Ni Jehova ti Soberano nga Apotayo!

“Iti Soberano nga Apo Jehova insaadko ti kamangko.”​—SAL. 73:28.

1. Ania ti agparang a tuktukoyen ni Pablo kadagiti sasaona iti 1 Corinto 7:31?

“TI BUYA daytoy a lubong [ket] agbaliwbaliw,” kinuna ni apostol Pablo. (1 Cor. 7:31) Agparang nga iyar-arigna ti lubong iti maysa nga entablado, a pakabuyaan kadagiti aktor iti nagduduma nga akem ken eksena iti maysa a drama.

2, 3. (a) Iti ania a mayasping ti pannakakarit ti kinasoberano ni Jehova? (b) Ania dagiti saludsod nga usigentayo?

² Adda nakapatpateg a drama a mapaspasamak ita​—ken karamankayo iti dayta! Nangnangruna a mainaig dayta iti pannakaalangon ti kinasoberano ni Jehova a Dios. Mabalin a mayilustrar daytoy a drama iti kasasaad ti maysa a pagilian. Adda lehitimo a gobierno a mangtagtaginayon iti kinaurnos. Ngem adda met maysa a sindikato a mangirakrakurak iti panagkusit, kinaranggas, ken pammapatay. Daytoy a dakes a grupo ket maysa a karit iti agturturay a gobierno ken subokenna ti kinasungdo ti amin nga umilina.

³ Umasping iti dayta ti kasasaad ti intero nga uniberso. Adda naisaad a lehitimo a gobierno ti “Soberano nga Apo Jehova.” (Sal. 71:5) Ngem agpegpeggad itan ti sangatauan gapu iti maysa nga ilegal nga organisasion nga iturturayan “daydiay nadangkes.” (1 Juan 5:19) Maysa dayta a karit iti gobierno ti Dios ken subokenna ti kinasungdo ti amin a tattao mainaig iti sapasap a turayna. Kasano a timmaud ti kasta a kasasaad? Apay nga impalubos ti Dios? Ania ti mabalintayo nga aramiden kas indibidual?

Dagiti Tampok ti Drama

4. Ania a dua nga agkanaig nga isyu ti nairaman iti mapaspasamak a sapasap a drama?

⁴ Adda dua nga agkanaig nga isyu a nairaman iti mapaspasamak a sapasap a drama: ti kinasoberano ni Jehova ken ti kinatarnaw ti tao. Iti Kasuratan, masansan a matukoy ni Jehova kas ti “Soberano nga Apo.” Kas pagarigan, inkanta ti salmista buyogen ti naan-anay a panagtalek iti Dios: “Iti Soberano nga Apo Jehova insaadko ti kamangko.” (Sal. 73:28) Ti “kinasoberano” ket tumukoy iti katan-okan a turay wenno pannakabalin. Ti maysa a soberano ti addaan iti kangatuan nga autoridad. Adda dagiti naimbag a rason nga ibilangtayo ni Jehova a Dios kas Daydiay Katan-okan.​—Dan. 7:22.

5. Apay a matignaytayo a mangitandudo iti kinasoberano ni Jehova?

⁵ Kas Namarsua, ni Jehova a Dios ti Soberano ditoy daga ken iti intero nga uniberso. (Basaen ti Apocalipsis 4:11.) Isu pay ti Ukom, Manangted-paglintegan, ken Aritayo. (Isa. 33:22) Yantangay utangtayo ti biagtayo iti Dios ken agpannuraytayo kenkuana, rumbeng laeng nga isu ti ibilangtayo kas Soberano nga Apotayo. Matignaytayo a mangitandudo iti natan-ok a saadna no silalagiptayo a “ni met laeng Jehova impasdekna a sititibker ti tronona iti mismo a langlangit; ket ti bukodna a kinaari nangdominar iti ngatuen ti isuamin.”​—Sal. 103:19; Ara. 4:24.

6. Ania ti kinatarnaw?

⁶ Tapno maitandudotayo ti kinasoberano ni Jehova, masapul nga agtalinaedtayo a natarnaw kenkuana. Ti “kinatarnaw” ket naan-anay a kinadalus iti moral. Ti maysa a natarnaw ket awan pakapilawanna ken nalinteg. Kasta ni patriarka a Job.​—Job 1:1.

No Kasano a Nangrugi ti Drama

7, 8. Kasano a kinarit ni Satanas ti kalintegan ni Jehova a mangituray?

⁷ Nasurok nga 6,000 a tawenen ti napalabas, maysa nga espiritu a parsua ti nangkarit iti kalintegan ni Jehova a mangituray. Babaen iti sao ken aramid, impakitana a kayatna nga isu ti pagdayawan. Sinugsoganna ti umuna a pagassawaan a da Adan ken Eva nga agrebelde iti kinasoberano ti Dios ken pinadasna a mulitan ti nagan ni Jehova babaen ti panangibagana nga Isu ket nagulbod. (Basaen ti Genesis 3:1-5.) Dayta a rebelde ti nagbalin a kangrunaan a Kabusor, Satanas (Bumusbusor), Diablo (Mammardaya), serpiente (manangallilaw), ken dragon (manangalun-on).​—Apoc. 12:9.

⁸ Nakirinnibal ni Satanas iti turay ti Dios. Kasano a tinaming ti Soberano nga Apo Jehova daytoy a karit? Dinadaelna kadi a dagus dagiti tallo a rebelde​—da Satanas, Adan, ken Eva? Sigurado a kabaelanna nga aramiden dayta, iti kasta, marisut ti isyu no asino ti mannakabalin-amin. Ken mapaneknekan met a pudno ti kinuna ni Jehova maipapan iti dusa iti asinoman a manglabsing iti lintegna. Ngem apay a saan a kasta ti inaramid ti Dios?

9. Ania ti kinuestionaran ni Satanas?

⁹ Babaen ti panagulbod ken panangisungsongna kada Adan ken Eva nga agrebelde iti Dios, kinuestionaran ni Satanas ti kalintegan ni Jehova a mangikalikagum iti panagtulnog ti sangatauan. Kanayonanna, babaen ti panangsugsogna iti umuna a pareha nga agsukir iti Dios, kinuestionaran met ni Satanas ti kinasungdo ti amin nga intelehente a parsua. Kas ipalgak ti kaso ni Job, a maysa a nasungdo iti kinasoberano ni Jehova, kinuna ni Satanas a kabaelanna nga itallikud ti amin a tao manipud iti Dios.​—Job 2:1-5.

10. Imbes a dagus a pasingkedan ti Dios ti kinasoberanona, ania ti impalubosna?

¹⁰ Imbes a dagus a pasingkedan ni Jehova ti kinasoberanona, inikkanna ni Satanas iti tiempo a mangpaneknek iti pammabasolna. Malaksid iti dayta, inikkanna dagiti tattao iti gundaway a mangipakita iti kinasungdoda iti kinasoberanona. Ania ti napasamak kadagiti naglabas a siglo? Nakaipasdek ni Satanas iti nabileg nga ilegal nga organisasion. Inton agangay, ni Jehova dadaelenna dayta agraman ti Diablo. Iti kasta, naan-anay a mapaneknekan a ti Dios ti addaan kalintegan a mangituray. Sigurado ni Jehova a positibo ti pagbanagan ti bambanag isu nga impadtona dayta apaman a napasamak ti panagrebelde idiay Eden.​—Gen. 3:15.

11. Ania ti inaramid ti adu a tattao mainaig iti kinasoberano ni Jehova?

¹¹ Adu a tattao ti nangipakita iti pammatida ken nangsalimetmet iti kinatarnawda iti kinasoberano ni Jehova ken iti pannakasantipikar ti naganna. Karaman kadagita da Abel, Enoc, Noe, Abraham, Sara, Moises, Ruth, David, Jesus, dagiti nagkauna nga adalan ni Kristo, ken ti minilion a natarnaw a tattao ita. Dagita a mangitantandudo iti kinasoberano ti Dios makiramramanda iti panangpaneknek nga ulbod ni Satanas ken iti panangdalus iti nagan ni Jehova a minulitan ti Diablo babaen ti panangipannakkelna a kabaelanna a pagtallikuden ti sangatauan manipud iti Dios.​—Prov. 27:11.

Sigurado ti Pagbanaganna

12. Kasano a masiguradotayo a saan nga ipalubos ti Dios nga agtultuloy ti kinadakes?

¹² Masiguradotayo a dandanin patalgedan ni Jehova ti kinasoberanona. Dina panuynoyan nga agtultuloy ti kinadakes, ken ammotayo nga agbibiagtayon iti maudi nga al-aldaw. Dinadael ni Jehova dagiti nadangkes idi Layus. Dinadaelna ti Sodoma ken Gomorra, kasta met ni Faraon ken ti buyotna. Uray ni Sisera ken ti buyotna, agraman ni Senaquerib ken dagiti Asirio a buyotna, dida nagballigi maibusor iti Kangatuan. (Gen. 7:1, 23; 19:24, 25; Ex. 14:30, 31; Uk. 4:15, 16; 2 Ar. 19:35, 36) Gapuna, makapagtalektayo a ni Jehova a Dios dina ipalubos nga agtultuloy ti pannakaumsi ti naganna ken ti pannakamaltrato dagiti Saksina. Kanayonanna, makitkitatayon ti pagilasinan ti kaadda ni Jesus ken ti panungpalan daytoy dakes a sistema ti bambanag.​—Mat. 24:3.

13. Ania ti aramidentayo tapno ditay mairaman kadagiti kabusor ni Jehova a madadael?

¹³ Tapno ditay mairaman kadagiti kabusor ti Dios a madadael, masapul a nasungdotayo iti kinasoberano ni Jehova. Kasano a maaramidtayo dayta? Babaen ti panagtalinaedtayo a naisina iti dakes a turay ni Satanas ken ti saan nga itutulok iti pammutbuteng dagiti buyotna. (Isa. 52:11; Juan 17:16; Ara. 5:29) No aramidentayo dagita, maalangontayo ti kinasoberano ti nailangitan nga Amatayo ken maaddaantayo iti namnama a maispal inton dalusan ni Jehova ti naganna manipud iti pannakaumsi ken iparangarangna nga isu ti Soberano iti Uniberso.

14. Ania ti ipalgak ti nagduduma a paset ti Biblia?

¹⁴ Nailanad iti intero a Biblia dagiti detalye mainaig iti sangatauan ken iti kinasoberano ni Jehova. Ti umuna a tallo a kapitulo dakamatenna ti maipapan iti panamarsua ken ti panagbasol ti tao, idinto ta ti maudi a tallo a kapitulo salaysayenna ti pannakaisubli ti sangatauan iti kinaperpekto. Nailanad iti dadduma pay a paset ti Biblia dagiti detalye maipapan kadagiti addang nga inaramid ti Soberano nga Apo Jehova tapno maibanagna ti panggepna agpaay iti sangatauan, daga, ken uniberso. Ipakita ti Genesis no kasano a timmaud ni Satanas ken ti kinadakes iti lubong, ket ti maudi a paset ti Apocalipsis ipalgakna no kasano nga agpatingga ti kinadakes, madadael ti Diablo, ken maaramid ti pagayatan ti Dios ditoy daga a kas idiay langit. Kinapudnona, ipalgak ti Biblia ti nakaigapuan ti basol ken ipapatay ken ipakitana no kasano a maikkat dagita ditoy daga ken masukatan iti naruay a rag-o ken agnanayon a biag para kadagiti natarnaw a tattao.

15. Ania ti masapul nga aramidentayo tapno magunggonaantayo a mismo inton agpatingga ti drama mainaig iti kinasoberano?

¹⁵ Iti mabiiten, naan-anayton nga agbaliw ti eksena daytoy a lubong. Agpatingganton ti nabayagen a drama mainaig ti kinasoberano. Maikkatton ni Satanas iti eksena nga agturong iti pannakadadael, ket sigurado a matungpalton ti pagayatan ti Dios. Ngem tapno magunggonaantayo iti daytoy ken masagraptayo ti adu a bendision nga impadto ti Sao ti Dios, masapul nga itandudotayo itan ti kinasoberano ni Jehova. Ditay mabalin ti agtalinaed a neutral. Masapul nga agtalinaedtayo iti dasig ti Dios tapno maikunatayo: “Ni Jehova adda iti dasigko.”​—Sal. 118:6, 7.

Makapagtalinaedtayo a Natarnaw!

16. Apay a masiguradotayo a kabaelan ti tao ti agtalinaed a natarnaw iti Dios?

¹⁶ Kabaelantayo nga itandudo ti kinasoberano ni Jehova ken agtalinaed a natarnaw yantangay insurat ni apostol Pablo: “Awan ti sulisog a nangkemmeg kadakayo malaksid iti kadawyan kadagiti tattao. Ngem ti Dios matalek, ket saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.” (1 Cor. 10:13) Ania ti pagtaudan ti sulisog a dinakamat ni Pablo, ken kasano nga isagana ti Dios ti dalan a pagruarantayo?

17-19. (a) Ania a sulisog ti di napagballigian dagiti Israelita idiay let-ang? (b) Apay a kabaelantayo ti agtalinaed a natarnaw ken Jehova?

¹⁷ Kas ipakita ti napasamak kadagiti Israelita idiay let-ang, ti “sulisog” ket agtaud kadagiti kasasaad a mangituggod kadatayo a manglabsing iti linteg ti Dios. (Basaen ti 1 Corinto 10:6-10.) Kabaelan koma idi dagiti Israelita a sarangten dagiti sulisog, ngem tinarigagayanda dagiti “makadangran a bambanag” idi simimilagro nga impaayan ida ni Jehova iti pugo a pagtaraonda iti makabulan. Nupay medio nabayag a dida nakaraman iti karne, impaayan met ida ti Dios iti umdas a manna a pagtaraonda. Kaskasdi, timmulokda iti sulisog gapu iti nalabes a kinaagumda idi nagurnongda iti pugo.​—Num. 11:19, 20, 31-35.

¹⁸ Sakbay dayta, bayat nga adda ni Moises iti Bantay Sinai tapno awatenna ti Linteg, natnag dagiti Israelita iti idolatria ta nakiramanda iti panagdayaw iti baka ken nalulok a ragragsak. Gapu ta awan daydiay mangidadaulo kadakuada, timmulokda iti dayta a sulisog. (Ex. 32:1, 6) Sakbay unay ti iseserrekda iti Naikari a Daga, rinibu nga Israelita ti nakaaramid iti seksual nga imoralidad gapu ta nagargarida kadagiti Moabita. Iti dayta a gundaway, rinibu nga Israelita ti natay gapu iti naaramidda a basol. (Num. 25:1, 9) Adda dagiti gundaway a timmulok dagiti Israelita iti pagannayasan nga agreklamo, kas iti naminsan a nagsaoda maibusor ken ni Moises ken iti Dios a mismo! (Num. 21:5) Nagtanabutobda pay ketdi idi nadadael dagiti nadangkes a da Kora, Datan, Abiram, ken dagiti kakaduada, a sibibiddut nga inrasonda a saan a nainkalintegan ti pannakapapatay dagita a rebelde. Kas resultana, 14,700 nga Israelita ti natay gapu iti saplit nga impagteng ti Dios.​—Num. 16:41, 49.

¹⁹ Saan a karkarna dagita a sulisog tapno saan a kabaelan a sarangten dagiti Israelita. Ngem timmulokda iti sulisog gapu ta napukawda ti pammatida ken nalipatanda ni Jehova, ti naayat a panangaywanna kadakuada, ken ti kinalinteg ti daldalanna. Kas kadagiti Israelita, dagiti sulisog a pakaipaspasanguantayo ket gagangay a mapaspasaran dagiti tattao. No ikagumaantayo a sarangten dagita ken agpannuraytayo iti tulong ti Dios, makapagtalinaedtayo a natarnaw. Siguradotayo iti daytoy gapu ta “ti Dios matalek” ken saanna nga ipalubos a ‘masulisogtayo iti labes ti kabaelantayo nga itured.’ Dinatay pulos baybay-an ni Jehova a maipasango kadagiti situasion a mamagbalin nga imposible kadatayo a mangaramid iti pagayatanna.​—Sal. 94:14.

20, 21. No masulisogtayo, kasano a mangisagana ti Dios iti “dalan a pagruaran”?

²⁰ Luktan ni Jehova ti “dalan a pagruaran” babaen ti panangpabilegna kadatayo a mangsaranget iti sulisog. Kas pagarigan, mabalin a dangrandatayo dagiti manangidadanes tapno tallikudantayo ti pammatitayo. Gapu iti kasta a pannakatrato, mabalin a masulisogtayo nga agkompromiso tapno maliklikantayo ti kanayonan a pannakababaut, pannakatuok, wenno posible nga ipapatay. Ngem maibatay iti naipaltiing a pammatalged ni Pablo iti 1 Corinto 10:13, ammotayo a temporario laeng ti makasulisog a situasion. Saan nga ipalubos ni Jehova nga agtalinaed dayta agingga iti punto a ditayon kabaelan ti agtalinaed a matalek kenkuana. Kabaelan ti Dios a parayrayen ti pammatitayo ken ipaayannatayo iti bileg a kasapulantayo tapno makapagtalinaedtayo a natarnaw.

²¹ Sarsaranayennatayo ni Jehova babaen ti nasantuan nga espirituna. Dayta nga espiritu ipalagipna pay kadatayo dagiti Nainkasuratan a sasao a kasapulantayo tapno masarangettayo ti sulisog. (Juan 14:26) Iti kasta, ditay maallilaw a magna iti di umiso a dana. Kas pagarigan, ammotayo dagiti nainaig nga isyu maipapan iti kinasoberano ni Jehova ken iti kinatarnaw ti tao. Gapu iti dayta a pannakaammo ken iti tulong ti Dios, adu ti nakapagtalinaed a matalek agingga ken patay. Ngem saan a ti ipapatayda ti nagbalin a ‘dalan a pagruaranda’ no di ket ti tulong ni Jehova. Iti kasta, nakapagibturda ken dida timmulok iti sulisog agingga iti panungpalan ti biagda. Kasta met ti aramiden ni Jehova kadatayo. Kinapudnona, us-usarenna met dagiti matalek nga anghelna a tumulong kadatayo. Kas publiko nga adipen ‘naibaonda tapno agserbida kadagidiay agtawid iti pannakaisalakan.’ (Heb. 1:14) Kas ipakita ti sumaganad nga artikulo, dagidiay laeng natarnaw ti addaan iti namnama a mangtagiragsak iti pribilehio a mangitandudo iti kinasoberano ti Dios iti agnanayon. Mabalin a maysatayo kadakuada no agtalinaedtayo iti dasig ni Jehova kas Soberano nga Apotayo.

Ania ti Sungbatyo?

• Apay a rumbeng nga ibilangtayo ni Jehova kas Soberano nga Apotayo?

• Ania ti kaipapanan ti panagtalinaed a natarnaw iti Dios?

• Kasanotayo nga ammo a mabiiten a pasingkedan ni Jehova ti kinasoberanona?

• Sigun iti 1 Corinto 10:13, apay a posible a masalimetmetantayo ti kinatarnawtayo?

[Ladawan iti panid 24]

Sinugsogan ni Satanas da Adan ken Eva nga agsukir ken Jehova

[Ladawan iti panid 26]

Determinadotayo koma a mangitandudo iti kinasoberano ni Jehova