No Ania ti Insuro ni Jesus Maipapan iti Pagarian ti Dios

“Nagbambaniaga iti siniudansiudad ken iti pinuronpurok, nga ikaskasabana . . . ti naimbag a damag ti pagarian ti Dios.”​—LUCAS 8:1.

KAYATTAYO a pagsasaritaan dagiti banag a pakaseknantayo wenno napateg kadatayo. Kas iti kinuna mismo ni Jesus, “ti naruay iti puso sawen ti ngiwat.” (Mateo 12:34) No usigentayo dagiti sinao ni Jesus bayat ti ministeriona, maibagatayo a nakapatpateg kenkuana ti Pagarian ti Dios.

Ania ti Pagarian ti Dios? Ti pagarian ket maysa a gobierno nga iturayan ti maysa nga ari. No kasta, ti Pagarian ti Dios ket maysa a gobierno nga impasdek ti Dios. Adu ti dinakamat ni Jesus maipapan iti Pagarian ti Dios, a pinagbalinna dayta a tema ti mensahena. Nasurok a 110 a daras a nadakamat ti Pagarian kadagiti uppat nga Ebanghelio. Ngem saan laeng a babaen kadagiti sasao a nangisuro ni Jesus. Adu met ti isuro dagiti tignayna maipapan iti Pagarian ti Dios ken no ania ti aramiden dayta.

Siasino ti Ari? Ti Ari ti Pagarian ti Dios ket saan a mapili babaen kadagiti butos dagiti tattao. Imbes ketdi, ti Dios ti mismo a mangpili iti Agturay. Iti pannursurona, impalgak ni Jesus nga isu ti pinili ti Dios nga agbalin nga Ari.

Ammo ni Jesus a naipadto iti Kasuratan ti maysa nga agnanayon a Pagarian nga iturayan ti naikari a Mesias. (2 Samuel 7:12-14; Daniel 7:13, 14; Mateo 26:63, 64) Laglagipem nga imbatad ni Jesus nga isu ti naipadto a Mesias. Binigbigna ngarud nga isu ti Ari a dinutokan ti Dios. (Juan 4:25, 26) Maitutop nga iti nagduduma a gundaway, inusar ni Jesus ti sasao a “ti pagariak.”​—Juan 18:36.

Insuro pay ni Jesus nga addanto kakaduana nga agturay iti Pagarian. (Lucas 22:28-30) Inawaganna ida kas “bassit nga ipastoran” gapu ta limitado ti bilangda. Kinunana maipapan kadakuada: “Inanamongan ni Amayo ti panangited kadakayo iti pagarian.” (Lucas 12:32) Ipakita ti maudi a libro ti Biblia nga agdagupto iti 144,000 ti maaddaan iti pribilehio a makipagturay ken Kristo.​—Apocalipsis 5:9, 10; 14:1.

Sadino ti ayan ti Pagarian? “Ti pagariak saan a paset daytoy a lubong,” kinuna ni Jesus iti Romano nga agturay a ni Poncio Pilato. (Juan 18:36) Ti Pagarian ti Dios iti sidong ni Kristo ket saanto nga agturay babaen kadagiti pannakabagi a tattao. Maulit-ulit a tinukoy ni Jesus ti Pagarian ti Dios kas “ti pagarian ti langlangit.”a (Mateo 4:17; 5:3, 10, 19, 20) Maysa ngarud a nailangitan a gobierno ti Pagarian ti Dios.

Naan-anay a ninamnama ni Jesus ti panagsublina idiay langit kalpasan ti tiempo a busbosenna ditoy daga. Kinunana nga idiay langit, ‘mangisagana iti lugar’ para kadagiti kakaduana nga agturay.​—Juan 14:2, 3.

Ania ti ibanag ti Pagarian? Insuro ni Jesus kadagiti dumdumngeg kenkuana nga ikararagda iti Dios: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mateo 6:9, 10) Maar-aramiden ti pagayatan ti Dios idiay langit. Ti Pagarian ti pamay-an tapno maaramid met ti panggep ti Dios para iti daga. Tapno maibanag dayta, mangaramid ti Pagarian kadagiti dadakkel a panagbalbaliw ditoy daga.

Ania ti aramiden ti Pagarian agpaay iti daga? Insuro ni Jesus a ti Pagarian ti Dios pukawenna ti kinadakes babaen ti panangikkatna kadagidiay sipapakinakem nga agar-aramid iti kinadakes. (Mateo 25:31-34, 46) Kaipapanan dayta nga agpatingga ti amin a kita ti kinarinuker ken kinadakes. Kas insuro ni Jesus, mapnonto ti daga kadagiti tattao a “naalumamay,” nalinteg, naasi, “nasin-aw ti pusoda,” ken mannakikappia.​—Mateo 5:5-9.

Iti kadi planeta a napnuan polusion ti pagbiaganto dagiti kasta a matalek a tattao? Saan a pulos! Inkari ni Jesus a babaen ti Pagarian ti Dios, addanto agkakasayaat a panagbalbaliw ditoy daga. Kinuna ti maysa a lalaki a dandanin mapapatay a kadua ni Jesus: “Jesus, laglagipennak inton makagtengka iti pagariam.” Insungbat ni Jesus: “Pudno ibagak kenka ita nga aldaw, makikaduakanto kaniak idiay Paraiso.” (Lucas 23:42, 43) Wen, ti Pagarian ti Dios pagbalinenna ti daga a maysa a sangalubongan a paraiso a kas iti daydi minuyongan ti Eden.

Ania pay ti aramiden ti Pagarian para iti sangatauan? Saan la a basta inkari ni Jesus no ania ti aramidento ti Pagarian ti Dios. Indemostrana pay no anianto ti aramiden dayta. Adu ti inaramid ni Jesus a namilagruan a panangpaimbag. Indemostrana ngarud iti limitado a pamay-an no anianto ti aramidenna iti dakdakkel a pamay-an bayat ti panangiturayna iti Pagarian. Kunaen ti naipaltiing nga Ebanghelio maipapan ken Jesus: “Linikmutna ti intero a Galilea, a nangisursuro kadagiti sinagogada ken nangikaskasaba iti naimbag a damag ti pagarian ken nangag-agas iti tunggal kita ti sagubanit ken tunggal kita ti an-annayen kadagiti tattao.”​—Mateo 4:23.

Pinaimbag ni Jesus dagiti tattao a nagduduma ti sakitda. “Linuktanna dagiti mata ti maysa a nayanak a bulsek.” (Juan 9:1-7, 32, 33) Maysa a lalaki nga agsakit iti nakaar-ariek a kukutel ti pinaimbag ni Jesus babaen ti siaalumamay a panangsagidna kenkuana. (Marcos 1:40-42) Idi nayasideg kenkuana ti “maysa a lalaki a tuleng ken adda lapped ti panagsaona,” indemostra ni Jesus a kabaelanna a ‘pagbalinen a makangngeg dagiti tuleng ken makasao dagiti umel.’​—Marcos 7:31-37.

Ti Ari a dinutokan ti Dios ket addaan pay iti pannakabalin a mangpagungar kadagiti natay. Adda dagiti gundaway a nangpagungar ni Jesus, ket tallo kadagita ti nadakamat iti Biblia. Pinagungarna ti kakaisuna nga anak ti maysa a balo, ti dose anyos a balasitang, ken ti nasinged a gayyemna a ni Lazaro.​—Lucas 7:11-15; 8:41-55; Juan 11:38-44.

Iti panangdeskribirna iti nakasaysayaat a kasasaad nga agur-uray kadagiti iturayan ti Pagarian ti Dios, impadto ni Jesus babaen ken apostol Juan: “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” (Apocalipsis 1:1; 21:3, 4) Panunotem laengen ti maysa a lubong nga awan ti ladingit, saem, ken ipapatay! Naan-anayto ngarud a matungpal ti kararagtayo a maaramid ti pagayatan ti Dios ditoy daga a kas sadi langit.

Kaano nga umay ti Pagarian ti Dios? Insuro ni Jesus a ti rugi ti panagturayna kas ari ket kagiddan ti naisangsangayan a periodo ti panawen nga inawaganna iti ‘kaaddana.’ Nangipaay ni Jesus iti detalyado a padto a mangipasimudaag no kaano a mangrugi ti kaaddana nga agturay kas ari. Mailasin daytoy a periodo ti panawen babaen kadagiti sangalubongan a riribuk, agraman ti gubgubat, bisin, ginggined, angol, ken ilalanlan ti kinakillo. (Mateo 24:3, 7-12; Lucas 21:10, 11) Dagitoy ken ti dadduma pay nga impadto ni Jesus ket nangnangruna a nakadidillaw sipud idi 1914, ti tawen a nangrugi ti Gubat Sangalubongan I. Gapuna, agturturayen ni Jesus kas Ari. Iti din agbayag, umayton ti Pagarian tapno aramidennan ti pagayatan ti Dios ditoy daga.b

Ania ti kaipapananna kenka ti iyaay ti Pagarian ti Dios? Agpannuray amin dayta iti panangipangagmo iti mensahe ni Jesus.

[Footnotes]