Ti Kinapudno Maipapan iti Pagarian ti Dios
Insuro ni Jesus kadagiti pasurotna nga ikararagda: “Amami nga adda iti langit, masantipikar koma ti naganmo. Umay koma ti Pagariam. Maaramid koma ti pagayatam ditoy daga, a kas sadi langit.” (Mateo 6:9, 10) Ania ti Pagarian ti Dios? Ania ti aramidenna? Ken apay nga ikararagtayo dayta?
Ni Jesus ti Ari ti Pagarian ti Dios.
Lucas 1:31-33: “Panaganamto iti Jesus. Agbalinto a natan-ok, ken maawaganto iti Anak ti Kangatuan, ket itedto kenkuana ni Jehova a Dios ti trono ni David nga amana, ken agnanayonto nga agturay kas Ari iti sangakabbalayan ni Jacob, ken saanto nga agpatingga ti Pagarianna.”
Ti Pagarian ti kangrunaan a tema ti panangasaba ni Jesus.
Mateo 9:35: “Napan ni Jesus iti amin a siudad ken purok, ket nangisuro kadagiti sinagoga ken inkaskasabana ti naimbag a damag maipapan iti Pagarian ken pinaimbagna ti amin a kita ti sakit.”
Nangted ni Jesus kadagiti adalanna iti pagilasinan tapno maammuanda no kaano a dandanin nga umay ti Pagarian.
Mateo 24:7: “Ta bumusorto ti nasion iti sabali a nasion ken ti pagarian iti sabali a pagarian, ket addanto met bisin ken ginggined iti nadumaduma a lugar.”
Dagiti adalan ni Jesus ikaskasabada ita ti maipapan iti Pagarian iti intero a daga.
Mateo 24:14: “Ti naimbag a damag maipapan iti Pagarian maikaskasabanto iti intero a daga tapno maammuan ti amin a nasion; kalpasanna, umayton ti panungpalan.”