Panagbalin a Kukua ni Jehova—Ebkas ti Di Kaikarian a Kinamanangngaasi
“Kukuanatay ni Jehova.”—ROMA 14:8.
1, 2. (a) Ania a pribilehio ti tagtagiragsakentayo? (b) Ania dagiti saludsod nga usigentayo?
MAYSA a naindaklan a pribilehio ti naitukon iti nasion ti Israel idi kinuna kadakuada ni Jehova: “Agbalinkayto a naisangsangayan a sanikuak manipud iti amin a sabsabali nga ili.” (Ex. 19:5) Dagiti kameng ti kongregasion Kristiano ita pakaidayawanda met ti panagbalin a kukua ni Jehova. (1 Ped. 2:9; Apoc. 7:9, 14, 15) Maysa dayta a pribilehio a pakagunggonaantayo iti agnanayon.
2 Saan laeng a maysa a pribilehio ti panagbalin a kukua ni Jehova no di ket maysa met a responsabilidad. Mabalin a maisaludsod ti dadduma: ‘Maaramidko ngata ti kalikaguman kaniak ni Jehova? No makabasolak, ilaksidnak ngata? Maikkat ngata ti wayawayak no agbalinak a kukua ni Jehova?’ Nainkalintegan nga ikabilangan dagita a pakaseknan. Ngem nasayaat nga usigentayo nga umuna ti saludsod nga: Ania dagiti gunggona nga itden ti panagbalin a kukua ni Jehova?
Mangyeg iti Kinaragsak ti Panagbalin a Kukua ni Jehova
3. Kasano a nakagunggona ken Rahab ti pangngeddengna nga agserbi ken Jehova?
3 Pakagunggonaan kadi dagiti tattao ti panagbalinda a kukua ni Jehova? Usigentayo ti pagarigan ni Rahab, maysa a balangkantis iti nagkauna a Jerico. Awan duadua a napadakkel iti nalulok a panagdayaw kadagiti didiosen iti Canaan. Ngem idi nadamagna dagiti balligi nga inted ni Jehova iti Israel, nabigbigna a ni Jehova ti pudno a Dios. Gapuna, inrisgona ti biagna tapno masalakniban ti ili a pinili ti Dios ken intalekna kadakuada ti masakbayanna. Kuna ti Biblia: “Saan kadi a ni Rahab a balangkantis naideklara met a nalinteg babaen kadagiti aramid, kalpasan nga inawatna buyogen ti kinamanagpadagus dagiti mensahero ket pinaruarna ida iti sabali a dalan?” (Sant. 2:25) Panunotem dagiti nagunggonana idi nagbalin a kameng ti nadalus nga ili ti Dios, a nasursuruan iti Linteg ti Dios a mangiparangarang iti ayat ken kinahustisia. Napalalo la ketdi ti ragsakna a nangtallikud iti sigud a panagbiagna! Nakiasawa iti maysa nga Israelita ken pinadakkelna ni Boaz nga anakna kas maysa a mapagwadan nga adipen ti Dios.—Jos. 6:25; Ruth 2:4-12; Mat. 1:5, 6.
4. Ania ti nagunggona ni Ruth gapu ta pinilina ti nagserbi ken Jehova?
4 Ni Ruth a Moabita inkeddengna met ti agserbi ken Jehova. Nalabit nga inkaubinganna ti agdayaw ken ni Kemos ken iti dadduma pay a didiosen iti Moab. Ngem naam-ammona ti pudno a Dios a ni Jehova ken nakiasawa iti maysa nga Israelita a nagkamang iti ilida. (Basaen ti Ruth 1:1-6.) Idi agangay, idi a ni Ruth ken ti abiratna a ni Orpa kinuyogda ti katuganganda a ni Noemi a mapan idiay Betlehem, indagadag kadakuada ni Noemi nga agawiddan iti nakayanakanda nga ili. Saan a nalaka kadakuada ti agnaed idiay Israel. Gapuna, ‘nagsubli ni Orpa kadagiti kailianna ken kadagiti diosna,’ ngem saan nga inaramid dayta ni Ruth. Nagtignay a maitunos iti pammatina ken ammona no asino ti kayatna a mangtagikua kenkuana. Kinunana ken Noemi: “Dika ipakaasi kaniak a baybay-anka, nga agsubliak manipud ikukuyog kenka; ta no sadino ti papanam mapanakto, ket no sadino ti pangbusbosam iti rabii busbosekto ti rabii. Dagiti kailiam isudanto dagiti kailiak, ket ti Diosmo Diosko.” (Ruth 1:15, 16) Gapu ta pinilina ti agserbi ken Jehova, nagunggonaan ni Ruth manipud iti Linteg ti Dios, a naglaon kadagiti naisangsangayan a probision para kadagiti balo, napanglaw, ken awanan iti daga. Kas maysa a kukua ni Jehova, nasarakanna ti kinaragsak, proteksion, ken kinatalged.
5. Ania ti napaliiwyo kadagiti matalek nga agserserbi ken Jehova?
5 Mabalin nga adda dagiti am-ammom a nabayagen a matalek nga agserserbi ken Jehova kalpasan a nagdedikarda kenkuana. Isaludsodmo kadakuada no ania dagiti nagunggonada iti panagserbida iti Dios. Nupay addaantayo amin iti parikut, adu ti pammaneknek nga umiso dagitoy a sasao ti salmista: “Naragsak ti ili a ti Diosna isu ni Jehova!”—Sal. 144:15.
Nainkalintegan Dagiti Kalikaguman ni Jehova
6. Apay a saantayo koma a panunoten a ditay kabaelan dagiti kalikaguman kadatayo ni Jehova?
6 Nalabit a pampanunotem no kabaelam ngata nga aramiden dagiti kalikaguman kenka ni Jehova. Nalabit a mariknam a kasla narigat ti agbalin nga adipen ti Dios, agbiag maitunos iti lintegna, ken agserbi kas pannakangiwatna. Kas pagarigan, narikna ni Moises nga isu ket saan a maikari idi imbaon ti Dios a makisarita kadagiti Israelita ken iti ari ti Egipto. Ngem saan a nalabes ti kalkalikaguman idi kenkuana ti Dios. ‘Insuro ni Jehova no ania ti aramidenna.’ (Basaen ti Exodo 3:11; 4:1, 10, 13-15.) Idi inawat ni Moises ti naitukon kenkuana a tulong, nariknana ti rag-o nga itden ti panangitungpal iti pagayatan ti Dios. Nainkalintegan met dagiti kalikaguman kadatayo ni Jehova. Matarusanna ti kinaimperpektotayo ken kayatnatayo a tulongan. (Sal. 103:14) Makapabang-ar imbes a makapadagsen ti panagserbi iti Dios kas pasurot ni Jesus yantangay ti kasta a wagas ti panagbiag ket pakagunggonaan ti sabsabali ken mangparagsak iti puso ni Jehova. Kinuna ni Jesus: “Umaykayo kaniak, . . . ket pagin-awaenkayto. Ibaklayyo ti sangolko ket agsursurokayo kaniak, ta naalumamay ti kababalinko ken napakumbaba ti pusok.”—Mat. 11:28, 29.
7. Apay a makapagtalekkayo a tulongannakayo ni Jehova a mangaramid kadagiti namnamaenna kadakayo?
7 Kanayon nga ipaay ni Jehova ti pammaregta a kasapulantayo no la ket ta agpannuraytayo kenkuana maipaay iti pigsa. Kas pagarigan, nalawag a saan a natured nga agsao ni Jeremias. Gapuna, idi tinudingan ni Jehova kas mammadtona, kinuna ni Jeremias: “O Soberano nga Apo Jehova! Adtoy pudno a saanko nga ammo ti agsao, ta maysaak laeng nga ubing.” Idi agangay, kinunana pay: “Saanakton nga agsao iti naganna.” (Jer. 1:6; 20:9) Kaskasdi, babaen ti pammabileg ni Jehova, 40 a tawen a naikasaba ni Jeremias ti mensahe a di magustuan dagiti tattao. Maulit-ulit nga impanamnama kenkuana ni Jehova: “Addaak kenka, tapno isalakanka ken tapno ispalenka.”—Jer. 1:8, 19; 15:20.
8. Kasanotayo a maipakita nga agtalektayo ken Jehova?
8 No kasano a ni Jehova pinabilegna da Moises ken Jeremias, matulongannatayo met a mangaramid kadagiti kalikagumanna kadagiti Kristiano ita. Ngem agkasapulan dayta iti panagpannuray iti Dios. Kuna ti Biblia: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.” (Prov. 3:5, 6) Maipakitatayo nga agtalektayo ken Jehova no aprobetsarentayo ti tulong nga ipapaayna babaen ti Saona ken ti kongregasion. No agpaiwanwantayo ken Jehova iti intero a panagbiagtayo, awan ti makalapped kadatayo nga agtalinaed a matalek kenkuana.
Maseknan ni Jehova iti Adipenna kas Indibidual
9, 10. Ania a kita ti pannalaknib ti ikarkari ti maika-91 a Salmo?
9 Bayat a pampanunoten ti dadduma no idedikarda ti biagda ken Jehova, nalabit a pakadanaganda amangan no agbasolda, agbalinda a di maikari, ken ilaksid ida ni Jehova. Ngem makaparagsak ta ipapaay ni Jehova ti amin a pannalaknib a kasapulantayo a mangsaluad iti napateg a relasiontayo kenkuana. Kitaentayo no kasano a nayebkas dayta iti maika-91 a Salmo.
10 Kastoy ti rugi dayta a salmo: “Asinoman nga agnanaed iti nalimed a lugar ti Kangatuan ikagumaannanto ti mangala iti pagdagusan iti sidong ti mismo a salinong Daydiay Mannakabalin-amin. Kunaekto ken Jehova: ‘Sika ti kamangko ken salindegko, Diosko, a pagtalkakto.’ Ta isu ispalennakanto iti silo ti managtiliw iti tumatayab.” (Sal. 91:1-3) Imutektekam ta inkari ti Dios a salaknibanna dagidiay agayat ken agtalek kenkuana. (Basaen ti Salmo 91:9, 14.) Ania dayta a pannalaknib? Bueno, sinalakniban ni Jehova iti pisikal a pamay-an ti dadduma a nagkauna nga adipenna—no dadduma tapno mataginayon ti kapuonan ti naikari a Mesias. Ngem adu a matalek nga adipenna ti naibalud, naparigat, ken napapatay iti sinasairo a panangikagumaan a mangdadael iti kinamatalekda iti Dios. (Heb. 11:34-39) Naaddaanda iti bileg nga agibtur gapu ta sinalakniban ida ni Jehova iti naespirituan a pamay-an tapno masalimetmetanda ti kinatarnawda. Gapuna, ti maika-91 a Salmo ket maysa a kari agpaay iti naespirituan a pannalaknib.
11. Ania ti “nalimed a lugar ti Kangatuan,” ken siasino dagiti adda iti dayta a lugar a salakniban ti Dios?
11 No kasta, ti “nalimed a lugar ti Kangatuan” a dinakamat ti salmista ket maysa a piguratibo a lugar agpaay iti naespirituan a pannalaknib. Dagidiay makidagus iti Dios kas sangailina ket natalged manipud iti aniaman ken asinoman a mamagpeggad iti pammati ken ayatda iti Dios. (Sal. 15:1, 2; 121:5) Maysa dayta a nalimed a lugar gapu ta saan a mailasin dagiti di manamati. Salakniban ni Jehova dagiti tattao nga adda iti dayta, nga arigna nga agkunkuna: ‘Sika ti Diosko a pagtalkak.’ No agtalinaedtayo iti dayta a lugar a pagkamangan, ditay rumbeng a pakadanagan a mapukawtayo ti anamong ti Dios babaen ti pannakatnag iti silo ni Satanas, “ti managtiliw iti tumatayab.”
12. Ania dagiti mamagpeggad iti relasiontayo iti Dios?
12 Ania dagiti mamagpeggad iti napateg a relasiontayo iti Dios? Dakamaten ti salmista ti sumagmamano a peggad kas iti “angol a magna iti daguyemyem, . . . [ken] iti pannakadadael nga agagaw iti tengnga ti aldaw.” (Sal. 91:5, 6) Adu ti nasiluan “ti managtiliw iti tumatayab” babaen ti managimbubukodan a panagtarigagay iti wayawaya. (2 Cor. 11:3) Tiliwenna met ti dadduma babaen ti kinaagum, kinatangsit, ken materialismo. Al-allilawenna pay ti dadduma babaen kadagiti pilosopia a kas iti patriotismo, ebolusion, ken palso a relihion. (Col. 2:8) Ken adu ti nagargari iti silo ti seksual nga imoralidad. Dagiti kasta nga arig angol a makadangran iti naespirituan ti makagapu a napukaw ti minilion a tattao ti panagayatda iti Dios.—Basaen ti Salmo 91:7-10; Mat. 24:12.
Salaknibam ti Panagayatmo iti Dios
13. Kasanonatayo a salsalakniban ni Jehova kadagiti mamagpeggad iti espiritualidadtayo?
13 Kasano a salakniban ni Jehova ti ilina manipud kadagita a naespirituan a peggad? Kuna ti salmo: “Mangtedto kadagiti bukodna nga anghel iti bilin maipapan kenka, tapno saluadandaka iti amin a daldalanmo.” (Sal. 91:11) Iwanwan ken salaknibannatayo dagiti anghel tapno maikasabatayo ti naimbag a damag. (Apoc. 14:6) Malaksid kadagiti anghel, dagiti panglakayen salaknibandatayo manipud iti pannakaallilaw iti palso a panagrasrason babaen ti naan-anay a panangusarda iti Kasuratan no mangisuroda. Matulonganda ti tunggal indibidual a mangikagkagumaan a mangparmek kadagiti nailubongan a kababalin. (Tito 1:9; 1 Ped. 5:2) Mangipapaay met ti “matalek ken masirib nga adipen” kadagiti naespirituan a taraon a mangsalaknib kadatayo manipud iti pannursuro ti ebolusion, pananggargari ti imoral a tarigagay, pananggun-od iti kinabaknang ken kinatan-ok, ken adu pay a makadangran a tarigagay ken impluensia. (Mat. 24:45) Ania ti nakatulong kenka a nangliklik iti dadduma a peggad?
14. Kasanotayo a maaprobetsar ti pannalaknib ti Dios?
14 Ania ti masapul nga aramidentayo tapno agtalinaedtayo iti “nalimed a lugar” ti Dios agpaay iti proteksion? No kasano a kanayon a salaknibantayo ti bagitayo manipud iti pisikal a peggad kas iti aksidente, kriminal, wenno impeksion, masapul met a kanayon a salaknibantayo ti bagitayo iti naespirituan a peggad. Gapuna, regular koma nga aprobetsarentayo ti panangiwanwan ni Jehova babaen kadagiti publikasiontayo ken Nakristianuan a gimong ken asamblea. Agpabalakadtayo koma kadagiti panglakayen. Ken makasursurotayo met manipud iti nagduduma a galad dagiti kapammatiantayo. Kinapudnona, ti pannakilangentayo iti kongregasion tulongannatayo nga agbalin a masirib.—Prov. 13:20; basaen ti 1 Pedro 4:10.
15. Apay a makapagtalekkayo a masalaknibannakayo ni Jehova iti aniaman a mangikkat iti anamongna kadakayo?
15 Awan ti rason nga agduaduatayo a dinatay kabaelan a salakniban ni Jehova manipud iti aniaman a mangikkat iti anamongna kadatayo. (Roma 8:38, 39) Sinalaknibanna ti kongregasion manipud iti nabileg a narelihiosuan ken napolitikaan a kabusor a ti panggepda ket masansan a saan a tapno papatayendatayo no di ket tapno isinadatayo manipud iti nasantuan a Dios. Napaneknekan nga umiso ti kari ni Jehova: “Aniaman nga igam a mabukelto maibusor kenka saanto nga agballigi.”—Isa. 54:17.
Asino ti Mangted Kadatayo iti Wayawaya?
16. Apay a ti lubong dina maipaay kadatayo ti wayawaya?
16 Maikkat kadi ti wayawayatayo no agbalintayo a kukua ti Dios? Saan. Ti ketdi panagbalin a kukua ti lubong ti mangikkat iti wayawayatayo. Ti lubong ket naisina ken ni Jehova ken iturturayan ti naulpit a dios a mangad-adipen kadagiti tattao. (Juan 14:30) Kas pagarigan, ti sistema ti bambanag ni Satanas us-usarenna ti kinarigat ti biag a mangikkat iti wayawaya dagiti tattao. (Idilig ti Apocalipsis 13:16, 17.) Ti basol ket addaan met iti mangallilaw a pannakabalin a mangadipen kadagiti tattao. (Juan 8:34; Heb. 3:13) Gapuna, nupay dagiti di manamati mabalin nga ikarida ti wayawaya no idagadagda ti wagas ti panagbiag a maikaniwas kadagiti pannursuro ni Jehova, asinoman a mangipangag kadakuada ti dagus nga agbalin nga adipen ti basol ken nalulok a panagbiag.—Roma 1:24-32.
17. Ania a wayawaya ti ituktukon ni Jehova kadatayo?
17 Iti kasumbangirna, wayawayaannatayo ni Jehova manipud iti aniaman a makadangran kadatayo no italektayo ti biagtayo kenkuana. No dadduma, mayarig ti kasasaadtayo iti tao a mangitalek iti biagna iti maysa a nalaing a doktor tapno mapaimbag manipud iti makapapatay a kasasaad. Addaantayo amin iti makapapatay a kasasaad—ti pannakatawid iti basol. Maliklikantayo laeng dagiti epekto ti basol ken agbiagtayo nga agnanayon no italektayo ti biagtayo ken Jehova maibatay iti daton ni Kristo. (Juan 3:36) No kasano a dumakkel ti panagtalektayo iti doktor bayat a maad-adaltayo ti kinalaingna, dumakkel met ti panagtalektayo ken Jehova bayat nga umad-adu ti pannakaammotayo maipapan kenkuana. Gapuna, itultuloytayo nga adalen a naimbag ti Sao ti Dios tapno maayattayo ni Jehova ket ditay agbuteng nga agbalin a kukuana.—1 Juan 4:18.
18. Ania ti magunggona dagidiay kukua ni Jehova?
18 Ni Jehova inikkanna ti amin a tao iti wayawaya nga agpili. Kuna ti Saona: “Masapul a piliem ti biag tapno makapagtalinaedka a sibibiag, sika ken ti putotmo, babaen ti panangayat ken Jehova a Diosmo.” (Deut. 30:19, 20) Kayatna nga isu ket ayatentayo babaen ti naimpusuan a panangpilitayo nga agserbi kenkuana. Imbes nga ikkatenna ti wayawayatayo, ti panagbalin a kukua ti ay-ayatentayo a Dios ti sigurado a mamagbalin ken mamagtalinaed kadatayo a naragsak.
19. Apay nga ebkas ti di kaikarian a kinamanangngaasi ti panagbalin a kukua ni Jehova?
19 Gapu ta managbasoltayo, saantayo a maikari nga agbalin a kukua ti perpekto a Dios. Ti laeng di kaikarian a kinamanangngaasi ti Dios ti mamagbalin a posible iti dayta. (2 Tim. 1:9) Gapuna, insurat ni Pablo: “Agpadpada a no agbiagtayo, agbiagtayo a maipaay ken Jehova, ket no mataytayo, mataytayo a maipaay ken Jehova. Gapuna agpadpada a no agbiagtayo ken no mataytayo, kukuanatay ni Jehova.” (Roma 14:8) Sigurado a ditayto pulos pagbabawyan ti panangikeddengtayo nga agbalin a kukua ni Jehova.
Ania ti Sungbatyo?
• Ania dagiti gunggona nga itden ti panagbalin a kukua ni Jehova?
• Apay a kabaelantayo nga aramiden dagiti kalikaguman kadatayo ti Dios?
• Kasano nga ipapaay ni Jehova ti pannalaknib kadagiti adipenna?
[Dagiti Ladawan iti panid 8]
Isaludsodmo iti sabsabali no ania ti nagunggonada iti panagbalinda a kukua ni Jehova
[Ladawan iti panid 10]
Ania ti dadduma a pamay-an a mangipapaay ni Jehova iti pannalaknib?