Mabautisaran iti Nagan ti Siasino ken ti Ania?

“Inkayo ngarud ket mangaramidkayo iti ad-adalan . . . , a bautisaranyo ida iti nagan ti Ama ken ti Anak ken ti nasantuan nga espiritu.”​—MAT. 28:19.

1, 2. (a) Ania ti napasamak idiay Jerusalem idi Pentecostes 33 K.P.? (b) Apay nga adu ti natignay a nagpabautisar?

IDI Pentecostes 33 K.P., adda maang-angay a napateg a piesta idiay Jerusalem isu a nagadu a tattao manipud iti nagduduma a lugar ti napan sadiay. Ngem adda karkarna a napasamak. Kalpasanna, nangipaay ni apostol Pedro iti makagutugot a palawag a nangtukay iti puso ti agarup 3,000 a Judio ken proselita tapno agbabawi ken agpabautisarda iti danum. Iti kasta, nainayonda iti kabbuangay a kongregasion Kristiano. (Ara. 2:41) Nangpataud la ketdi iti arimbangaw ti pannakabautisar ti nagadu a tattao kadagiti pagurnongan iti danum idiay Jerusalem!

² Ania ti napasamak sakbayna a nakaigapuan ti panagpabautisar ti adu? Iti nasapsapa a paset dayta nga aldaw, “adda dimteng manipud langit nga ungor a kaasping ti ungor ti bumanesbes a napigsa a puyupoy.” Iti makinngato a siled ti maysa a pagtaengan, agarup 120 nga adalan ni Jesus ti napno iti nasantuan nga espiritu. Kalpasanna, naguummong dagiti napasnek a tattao ken naala ti atensionda idi mangngegda dagiti adalan nga ‘agsasao iti nagduduma a pagsasao.’ Apaman a nangngegda ti kinuna ni Pedro, agraman ti nalawag ken prangka a komentona maipapan iti ipapatay ni Jesus, ‘naduyok ti puso’ ti adu. Ania ti rumbeng nga aramidenda? Kinuna ni Pedro: “Agbabawikayo, ket mabautisaran koma ti tunggal maysa kadakayo iti nagan ni Jesu-Kristo . . . , ket awatenyonto ti awan bayadna a sagut ti nasantuan nga espiritu.”​—Ara. 2:1-4, 36-38.

3. Idi aldaw ti Pentecostes, ania ti masapul nga aramiden dagiti agbabbabawi a Judio ken proselita?

³ Usigenyo ti naespirituan a kasasaad dagiti Judio ken proselita a nakangngeg ken Pedro. Siguden nga inawatda ni Jehova kas Diosda. Ken babaen ti Hebreo a Kasuratan, ammoda ti maipapan iti nasantuan nga espiritu, ti aktibo a puersa ti Dios nga inusarna bayat ti panamarsua ken nagtultuloy. (Gen. 1:2; Uk. 14:5, 6; 1 Sam. 10:6; Sal. 33:6) Ngem saan laeng a dagita ti kasapulanda. Masapul met a matarusan ken bigbigenda ti usaren ti Dios a mangisalakan​—ti Mesias a ni Jesus. Gapuna, intampok ni Pedro a masapul a ‘mabautisaranda iti nagan ni Jesu-Kristo.’ Sumagmamano nga aldaw sakbayna, ti napagungar a ni Jesus binilinna ni Pedro ken ti dadduma pay nga adalan a bautisaranda dagiti tattao “iti nagan ti Ama ken ti Anak ken ti nasantuan nga espiritu.” (Mat. 28:19, 20) Adda dakkel a kaipapanan dayta idi umuna a siglo ken agingga ita. Ania dayta?

Iti Nagan ti Ama

4. No maipapan kadagiti tattao a siguden nga adda relasionda ken Jehova, ania a panagbalbaliw ti napasamak?

⁴ Kas nadakamaten, dagidiay nangipangag iti palawag ni Pedro ket sigud nga agdaydayawen ken Jehova, addaandan iti relasion kenkuana, ken ikagkagumaanda nga annuroten ti Linteg. Dayta ti makagapu a napan idiay Jerusalem ti adu a tattao manipud iti nagduduma a lugar. (Ara. 2:5-11) Ngem iti dayta a gundaway, nagbalbaliw ti pannakilangen ti Dios kadagiti tattao. Inlaksidna dagiti Judio kas naisangsangayan a nasionna; saanen a babaen ti panangannurotda iti Linteg a magun-odda ti anamongna. (Mat. 21:43; Col. 2:14) No kayat dagidiay nga agdengdengngeg a mataginayon ti relasionda ken Jehova, adda sabali a masapul nga aramidenda.

5, 6. Ania ti inaramid ti adu a Judio ken proselita idi umuna a siglo tapno mataginayonda ti relasionda iti Dios?

⁵ Masapul nga umadanida ken Jehova, ti Gubuayan ti Biagda. (Ara. 4:24) Wen, dagidiay nangipangag iti panangilawlawag ni Pedro ad-adda a mabigbigdan a naasi ken naayat nga Ama ni Jehova. Imbaonna ti Mesias a mangispal kadakuada ken sidadaan a mangpakawan uray kadagidiay nangikunaan ni Pedro: “Ammuen koma ti intero a balay ti Israel nga awan duadua a ti Dios pinagbalinna nga agpadpada nga Apo ken Kristo, daytoy Jesus nga inlansayo.” Kinapudnona, dagidiay nangipangag kadagiti sasao ni Pedro addaanda ita iti dakdakkel a rason a mangipateg iti inaramid ti Ama iti isuamin nga agtarigagay a maaddaan iti relasion iti Dios!​—Basaen ti Aramid 2:30-36.

⁶ Kinapudnona, matarusanen dagidiay a Judio ken proselita a mataginayonda ti relasionda ken Jehova no bigbigenda nga ipaayna ti pannakaisalakan babaen ken Jesus. Matarusantayo ngarud no apay a pinagbabawyanda dagiti basolda, agraman ti panangilaksidda ken ni Jesus ken ti pannakipasetda kas maysa a grupo iti panangpapatay kenkuana. Ken matarusantayo met a bayat dagiti simmaganad nga aldaw, “intuloyda nga impamaysa ti bagbagida iti sursuro dagiti apostol.” (Ara. 2:42) Kabaelan ken kayatda ti ‘umadani iti trono ti di kaikarian a kinamanangngaasi buyogen ti wayawaya nga agsao.’​—Heb. 4:16.

7. Kasano a nagbalbaliw ti panangmatmat ti adu ita maipapan iti Dios ken nagpabautisarda iti nagan ti Ama?

⁷ Minilion a tattao ita a nagduduma ti nalikudanda ti nakaadal manipud iti Biblia iti kinapudno maipapan ken Jehova. (Isa. 2:2, 3) Dadduma ti ateista wenno deistaa ngem nakombinsirda nga adda Namarsua ken mabalinda ti maaddaan iti nasinged a relasion kenkuana. Adda met dagidiay agdaydayaw iti nagkatlo a dios wenno nagduduma a didiosen. Ngem naammuanda a ni Jehova laeng ti mannakabalin-amin a Dios, isu nga awaganda itan babaen ti personal a naganna. Maitunos dayta iti kinuna ni Jesus a masapul a mabautisaran dagiti adalanna iti nagan ti Ama.

8. No maipapan kadagidiay saan a makaammo iti natawid a basol ken Adan, ania ti rumbeng a bigbigenda mainaig iti Ama?

⁸ Naadalda met a natawidda ti basol ni Adan. (Roma 5:12) Para kadakuada, baro a banag dayta ngem masapul a bigbigenda nga umiso dayta. Mayarigda iti masakit a tao a dina ammo nga adda sakitna. Mabalin nga adda dagiti mariknana a sintoma, kas iti sagpaminsan a pannakarikna iti ut-ot. Ngem yantangay saan pay a natakuatan ti espesipiko a sakitna, nalabit a panunotenna nga isu ket nasalun-at. Ngem sabali ti ipakita ti kinapudno. (Idilig ti 1 Corinto 4:4.) Kasanon no natakuatan ti pudno a sakitna? Saan kadi a nainsiriban nga agbirok ken awatenna ti pagaammo, napaneknekan, ken epektibo nga agas? Umasping iti dayta, apaman a naammuanda ti maipapan iti natawid a basol, adu ti nangawat iti dayta a kinapudno manipud iti Biblia ken natarusanda nga ituktukon ti Dios ti “agas.” Wen, amin dagidiay naisina iti Ama masapul nga umadanida iti Daydiay “makaagas” kadakuada.​—Efe. 4:17-19.

9. Ania ti inaramid ni Jehova tapno posible ti maaddaan iti relasion kenkuana?

⁹ No naidedikarmon ti biagmo ken ni Jehova a Dios ken maysakan a bautisado a Kristiano, ammom a nagsayaat ti maaddaan iti relasion kenkuana. Ad-adda a maawatamon no kasano kadakkel ti panagayat ni Jehova kas Amam. (Basaen ti Roma 5:8.) Nupay nagbasol da Adan ken Eva iti Dios, isu ket nangaramid iti pamay-an tapno dagiti kaputotanda​—a pakairamanantayo​—ket maaddaan iti nasayaat a relasion kenkuana. Ngem iti panangaramidna iti dayta, masapul nga ibturan ti Dios ti saem ti pannakakitana iti panagsagaba ken ipapatay ti dungdungnguenna nga Anak. Saan kadi a ti pannakaammotayo iti dayta tulongannatayo a mangbigbig iti autoridad ti Dios ken naimpusuan a mangtungpal kadagiti bilinna? No saanmo pay nga inaramid dagita, nasayaat nga idedikarmon ti biagmo iti Dios ken agpabautisarka.

Iti Nagan ti Anak

10, 11. (a) Kasano kadakkel ti panagyamanmo ken Jesus? (b) Ania ti mariknam maipapan iti ipapatay ni Jesus kas subbot?

¹⁰ Ngem panunotem manen ti kinuna ni Pedro iti bunggoy. Impaganetgetna ti panangawat ken Jesus, a direkta a mainaig iti panagpabautisar “iti nagan . . . ti Anak.” Apay a napateg dayta idi ken uray ita? Bueno, ti panangawat ken ni Jesus ken panagpabautisar iti naganna kaipapananna ti panangbigbig iti akemna mainaig iti relasiontayo iti Namarsua. Masapul idi a mailansa ni Jesus iti kayo a pagtutuokan tapno maikkat kadagiti Judio ti lunod ti Linteg. Ngem nangyeg iti dakdakkel a gunggona ti ipapatayna. (Gal. 3:13) Impaayna ti pangsubbot a daton a kasapulan ti sangatauan. (Efe. 2:15, 16; Col. 1:20; 1 Juan 2:1, 2) Tapno maitungpalna dayta, inibturan ni Jesus ti kinaawan hustisia, pannakaumsi, pannakaparigat, ken kamaudiananna, ti ipapatay. Kasano kadakkel ti panangipategmo iti datonna? Iladawanmo a maysaka nga ubing nga agtawen iti 12 a nagsakay iti Titanic, ti barko a dimmungpar iti iceberg ken limned idi 1912. Pinadasmo ti lumugan iti lifeboat ngem napnon dayta. Kalpasanna, maysa a lalaki iti lifeboat ti nagpakada ken baketna, nagsubli iti barko, sa sika ti inluganna iti lifeboat. Ania ti mariknam? Sigurado nga agyamanka kenkuana! Gapuna, matarusam ti narikna ti ubing a nakapadas a mismo iti dayta.b Ngem adayo a napatpateg ti inaramid ni Jesus para kenka. Isu ket natay tapno magun-odmo ti agnanayon a biag.

¹¹ Ania ti nariknam idi naadalmo ti inaramid ti Anak ti Dios maipaay kenka? (Basaen ti 2 Corinto 5:14, 15.) Nalabit a kasta unay ti panagyamanmo. Tinulongannaka dayta a mangidedikar iti biagmo iti Dios ken ‘agbiag saan nga agpaay iti bagim, no di ket agpaay kenkuana a natay maipaay kenka.’ Ti panagpabautisar iti nagan ti Anak kaipapananna ti panangbigbig iti inaramid ni Jesus maipaay kenka ken panangawat iti autoridadna kas “ti Kangrunaan nga Ahente ti biag.” (Ara. 3:15; 5:31) Awananka idi iti relasion iti Namarsua, ken nalabit awananka iti umiso a namnama. Ngem babaen ti panangipakitam iti pammati iti naiparukpok a dara ni Jesu-Kristo ken babaen ti panagpabautisarmo, addaanka itan iti relasion iti Ama. (Efe. 2:12, 13) Insurat ni apostol Pablo: “Dakayo a naisina idi ken kabkabusor agsipud ta dagiti panunotyo addada kadagiti aramid a nadangkes, [ti Dios] inkappianakayo manen ita babaen ti nainlasagan a bagi [ni Jesus] babaen ti ipapatayna, tapno iparangnakayo a nasantuan ken awanan pakapilawan.”​—Col. 1:21, 22.

12, 13. (a) Kasano a ti pannakabautisarmo iti nagan ti Anak apektaranna ti reaksionmo no adda mangsair kenka? (b) Kas maysa a Kristiano a nabautisaran iti nagan ni Jesus, ania ti masapul nga aramidem?

¹² Nupay nabautisarankan iti nagan ti Anak, pagaammom unay nga adda latta pagannayasam nga agbasol. Napateg a kanayon a laglagipem dayta. Kas pagarigan, no adda nangsair kenka, sipapanunotka kadi nga agpadakayo a managbasol? Agpada ngarud a kasapulanyo ti pammakawan ti Dios ken ti panagbalin a manangpakawan. (Mar. 11:25) Kas panangipaganetget iti dayta, nangipaay ni Jesus iti ilustrasion: Ti ari winaswasna ti utang ti adipenna a sangapulo a ribu a talento (60 a milion a denario). Ngem dayta nga adipen dina winaswas ti utang kenkuana ti padana nga adipen a 100 a denario. Kalpasanna, impatuldo ni Jesus: Saan a pakawanen ni Jehova ti di mangpakawan iti kabsatna. (Mat. 18:23-35) Wen, ti pannakabautisar iti nagan ti Anak kaipapananna ti panangbigbig iti autoridad ni Jesus ken ti panangikagumaan a mangtulad iti ulidanna ken mangannurot kadagiti pannursurona, agraman ti sidadaan a panangpakawan kadagiti sabsabali.​—1 Ped. 2:21; 1 Juan 2:6.

¹³ Gapu iti kinaimperpekto, saanmo a naan-anay a matulad ni Jesus. Nupay kasta, aramidem ti amin a kabaelam a mangtulad ken Jesus maitunos iti naimpusuan a dedikasionmo iti Dios. Ramanen dayta ti agtultuloy a panagregget a manguksob iti daan a personalidad ken mangikawes iti baro a personalidad. (Basaen ti Efeso 4:20-24.) No raraemem ti maysa a gayyem, mabalin nga ikagumaam a tuladen ti ulidanna ken dagiti nasayaat a galadna. Umasping iti dayta, kayatmo ti agpaisuro ken ni Kristo ken tuladem ti ulidanna.

14. Kasanom a maipakita a bigbigem ti autoridad ni Jesus kas nailangitan nga Ari?

¹⁴ Adda sabali pay a pamay-an tapno maipakitam a maawatam ti ramanen ti pannakabautisar iti nagan ti Anak. Ti Dios ‘impasakupna ti amin a bambanag iti baba dagiti saka ni Jesus, ket pinagbalinna nga ulo iti amin a bambanag iti kongregasion.’ (Efe. 1:22) Gapuna, nasken a raemem ti wagas ti panangiwanwan ni Jesus kadagiti nagdedikar ken Jehova. Us-usaren ni Kristo dagiti imperpekto a tattao iti tunggal kongregasion, nangnangruna dagiti lallaki a nataengan iti naespirituan, dagiti nadutokan a panglakayen. Nadutokan dagita a lallaki “iti panggep a panangatur kadagiti sasanto, . . . maipaay iti pannakapabileg ti bagi ti Kristo.” (Efe. 4:11, 12) Uray no agkamali dagiti imperpekto a tattao, ni Jesus kas Ari iti nailangitan a Pagarian kabaelanna a tamingen dagiti bambanag iti inkeddengna a tiempo ken pamay-an. Patiem kadi dayta?

15. No saanka pay a bautisado, ania dagiti bendision nga agur-uray kenka kalpasan ti bautismom?

¹⁵ Ngem dadduma ti saan pay a nangidedikar iti biagda ken ni Jehova ken saanda pay a nagpabautisar. No maysaka kadakuada, naamirismo kadi maibatay kadagiti nadakamaten a ti panangbigbig iti Anak ket nainkalintegan ken pamay-an dayta a maipakitam ti panagyamanmo? Ti pannakabautisar iti nagan ti Anak luktanna ti gundaway tapno umawatka kadagiti agkakaimbag a bendision.​—Basaen ti Juan 10:9-11.

Iti Nagan ti Nasantuan nga Espiritu

16, 17. Ania ti kaipapananna kenka ti pannakabautisar iti nagan ti nasantuan nga espiritu?

¹⁶ Ania ti kayat a sawen ti pannakabautisar iti nagan ti nasantuan nga espiritu? Kas nadakamaten, dagidiay dimngeg ken Pedro idi aldaw ti Pentecostes ammoda ti maipapan iti nasantuan nga espiritu. Kinapudnona, nakitada a mismo ti pammaneknek nga agtultuloy nga us-usaren ti Dios ti nasantuan nga espiritu. Ni Pedro ti maysa kadagidiay ‘napno iti nasantuan nga espiritu ken maysa kadagidiay nangrugi nga agsao iti nagduduma a pagsasao.’ (Ara. 2:4, 8) Ti ebkas nga “iti nagan ti” ket saan a kanayon a tumukoy iti nagan ti maysa a persona. Adu ita ti maar-aramid “iti nagan ti gobierno,” a saan met a maysa a persona. Kayatna la a sawen a maar-aramid dagita babaen ti autoridad ti gobierno. Umasping iti dayta, ti maysa a nabautisaran iti nagan ti nasantuan nga espiritu bigbigenna a saan a maysa a persona dayta no di ket ti aktibo a puersa ni Jehova. Ti kasta a pannakabautisar kaipapananna pay a ti maysa bigbigbigenna ti akem ti nasantuan nga espiritu kadagiti panggep ti Dios.

¹⁷ Saan kadi a naammuam ti maipapan iti nasantuan nga espiritu babaen ti panagadalmo iti Biblia? Kas pagarigan, natarusam a naisurat ti Kasuratan babaen ti panangipaltiing ti nasantuan nga espiritu. (2 Tim. 3:16) Bayat a rumangrang-ayka iti naespirituan, mabalin nga immuneg ti pannakaawatmo iti kinapudno a ‘ti Ama sadi langit mangtedto iti nasantuan nga espiritu kadagidiay agdawdawat kenkuana,’ a pakairamanam. (Luc. 11:13) Nalabit a nakitam ti panagtignay ti nasantuan nga espiritu iti biagmo. Iti sabali a bangir, no agngayngayangaykan nga agpabautisar iti nagan ti nasantuan nga espiritu, ti panangipasigurado ni Jesus nga ited ti Ama ti nasantuan nga espiritu kaipapananna nga agur-uray kenka dagiti pudno a bendision inton maawatmo dayta nga espiritu.

18. Aniada a bendision ti sagrapen dagiti nabautisaran iti nagan ti nasantuan nga espiritu?

¹⁸ Nabatad nga iwanwanwan ken iturturong met ita ni Jehova ti kongregasion Kristiano babaen ti espirituna. Kas indibidual, tultulongannatayo met dayta nga espiritu kadagiti inaldaw nga aktibidadtayo. Ti pannakabautisartayo iti nagan ti nasantuan nga espiritu ramanenna ti panangbigbigtayo iti akemna iti biagtayo ken ti siyayaman a panagpaidalan iti dayta nga espiritu. Ngem mabalin a pampanunoten ti dadduma no kasanotayo a maitungpal ti dedikasiontayo ken ni Jehova ken no kasano a nairaman iti dayta ti nasantuan nga espiritu. Usigentayo dayta iti sumaganad nga artikulo.

[Footnotes]

Malagipyo Kadi?

• Ania ti ramanen ti pannakabautisar iti nagan ti Ama?

• Ania ti kayat a sawen ti pannakabautisar iti nagan ti Anak?

• Kasanoyo a maipakita ti panagyaman iti kinapateg ti pannakabautisar iti nagan ti Ama ken ti Anak?

• Ania ti kayat a sawen ti pannakabautisar iti nagan ti nasantuan nga espiritu?

[Dagiti Ladawan iti panid 10]

Kalpasan ti Pentecostes 33 K.P., ania ti masapul a bigbigen dagiti kabbaro nga adalan mainaig iti relasionda iti Ama?

[Credit Line]

Iti pammalubos ti Israel Museum, Jerusalem