana nga isu ket kameng ti pamilia ti Bethel. Gapuna, ikagkagumaanna a tuladen dayta babaen ti pannakisaritana kadagiti padana a Bethelite.
Ti Kinapakumbaba Tulongannatayo a Makikappia
15. Ania ti mangipakita a posible a maipasangotayo iti di panagkikinnaawatan?
15 Da Euodia ken Sintique, dua a Kristiano a babbai iti nagkauna a Filipos, ket agparang a marigatanda idi a mangrisut iti dida nagkinnaawatan. (Fil. 4:2, 3) Adu ti nakaammo iti nabara a panagsupiat da Pablo ken Bernabe a nagresulta iti temporario a panagsinada. (Ara. 15:37-39) Ipakita dagitoy a salaysay a posible a tumaud ti di panagkikinnaawatan uray kadagiti pudno nga agdaydayaw. Mangipapaay ni Jehova iti tulong tapno marisut dagiti di panagkikinnaawatan ken maisubli ti panaggagayyem. Ngem adda kalikagumanna nga aramidentayo.
16, 17. (a) Kasano kapateg ti kinapakumbaba iti panangrisut iti di panagkikinnaawatan? (b) Kasano a ti salaysay maipapan iti panagkita da Jacob ken Esau iyilustrarna ti kinapateg ti kinapakumbaba?
16 Ipapantayo nga agbiahekayo nga aggayyem. Masapul nga adda tulbek tapno agandar ti paglugananyo. Adda met tulbek a mangiruangan iti panangrisut iti di panagkikinnaawatan. Dayta a tulbek ket ti kinapakumbaba. (Basaen ti Santiago 4:10.) Kas ipakita dagiti sumaganad a pagarigan iti Biblia, dayta a tulbek ti tumulong kadagidiay di agkikinnaawatan tapno mairugida nga iyaplikar dagiti prinsipio ti Biblia.
17 Nagsakit ti nakem ni Esau idi naited iti kasinginna a ni Jacob ti kalinteganna kas inauna isu a kayatna a papatayen ti kabsatna. Kalpasan ti 20 a tawen, agkitada manen isu a “ni Jacob nagbuteng iti kasta unay ket naringgoran.” Mariknana a dakkel ti posibilidad nga isu ket dangran ni Esau. Idi agkitadan, adda inaramid ni Jacob a di ninamnama ni Esau. Ni Jacob “nagruknoy agingga iti daga” bayat nga inasitganna ti kabsatna. Ania ti sumaganad a napasamak? “Ni Esau nagtartaray a sumabet kenkuana, ket inarakupna ket nagpasag iti tengngedna ken inagepanna, ket nagsangitda.” Naliklikan ti gistay panagrangetda. Ti kinapakumbaba ni Jacob ti timmulong a nangparmek iti aniaman a gura a nalabit nga ing-ingpen ni Esau.—Gen. 27:41; 32:3-8; 33:3, 4.
18, 19. (a) No adda ditay nagkinnaawatan iti maysa a kabsat, apay a napateg a datayon ti umuna a mangyaplikar iti balakad ti Biblia? (b) Apay a ditay maawanan iti namnama no saanna a dagus nga awaten ti pannakikappiatayo?
18 Naglaon ti Biblia kadagiti nainsiriban a balakad no iti panangrisut iti di panagkikinnaawatan. (Mat. 5:23, 24; 18:15-17; Efe. 4:26, 27)a Ngem no saantayo a sipapakumbaba nga iyaplikar dagita a balakad, marigatantayo a makikappia. Saan a solusion nga urayentayo pay la ti maysa nga isu ti mangipakita iti kinapakumbaba no mabalin met a datayo ti umuna nga agtignay.
19 No saan nga agballigi ti damo a panangikagumaantayo a makikappia iti kabsattayo, ditay koma maawanan iti namnama. Nalabit a kasapulanna laeng ti tiempo a mangtingiting iti riknana. Ni Jose ket liniputan dagiti kakabsatna. Nabayag pay sakbay a nakasangoda manen ni Jose a maysan a primero a ministro iti Egipto. Ngem nagbaliwen ti kababalinda ket dimmawatda iti pammakawan. Pinakawan ida ni Jose. Idi agangay, nagbalin dagiti annak ni Jacob kas maysa a nasion a naaddaan iti pribilehio a mangawit iti nagan ni Jehova. (Gen. 50:15-21) No taginayonentayo ti talna iti nagbabaetantayo, makatulongtayo iti panagkaykaysa ken ragsak ti kongregasion.—Basaen ti Colosas 3:12-14.
Agiinnayattayo “iti Aramid ken Kinapudno”
20, 21. Ania ti masursurotayo iti panangbuggo ni Jesus iti saka dagiti apostolna?
20 Sakbay unay ti ipapatay ni Jesus, kinunana kadagiti apostolna: “Impasdekko ti pagtuladan maipaay kadakayo, tapno, kas iti inaramidko kadakayo, rebbeng nga aramidenyo met.” (Juan 13:15) Kalkalpasna laeng idi a binugguan ti saka ti 12 nga apostolna. Dayta nga inaramidna ket saan laeng a maysa a ritual wenno panangipakita iti asi. Sakbay nga insalaysay ni Juan dayta nga inaramid ni Jesus, insuratna: “Ni Jesus, yantangay inayatna ti kukuana nga adda iti lubong, inayatna ida agingga iti panungpalan.” (Juan 13:1) Ti panagayatna kadagiti adalanna ti nangtignay kenkuana a mangaramid iti serbisio a gagangay nga ar-aramiden ti maysa nga adipen. Gapuna, masapul met a sipapakumbaba a mangaramidda iti kinaimbag iti maysa ken maysa buyogen ti ayat. Wen, ti napudno a nainkabsatan nga ayat tignayennatayo a mangipakita iti pannakaseknan kadagiti amin a kapammatiantayo.
21 Naawatan ni apostol Pedro ti kaipapanan ti panangbuggo ti Anak ti Dios iti sakada. Insuratna: “Ita ta ginugoranyon dagiti kararuayo babaen ti panagtulnogyo iti kinapudno a ti imbungana ket di managinsisingpet a nainkabsatan a panagayat, ayatenyo ti maysa ken maysa a nasged unay manipud iti puso.” (1 Ped. 1:22) Ni apostol Juan, a maysa met kadagiti binugguan ti Apo ti sakana, insuratna: “Annak, agayattayo koma, saan nga iti sao wenno babaen iti dila, no di ket iti aramid ken kinapudno.” (1 Juan 3:18) Matignay koma ti pusotayo a mangipakita iti nainkabsatan nga ayat babaen ti aramid.
[Footnote]
a Kitaenyo ti libro nga Organisado a Mangaramid iti Pagayatan ni Jehova iti panid 144-150.
Malagipyo Kadi?
• Kadagiti ania a pamay-an a ‘mapalawa’ ti panagayattayo iti maysa ken maysa?
• Ania ti makatulong kadatayo nga agbalin a nalaka a maas-asitgan?
• Ania ti akem ti kinapakumbaba no iti pannakikappia?
• Ania koma ti mangtignay kadatayo a mangipakita iti pannakaseknan kadagiti kapammatiantayo?
[Ladawan iti panid 21]
Sibabara nga abrasaentayo dagiti kapammatiantayo
[Ladawan iti panid 23]
Gundawayanyo ti amin nga oportunidad a makilangen kadagiti kakabsat