Ti Masursurotayo ken Jesus

No Kasano a Sapulen ti Kinaragsak

Ania ti tulbek ti kinaragsak?

▪ Kinaragsak ti umuna a dinakamat ni Jesus iti kalatakan a sermonna. Kinunana: “Naragsak dagidiay sipapanunot iti naespirituan a kasapulanda.” (Mateo 5:3) Ania ti kayatna a sawen? Ania ti naespirituan a kasapulantayo?

Tapno agtultuloy nga agbiagtayo, masapul nga aganges, uminum, ken mangantayo a kas kadagiti animal. Ngem tapno agbalintayo a naragsak, adda kasapulantayo a saan a kasapulan dagiti animal​—kasapulan a maawatantayo ti panggep ti biag. Ti laeng Namarsua iti biag ti makabael a mangpennek iti dayta. Gapuna, kinuna ni Jesus: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.” (Mateo 4:4) Naragsak dagidiay sipapanunot iti naespirituan a kasapulanda gapu ta agbalinda a nasinged ken Jehova, “ti naragsak a Dios,” ken ipaayanna ida iti namnama, a nasken tapno agbalinda a naragsak.​—1 Timoteo 1:11.

Kasano a nangipaay ni Jesus iti namnama?

▪ “Naragsak dagiti naalumamay ti kababalinda, yantangay tawidendanto ti daga,” kinuna ni Jesus. (Mateo 5:5) Nangipaay ni Jesus iti namnama para iti sangatauan babaen ti panangpaimbagna kadagiti masakit ken panangpagungarna kadagiti natay. Nangiranud pay iti mangted namnama a mensahe. Inlawlawagna: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Dagidiay tattao nga agtulnog iti Dios tagiragsakendanto ti agnanayon a biag ditoy daga. Ar-arapaapem kadi ti agbiag a kadua dagiti naalumamay a tattao, ken saankanton a pulos a bumaket wenno lumakay? Di ngarud pagsiddaawan a kunaen ti Sao ti Dios: “Agrag-okayo iti namnama.” (Roma 12:12) Inlawlawag met ni Jesus no kasano a sapulen ita ti kinaragsak.

Ania a naragsak a wagas ti panagbiag ti insuro ni Jesus?

▪ Nangipaay ni Jesus iti praktikal a balakad mainaig iti pannakilangen iti sabsabali, panagasawa, kinapakumbaba, ken umiso a panangmatmat kadagiti material a bambanag. (Mateo 5:21-32; 6:1-5, 19-34) Masarakantayo ti kinaragsak no surotentayo ti balakad ni Jesus.

Mangyeg ragsak ti kinamanagparabur. (Aramid 20:35) Kas pagarigan, kinuna ni Jesus: “No mangisaganaka iti padaya, awisem dagiti napanglaw a tattao, lugpi, pilay, bulsek; ket naragsakkanto, agsipud ta awan maisupapakda kenka.” (Lucas 14:13, 14) Naragsak dagidiay saan nga agimbubukodan a tumultulong iti sabsabali nga agbalin met a naragsak.

Ania ti kangrunaan a gubuayan ti kinaragsak?

▪ Naragsakka no aramidem ti bambanag para iti sabsabali, ngem naragragsakka pay no aramidem ti bambanag para iti Dios. Dayta a kinaragsak ket dakdakkel nga amang ngem iti marikna dagiti maragragsakan a nagannak a mangipatpateg kadagiti annakda. Nabatad dayta iti napasamak iti maysa a gundaway bayat a mangisursuro ni Jesus iti publiko. “Maysa a babai manipud iti bunggoy impigsana ti timekna ket kinunana kenkuana: ‘Naragsak ti aanakan a nangawit kenka ken dagiti suso a sinusuam!’ Ngem kinunana: ‘Saan, imbes ketdi, Naragsak dagidiay dumdumngeg iti sao ti Dios ken mangsalsalimetmet iti dayta!’”​—Lucas 11:27, 28.

Ni Jesus a mismo ket naaddaan iti pannakapnek ken kinaragsak iti panangaramid iti pagayatan ti nailangitan nga Amana. Pagayatan ti Dios a mangngegan dagiti tattao ti maipapan iti namnama nga agnanayon a biag. Naminsan, kalpasan nga inlawlawagna dayta a namnama iti maysa a tao nga interesado iti mensahena, kinuna ni Jesus: “Ti taraonko isu ti panangaramidko iti pagayatan daydiay nangibaon kaniak.” (Juan 4:13, 14, 34) Maragsakanka met a mangaramid iti banag a makaay-ayo iti Dios babaen ti panangiranudmo iti kinapudno a linaon ti Biblia.

Para iti kanayonan nga impormasion, kitaem ti kapitulo 1 daytoy a libro, Ania a Talaga ti Isursuro ti Biblia? nga impablaak dagiti Saksi ni Jehova.

[Ladawan iti panid 16]

Maaddaantayo iti pudno a kinaragsak no pennekentayo ti kasapulantayo a pannakaawat iti panggep ti biag