Ti “Naituding a Tiempo” Asidegen

KAS ken propeta Habakuk, il-iliwen idi dagiti adalan ni Jesus nga agpatingga ti panagsagaba. Gapu ta naammuandan no ania ti aramiden ti Pagarian ti Dios tapno marisut dagiti parikut ditoy daga, inyimtuodda ken Jesus: “Kaanonto a mapasamak dagitoy a banag, ket anianto ti pagilasinan ti kaaddam [a mangituray iti Pagarian] ken ti panungpalan ti sistema ti bambanag?” (Mateo 24:3) Kas sungbat, kinuna ni Jesus a ni laeng Jehova a Dios ti makaammo no kaanonto a talaga ti panagturay ti Pagarian ditoy daga. (Mateo 24:36; Marcos 13:32) Nupay kasta, ni Jesus ken ti dadduma pay a propeta impadtoda dagiti pasamak a mangipakita nga asidegen dayta a tiempo.​—Kitaem ti kahon iti kannawan.

Dika kadi umanamong a gagangayen dagita a bambanag iti kaaldawantayo? Impadto pay ni Jesus nga addanto sangalubongan a trabaho a panangisuro. Kinunana: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”​—Mateo 24:14.

Matungtungpalen dayta iti panawentayo. Ar-aramiden dagiti Saksi ni Jehova dayta a trabaho. Iti agarup 236 a pagilian, nasurok a pito a milion a Saksi ti mangipakpakaammo kadagiti tattao no anianto ti aramiden ti Pagarian, ken tultulonganda ida a mangitunos iti biagda kadagiti nalinteg a pagannurotan ti Dios, a makinpagayatan nga agpatingga ti panagsagaba ken ut-ot. Itultuloymo nga adalen ti maipapan iti Pagarian ti Dios tapno maaddaanka iti namnama nga agbiag nga agnanayon iti maysa a lubong nga awanton ti panagsagaba.

[Kahon iti panid 8]

Dagiti Teksto ti Biblia a Mangdeskribir Kadagiti Maudi nga Aldaw

MATEO 24:6, 7; APOCALIPSIS 6:4

• Awan pay kaaspingna a gubgubat

MATEO 24:7; MARCOS 13:8

• Napigsa a ginggined

• Nakirang a taraon

LUCAS 21:11; APOCALIPSIS 6:8

• Angol

MATEO 24:12

• Iyaadu ti kinakillo

• Panaglamiis ti ayat ti adu

APOCALIPSIS 11:18

• Panangdadael iti daga

2 TIMOTEO 3:2

• Nalabes a panagayat iti kuarta

• Isusukir kadagiti nagannak

• Nalabes a panagayat iti bagi

2 TIMOTEO 3:3

• Kinaawan nainkasigudan a panagayat

• Saan a sidadaan dagiti tattao iti aniaman a tulagan

• Kinaawan panagteppel iti amin a sektor ti kagimongan

• Nasaknap a kinaawan panagayat iti kinaimbag

2 TIMOTEO 3:4

• Panagayat iti ragragsak a nangnangruna ngem iti panagayat iti Dios

2 TIMOTEO 3:5

• Adu ti managinsisingpet a mangibaga a Kristianoda

MATEO 24:5, 11; MARCOS 13:6

• Adu ti aktibo a palso a propeta

MATEO 24:9; LUCAS 21:12

• Pannakaidadanes dagiti pudno a Kristiano

MATEO 24:39

• Saan nga ikankano ti tattao dagiti ballaag ti Biblia

[Ladawan iti panid 8]

Iti sangalubongan, isursuro dagiti Saksi ni Jehova ti maipapan iti Pagarian ti Dios