Sipapasnek a Gun-oden ti Bendision ni Jehova
“[Ti Dios] agbalin a mananggunggona kadagidiay sipapasnek a mangsapsapul kenkuana.”—HEB. 11:6.
1, 2. (a) Kasano ti panangikagumaan ti adu a manggun-od kadagiti bendision ti Dios? (b) Apay a tarigagayantayo a gun-oden ti bendision ni Jehova?
“GOD bless our home!” Kasta ti karatula a makita a nakasab-it iti dadduma a pagtaengan. Dagiti klero ti nagduduma a relihion bendisionanda dagiti tattao, animal, ken aniaman a banag. Maatrakar dagiti turista a mapan kadagiti narelihiosuan a lugar gapu ta mangnamnamada a makagun-odda iti bendision. Dagiti politiko kanayon nga ipakaasida a bendisionan koma ti Dios ti pagilianda. Maitutop ngata dagita a panagkiddaw iti bendision? Epektiboda ngata? Siasino dagiti pudno nga umawat iti bendision ti Dios, ken apay?
2 Impakpakauna ni Jehova nga iti maudi nga al-aldaw, isu ket maaddaanto iti nadalus ken natalna nga ili manipud iti amin a nasion a mangikasaba iti naimbag a damag ti Pagarian agingga iti ungto ti daga iti laksid ti pananggura ken ibubusor. (Isa. 2:2-4; Mat. 24:14; Apoc. 7:9, 14) Datayo nga immawat iti responsabilidad nga agbalin a kameng ti ilina tarigagayantayo—ken kasapulantayo—ti bendision ti Dios. No awan dayta, ditay pulos agballigi. (Sal. 127:1) Ngem kasano a magun-odantayo ti bendision ti Dios?
Umapay Dagiti Bendision Kadagiti Natulnog
3. No nagtulnog koma idi dagiti Israelita, ania ti natagiragsakda?
3 Basaen ti Proverbio 10:6, 7. Sakbay unay a simrek ti nasion ti Israel iti Naikari a Daga, impamatmat ni Jehova a matagiragsakda ti naisangsangayan a kinarang-ay ken pannalaknib no agtulnogda iti timekna. (Deut. 28:1, 2) Sigurado nga ‘umapay’ dagiti bendision ni Jehova kadagiti natulnog a tattao.
4. Ania ti ramanen ti naimpusuan a panagtulnog?
4 Ti panagtulnog dagiti Israelita ket nabuyogan koma iti ania a kababalin? Sigun iti Linteg, di maay-ayo ti Dios no ti panagserbi kenkuana ti ilina ket saan a ‘nabuyogan iti panagragsak ken rag-o ti puso.’ (Basaen ti Deuteronomio 28:45-47.) Saan koma a tungpal-bilin laeng ti panagtulnog kadagiti kalikagum ni Jehova, yantangay ar-aramiden met dayta dagiti animal wenno demonio. (Mar. 1:27; Sant. 3:3) Ti naimpusuan a panagtulnog iti Dios ket ebkas ti ayat. Makita dayta no ti maysa ket naragsak gapu iti pammatina a saan a makapadagsen dagiti bilin ni Jehova ken Isu ti “mananggunggona kadagidiay sipapasnek a mangsapsapul kenkuana.”—Heb. 11:6; 1 Juan 5:3.
5. Kasano a ti panagtalek iti kari ni Jehova tulonganna ti maysa nga agtulnog iti bilin ti Deuteronomio 15:7, 8?
5 Usigentayo no kasano a ti panagtulnog a nabuyogan iti panagtalek ket maiparangarang babaen ti panangtungpal iti bilin iti Deuteronomio 15:7, 8. (Basaen.) Ti mapilpilit a panagtulnog iti dayta a bilin ket mabalin a mangyeg iti temporario a bang-ar iti napanglaw. Ngem mangyeg kadi dayta iti nasayaat a relasion ken kinasinged iti nagbabaetan dagiti adipen ti Dios? Napatpateg pay, ipakpakitatayo kadi nga agtalektayo a kabaelan ni Jehova nga ipaayan dagiti adipenna ken agyamantayo iti gundaway a matulad ti kinaparaburna no mapilpilittayo laeng? Saan! Mabasa ti Dios ti kasasaad ti puso dagidiay pudno a naparabur ket inkarina a bendisionanna ti tunggal aramid ken gapuananda. (Deut. 15:10) Ti panagtalek iti dayta a kari tignayenna ti maysa nga agbalin a naparabur ken agresulta iti aglaplapusanan a bendision.—Prov. 28:20.
6. Ania ti ipanamnama kadatayo ti Hebreo 11:6?
6 Malaksid iti panagtalek ken Jehova kas Mananggunggona, itampok ti Hebreo 11:6 ti sabali pay a galad a kasapulan tapno magun-od ti bendision ti Dios. Imutektekanyo ta gunggonaan ni Jehova dagiti “sipapasnek a mangsapsapul kenkuana.” Iti orihinal a lenguahe, ti sao a nausar ditoy ipamatmatna ti napinget ken naipamaysa a panagregget. Anian a pammatalged dayta a no agreggettayo, umawattayo kadagiti bendision! Aggubuay dagita iti maymaysa a pudno a Dios, daydiay “saanna a mabalin ti agulbod.” (Tito 1:2) Iti adun a milenio, pinaneknekanna a naan-anay a mapagtalkan dagiti karina. Di pulos mapaay dagiti saona; kanayon a matungpalda. (Isa. 55:11) Gapuna, naan-anay a makapagtalektayo a no iparangarangtayo ti pudno a pammati, isu ket agbalin a Mananggunggona kadatayo.
7. Kasano a makagun-odtayo iti bendision babaen ti ‘bin-i’ ni Abraham?
7 Awan duadua a ni Jesu-Kristo ti kangrunaan a paset ti ‘bin-i’ ni Abraham. Dagiti napulotan a Kristiano ti mangbukel iti segundario a paset ti naipadto a ‘bin-i.’ Naibilin kadakuada nga ‘ideklarada a sisasaknap dagiti kinatan-ok daydiay nangayab kadakuada manipud iti kinasipnget nga agturong iti nakaskasdaaw a lawagna.’ (Gal. 3:7-9, 14, 16, 26-29; 1 Ped. 2:9) Ditay manamnama a matagiragsaktay ti nasayaat a relasion ken Jehova no saantay nga agtulnog kadagidiay dinutokan ni Jesus a mangaywan kadagiti sanikuana. No awan ti tulong “ti matalek ken masirib nga adipen,” ditay matarusan ti naan-anay a kaipapanan ti linaon ti Sao ti Dios ken no kasano nga iyaplikar dayta. (Mat. 24:45-47) No iyaplikartayo dagiti maad-adaltayo iti Kasuratan, magun-odtayo ti bendision ti Dios.
Sipapanunot iti Pagayatan ti Dios
8, 9. Kasano nga impakita ni patriarka a Jacob ti panagreggetna maitunos kadagiti kiddawna?
8 Ti panagregget a gumun-od iti bendision ti Dios ipalagipna kadatayo ni patriarka a Jacob. Dina ammo no kasano a matungpal ti kari ti Dios ken Abraham, ngem agtalek a paaduen ni Jehova ti kaputotan ni apongna ken agbalin dayta a dakkel a nasion. Gapuna, idi 1781 K.K.P., napan ni Jacob idiay Haran tapno mangbirok iti asawana. Saan laeng a makaay-ayo a katakunaynay ti birbirokenna no di ket maysa a naespirituan ti panagpampanunotna nga agdaydayaw ken ni Jehova ken agbalinto a nasayaat nga ina kadagiti annakda.
9 Ammotayo a ti kabagianna a ni Raquel ti naam-ammo ken inayatna idi agangay. Tapno maasawana ni Raquel, immanamong nga agtrabaho ken Laban nga amana iti pito a tawen. Saan laeng a basta pakasaritaan dayta ti maysa a nakallalagip a panaginnayat. Sigurado nga ammo ni Jacob ti inkari ti Mannakabalin-amin a Dios iti apongna a ni Abraham ken iti amana a ni Isaac. (Gen. 18:18; 22:17, 18; 26:3-5, 24, 25) Kalpasanna, kinuna ni Isaac iti anakna a ni Jacob: “Ti Dios a Mannakabalin-amin bendisionannakanto ket pagbalinennaka a nabunga ket paaduennaka, ket sigurado nga agbalinkanto a kongregasion dagiti ili. Ket itdennanto kenka ti bendision ni Abraham, kenka ken iti bin-im a mairaman kenka, tapno matagikuam ti daga a pagnanaedam kas ganggannaet, nga inted ti Dios ken Abraham.” (Gen. 28:3, 4) Gapuna, ti panangikagumaan ni Jacob nga agbirok iti maitutop nga asawa ken mangbuangay iti pamilia ket pammaneknek nga agtalek iti kari ni Jehova.
10. Apay a naay-ayo ni Jehova a mangbendision ken Jacob?
10 Saan a ti kinabaknang ti binirok ni Jacob agpaay iti pamiliana. Naipamaysa ti panunotna iti tawidna. Sipapanunot iti pannakatungpal ti pagayatan ni Jehova. Determinado ni Jacob a mangaramid iti amin a kabaelanna a manggun-od iti bendision ti Dios iti laksid dagiti lapped. Kasta ti kababalinna agingga iti kinalakayna, ket binendisionan ni Jehova gapu iti dayta.—Basaen ti Genesis 32:24-29.
11. Ania ti rumbeng a pagreggetantayo nga aramiden maitunos iti naipalgak a panggep ti Dios?
11 Kas ken Jacob, ditay ammo ti amin a detalye no kasano a matungpal ti panggep ni Jehova. Ngem babaen ti panagadal iti Sao ti Dios, adu ti ammotayo mainaig iti “aldaw ni Jehova.” (2 Ped. 3:10, 17) Kas pagarigan, ditay ammo ti eksakto nga idadateng dayta nga aldaw, ngem ammotayo nga asidegen. Mamatitayo iti kunaen ti Sao ti Dios a babaen ti naan-anay a panangasaba bayat ti nabatbati nga ababa a tiempo, maisalakantayo ti bagitayo ken dagidiay dumngeg kadatayo.—1 Tim. 4:16.
12. Ania ti masiguradotayo?
12 Ammotayo a dumteng ti panungpalan iti aniaman a tiempo; saan a masapul nga urayen ni Jehova a makasabaan ti tunggal indibidual ditoy daga sakbay nga agtignay. (Mat. 10:23) Kaskasdi nga ipapaayantayo iti nasayaat a panangiwanwan no kasano a sieepektibo a maitungpaltayo ti trabaho a panangasaba. Buyogen ti pammati, aramidentayo ti amin a kabaelantayo a makiraman iti daytoy a trabaho, nga usarentayo ti aniaman nga ik-ikutantayo. Manamnamatayo kadi nga adu ti mangipangag iti mensahe nga ikaskasabatayo? Ditay maibaga dayta a nasaksakbay. (Basaen ti Eclesiastes 11:5, 6.) Ti trabahotayo ket mangasaba, nga agtalektayo a bendisionannatayo ni Jehova. (1 Cor. 3:6, 7) Masiguradotayo a makitkitana ti panagreggettayo, ken babaen ti nasantuan nga espirituna, ipaayna ti aniaman nga espesipiko a panangiwanwan a kasapulantayo.—Sal. 32:8.
Pananggun-od iti Nasantuan nga Espiritu
13, 14. Kasano a napaneknekan a kabaelan ti nasantuan nga espiritu ti Dios a tulongan dagiti adipenna?
13 Kasano no mariknatay a saantayo a kualipikado a mangitungpal iti maysa nga annongen wenno makiraman iti panangasaba? Masapul a kiddawentayo ken Jehova nga ipaayna ti nasantuan nga espirituna tapno mapasayaat ti aniaman nga abilidadtayo mainaig iti panagserbi. (Basaen ti Lucas 11:13.) Ti espiritu ti Dios tulonganna dagiti tattao nga agbalin a kualipikado para iti maysa nga annongen wenno pribilehio iti kongregasion aniaman ti nalikudan wenno kapadasanda. Kas pagarigan, kalpasan unay ti panagdaliasat ti Israel manipud Egipto, daytoy nga ili a buklen ti papastor ken ad-adipen ket tinulongan ti espiritu ti Dios a mangparmek kadagiti kabusorda uray awan kapadasanda iti pannakigubat. (Ex. 17:8-13) Di nagbayag, dayta met laeng nga espiritu ti nangtulong kada Bezalel ken Oholiab tapno maaramidda ti narikut ken ti impaltiing ti Dios a disenio ti tabernakulo.—Ex. 31:2-6; 35:30-35.
14 Dayta nga espiritu tinulonganna dagiti moderno-aldaw nga adipen ti Dios idi kasapulanda nga irugi ti panagimprentada tapno maipaayda ti kasapulan ti organisasion. Ti manangaywan idi iti pagimprentaan a ni Kabsat R. J. Martin inlawlawagna iti suratna no ania ti naibanag idi 1927. “Iti umiso a tiempo, linuktan ti Apo ti ruangan; ket impaayna kadakami ti dakkel a makina a pagimprenta, nupay awan a pulos ti ammomi no kasano a sangalen ken paandaren dayta. Ngem ammo ti Apo no kasanona nga ad-adda a pasiriben dagidiay mangar-aramid iti amin a kabaelanda agpaay kenkuana. . . . Iti sumagmamano laeng a lawas, napaandarmi ti makina; ken agan-andar pay laeng agingga ita, a makairingpas kadagiti bambanag a di ninamnama uray dagiti nangaramid iti dayta.” Agingga ita, bembendisionan ni Jehova dagiti kasta a napasnek a panagregget.
15. Kasano a makapabileg ti Roma 8:11 kadagidiay maipaspasango iti sulisog?
15 Agtigtignay ti espiritu ni Jehova iti nagduduma a pamay-an. Magun-od dayta ti amin nga adipen ti Dios, ken tulonganna ida a mangdaer kadagiti dakkel a lapped. Kasanon no mariknatayo a ditay kabaelan ti sulisog? Mapabilegtayo kadagiti sasao ni Pablo iti Roma 7:21, 25 ken 8:11. Wen, “ti espiritu daydiay nangibangon ken Jesus manipud kadagiti natay” kabaelannatayo a pabilgen a mangsaranget kadagiti tarigagay ti lasag. Nupay naiturong dayta a teksto kadagiti Kristiano a napulotan iti espiritu, agaplikar met ti prinsipiona iti amin nga adipen ti Dios. Magun-odtayo amin ti biag babaen ti panangipakita iti pammati ken Kristo, panagregget a mangparmek kadagiti di umiso a tarigagay, ken panagbiag maitunos iti panangiwanwan ti espiritu.
16. Ania ti masapul nga aramidentayo tapno magun-odtayo ti nasantuan nga espiritu ti Dios?
16 Manamnamatayo kadi nga ited ti Dios ti aktibo a puersana uray awan ti panagreggettayo? Saan. Malaksid iti panangikararag iti dayta, masapul a siaanep nga adalentayo ti naipaltiing a Sao ti Dios. (Prov. 2:1-6) Kanayonanna, agtigtignay ti espiritu ti Dios iti uneg ti kongregasion Kristiano. Ti regular a pannakigimongtayo ipakitana ti tarigagaytayo a ‘dumngeg iti kunaen ti espiritu kadagiti kongregasion.’ (Apoc. 3:6) Kanayonanna, sipapakumbaba nga iyaplikartayo ti maad-adaltayo. Balakadannatayo ti Proverbio 1:23: “Sumublikayo iti pannubngarko. Iti kasta pagburayokekto kadakayo ti espirituk.” Wen, ipaay ti Dios ti nasantuan nga espirituna “kadagidiay agtultulnog kenkuana kas agturay.”—Ara. 5:32.
17. Iti ania a mayarig ti panangbendision ti Dios iti panagreggettayo?
17 Nupay kasapulan ti napasnek a panagregget tapno magun-od ti bendision ti Dios, laglagipentayo a saan laeng a dayta ti makagapu iti aglaplapusanan a bendision ni Jehova iti ilina. No kasano a magunggonaan ti bagitayo kadagiti nasustansia a taraon, magunggonaantayo met iti panangbendision ni Jehova kadagiti panagreggettayo. Ti Dios diniseniona ti bagitayo iti pamay-an a matagiragsaktayo ti taraon ken magun-odtayo dagiti napateg a sustansiana. Ipapaayna pay ti taraon. Ditay naan-anay a matarusan no kasano a patauden ti taraon ti sustansiana, ken adu kadatayo ti saan a makailawlawag no kasano a mangpataud ti bagitayo kadagiti enerhia manipud iti taraon nga ipapaunegtayo. Ti ammotayo laeng ket epektibo dayta a proseso ken makitintinnulongtayo babaen iti pannangan. No mangantayo kadagiti nasustansia a taraon, nasaysayaat pay ti resultana. Umasping iti dayta, nangipasdek ni Jehova kadagiti pagannurotan no kasano a magun-od ti agnanayon a biag, ken tultulongannatayo a mangalagad kadagita a pagannurotan. Nalawag a dakkel ti maitultulongna kadatayo isu a maikari iti panangidayawtayo. Kaskasdi, masapul a makitinnulongtayo iti Dios, nga agtignaytayo maitunos iti pagayatanna tapno magun-odtayo ti bendision.—Hag. 2:18, 19.
18. Ania ti determinasionyo, ken apay?
18 Gapuna, sipapasnek nga itungpalyo ti aniaman nga annongenyo. Kanayon koma nga agpannuraykayo ken Jehova tapno agballigikayo. (Mar. 11:23, 24) Bayat nga ar-aramidenyo dayta, masiguradoyo a “tunggal maysa nga agsapsapul makasarak.” (Mat. 7:8) Dagiti napulotan iti espiritu magun-oddanto ti bendision a “korona ti biag” idiay langit. (Sant. 1:12) Dagiti “sabsabali a karnero” ni Kristo, a mangikagkagumaan a manggun-od iti bendision babaen ti bin-i ni Abraham, maragsakandanto a makangngeg Kenkuana nga agkuna: “Umaykayo, dakayo a binendisionan ni Amak, tawidenyo ti pagarian a naisagana kadakayo manipud iti pannakabangon ti lubong.” (Juan 10:16; Mat. 25:34) Wen, ‘dagidiay bembendisionan ti Dios tagikuaendanto ti daga, ket agtaengdanto nga agnanayon iti dayta.’—Sal. 37:22, 29.
Mailawlawagyo Kadi?
• Ania ti ramanen ti naimpusuan a panagtulnog?
• Ania ti kasapulan tapno magun-od ti bendision ti Dios?
• Kasanotayo a magun-od ti nasantuan nga espiritu ti Dios, ken kasano nga agtignay dayta maipaay kadatayo?
[Dagiti Ladawan iti panid 9]
Nakigubal ni Jacob iti maysa nga anghel tapno magun-odna ti bendision ni Jehova.
Kasta met kadi kapasnek ti panagreggetyo?
[Ladawan iti panid 10]
Ti nasantuan nga espiritu ti Dios ti nangtulong kada Bezalel ken Oholiab a nangibanag iti annongenda