Umadanika iti Dios

No Gumawgawawa iti Pammakawan ti “Puso a Nadunor ken Naidagel”

2 SAMUEL 12:1-14

AGBASOLTAYO amin iti adu a daras. No maamiristayo ti kadagsen ti basoltayo, mabalin a mapanunottayo: ‘Denggen ngata ti Dios dagiti napasnek a kararagko iti panagbabawik? Pakawanennak ngata?’ Isursuro ti Biblia daytoy a makaliwliwa a kinapudno: Nupay di pulos panuynoyan ni Jehova ti panagbasol, sidadaan a mangpakawan iti nakabasol nga agbabbabawi. Naibatad dayta idi nagbasol ni David nga ari iti nagkauna nga Israel, sigun iti 2 Samuel kapitulo 12.

Panunotem daytoy a pasamak. Nakaaramid ni David kadagiti nadagsen a basol. Nakikamalala ken Bat-seba, ket idi saannan a mailimed dayta, impamuspusanna ti ipapatay ti asawa ni Bat-seba. Inlimlimed ni David dagiti basolna, ken nagpammarang nga inosente iti sumagmamano a bulan. Ngem kumitkita ni Jehova. Ammona dagiti basol ni David. Ngem ammona met a mabalin a pagbabawyan ni David dagiti basolna. (Proverbio 17:3) Ania ti inaramid ni Jehova?

Imbaon ni Jehova ni propeta Natan a mapan ken David. (Bersikulo 1) Babaen ti panangiwanwan ti nasantuan nga espiritu, nataktika nga immasideg ni Natan iti ari ta ammona a masapul nga annadanna dagiti sasaona. Ania ti inaramidna tapno matulonganna ni David a mangamiris nga al-allilawen ti ari ti bagina ken tapno makitana ti kadagsen dagiti basolna?

Tapno saan nga ikalintegan ni David ti bagina, nangisalaysay ni Natan iti pasamak a sigurado a mangtignay iti puso ti dati a pastor. Maipapan daytoy iti dua a lallaki, maysa a nabaknang ken maysa a napanglaw. Daydiay nabaknang, addaan iti “adu unay a karnero ken baka,” idinto ta daydiay napanglaw addaan iti “maymaysa a kabaian a kordero.” Adda sangaili ti nabaknang a lalaki ket tarigagayanna nga isaganaan iti taraon. Imbes a mangala iti maysa kadagiti tarakenna, innalana ti kakaisuna a kordero daydiay napanglaw. Impagarup ni David a pudno ti estoria. Gapuna, sipupungtot a kinunana: “Ti lalaki nga agar-aramid iti kastoy maikari a matay!” Apay? “Agsipud ta saan a naasian,” inlawlawag ni David.a​—Bersikulo 2-6.

Epektibo ti pangngarig ni Natan. Arigna a ni David a mismo ti nangakusar iti bagina. Ita, prangka a kinuna ni Natan: “Sika a mismo ti lalaki!” (Bersikulo 7) Yantangay ni Natan ti pannakangiwat ti Dios, nabatad a ni Jehova ti mangtamtaming kadagiti nagbasolan ni David. Yantangay linabsing ni David dagiti linteg ti Dios, dina ngarud rinaem daydiay mangmangted iti linteg. “Inumsinak,” kuna ti Dios. (Bersikulo 10) Nasalput ti puso ni David iti pannakatubngarna, ket impudnona: “Nagbasolak a maikaniwas ken Jehova.” Kalpasanna, ni Natan impatalgedna ken David a manamnamana ti pammakawan ni Jehova. Ngem kaskasdi a sagabaenna ti bunga dagiti basolna.​—Bersikulo 13, 14.

Kalpasan nga impudno ni David ti basolna, pinutarna ti maaw-awagan ita a Salmo 51. Iti dayta a kanta, impeksa ni David ti adda iti pusona, a mangipakita iti kapasnek ti panagbabawina. Gapu kadagiti basolna, inumsi ni David ni Jehova. Naay-ayo ti agbabbabawi nga ari gapu iti kinamanangpakawan ti Dios, ket nayebkasna ken Jehova: “Ti puso a nadunor ken naidagel, O Dios, saanmonto nga umsien.” (Salmo 51:17) Maysa dayta kadagiti kasasayaatan nga ebkas a mangpatalged iti rikna ti agbabbabawi a nagbasol a gumawgawawa iti asi ni Jehova.

[Footnote]