Ipalpalubosmo Kadi nga Agsaludsod Kenka ni Jehova?

NAGLAON ti Biblia iti ginasut a saludsod a sumarut iti puso. Kinapudnona, agus-usar a mismo ni Jehova a Dios kadagiti saludsod tapno isurona dagiti napateg a kinapudno. Kas pagarigan, nagusar ni Jehova iti sumagmamano a saludsod idi pinakdaaranna ni Cain a mangilinteg iti dakes nga aramidna. (Gen. 4:6, 7) Iti dadduma a gundaway, umdasen ti maysa a saludsod ni Jehova a mangtignay iti maysa a tao a mangaramid iti umiso. Idi nangngegna ti saludsod ni Jehova a: “Siasinonto ti ibaonko, ket siasinonto ti mapan a maipaay kadakami?” insungbat ni propeta Isaias: “Adtoyak! Ibaonnak.”​—Isa. 6:8.

Ni Jesus, ti Naindaklan a Mannursuro, ket sieepektibo a nagusar met iti salsaludsod. Naglaon dagiti Ebanghelio iti nasurok a 280 a saludsod ni Jesus. Nupay adda dagiti gundaway a nagusar iti salsaludsod tapno pagulimekenna dagiti kritikona, masansan a ti panggepna ket tapno danonenna ti puso dagiti agdengdengngeg kenkuana. Iti kasta, matignayda a mangsukimat iti espiritualidadda. (Mat. 22:41-46; Juan 14:9, 10) Ni apostol Pablo, a nangisurat iti 14 a libro ti Kristiano a Griego a Kasuratan, nagusar met kadagiti makaguyugoy a saludsod. (Roma 10:13-15) Kas pagarigan, naglaon iti adu a saludsod ti suratna kadagiti taga-Roma. Dagiti saludsod ni Pablo tignayenna dagiti agbasbasa a mangipateg iti ‘kinauneg ti kinabaknang ken sirib ken pannakaammo ti Dios.’​—Roma 11:33.

Nupay agkalikagum iti berbal a sungbat ti dadduma a saludsod, adda dagiti nairanta a mamagpanunot. Ipakita dagiti Ebanghelio a masansan a nagusar ni Jesus kadagiti mamagpanunot laeng a saludsod. Naminsan, pinakdaaran ni Jesus dagiti adalanna: “Siputanyo ti lebadura dagiti Fariseo ken ti lebadura ni Herodes,” a tumukoy iti kinamanaginsisingpetda ken dagiti di umiso a pannursuroda. (Mar. 8:15; Mat. 16:12) Saan a naawatan dayta dagiti adalan ni Jesus isu a nagririkkiaranda ti pannakalipatda a nagbalon iti tinapay. Imutektekam ti panagusar ni Jesus iti salsaludsod bayat ti ababa a panagsasaritada. “Kinunana kadakuada: ‘Apay nga agririkiarkayo maipapan iti kaawan ti tintinapayyo? Dikay pay aya maawatan ken matarusan ti kaipapananna? Ngimmelngel aya dagiti pusoyo iti pannakaawat? “Nupay addaankay kadagiti mata, dikay kadi makakita; ket nupay addaankay kadagiti lapayag, dikay kadi makangngeg?” . . . Dikay pay kadi matarusan ti kaipapananna?’” Dagita a saludsod ni Jesus ket nairanta laeng a mamagpanunot, a mangtignay kadagiti adalanna a mangutob iti pudno a kaipapanan dagiti sasaona.​—Mar. 8:16-21.

“Bay-am a Saludsodanka”

Nagusar ni Jehova a Dios kadagiti saludsod tapno aturenna ti panagpampanunot ti adipenna a ni Job. Babaen iti adu a saludsod, impamatmatna nga awan kaimudingan ni Job no idilig iti Nangaramid kenkuana. (Job, kap. 38-41) Ninamnama kadi ni Jehova a berbal a sungbatan ni Job ti tunggal saludsodna? Saan. Dagiti saludsod a kas iti “Sadino ti ayanmo idi imbangonko ti daga?” ket nalawag a nairanta laeng a mangtignay iti isip ken rikna ni Job. Kalpasan ti sumagmamano kadagita a nabagas a saludsod, dandanin awan maisungbat ni Job. Naikunana laeng: “Anianto ti isungbatko kenka? Ti imak inyapputko iti ngiwatko.” (Job 38:4; 40:4) Naawatan ni Job ti punto isu a nagpakumbaba. Ngem saan laeng a kinapakumbaba ti isursuro ni Jehova ken ni Job. Nailinteg met ti panagpampanunotna. Iti ania a pamay-an?

Nupay ni Job ket “maysa a lalaki nga awan pakababalawanna ken nalinteg,” adda dagiti gundaway nga ipakita dagiti sasaona a di umiso ti panagpampanunotna. Dinakamat dayta ni Eliu idi tinubngarna ni Job gapu iti “panangideklarana a nalinteg ti bukodna a kararua imbes a ti Dios.” (Job 1:8; 32:2; 33:8-12) Gapuna, nailinteg met ti pannakaawat ni Job gapu iti salsaludsod ni Jehova. Iti pannakisaritana ken Job babaen ti allawig, kinuna ti Dios: “Siasino daytoy a mangliblibeg iti pammatigmaan babaen iti sasao nga awanan pannakaammo? Bariksam dagiti lomom, pangngaasim, kas iti maysa a nabaneg a lalaki, ket bay-am a saludsodanka, ket pakaammuannak.” (Job 38:1-3) Babaen kadagiti saludsod, intampok ni Jehova ti awan patinggana a kinasirib ken pannakabalinna kas iparangarang dagiti agkakaimbag nga aramidna. Dayta a pannakalawlawag ti timmulong ken Job nga ad-adda nga agtalek iti pangngeddeng ni Jehova ken iti wagas ti panangaramidna iti bambanag. Anian a nagsayaat a kapadasan dayta ken Job​—ti pribilehio a mapagsaludsodan ti mismo a Mannakabalin-amin a Dios!

No Kasano a Palubosantayo a Pagsaludsodannatayo ni Jehova

Datayo ngay? Magunggonaantayo met kadi kadagiti saludsod a nailanad iti Biblia? Wen! No ipalubostayo dagitoy a saludsod a mamagpanunot kadatayo, mangyegda kadagiti naespirituan a gunggona. Kinapudnona, dagita a mamagtignay a saludsod ti maysa a mamagbalin nga epektibo iti Sao ti Dios. Wen, “ti sao ti Dios . . . adda bilegna . . . ket kabaelanna a lasinen dagiti panunot ken dagiti panagem ti puso.” (Heb. 4:12) Ngem tapno ad-adda a magunggonaantayo iti dayta, masapul nga iturongtayo dagita a saludsod iti mismo a bagitayo. (Roma 15:4) Usigentayo ti sumagmamano a pagarigan.

“Ti aya Ukom ti intero a daga saanna nga aramiden no ania ti umiso?” (Gen. 18:25) Insaludsod daytoy ni Abraham ken ni Jehova idi ukomen ti Dios ti Sodoma ken Gomorra. Para ken Abraham, adayo nga agtignay ni Jehova iti di nainkalintegan a wagas​—a papatayenna agpada dagiti nadangkes ken nalinteg. Ti saludsod ni Abraham iyanninawna ti dakkel a panagtalekna iti kinalinteg ni Jehova.

Nalabit nga adda bukod a kapanunotan ti dadduma ita mainaig iti panangukom ni Jehova iti masanguanan, kas iti no siasino a talaga dagiti makalasat iti Armagedon wenno dagiti mapagungarto. Imbes a pakaburiborantayo dagita, laglagipentayo ti mamagpanunot a saludsod ni Abraham. Yantangay ammotayo a ni Jehova ket naayat a nailangitan nga Ama ken naan-anay nga agtalektayo iti kinahustisia ken kinamanangngaasina kas inaramid idi ni Abraham, maliklikantayo a masayang ti panawen ken pigsatayo iti bambanag a ditay rumbeng a pakadanagan, panagduadua a mangpakapuy iti pammati, ken awan serserbina a panagdedebate.

“Siasino kadakayo nga iti panagbalinna a maringgoran manayonanna iti maysa a kasiko ti kaatiddog ti biagna?” (Mat. 6:27) Idi kasarsarita ni Jesus ti maysa a dakkel a bunggoy agraman dagiti adalanna, insaludsodna daytoy tapno ipaganetgetna ti kinapateg ti panangitalekda iti bagida iti naayat a panangaywan ni Jehova. Bayat ti maudi nga al-aldaw daytoy dakes a sistema ti bambanag, adu ti tumaud a pakaringgorantayo. Ngem saan nga umatiddog wenno sumayaat ti kalidad ti biagtayo no dagita ti kanayon a pampanunotentayo.

Tunggal maringgorantayo maipapan iti bagitayo wenno kadagiti ipatpategtayo iti biag, ti pananglagip iti saludsod ni Jesus tulongannatayo a maaddaan iti umiso a panangmatmat. Tulongannatayo a mangikkat iti panagdanag ken kadagiti negatibo a kapanunotan a mangpaksuy kadatayo iti mental, emosional, ken pisikal. Impasigurado kadatayo ni Jesus a no kasano a ti nailangitan nga Amatayo tartaraonanna dagiti tumatayab ken kawesanna dagiti mula iti tay-ak, naan-anay met nga ammona dagiti kasapulantayo.​—Mat. 6:26-34.

“Mabalin kadi ti maysa a tao ti mangkaraykay a mangurnong iti saklotna iti apuy ket kaskasdi a saan a mapuoran dagiti mismo a kawesna?” (Prov. 6:27) Ti umuna a siam a kapitulo ti Proverbio iramanda dagiti nainsiriban a balakad ti maysa nga ama iti anakna. Ti nadakamat a saludsod ket tumukoy kadagiti nasaem a resulta ti pannakikamalala. (Prov. 6:29) No maamiristayo nga agal-alembong wenno pampanuynoyantayo ti aniaman a di umiso a seksual a tarigagay, daytoy a saludsod ti rumbeng a mangalarma kadatayo kadagiti peggad. Mabalin met nga isaludsod daytoy ti maysa no isu ket maipasango iti sulisog nga agaramid iti di umiso. Anian a naglawag a mangipaganetget iti praktikal a prinsipio ti Biblia: ‘Apitem ti imulam’!​—Gal. 6:7.

“Siasinoka a mangukom iti adipen iti balay ti sabali?” (Roma 14:4) Iti surat ni Pablo kadagiti taga-Roma, dinakamatna dagiti parikut a timmaud iti kongregasion idi umuna a siglo. Yantangay addaanda iti nagduduma a nalikudan, adda dagiti Kristiano nga agannayas a mangbabalaw kadagiti pangngeddeng wenno tignay dagiti kapammatianda. Ti saludsod ni Pablo ipalagipna kadakuada nga awatenda ti tunggal maysa ket bay-anda a ni Jehova ti mangukom iti bambanag.

Uray iti kaaldawantayo, nagduduma met ti nalikudan dagiti adipen ni Jehova. Ngem anian a yamantayo a pinagkaykaysanatayo ni Jehova. Gapuna, tumultulongtayo kadi a mangtaginayon iti dayta a panagkaykaysa? No alistotayo a mangdillaw iti naibatay iti konsiensia a pangngeddeng ti maysa a kabsat, anian a nainsiriban nga iyimtuodtayo iti bagitayo ti nadakamat a saludsod ni Pablo!

Dagiti Saludsod Ad-adda a Pasingedendatayo ken Jehova

Dagita a sumagmamano a saludsod paneknekanda a kabaelandatayo a pagpanunoten dagiti saludsod a linaon ti Sao ti Dios. Ti panangusig iti konteksto ti tunggal saludsod tulongannatayo a mangyaplikar kadagita iti kasasaadtayo. Ken bayat a basbasaentayo ti Biblia, makitatayo dagiti kanayonan a makatulong a saludsod.​—Kitaen ti kahon iti panid 14.

No ipalubostayo a tignayendatayo dagitoy a saludsod a linaon ti Sao ti Dios, maitunostayo ti isip ken pusotayo iti nalinteg a daldalan ni Jehova. Kalpasan a sinaludsodan ni Jehova, kinuna ni Job: “Iti alimadamad nangngegko ti maipapan kenka, ngem ita ti bukodko a mata makitanaka.” (Job 42:5) Wen, ad-adda a nagbalin ni Jehova a pudno a persona ken Job, a kasla makitkitana a mismo. Idi agangay, kinuna ni adalan a Santiago: “Umadanikayo iti Dios, ket isu umadaninto kadakayo.” (Sant. 4:8) Sapay koma ta ipalubostayo ti amin a paset ti Sao ti Dios, agraman dagiti saludsod a linaonna, a tumulong kadatayo a rumang-ay iti naespirituan ken tapno ‘makitatayo’ a nalawlawag ni Jehova!

[Kahon iti panid 14]

Kasano a ti panangisaludsodmo kadagiti sumaganad tulongannaka a mangtulad iti panangmatmat ni Jehova iti bambanag?

▪ “ Ad-adda kadi a pakaragsakan ni Jehova dagiti daton a mapuoran ken sakripisio ngem ti panagtulnog iti timek ni Jehova?”​—1 Sam. 15:22.

▪ “ Daydiay mangar-aramid iti mata, saan aya a makakita?”​—Sal. 94:9.

▪ “ Ti panangbirok dagiti tattao iti bukodda a dayag, dayag kadi dayta?”​—Prov. 25:27.

▪ “ Umiso kadi nga agpupudotka buyogen ti unget?”​—Jon. 4:4.

▪ “ Ania ti magunggonanto ti maysa a tao no magun-odna ti intero a lubong ngem mapukawna ti kararuana?”​—Mat. 16:26.

▪ “ Siasinonto ti mangisina kadatayo manipud iti ayat ti Kristo?”​—Roma 8:35.

▪ “ Ania ti adda kenka a dika inawat?”​—1 Cor. 4:7.

▪ “ Ania ti pakiramanan ti lawag iti sipnget?”​—2 Cor. 6:14.

[Ladawan iti panid 15]

Ania ti nasursuro ni Job kadagiti saludsod ni Jehova?