Dinungdungngo ti Dios ken Dagiti Gagayyemna

AWAN ti makaammo iti naganna agingga ita. Ti laeng ammotayo ita ket ti nagan ni tatangna a Jefte. Basaentayo ti Biblia ken ammuentayo no ania ti masursurotayo maipapan kadakuada. Maammuantayo a ti balasang ni Jefte ket dinungdungngo ti Dios ken dagiti gagayyemna.

Ti salaysay maipapan ken Jefte ken ti balasangna ket mabasatayo iti Biblia, iti Uk-ukom kapitulo 11. Yantangay ni Jefte ket maysa a matalek nga adipen ti Dios, regular la ketdi nga inlawlawagna ti Kasuratan iti balasangna.

Nagbiag ni Jefte iti tiempo sakbay a ti ili ti Dios nga Israel ket nagkiddaw iti ari a mangituray kadakuada. Ni Jefte ket maysa a nabileg a lalaki a nalaing a makigubat. Gapuna, kiniddaw dagiti Israelita nga isu ti mangidaulo kadakuada a makigubat kadagiti Ammonita, maysa a nasion iti asidegda a manggubgubat kadakuada.

Kayat ni Jefte ti agpatulong iti Dios tapno maparmekna dagiti Ammonita, isu a nangaramid iti maysa a kari. Kinuna ni Jefte a no ipaay ni Jehova dayta a panagballigi, itedna ken Jehova daydiay umuna a rummuar iti balayna inton agawid. Tungpal-biag nga agserbi dayta a tao iti tabernakulo ti Dios​—ti lugar a pagdaydayawan idi dagiti tattao iti Dios. Ammoyo kadi no siasino ti immuna a rimmuar?​—a

Wen, ti balasang ni Jefte​—ti kakaisuna nga anakna! Kasta unay ti ladingit ni Jefte. Ngem nagkarin ken Jehova ket rumbeng a tungpalenna dayta. Dagus a kinuna ti anakna: “Amak, no linuktam ti ngiwatmo ken Jehova, aramidem kaniak ti maitunos iti rimmuar iti ngiwatmo.” Kalpasanna, kiniddawna a makapagmaymaysa iti dua a bulan tapno makapan agsangit iti bambantay. Apay a naladingitan? Gapu ta ti panangtungpalna iti kari ni amana kaipapananna a mapukawna ti karbenganna a mangasawa ken maaddaan iti annak. Nupay kasta, saan a ti tarigagayna ti kapatgan kenkuana. Kayatna ti agtulnog iti amana ken agbalin a nasungdo ken Jehova. Iti panagkunayo, naparagsakna ngata ni Jehova ken ni amana?​—

Gapuna, impalubos ni Jefte a pumanaw ti anakna iti dua a bulan a kadua dagiti gagayyemna a babbalasang. Idi nagsubli, tinungpal ni amana ti karina ket imbaonna ti anakna iti tabernakulo ti Dios idiay Silo tapno agserbi sadiay iti unos ti panagbiagna. Dagiti babbalasang ti Israel tinawen a mapanda idiay Silo tapno paregtaenda ti anak ni Jefte.

Adda kadi am-ammoyo nga agtutubo a natulnog kadagiti nagannakda ken ay-ayatenda ni Jehova?​— Nasayaat a maam-ammoyo ida ken makigayyemkayo kadakuada. No tuladenyo ti anak ni Jefte ket agbalinkayo met a natulnog ken nasungdo, maaddaankayo kadagiti nasayaat a gagayyem. Maparagsakyo dagiti dadakkelyo, ken dungdunguennakayo met ni Jehova.