No Kasano a ti Espiritu ti Dios Apektarannakayo

“IDI punganay ti Dios pinarsuana dagiti langlangit ken ti daga. Ket ti daga adda idi a gusoguso ken awan nagyan, ket ti sipnget adda idi iti rabaw ti yuyeng; ken ti Espiritu ti Dios nagtignay iti rabaw dagiti dandanum.” (Genesis 1:1, 2, Revised Standard Version) Daytoy Nainkasuratan a sasao itamtampoknat’ naisangsangayan a pamay-an a sadiay tunggal maysa a sibibiag nagunggonaan manipud iti nasantuan nga espiritu. Dayta nga espiritu ket aktibo bayat ti panamarsua, ket pagyamanan iti ar-aramidna, ti daga nagbalin a makaay-ayo a pagtaengan ti sangatauan.

Ngem dagiti tattao magunggonaandat’ ad-adu pay manipud iti nasantuan nga espiritu. Kuna ti naipaltiing a proverbio: “Talliawenyo kadi toy panangtubngarko. Ket iparukpukkonto ti espirituk kadakayo; ipakaammokto dagiti sasaok kadakayo.” (Proverbio 1:23) Iti kaaldawantayo dagiti ‘sasao’ nga inurnong ti Dios ket magun-odanda iti Nasantuan a Biblia, nga insurat dagiti tattao a “pinaltiingan ti nasantuan nga espiritu.” (2 Pedro 1:21; Marcos 12:36; 2 Timoteo 3:16) Kaanoman a basaen ti tao a naemma ti Biblia, isut’ magunggonaan manipud iti nasantuan nga espiritu.

Nasantuan nga Espiritu ken ti Trabaho a Panangasaba

No maysa kadagiti Saksi ni Jehova ti sumarungkar iti pagtaenganyo tapno isarita maipapan ti naimbag a damag ti Pagarian, ti nasantuan nga espiritu maapektaranna ti biagyo iti sabali pay a pamay-an. Kasanotay nga ammo? Idi a rinugian ni Jesu-Kristo nga ikaskasaba ti naimbag a damag, inyaplikarna iti bagina dagiti sasao ni mammadto nga Isaias, a kunkunana: “Ti espiritu ni Jehova adda kaniak, ta pinulotannak a mangted ti naimbag a damag kadagiti napanglaw, . . . tapno iwarnak ti tawen a pakaay-ayuan ni Jehova.” (Lucas 4:18, 19; Isaias 61:1, 2) Wen, ni Jesus ket napulotan babaen ti nasantuan nga espiritu a mangikasaba ti naimbag a damag.

Mainayon pay, impadto ni Jesus a ti panakaikasaba ti naimbag a damag agtultuloy kalpasan ti ipapatayna. Impadtona: “Daytoy naimbag a damag ti pagarian maikaskasabanto iti amin a mapagnaedan a daga kas pammaneknek iti amin a nasnasion; ket iti kasta umayton ti panungpalan.” (Mateo 24:14) Di nagbayag kalpasan ti iyuuli ni Jesus sadi langit, inikkanna dagiti paspasurotna itoy a bilin: “Inkayo . . . ket agaramidkayo ti adalan kadagiti tattao ti amin a nasnasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada nga aywananda dagiti isuamin a banag nga imbilinko kadakayo.” (Mateo 28:19, 20) Ngarud, kalpasan ti iyuuli ni Kristo idiay langit, intultuloy dagiti adalanna ti inautorisaran ti espiritu a trabaho a panangasaba ken panangisuro. Dagiti Saksi ni Jehova itatta tultuladenda dagidiay immuna nga adalan iti panangikaskasaba ti naimbag a damag iti intero a lubong.

Bautismo ken ti Nasantuan nga Espiritu

No abrasaen a sisasayaat ti maysa a tao ti naimbag a damag, kuna ni Jesus a rebbeng nga isut’ mabautisaran “iti nagan ti Ama ken ti Anak ken ti nasantuan nga espiritu.” Gapuna dagiti baro nga adalan maapektaranda manen babaen ti nasantuan nga espiritu. Ti sasao nga “iti nagan ti” talaga a kaipapanannat’ “babaen ti autoridad ti” wenno “panangbigbig ti posision ti.”a Gapuna, ti pannakabautisar iti nagan ti Ama kaipapananna ti panangawat nga awan duadua iti kinasoberano ti Dios iti biagtayo. Ti bautismo iti nagan ti Anak kaipapananna ti panangakseptar ken Jesus kas Mannubbot, Pagulidanan, ken Ari. Ket ti bautismo iti nagan ti nasantuan nga espiritu ramanenna ti panagpannuray iti espiritu ken panagpasakup iti pannakabalinna.b

Ti Nasantuan nga Espiritu iti Biagyo

Nakalkaldaang, ta ti kinasuitik, imoralidad, kinaranggas, ken ti pangkaaduan a kinadakes a makitkitatayo kadagiti “Kristiano” a dagdaga ipamatmatda ti kinapudno a kaaduan kadagidiay agkunkuna a Kristiano ket kinapudnona lablabananda ti nasantuan nga espiritu. Ngem dagidiay agpaspasakup iti dayta nabendisionanda iti dakkel. Iti maysa, patpatienda a sisiserioso ti mabasbasada iti impaltiing ti espiritu a Biblia ket iyap-aplikarda dayta kadagiti biagda. Gapuna, addaandat’ kinasirib, pannakaawat, pangngeddeng, kinatakneng, pannakaammo, ken abilidad nga agpanunot. (Proverbio 1:1-4) Napapateg dagitoy a sanikua iti panawentayo a nariribuk.

Ti nasantuan nga espiritu tulonganna met dagita a tattao a mangparmek kadagiti naririkut a problemada. Idi ugma, impakita ti Dios iti ilina no kasanoda nga aramiden dagiti nakarigrigat nga annongenda. Kuna ni Jehova a daytat’ maaramidan “saan a maipuon iti kinamaingel, wenno iti pannakabalin, no di ket babaen ti espiritu[na].” (Zacarias 4:6) No agpasakuptayo iti Dios ken ti espirituna, matulongannatayo met a mangitungpal kadagiti annongen ken mangparmek kadagiti lapped a mabalin a dakkel unay para kadatayo.​—Mateo 6:33; Filipos 4:13.

Mainayon pay, ti espiritu ti Dios tulongannatayo a mangtagiragsak ti wayawaya a di pagaammo a kaaduan ti lubong. Insurat ni apostol Pablo: “Ket no sadino ti yan ti espiritu ni Jehova, idiay adda wayawaya.” (2 Corinto 3:17) Dagidiay agpasakup iti espiritu ti Dios tagiragsakenda ti wayawaya manipud ulbod a relihion, panaganito, panagbuteng iti masanguanan, ken adu pay a dadduma a makaadipen a bambanag. Ti espiritu ti Dios ket pudpudno a pannakabalin a maipaay iti kinaimbag! Mapagbalbaliwna pay dagiti tattao. Saklawen ti Biblia daytoy idi a kinunana: “Ti bunga ti espiritu isu ti ayat, rag-o, talna, mabayag a panagitured, kinaasi, kinaimbag, pammati, kinaemma, panagteppel. Awan linteg a maibusor kadagitoy a banag.” (Galacia 5:22, 23) Anian a naiduma koma daytoy a lubong no tunggal maysa agpasakup iti impluensia ti espiritu ti Dios!

Kas maysa a grupo, tagtagiragsaken met dagiti pudno a Kristiano “ti panagmaymaysa ti espiritu iti singgalut ti talna.” (Efeso 4:3) Ti panagkaykaysa ken talna natakkonen a bambanag itatta. Ngem adda dagita idiay lugar nga aktibo ti espiritu ti Dios. Pudno unay, kadagiti Saksi ni Jehova ti mamagkaykaysa a singgalut ti nasantuan nga espiritu inyegna dagiti tattao iti amin a rasa, pagsasao, ken nasionalidad iti pudpudno nga “asosasion dagiti kakabsat.”​—1 Pedro 2:17.

Ti Espiritu ti Dios ken Dakayo

Makitkitayo aya ti gunggona ti pannakaadda iti inted-Dios a kinasirib ken ti panangtagiragsak ti pudno a wayawaya? Saan kadi a nakaskasdaaw ti maaddaan nadiosan a tulong iti panangsolbar kadagiti parikut ken ti panangsukay ti ayat, rag-o, talna, mabayag a panagitured, kinaasi, kinaimbag, pammati, kinaemma, ken panagteppel? Ngarud agpasakupkayo iti pannakabalin ti nasantuan nga espiritu ti Dios. Ngem kasano a maaramidan ti maysa a tao daytoy?

Bay-anyo a ti Sao ti Dios, ti Biblia, impluensiaannat’ isip ken pusoyo. Makitimpuyogkayo kadagidiay mangipalpalubos a ti nasantuan nga espiritu impluensiaanna ti panagbiagda. Alaenyo dagiti addang itan a mangammo ken mangaramid ti nadiosan a pagayatan. Kalpasanna, “ti Dios ti inanama punnuennakayo koma iti amin a ragsak ken kappia iti panamati, tapno umadu ti inanamayo gapu iti pannakabalin ti nasantuan nga espiritu.”​—Roma 15:13.

[Dagiti Footnote]