Ammoyo Kadi?
Ania a kalsada ti nagnaan ni apostol Pablo idi damo a nagdaliasat nga agturong idiay Roma?
▪ Kuna ti Aramid 28:13-16 a simmangpet idiay Puteoli (Pozzuoli ita), iti Baybay ti Naples, ti barko a nagluganan ni Pablo a nagturong idiay Italia. Kalpasanna, idi nagturong idiay Roma, dinaliasatna ti kangrunaan a kalsada ti siudad a maawagan iti Via Appia.
Nagtaud ti Via Appia iti nagan nga Appius Claudius Caecus, ti estadista a Romano a nangirugi iti pannakaaramid dayta a kalsada idi 312 K.K.P. (B.C.E.). Dayta a kalsada, a lima agingga iti innem a metro ti kalawana ken nabaldosaan iti dadakkel a bato nga impugso ti bulkan, ket napaatiddog pay idi agangay agingga iti 583 a kilometro nga agpa-abagatan a daya manipud Roma. Dayta ti namagsilpo iti Roma ken ti puerto ti Brundisium (Brindisi ita), ti pagrubbuatan nga agturong iti Daya. Dagiti agdaldaliasat dumagasda kadagiti lugar a pagsardengan, a 24 a kilometro ti nagbabaetanda, tapno gumatangda kadagiti abasto, maturog, wenno baliwanda ti paglugananda wenno pagsakayanda a kabalio.
Ngem nalabit nagnagna ni Pablo. Mabalin a 212 a kilometro ti kawatiwat ti paset ti Via Appia a dinaliasatna. Adda paset dayta a dalan a bumallasiw iti Pontine Marshes, maysa nga aluguog nga inreklamo ti maysa a mannurat a Romano gapu kadagiti lamok ken nabuyok nga angot. Iti amianan dayta a lugar, masarakan ti Plasa ni Appius nga agarup 65 a kilometro manipud iti Roma ken ti Tallo a Taberna a maysa a paginanaan nga agarup 50 a kilometro manipud iti siudad. Kadagita a dua a pagsardengan nga inuray dagiti Kristiano manipud Roma ti isasangpet ni Pablo. Idi nakita ida ni Pablo, “nagyaman iti Dios ket bimmileg.”—Aramid 28:15.
Ania a pagsuratan a tapi ti tuktukoyen ti Lucas 1:63?
▪ Sigun iti salaysay iti ebanghelio ni Lucas, dagiti gagayyem ni Zacarias sinaludsodda kenkuana no ania ti maipanagan iti kappasngay nga anakna a lalaki. “Dimmawat [ni Zacarias] iti maysa a tapi ket insuratna: ‘Juan ti naganna.’” (Lucas 1:63) Sigun iti libro ti maysa nga eskolar, ti Griego a sao a naipatarus a “tapi” tukoyenna ti “maysa a bassit a pagsuratan a tapi a kaaduanna a naaramid iti kayo a nakalupkopan iti allid.” Mausar dagiti nalamuyot nga allid ti uyokan kas masilia tapno mapalanas dagiti narabaw a birri dagiti napagsisilpo a tabla. Ti maysa a mannurat mabalinna ti agikur-it iti rabaw ti namasiliaan a tabla babaen ti pluma. Kalpasanna, mabalin a mapalanas ti rabaw ti tabla tapno mausar manen a pagsuratan.
Kuna ti libro a Reading and Writing in the Time of Jesus: “Nasaknap ti pannakausar ti tapi kas ipakita dagiti lamina manipud Pompeii, dagiti eskultura iti nagduduma a paset ti Imperio ti Roma, ken dagiti nakabakab iti adu a lugar a naiwaras manipud Egipto agingga iti Pader ni Hadrian [Makin-amianan a Britania].” Agduduma nga indibidual ti mabalin nga agaw-awit idi kadagita a tapi, a pakaibilangan dagiti komersiante, opisial ti gobierno, ken nalabit uray ti dadduma a Kristiano idi umuna a siglo.
[Ladawan iti panid 11]
Ti Via Appia
[Ladawan iti panid 11]
Namasiliaan a tapi ti ages-eskuela nga ubing idi maikadua siglo K.P.
[Credit Line]
Iti pammalubos ti British Library