Masarakam ti Kinatalged iti Ili ti Dios
“Idayawkanto iti dakkel a kongregasion.”—SAL. 35:18.
1-3. (a) Ania ti mabalin a nangiturong iti dadduma a Kristiano iti napeggad a kasasaad iti naespirituan? (b) Pakasarakan ti ili ti Dios iti salaknib?
BAYAT nga aglanglangoy ni Joe ken ti baketna iti kadilian, tagtagiragsakenda ti buya dagiti ikan a nagduduma ti kolor ken kadakkelda. Immadayoda pay tapno makitada ti naun-uneg a paset ti kadilian. Idi nadlaw ti baket ni Joe nga adalemen, kinunana: “Adayotan sa unayen.” “Dika kadi madanagan,” kinuna ni Joe. “Siak ti makaammo.” Di nagbayag, agbalaw ni Joe no apay nga awan metten dagiti ikan. Naammuanna ti rason idi nakitana ti pating nga agturong iti ayanna. Kasta unay ti butengna ta ammona nga awanen ti maaramidanna. Idi asidegen ti pating, bigla a nagbaliw ti direksion daytoy.
2 Mabalin a maatrakar ti maysa a Kristiano kadagiti pangawis ti sistema ti bambanag ni Satanas—dagiti paglinglingayan, panggedan, ken sanikua—a dina madmadlaw nga isu ket arigna nga agturturongen iti napeggad a paset ti baybay. “Ti kapadasak ti namagpanunot kaniak maipapan kadagiti pakikadkaduaak,” kuna ni Joe, maysa a panglakayen. “Aglangoyka laeng koma iti natalged ken makaay-ayo a lugar—iti kongregasion!” Dika aglangoy iti adalem, a posible a mangisina ken mamagpeggad kenka iti naespirituan. No madlawmo a kasta ti kasasaadmo, dagus koma nga agsublika iti ‘natalged a paset ti baybay.’ Ta no saan, madadael ti relasionmo iti Dios.
3 Ti lubong ita ket napeggad a lugar para kadagiti Kristiano. (2 Tim. 3:1-5) Ammo ni Satanas nga ababan ti tiempona, ket puntiriaenna dagiti saan a naridam. (1 Ped. 5:8; Apoc. 12:12, 17) Ngem adda salaknibtayo. Nangipaay ni Jehova iti natalged a naespirituan a pagkamangan—ti kongregasion Kristiano.
4, 5. Ania ti marikna ti adu a tattao maipapan iti masakbayanda, ken apay?
4 Ti lubong ita ket limitado laeng ti maipaayna a pisikal wenno emosional a kinatalged. Adu a tattao ti saan a makarikna iti pisikal a kinatalged gapu iti krimen, kinaranggas, nangina a gagatangen, ken uray kadagiti parikut a mainaig iti aglawlaw. Amintayo ket maipaspasango iti parikut nga itden ti panaglakay ken panagsakit. Uray dagiti nasalun-at ken addaan iti panggedan, pagtaengan, ken kinabaknang, mabalin a pampanunotenda no kasano pay kabayag a matagiragsakda dagita.
5 Adu ti saan a makarikna iti emosional a kinatalged. Nagadu ti mangnamnama a masarakanda ti talna ken pannakapnek no makiasawa ken agpamiliada. Ngem makapaladingit ta napaayda laeng. No maipapan iti naespirituan a kinatalged, adu a relihioso a tattao ti mariro, a pagduaduaanda ti kinapateg ti isursuro ti relihionda nangruna ta kuestionable ti kondukta dagiti liderda ken saan a nainkasuratan dagiti pannursuroda. Gapuna, mapilitan ti adu a mangisadag iti namnamada iti siensia wenno iti kinaimbag ken kinasirib ti padada a tao. Di ngarud pakasdaawan a saan a natalged ti rikna dagiti tattao wenno dida pay maseknan unayen iti masakbayanda.
6, 7. (a) Apay nga agduma ti panangmatmat dagidiay agserserbi ken saan nga agserserbi iti Dios? (b) Ania ti usigentayo?
6 Anian a naiduma ti panangmatmat dagiti kameng ti kongregasion Kristiano no idilig iti daytoy a lubong! Kas ad-adipen ni Jehova, maipaspasangotayo met iti adu nga isyu ken parikut a mapaspasaran dagiti padatayo a tattao. Ngem naiduma ti reaksiontayo. (Basaen ti Isaias 65:13, 14; Malakias 3:18.) Apay? Gapu ta masarakantayo iti Biblia dagiti makapnek a pannakailawlawag no apay a kastoy ti kasasaad ti sangatauan, ken nakabalantayo a mangtaming kadagiti karit ken parikut ti biag. Kas resultana, saantayo unay a maringgoran agpaay iti masanguanan. Kas agdaydayaw ken Jehova, masalsalaknibantayo manipud kadagiti di umiso ken di nainkasuratan a panagrasrason, imoral nga aramid, ken kadagiti dakes nga ibunga dagita. Iti kasta, dagiti kameng ti kongregasion Kristiano makariknada iti kinatalinaay a saan nga ammo dagiti dadduma.—Isa. 48:17, 18; Fil. 4:6, 7.
7 Adda dagiti pagarigan a tumulong kadatayo a mangutob iti kinatalged a tagtagiragsaken laeng dagiti agserserbi ken Jehova. Dagitoy ti mabalin a tumulong kadatayo a mangsukimat iti bukodtayo a panagrasrason ken ar-aramid ken mangusig no mayaplikartayo nga ad-adda pay ti balakad ti Dios a nairanta a mangsalaknib kadatayo.—Isa. 30:21.
“Gistay Simiasi Dagiti Sakak”
8. Ania ti itultuloy nga aramiden dagiti adipen ni Jehova?
8 Sipud idi umuna a panawen, dagidiay pinilida ti agserbi ken agtulnog ken ni Jehova ikagkagumaanda ti di makisinninged kadagidiay saan nga adipen ti Dios. Kinapudnona, impasimudaag ni Jehova nga adda panagginnura iti nagbaetan dagiti agdaydayaw kenkuana ken dagidiay dimmasig ken ni Satanas. (Gen. 3:15) Gapu iti natibker a panangannurotda kadagiti prinsipio nga impaltiing ti Dios, naiduma ti kondukta ti ilina no idilig kadagidiay adda iti aglawlawda. (Juan 17:15, 16; 1 Juan 2:15-17) Saan a kanayon a nalaka ti agbalin a naiduma. Kinapudnona, adda dagidiay adipen ni Jehova nga agduadua no dadduma no nainsiriban met laeng ti panagbiag buyogen ti panagsakripisio.
9. Iladawanyo ti panagduadua a narikna ti nangisurat iti Salmo 73.
9 Ti maysa nga adipen ni Jehova a nagduadua no nainsiriban met laeng ti inaramidna a desision ket ti nangisurat iti Salmo 73, a nalabit kaputotan ni Asaf. Insaludsod ti salmista no apay a masansan a kasla naballigi, naragsak, ken narang-ay dagiti nadangkes idinto ta dadduma a mangikagkagumaan nga agserbi iti Dios agsagsagabada kadagiti suot ken pakarigatan.—Basaen ti Salmo 73:1-13.
10. Apay a pakaseknantayo dagiti isyu a pinataud ti salmista?
10 Nayimtuodmo met kadin ti kas iti insaludsod ti salmista? No wen, dika koma maldaangan unay wenno dimo panunoten a kumapkapuyen ti pammatim. Kinapudnona, narikna met dayta ti sumagmamano nga adipen ni Jehova, a pakairamanan ti dadduma nga inusarna a nangisurat iti Biblia. (Job 21:7-13; Sal. 37:1; Jer. 12:1; Hab. 1:1-4, 13) Amin nga agtarigagay nga agserbi ken Jehova masapul nga utobenda a naimbag ken akseptarenda ti sungbat daytoy a saludsod: Ti kadi panagserbi ken panagtulnog iti Dios ti kasayaatan nga aramidentayo? Mainaig dayta iti isyu a pinataud ni Satanas iti hardin ti Eden. Naisentro dayta iti kalintegan ti Dios a mangituray iti intero nga uniberso. (Gen. 3:4, 5) Gapuna, nasayaat nga usigentayo amin ti pakaseknan ti salmista. Rumbeng kadi nga apalantayo dagiti nadangkes a mangipampannakkel iti kasla awan parikutna a biagda? ‘Sumiasitayo’ kadi nga agserbi ken Jehova ket tuladentayo ida? Siempre, dayta a mismo ti kayat ni Satanas nga aramidentayo.
11, 12. (a) Kasano a naparmek ti salmista ti panagduaduana, ken ania ti maadaltayo iti dayta? (b) Ania ti timmulong kenka a maaddaan iti isu met laeng a panangmatmat a kas iti salmista?
11 Ania ti nakatulong iti salmista a nangparmek iti panagduaduana? Nupay bigbigenna a gistay simiasi iti kinalinteg, nagbaliw ti panangmatmatna idi simrek iti “naindaklan a santuario ti Dios”—kayatna a sawen, idi nakilangen kadagiti naespirituan a tattao iti tabernakulo wenno templo ti Dios ken inutobna ti panggep ti Dios. Kalpasanna, nagbalin a nalawag iti salmista a dina kayat a tuladen dagiti nadangkes. Nakitana nga addada iti “nagalis a pagsaadan” maigapu kadagiti desision ken wagas ti panagbiagda. Nabigbig ti salmista nga amin a nangilaksid ken Jehova saanda a maliklikan ti pannakadadaelda buyogen ti “kellaat a panagaligaget,” idinto ta tulongan ni Jehova dagidiay agserserbi kenkuana. (Basaen ti Salmo 73:16-19, 27, 28.) Awan duadua a napaneknekam a pudno dagita a sasao. Kaykayat ti adu a panuynoyan ti bagida ken saanda nga ikabilangan ti linteg ti Dios, ngem saanda a maliklikan dagiti dakes nga ibunga dagita.—Gal. 6:7-9.
12 Ania pay ti maadaltayo iti kapadasan ti salmista? Nakasarak iti kinatalged ken kinasirib iti ili ti Dios. Nagbalin a nalawag ken lohikal ti panangmatmatna idi napan iti pagdayawan ken Jehova. Uray ita, makasaraktayo kadagiti masirib a mammalakad ken matagiragsaktayo ti makapakired a naespirituan a taraon kadagiti gimong ti kongregasion. Adda ngarud naimbag a rason nga imbilin ni Jehova kadagiti adipenna a tumabunoda kadagiti Nakristianuan a gimong. Maparegtada sadiay ken magutugotda nga agtignay a nainsiriban.—Isa. 32:1, 2; Heb. 10:24, 25.
Nainsiriban a Piliem ti Pakikaduaam
13-15. (a) Ania ti napasaran ni Dina, ken ania ti maadaltayo iti dayta? (b) Apay a maysa proteksion ti pannakikadua kadagiti pada a Kristiano?
13 Ni Dina nga anak ni Jacob ti maysa a pagarigan a nairubo gapu iti pannakikaduana kadagiti saan nga adipen ti Dios. Sigun iti salaysay ti Genesis, kaykayatna ti makikadua kadagiti agtutubo a Canaanita iti lugarda. Saan a salsalimetmetan dagiti Canaanita ti nangato a pagalagadan dagiti agdaydayaw ken Jehova. Imbes ketdi, dagiti nakabakab dagiti arkeologo ipamatmatda a napno ti Canaan iti idolatria, imoralidad, nalulok a seksual a panagdayaw, ken kinaranggas gapu iti wagas ti panagbiag dagiti umilina. (Ex. 23:23; Lev. 18:2-25; Deut. 18:9-12) Lagipem ti imbunga ti pannakikadkadua ni Dina kadagita a tattao.
14 Ni Siquem, a taga-Canaan ken natukoy kas “ti kadadayawan iti intero a balay ni amana,” nakitana ni Dina “ket kalpasanna innalana ket nakikaidda kenkuana ket pinilitna.” (Gen. 34:1, 2, 19) Anian a nakalkaldaang dayta! Ninamnama kadi ni Dina a mapasamak dayta kenkuana? Nalabit a kayatna laeng ti makigayyem kadagiti agtutubo iti lugarda, nga ipagarupna a nasisingpet. Ngem naallilaw ni Dina.
15 Ania ti maadaltayo iti dayta a salaysay? Ditay koma panunoten nga awan ti dakes nga ibunga ti pannakikadua kadagiti saan a manamati. Kuna ti Kasuratan a “dagiti dakes a pannakitimpuyog dadaelenda dagiti makagunggona nga ugali.” (1 Cor. 15:33) Iti kasumbangirna, maysa a proteksion ti pannakikadua kadagiti kapammatiam a padam a mangan-annurot iti nangato a moral a pagalagadan ken mangay-ayat ken Jehova. Dagiti kasta a kakadua paregtaendaka nga agtignay a nainsiriban.—Prov. 13:20.
“Naugasankayon”
16. Ania ti kinuna ni apostol Pablo maipapan iti dadduma a Kristiano idiay Corinto?
16 Adu ti natulongan ti kongregasion Kristiano a mangiwaksi kadagiti dakes nga aramidda. Iti umuna a surat ni apostol Pablo iti kongregasion ti Corinto, kinomentuanna dagiti panagbalbaliw nga inaramid dagiti Kristiano sadiay tapno maitunosda ti biagda kadagiti pagalagadan ti Dios. Adda dagiti sigud a mannakiabig, managrukbab iti idolo, mannakikamalala, homoseksual, mannanakaw, managbarbartek, ken dadduma pay. “Ngem naugasankayon,” kinuna kadakuada ni Pablo.—Basaen ti 1 Corinto 6:9-11.
17. Kasano a ti panagbiag a maitunos kadagiti pagalagadan ti Biblia binalbaliwanna ti biag ti adu?
17 Awan ti mapagpannurayan a prinsipio a mangigiya kadagiti saan nga agserserbi iti Dios. Aramidenda ti kaykayatda, wenno tuladenda ti imoral a panagbiag dagiti adda iti aglawlawda, kas iti inaramid ti dadduma a nagkauna a taga-Corinto sakbay a nagbalinda a manamati. (Efe. 4:14) Ngem ti umiso a pannakaammo iti Sao ti Dios ken kadagiti panggepna ket nabileg a puersa a mangpasayaat iti panagbiag ti amin a mangyaplikar iti Kasuratan. (Col. 3:5-10; Heb. 4:12) Adu ita a kameng ti kongregasion Kristiano ti makaibaga a sakbay a naammuan ken inyaplikarda dagiti nalinteg a pagalagadan ni Jehova, nalulok idi ti panagbiagda isu nga awan pannakapnekda ken saanda a naragsak. Naaddaanda laeng iti talna idi rinugianda ti makitimpuyog iti ili ti Dios ken nagbiagda a maitunos kadagiti prinsipio ti Biblia.
18. Ania ti kapadasan ti maysa nga agtutubo, ken ania ti paneknekan dayta?
18 Iti sabali a bangir, dagidiay pinilida ti pumanaw iti ‘natalged a paset ti baybay’—ti kongregasion Kristiano—pagbabawyanda unay ti inaramidda. Maysa a kabsat nga awagantayo iti Tanya, kunana a nasapa a naammuanna ti kinapudno. Ngem idi agtawen iti 16, immadayo iti kongregasion gapu ta nagargari kadagiti nailubongan nga aramid. Kas resultana, nasikogan ken nagparegreg. Kunana ita: “Ti tallo a tawen nga iyaadayok iti kongregasion ti nangibati kaniak iti napalalo a saem a narigat a maikkat. Agingga ita, makonkonsiensiaak gapu iti panagparegregko. . . . Iti amin nga agtutubo a mayat a mangpadas iti lubong uray apagbiit laeng, kayatko nga ibaga kadakuada: ‘Diyo pulos padasen dayta!’ Kasla makaay-ayo no damo, ngem mangyegto iti nakaro a saem. Bin-ig a sakit ti nakem ti ipaay ti lubong. Ammok ta napadasak a mismo dayta. Agtalinaedkayo iti organisasion ni Jehova! Dayta laeng ti wagas ti panagbiag a mangyeg iti kinaragsak.”
19, 20. Ania a pannalaknib ti ituktukon ti kongregasion Kristiano, ken kasano?
19 Panunotem laengen ti pagbanagam no panawam ti pannalaknib ti kongregasion Kristiano. Saan pay a kayat a panunoten ti adu ti awan direksionna a panagbiagda sakbay nga inawatda ti kinapudno. (Juan 6:68, 69) Agtultuloy a matagiragsakmo ti kinatalged ken pannalaknib manipud kadagiti saem ken rigat a gagangay iti lubong ni Satanas babaen ti panagtalinaedmo a nasinged kadagiti Kristiano a kakabsat. Ti pannakitimpuyogmo kadakuada ken ti regular a pannakigimong ti agtultuloy a mangipalagip kenka a nainsiriban dagiti nalinteg a pagalagadan ni Jehova ken mangparegta kenka a mangsalimetmet kadagita. Adu ti nasayaat a rason nga ‘idaydayawmo ni Jehova iti dakkel a kongregasion,’ kas iti inaramid ti salmista.—Sal. 35:18.
20 Siempre, adda dagiti gundaway nga amin a Kristiano marigatanda a mangtaginayon iti kinatarnawda gapu iti nagduduma a rason. Nalabit a kasapulanda laeng ti umiso a panangiwanwan. Ania ti maaramidam—ken kinapudnona ti intero a kongregasion—tapno matulongan dagiti kapammatian kadagita a gundaway? Usigen ti sumaganad nga artikulo no kasano a ‘maitultuloymo a liwliwaen ken pabilgen’ dagiti kakabsatmo.—1 Tes. 5:11.
Ania ti Sungbatyo?
• Ania ti maadaltayo iti kapadasan ti nangisurat iti Salmo 73?
• Ania ti maadaltayo iti kapadasan ni Dina?
• Apay a makasarakkayo iti kinatalged iti kongregasion Kristiano?
[Dagiti Ladawan iti panid 7]
Aglangoyka laeng koma iti natalged a lugar; agtalinaedka iti kongregasion!