No Apay a Saan a Nagdardaras ni Jesus

NAAMMUAN ni Jesus a nakaro a masakit ti nasinged a gayyemna a ni Lazaro. Impadamag dayta ti mensahero nga imbaon da Maria ken Marta a kakabsat ni Lazaro. Naggapu idiay Betania ti mensahero. Agnanaed sadiay da Lazaro ken ti kakabsatna. Uray no adayo ti ayanda ta agnanaedda iti bangir ti Karayan Jordan, mamati da Maria ken Marta a kabaelan a paimbagen ni Jesus ti kabsatda. Ammoda nga adda idi dagiti pinaimbag ni Jesus uray no addada iti adayo.​—Mateo 8:5-13; Juan 11:1-3.

Idi dimteng ken Jesus ti mensahero a nangipadamag nga agsakit ni Lazaro, saan a nagtignay a dagus ni Jesus. Kuna ti Biblia: “Nagtalinaed pay iti dua nga aldaw iti lugar nga ayanna idi.” (Juan 11:6) Ammom kadi no apay a saan a nagdardaras ni Jesus a timmulong ken Lazaro?​—a Pagsaritaanta dayta.

Ammo ni Jesus a natayen ni Lazaro gapu iti sakitna. Gapuna, imbagana kadagiti apostolna: “Mapantayo manen idiay Judea.” Nagkedked dagiti apostol a kunkunada: “Itay laeng nabiit inkagkagumaandaka nga uboren dagiti taga Judea, ket mapanka aya manen sadiay?” Inlawlawag ni Jesus: “Ni Lazaro a gayyemtayo napan naginana, ngem agbaniagaak sadiay tapno riingek manipud pannaturogna.”

Insungbat dagiti apostol: “Apo, no isu napan naginana, umimbagto.” Idin inlawlawag ni Jesus: “Ni Lazaro natayen.” Kalpasanna, inyebkasna ti sasao a mabalin a namagsiddaaw kadakuada: “Agrag-oak gapu kadakayo ta awanak sadiay . . . Ngem mapantayo kenkuana.”

Situtured a kinuna ni Tomas: ‘Mapantayo met, tapno mataytayo a maikanunong ken Jesus.’ Ammo ni Tomas nga ikagumaan manen dagiti kabusor a papatayen ni Jesus, ket posible a mapapatay met dagiti apostol. Ngem napanda latta. Kalpasan ti agarup dua nga aldaw, dimtengda idiay Betania, ti ili ni Lazaro. Agarup tallo a kilometro ti kaadayona manipud Jerusalem.​—Juan 11:7-18.

Ammom kadi no apay a saan a simmangpet ni Jesus a nasaksakbay?​— Bueno, addan dagidiay pinagungar idi ni Jesus, ngem sumagmamano pay la nga oras a natayda idi pinagungarna ida. (Lucas 7:11-17, 22; 8:49-56) Ngem ti bangkay ni Lazaro ket sumagmamano nga aldawen nga adda iti tanem. Awan ti mabalin a mangkuestion no talaga a natayen!

Idi nadamag ni Marta nga asidegen ni Jesus idiay Betania, nagtaray a napan simmabet kenkuana. “Apo, no addaka koma idi ditoy saan koma a natay ti kabsatko,” kinunana. “Bumangonto ni kabsatmo,” impatalged ni Jesus. Timmaray a nagsubli ni Marta ket inyarasaasna ken Maria a kabsatna: “Adda ti Mannursuro ket ay-ayabannaka.”

Dagus a napan ni Maria iti ayan ni Jesus. Impagarup ti bunggoy a mapan idiay tanem, isu a simmurotda kenkuana. Idi nakita ni Jesus ni Maria ken ti bunggoy nga agsangsangit, ‘nagarubos met dagiti luana.’ Idi agangay, nakagtengdan amin iti tanem a naserraan iti dakkel a bato. Kinuna ni Jesus: “Ikkatenyo ti bato.” Ngem nagkedked ni Marta a kunkunana: “Apo, itan nabuyoken, ta uppat nga aldawen.”

Tinungpal dagiti tattao ti imbaga ni Jesus ket inikkatda ti bato. Kalpasanna, nagkararag ni Jesus, nagyaman iti Dios ta ammona nga ipaay ti Dios kenkuana ti pannakabalin tapno mapagungarna ni Lazaro. Nagpukkaw ni Jesus “iti natbag a timek: ‘Lazaro, rummuarka!’ “ Ket rimmuar ni Lazaro a “sipapatapat kadagiti bedbed.” Kalpasanna, kinuna ni Jesus: “Warwaranyo ket bay-anyo a mapan.”​—Juan 11:19-44.

Maawatam kadi itan no apay a saan a nagdardaras ni Jesus?​— Ammona a babaen ti panagurayna, ad-adda a makaipaay iti pammaneknek maipapan ken Jehova nga Amana. Kasta met, gapu ta pinilina ti kasayaatan a gundaway, adu ti nagbalin a manamati. (Juan 11:45) Makitam kadi no ania ti masursurotayo iti ulidan ni Jesus?​—

Mabalinmo met ti mangpili iti nasayaat a gundaway a mangipaay iti pammaneknek kadagiti agkakaim-imbag a naaramidan ken aramidento pay ti Dios. Nalabit a mabalinmo ti makisao kadagiti padam nga estudiante wenno kadagiti mannursurom maipapan kadagita. Uray bayat ti klase, ginundawayan ti dadduma nga agtutubo nga ipakaammo ti maipapan kadagiti naindaklan a bendision nga itden ti Pagarian ti Dios iti sangatauan. Siempre, dimo kabaelan ti mangpagungar, ngem matulongam ti sabsabali a mangam-ammo iti Dios a makabael ken agtarigagay a mangpagungar kadagiti ipatpategtayo iti biag.